كام يجر براسي ويصم ايده ويضربني 

همت عليه عمتي تريد تجرني تخلصني من بين اديه لازم بيه جني عدوته ويكلي : يطلعلج صوت يالمطلكة رجل ما عرفتي تحوي ضليتي داييييييييحة بالشوارع ساااقطة 

اجر بروحي عنه وابجي واتصايح وياه 

ركض عمي على صياحنا ووكف كدامه وجرني منه وكام يصيح : انا يمتى افتك منكم ، طلعت روحي من مصايبكم جاي هنا لا الك عونة الها ولا تشيل عنها بس صاير زلمة بروسنا انت دامش امش ولي انكلع منا من انعل ابوكم لابو اليوم البزر هالبزرية هاي الطايح حظها 

كام يتصايح ويا عمي ويكله : وانت مديحها بالشوارع شني رايد فضيحتنا من تهرم لو تسويلها مكسورة ما بكولون اخت جعفر وحيدر ما يذبون بلاويها بروسنا 

زمخ بيه عمي : امشي ابن الكلب مديحها شنو كوا* اني بت جاي تشتغل وتكد على روحها انت ياهو مالتك مو ذبيتها علي واتبريت منها جاي لجيتي تحاسبني المضبع 

-شيصير ما يصير وياها انت المسؤل عنها والله لا اكلب الدنيا 

راد عمي يهد عليه كامت عمي تلزم بيه 

وجعفر لزم الباب ومشى .. واني رحت لغرفتي اجا وراي عمي 

انت ما تستحين ما تكفين مشاكل ما تملين ولج كافي ماكو احد حملج 

لا رجل حملج لا اخو لا اهل كلها ذبتج وبعدج حديد ما تردين الخووووثة 

-واني شسويتله بس طبيت تلكاني بالغلط والرزايل 

-اكعدي استجني بالبيت اكعدي 

-واذا اكعد منو ينطيني منو يكلي هاج 

بطل عصير من اطلبه منك تكلي اطيني فلوسه 

لو كعدت وذبيت حملي عليك تحملني لو هم تلزمني الباب 

-اني الما حاملج ولج اني الحارع المر منج ولج انت مال ذب/ ح والله مو مال احترام اليوم لا ما اكصبج ما يبردلي دم 

وعمتي تجر بيه وهو يريد يجيني 

وهدى واكفة تباوع ومرت رسول نزلت من بيتها فوك هم واكفة والجهال 

وهو يصيح ويريد يكتلني .. 

اندك الباب ... 

والصياح واصل لذاك الصوب .. ركض سويسو يفتح الباب 

وعمتي جرت عمي دخلته للدكان وهي تصيح : الله والاحد مرة ما خلصانة منكم شحجت هي شو النكس تولاها من اول ما طبت لحد ما طلع وانت فوكاه اطلكت شلون بالله تموووت .. 

يا صبا عسى قسمتج اليوم كبل باجر ناخية الحسين الشهيد اليخلصج من هالذياب ذول .. برا مو اهل دكول عدوان لا ولا حد بيكم منطيها لا بعيد مشتريلها ولا ابرد ذاكرينها وبس صياحكم فوكها جيفكم زلم وهي مرة 

شهالعيشة الكشرها هاي من امدا حظج اي والله . 

حجت وراحت للحمام طبت .. 

واني كاعدة ابجي بمكاني وكفت مرت يوسف : ميخالف اتحملي شتسوين اتعرفين عمي وعصبيته بس من حركة كلبه عليج والله لا تضوجين . 

- ولج تعبت والله لو طالعة اتونس اكول خوش 

رحت اودي الشحاطة للزلمة ومريت لوفاء انطيتها الهدوم ورجعت 

وكتله وطلعت بعلمه وما بطيت لزموني على غدا وما صليت لان وصاني ما ابطي عدهم تالي بس الرزايل ماكلتها 

-ميخالف يا اختي كولي يا الله كومي اغسلي وجهج 

طب سويسو : صبا جدي يكول خل تطلع حازم اجا 

-يا حازم ؟ 

-ابو الأنشائية جاي علمود السكيفة ماتج 

-ها اي 

كمت للمغسلة اغسل .. 

عمي دخله عسباله طبيت 

من شافني الرجال :العفو 

ودنك 

كاله عمي : فوت بويه فوت .. 

امشي منا انت 

صرت على صفحة فات للغرفة 

اني كملت غسل اباوع الصفحة مال عيني اليمنى ازركت من ضربة جعفر 

صم ايده ولخني على وجهي تكول عدوته وعنده ثار وياي مو اخته . 

نشفت وجهي وعدلت حجابي 

طلع عمي : اكربي لمي الهدوم خلي الزلمة يقيس فضيها 

-بس اطيني عباتي من الغرفة 

-واني وين اندل عباتج بت الاوادم 

هميت اريد امشي للغرفة طلع منها الرجال ابو الشحاطة 

صد وجهي بوجهه ودنكت وصرت ورا عمي 

وهو كال : المعذرة 

ومشى طلع وكف لهناك اني فتت جريت عباتي لبستها وشلت الغراض كفيتهن كلهن ودنيت الميز 

طلعت كتله : لعمي كفيتهن

عمي ماكو بس الرجال مدنك ع العدة مال الدرنفيس والبلايس وهالامور ديطلع الفيتة .. وسويسو واكف يمه 

حجيت : جا عمي وين راح 

سويسو :-بس صاحو للدكان واني ما اعرف وين اليريدونه

كام هو كال : بس هاي الغرفة مو 

- اي 

- اكو درج لو ما عدكم 

- عد بيت يوسف سويسو روح جيبه بسرعة 

ركض سويسو وهو واكف ، همس : هاي غرفتج !؟ 

- اي والله وامس كامت تخر مي اضطريت انام بالدكان 

- الله يعينج هسه اسويلجياه ما اخليلج ولا قطرة تفوت 

- بس كم مترة قستها ؟

- تقريبا ١٥ مترة تحتاج اطبكهن واكبسهن وادكهن خاطر ما يعبرن ويصيرن اقوى بعد تنسين ماكو لا سكف يعبر مي ولا هم يحزنون ترتاحين 

-يا وبيش تحسبهن عليّ ذن ال١٥ ؟ 

-هسه سهلة خل اكملها وسهلة 

-يطيك العافية كون بجاه علي 

-الله يسترج خوية 

كاعد نحجي اجت عمتي : ها سواه 

- بس منتضر الدرج راح يجيبه سويسو 

اشرتلي على وجهي وغمزتلي عود فوتي 

: روحي سويله جاي للزلمة يمه ، غدي خاف ما متغدي 

متغدي عليك العباس 

-لا الف عافية ماكل كبل شوية 

-عليك الحسين خاف ما متغدي 

-اتريك متأخر والله بيت العامر ، بس جاي اذا اسوي عليج زحمة ويا الجكارة 

-رحمة تدلل 

رحت للمطبخ حطيت قوري الجاي .. وحطيتله هيل سويته خوش جاي 

سمعت صوت رسول اجا وكف ويا الزلمة 

زدت الاستكاين سويتهن اثنين 

صبيت واخذتهن 

اتناوشها من ايدي رسول 

والرجال كال : اي والله رحم الله والديچ 

مشيت ويا عمتي للدوانية 

وكفت اصلي كملت فرضي وكعدت اسبح حجيت ويا عمتي : جعفر شنهو جيته ليجاي 

-عمج ودا عليه رايد منه فلوس مال عشيرة صاير عدهم فصل مادري شنهو والله ما ادري هل اجا خاطر ينطي العمج 

- مو اكول قابل جاي عليه لو رايد يعرف شحالي وشمحتاجة 

- عمة اتجرعي واسكتي لا تعاتبين ولا تحجين 

اتعبين واشبعين مغمة لو ضليتي تتنطرين من احد 

- عمه اني لا ناطرة ولا رايدة من احد بس هضيمة لا حاويني لا صارف علي لا سائل عني لا يدري بيه شوفت عينج الغرب تتفرعلي ويجي يحجي معلك ويرزل لان طالعة واني طلعت اتونس لو رايحتلي بشغلة ؟ 

-ميخالف عمة اجرعي واسكتي كليله امرك وعدي وامشي داري عنج كاعد وياج هو بس يدورلج الزلة بلكت تحجين خاطر يطلع مراجله من عمت عينه 

وكف عمي : شني اليوم ما نتغدا متنا من الجوع 

عمتي : والزلمة كضى خاطر نصب ؟ 

-هسه ياهو مالتنا بالزلمة كاعد يشتغل شغله شلون بالله احنا نموت جوع جيف كاعد يشتغل ؟ 

-لا بس زحمة شلون نشيل الصينية كدامه وما نحطله 

- اي صبوله صينية صعبة دكوووموا 

-كومي عمة صبي العمج يلا واصبري وذبي حملج على ربج ما ينساله عبد ولا يضيعله اجر صابر كلشي يمه محسوب ويجازي ويعوض 

- الله كريم عمه والنعم بالله ، اكوم اصبن لعمي 

رحت صبيت صينية لرسول والزلمة وصحت لرسول اخذها 

واخذت الصينية اني وعمي وصحت على سويسو كتله: بس انده لمرت عمك هدى خل تجي تتغدا 

حطيتها واجا وراي يكول : عمتي تكول ما تريد 

اتغدينا اني وعمي وعمتي وداليا بت يوسف ابن عمي 

عازل فوك هو ومرته وجهاله 

عنده ثلث جهال 

سويسو اسمه سيف ندلعه سويسو 

وداليا .. وحنين 

ومرته اسمها ميلاد 

زينة وخوش مرة بس من تصف ويا هدى تخرب .. 

بس هي انعزالية نادرا ما تنزل جوا لو تختلط ويانا كل وكتها فوك تاكل تشرب 

وعرك هدى وياها وويا عمتي 

جيف سويسو و داليا دومهم جوا وامهم فوك 

تكول تذب جهالها وترتاح واحنا نبتلي بهوستهم 

بس هم الجهال ينزلون علمود جدهم وجدتهم 

وعمي ما يكدر بدون سويسو لازمه صخرة النهار كله 

رسول عنده اثنين جهال بس صغار 

الاول علي والثانية فاطمة 

اعمارهم ٥ و سنتين 

هدى تريد تعزل .. بس رسول ما يرضى 

يكللها هو منو اكو غير امي وابوي .. نعزل اكلنا ويضلون يطبخون لرواحهم .. ما عاجبها الوضع هنا 

والاثنين ما عدهم يطلعون بيت لوحدهم .. هالكاعدين ابيت اهلهم رغم المشاكل . 

شلت الصينية ورحت للمطبخ 

لكيت الرجال جاي ينزل .. فتت للمطبخ بسرعة 

نظفت المواعين وغسلت المطبخ ومسحته .. صاحلي رسول 

كال : تعاي شوفي صارت لوز 

- يطيه العافية خطية تعب شكد راد 

- والله راح بدون ما يطلب كال تأخرت والبيت منتظرني حتى غدا ما رضى يتغدا 

- يعني ما اخذ فلوس 

- لا والله كتله كال نتحاسب بعدين خل اطلع اتأخرت 

- خطية الله ينطي العافية ويستر عليه وعلى اهل بيته بجاه الزهرة الزجية لو ما متعني وجاي جان ضلت السكيفة هاي ضلتها 

- اها جا انا مو كتلج اسويها 

- خوية انت تسوي مو ما تسوي بس لو ضالة عليك بحيل الله اذا اذا شديت حيلك الشتوية الجاية تسويها 

ضحك : يعابيج العباس تعيبين علي ولج 

- جا احجي الصدك قابل جذب كلشي عندك بعدين وفد شوية 

كام يضحك  طلعت مرته وهو وكعد للصينية ياكل 

كالتله : اريد اروح لاهلي 

- شنهي ما صالج اسبوع من اجيتي يومية هي ؟ 

- اي يومية تعبت اختنكت هنا اخذني 

- شكو 

- سلامتك اني ما اريد اضل هنا 

- غير اعرف شبيج 

- كاعد وتتكهكة ويا بت عمك ولا اجيت ولا مريت للغرفة والله كاطع كلبك تسويلها السكيفة 

- هاي شمالج انت مسودنة غير الغرفة خرت عليه امس وسواها الرجال حتى مو انا شلون اعيفه وحده وهو ابيتنا ؟ 

- والله تعوفه ما تعوفه مالي غرض يا اني يا بت عمك بالبيت 

- شني وصبا شلها علاقة شمسويتلج 

حجيت : خية شمالج كاربتج اني حاجية وياج من الصبح احاجيج ما تحاجيني وهسه كاعدة اطردين بيه شعندج وياي 

- من ادكدكين البيبان الصبح والناس نايمة ما استحيتي من طلعلج بطرك الباسه  ؟ 

- يا واني شنهي معجبه بالباسه انت شو ما تعرفين تحجي طلبت الخب وهو ورا الباب ما طلعلي 

- اي هو استحى وانت ما استحيتي تتصيدين من الفجريات اتدكدكين بلكي يطلعلج مصله بطرك اللباس ويكلبج 

رسول : هسه عركتج وهوستج هاي على الباسي ؟ صدك جذب انت مسودنة ؟ شگل للوادم اتعاركنا علمود الباس خب استحي وطبي طبي 

- لا والله ما اطب 

طلعت عمتي : خير هدى صوتج وصال لذاك الصوب شصاير 

كامت تصيح وتبجي 

وطلع عمي كام يتصايح ورجع عليه 

وبلاويج ما تكضي والله يفكني منج 

اجرج من جعفر تتعاركين ويا هدى شلون وياج انت 

طركاعة وطحتي على راسي شيخلصني منج والله لو ما عيب من الناس لا اذبج بالشارع وانعل والديج 

طبيت لغرفتي اسمع صياحه ومعايره وغلطه 

ودموعي تجري .. عفت هوستهم ما طلعت ابد .. 

كمت رتبت الغرفة ورجعت كلشي لمكانه .. وكعدت اكمل خياطة بس دموعي ما نشفن ع الهظيمة الاني بيها . 

لا الي مكان اولي له 

لا اهل لا اخوة بيهم خير لا خوات بيوتهن عامرة والتجئ الهن 

حالي بس الله يعلم بيه .. 

طبت عمتي كالت : لا تضوجين يمه والله من حركة كلبه يحجي هيج .. اتحملي 

- متحملة عمة من عساني لا اتحملت وطكيت ومتت اقلها اروح لهيلتي هناك يم الخلفوني انكبر يمهم اخير ما ضالة هاي ضلتي عالة ع الكل . 

- لا عالة شنهي قابل مطيج احنا لو شايلج فوك روسنا شو كاعدة بهالكورة ومالج حس .

كامت تمسح على راسي ومشت واني اعدل بالثوب اخيط 

عفت من ايدي .. وباوعت وراها 

انفجرت من البجي ودنكت راسي ع المكينة هالكثر بجيت. 

لحد ما خويت واني ما نايمة بالليل زين وكاعدة من الفجر 

نزلت لدوشكي واخذتلي غفوة ساعة وشوية وكعدت راسي ثكلان من البجي 

النوم مو الي هم هيج وما متحمليني مو انوب اكل وانام 

كمت نظفت الدوانية اليكعدون بيها عمي وعمتي ومحت الميز والتلفزيون .. ذبيت بتيتة سلك ع النار وطلعت غسلت الممر والحوش والمغسلة اللي اباحة الدرج ومسحت المرايا .. لحد ما خليت البيت كله يلمع ، طفيت البيتيته للعشا 

رجعت كملت خياط .

خلصت خياط ثوب واحد وايدي بعد ما كامت تاخذ احس مالي خلك .. دگ تليفوني خابرتني وفاء .. رديت 

- الو 

- ها اصبية وينج ام الدهاير 

- بنص الخير كولي 

- اطلعيلي من الخير شوية وتعاي عاونيني عدي اثنين يردن حفافة وبيدي وحدة كاعد اميشلها فدوة استعجليلي 

- خل اشوفن عمي واجيج 

كمت رحت لعمي بالدكان 

كتله : عمي 

صاح : ها 

- وفاء خابرتني اعاونها بالشغل 

- يا وفاء هاي 

- بت بيت ابو اسعد 

- ها .. روحي بس لا تبطين 

- ساعتين اكضي وياها شغل وارد 

- ديلا امشي ، بس عشا ما سويتي مرت رسول مطنكرة وانت طالعة شناكل حو ؟ 

- بعيني هسه اسويلك اطيب اكل تامرني امر 

ركضت للمطبخ حطيت طاريت كصصت بصل حطيت بالطاوتين وقوري الجاي وكصصت بتيته حطيته على طاوة وطماطة ع الطاوة الثانية وزلاطة كفيت العشا بربع ساعة وحطيته بصينية وحطيته بالدوانية كدام عمتي وصحت لعمي وطلعت . 

دخلت كالت : تأخرتي 

- شسوي بين ما اسكت حلك عمي 

- هاي شبيه وجهج ياهو الطاكج ؟ 

- ياهو ؟ ها .. هاي .. اي 

ولج غير كاعد انظف العصرية والبالي يچرخ بمصايب الدنيا واندهرت مدنجة امسح واكوم ما احس الا والشباك راد على وجهي .. طير نص وجهي خاف ناقصني ضيم يكملها عليّ. 

ضلت تباوع علي ما مصدگة كلامي : اي يلا هم زين اجت على هيج ما طفت عينج لو صار بيج شي 

- ما يصير بيه شي لا تخافين حديد ما طول الضيم وراي . 

ضحكت :- دشتغلي هاي المرة صارلها ساعة منتظرتج 

- اي هلا .. يلا 

كعدت احف المرة والتلفزيون مشتغل 

طالع مسلسل نور ومهند وهن متخبلات ع المسلسلة جيف البطل حلو 

اندمجت وياهن بس صدك مضروب الچلوة حلو حكهن يتعاركن عليه .. 

كضيتها بعين احف وعين اباوع .. 

لحد ما خلصت وكعدت اكلت تعشيت وياهن مسويات تمن كبة وطماطة وجاي .. ونباوع .. 

كضت المسلسلة اندارتلي وفاء : حكه صدك صبا تذكرين المرة الاجت اليوم ام علي ؟

- مني ؟ 

- هاي التريد مرة الرجلها 

- يا هههه شمالها المسودنة ؟ 

- جا غير رادتج لرجلها 

- عليج العباس ؟

- اي والزهرة 

- ههههههههههههههه شكالتلج ؟ 

- تكلي هي هاي متزوجة لو عانس ؟ شو ما ادري ليش حسيتها جاي تبسمرني جيف اني معنسة 

- يا هههههههههههههههه  دهر الدهرها كون ، اي ؟ 

- كتلها عاجر وطلكها رجلها ما عده يحوي اثنين واتزوج وعافها 

- يعابيج الله مو سيرة ذاتية هاي فضيحة 

- جا غير احجي حالج شكولن ؟

-اي دكملي

- كالت عاجر يعني كلش ما تخلف 

كتلها ما عدها رحم اصلا تخلف بيه 

تكلي تشوفينها صبورة خوش بنية لو السان اني اريدلي وحدة كون خوثة وفاهية لرجلي كون ما تفك حلكها ولا تسويلي مشاكل بس تصملي حلكه وتكضي حاجاته عني واداري البيت . 

- بين قوسين تردلها خدامة لبيتها 

- اي والله كتلها والله هي البنية خوش بنية بس انت روحي واحجي ويا عمتها وشوفي رأيهم 

ضلت شكثر تسأل عنج 

- لا هو ناقصني انزل على ضرة واشتغللها خدامة 

لا والحظ من حظي امداني 

- هاليومين تجيكم وعلي حطتج ابالها 

- يعاب بالها يمعودة مبينة المرة ملسونة وما تنكدر رب التزوج رجلها حتى تخور بكيفها تنحمل هاي ؟ غير تسود عيشتي 

- اي بالعباس تاكلج اكل . 

- اكومن بعد مناك عمي لو بطيت يسويها سالفة 

- شني ما صالج ساعة دكعدي بعد وكت

- لا خية يا ساعة كولي ساعتين ، كليلي روحي 

هم مناك عدي خياط اكضي الناس تريد هدومها الكعدة مو الي

اطتني خمسة الاف على احفافة اثنين نسوان 

كتلها : نعم الله 

ولبست عباتي وردت امشي لبيت عمي 

طلعت بوجهي للشارع العام كلت خمسة بجيبي وخمسة هسه حصلتها اطيهن للزلمة واشوف شكثر ضل علي اوفيهن اله غير مرة 

بس من رحت ما لكيته جان واحد غريب واكف بالمحل 

كتله : حازم موجود 

- لا طالع 

- يرد 

- ما اعرف كولي 

- لا جا من يجي امرله اودعناك 

عفته ورجعت لبيت عمي ، لكيته كاعد كتله : راح احمي الجاي اسويلك استكين وياي ؟ 

- اي والله بعد عمج سويلي فد استكان 

رحت حميت الجاي وصبيت الي واله ... انطيته ورديت لغرفتي شربت جايي وشغلة احمد الساعدي 

شكثر احبن هالمنشد من اسمع صوته روحي ترتاح 

احطه واشتغل والتهي بين التفكير والخياط 

على صوته .. 

اريد مرة اذكر وامشي لابو الموبايلات اسئله خاف منزل قصايد جديدة وما ادري عنهن خاطر يحملياهن . 

شغلت ( يا حلاتج يالمدينة من تسميتي بولينا  ) 

وكعدت اشتغل ... لحد ما دخت ونعست ونمت .

مرت يومين ما طلعت غير لبيت وفاء احف وارد اكمل خياطي 

لا اكعد ويا بيت عمي ولا اكثر اختلاطي بيهم 

اتجنب الحجاية التخشن گلبي منهم 

على كد اعجن اخبز لو انظف غرفة عمي وعمتي واغسل الحوش وارد اكعد بغرفتي .. 

اتمنى يصير عدي تلفزيون واكعد اتابع مسلسل نور ومهند بغرفتي بس ما عدي اروح اوفاء بحجة اشتغل اكمل المسلسلة وارد .. 

اني عدي ٥٠٠ الف جامعتهن وضامتهن بس ما اريد اصرف منهن وبنفس الوكت ما اريد اورج عمي عندي اذا درى عندي واشتري تلفزيون واحط ستلايت يكوم يتعارك وياي على فلوس خاطر اداينه لو انطي وهو ما مقصر جيف يعرف اني اشتغل كل ما يدزني على شغلة يكلي دفعي وبعدين اطيح ويغلس ومن اطالبه يسوي روحه عصبي ويكوم يصيح .. 

فضالة هذا حالي حتى ما اكدر اشتريلي حاجة وابتلي على روحي .. وما ادري شلون تفض لو شلون يخلص هالوضع 

ما ادري يمكن يصير اسوء 

واخاف لا يوم عمي يشمرني ويتبرا مني واخوتي ما يريدوني واحتار ما عندي فلس هالكاعد احط الفلس ع الفلس واجمعلي ليومي الاسود خاف تذبني الدنيا . 

اعتازيت غراض للخياط .. 

ما طلعت الصبح جان عندي شغلت 

كلت العصر ازرك للسوك مالنا اجيب واجي .. 

عد ما ردت اعبر الشارع اوكف كية انتبهت 

حازم ابو الأنشائية مفتح وهو الكاعد بالمحل لمحته واني امر 

انداريت ومشيتله .. جان يمه واحد كاعد يشتري 

كتله : مسا الخير 

اندارلي : يا هلا مساء النور 

-ذاك اليوم اجيت سويت السكيفة وما.... قاطعني 

-لحظم من رخصتج بس امشي الولد 

-ها اي العفو على راحتك . 

انطى للولد احتياجاته ومشاه ، ضليت واكفة وهو يحسب الفلوس ويحطهن بالجرار صاح على ابنه : علييييييي 

- ها يابه 

- هاك اخذ جيب بطلين مي من عمك ابو منير بساع وردلي يلا ابني .. 

- اي يابه 

اخذ الولد ومشى انداري : يا اهلا ام .. ام منو حضرتج 

- ما عندي ضما اسمي صبا 

- يا هلا ومرحبا باختنا كولي تفضلي 

- زاد فضلك ذاك اليوم اجيتنا وما خذت حسابك ومريت نوتبين ما لكيتك .. شكثر.... قاطعني 

- تسمحيلي اسألج سؤال اذا ما بيها زحمة وتدخل بامورج الشخصية 

- لا العفو گول خوية 

- انت عندج اهل ؟ 

ابتسمت : شني القصة جا طالعة من فطر الكاع 

- لا العفو ما فهمتيني قصدي ابوج امج موجودين بالحياة 

- هاه ، لا الله يرحمهم 

- يعني يتيمة !؟ 

دنكت بلعت العبرة التجمعت ببلعومي ورفعت راسي عيوني تلامعن ... ضل يباوع بعيوني ، اخذت نفس وكتله : الحمدلله على كل حال 

- محمود مشكور بكل حين ، بس يعني خوان خوات 

- خواتي محكومات برجولتهن واخوتي ... سكتت 

هز راسه : وكاعدة عد عمج بهالصريفة الما احط بيها دجاج مو بشر .

- خوية انا جايتك افتح دين واوفي لو جاية افتح جروح 

خلي الهموم مجودرة وما يعلمها الا ربك ، لو راد يغير الحال بس راضية بقسمة ربي 

- كبل امس من اجيتي ليجاي وانكطعت شحاطتج بالطين ما شفت على وجهج الكدمة الشفتها من اجيتكم اسوي الصريفة ! 

- شكثر حسابك خوية !؟ 

تنهد : اتوكلي بعد اخوج ما عليج حساب 

- لا ما ارضى اني ما كتلك حالي خاطر تتصدق علي بتعبك صح يتيمة ومالي معين بس اعجبك مرة بالف زلمة جاي اشتغل واكد على روحي وما حاطة نفسي عالة على احد . 

- والنعم منج والله يكثر خيرج ويبارك برزقج بجاه امير المومنين 

- الله ينطيك على هالدعوة ، وهسه گلي شكثر حسابك 

- ١٥ 

- لا جذاب وضلع الزهرة .. مو ١٥ 

ضحك بصوت عالي ، دنجت : لا العفو يعني مو جذاب حشاك بس والله حسابك اكثر اني ما ارضى احد يستعطفني بالله عليك كلي شكثر 

اجا ابنه انطاه المي 

حط البطل كدامي وكال :- حلفتيني بالله حسابج ٣٥ بس ادفعي التكدرين عليه واذا ما تحبين اسجله يمي دين ويمتى ما صار بيدج تعاي وفي عسى ما بالاسبوع الف . 

- ينطيك العافية الله يحفظلك علاوي والاهل بجاه كلمن عده جاه 

- الله يستر عليج 

-هسه اني راح اطيك ٢٠ ومن يصير عدي اوفيك ال١٥ الباقية 

-على راحتج 

فتحت الجنطة طلعت عشرين اطيته 

اخذهن واني كمت اباوع الجيزدان ضلي بس عشرة روحة رجعة وغراضي بالسوك يحتاجن اكثر .. وما اريد اسحب من الخمسمية الضامتهن .. وشلون هسه 

باوع بوجهي : ها محتاجة شي 

- ااا لا هاهية تسلم 

هميت اريد اطلع صاح : اختنا 

انداريتله ، طلع ١٥ وانطانياهم : هاج اخذي ذني و راح اسجل اسمج عندي بهالدفتر ترا مو صدقة واستعطاف بالحسين بس اني ويا ناسي كلها هيج الما عده اسجل اسمه كل ما يصير عده يناوشني وربج يسهلها .. روحي خوية 

-يومين وارجعهن ما اطول عليك ولو حيل زاحمتك اني 

-لا تفكرين ولا تكولين وشتاحتاحين محلج كلوبات غراض كهربائيات مدي واخذي 

- الله ينطيك العافية بجاه الحسين الشهيد 

-الله يحفظج 

-اودعناك 

-ميج لا تنسينه ينشف ريكج بالسوك يفيدج 

تبسمت : شدراك رايحة سوك ؟ شني تقرا وجوه 

ضحك واندار لابنه يحاجي ... 

اني هم عفته وطلعت ، بس طلعت واني متبسمة وكلبي بارد 

شيصير لو كل الناس كلوبها طيبة والسانها لين مثل هالرجال حتى لو عليك جبال مال هموم ترتاح بكلماته الطيبة وابتسامته بوجه الناس . 

صدك لو كال نبينا ( الكلمة الطيبة صدقة ) 

واحدنا ما محتاج فلوس بكثر ما محتاج كلمة طيبة من الناس تخفف عليه ايامه واتطمنه الدنيا بخير مو كلها ذياب .

رحت للسوك جني ريشة اشتريت الاريده ورديت للبيت 

جان وكت غروب .. صليت وكمت سويت العشا .. 

عمي جاي يصيح على رسول ويوسف 

رايد يطلع من العصر وماكو واحد منهم اجا وكف بمكانه بالدكان .. لحد ما كعد رسول اكل رزالة من عمي وكعد بالدكان .. 

اني اشتغل بالمطبخ وبس سويسو واكف يمي يهذري 

ما تعرفه شيحجي سالفة تجر سالفة 

واني اكله .. اي .. ها .. يا وشسويت 

اجاريه الولد عنده طاقة للسوالف 

كاعد نحجي وكف رسول كال : حيل جوعان ما خلص العشا 

- بعيني هسه دقايق واحطه 

صاح يوسف : صبا موبايلج يدگ 

- اي جيت 

عفت الطاوة ع النار وركضت لتليفوني 

شفته رقم غريب ! 

ارد خاف يطلع زلمة 

بس لو طلعت مرة وتريد ثوبها لو شي !؟ 

كتله : سويسو رد ع التليفون اذا زلمة شوفه منو واذا مرة اطيني احاجيها 

عاد سويسو نفخ روحه حس بالمسؤلية وخشن صوته ورد : الو 

ياهو انت .. لا مو رقمها شرايد 

هسه غير يكول شرايد 

- خب منو هاذ ولك ؟  

- زلمة يكول اريد صبا 

- هششش فضحتي دهر الدهرك يا زلمة شيريد 

- اكلك مو رقمها شرايد 

اي معليك احجي وياها ما احجي ما انطيك كول منو 

حسن ؟ يا حسن 

وخر التليفون وحجه وياي : يكول اني حسن 

- يا حسن هاذ 

- يا حسن انت 

- خب دسده شهرتنا من دهيرة الطكتك .. ما ظل احد ما سمع صياحك وانت تحجي هسه عسبالهم صاحبي دسده 

- روح عمي روح ما عدنا واحد اسمه حسن 

وسده 

طكيته على راسه : يبو راس الاعطر هي شني ما عدنا واحد اسمه حسن غير هو حسن 

- وانت تعرفينه 

- خب شعرف غير يكلك اني اسمي حسن ما كالك ياهو 

- لا يكلي بس اطينياها 

- وحسن هذا منين يربي ، دعوفه خل اخذ العشا الوادم كتلها الجوع جبت صمون لو التهيت بالتهذري ؟ 

-لا جدة كالت عدنا خبز 

- دروح على هدى كللها ع الخبز 

مشى ورسول وكف : اكلج هي وفاء بت بيت ابو اسعد مو صاحبتج 

- اي ليش 

- صارت عركة ما ادري عليمن ابيتهم وصياحهم لذاك الصوب 

- ما عرفت شكو 

- لا والله دخابريها شوفي شنهي العركة 

- يا دهر رسول شمالك اخابرهم استفسر شني 

- جا شلون نعرف العركة عليمن ؟ 

- والا تعرف اصول العركة ، دكعد يمعود 

- دخلصي العشا بساع يمعودة متت 

- اي كضيت ، اكلك بس الخبز فدوة سويسو الظاهر هم كضله سالفة يم مرتك .

راح واني شلت الصينية ومشيت 

جاب الخبز واجا وراي : سد الشباج مال الدكان وتعال 

- لا امي كاعدة 

- وعمتي وين بيها حيل توكف بدكان ما صبرتلك تكعد كم دقيقة كعدت المرة دروح 

كعد ع الصينية وهو يصيح : يمممممممه سدي الشباچ وتعاي خل نتعشى عوفي الدكان 

طب سويسو كتله : روح صيح لبيبيتك خل تجي 

وكعدت مقابيل رسول احط شكر بالاستكاين 

هو يباوع بوجهي 

- حافة حاجبج 

باوعت بوجهه وضحكت : شبيك يمعود شنيه ؟ 

- لا مو حاجبج احمر يلمع يصد بالعين 

- ديلا بالله هذا هم حظي 

ضحك وطبت هدى : وانت هنا 

- جا وين اروح ؟ 

- مو بالدكان شمكعدك 

- اي غير اتعشى 

- تتعشى لو تتمضحك 

- بت الجلب ضاحك ابيت الخلفج انت ياهو مالتج 

- وعليمن تشتم باهلي ؟ 

- وانت ياهو مالتج اضحك ابجي اكعد اكو صايرتلي عريف تحاسبيني 

طب يوسف : كولوا يا الله يمعودين ، امي وين 

وكعد ع الصينية 

حچت هدى : لا هاهية خوية عليمن عازلين شو انت وجهالك تتعشون هنا وبس مرتك فوك 

حجه : لازم ماكل من زاد اهلج 

رسول : صمي حلكج واحترمي روحج لا تخليني اكومنلج والله 

يوسف : دعوفها وكوم صيح امي 

-اني راح اكوم بس خل اسويلي لفة 

جريت نص كرصة سويت لفة واخذت كلاص جاي وكمت 

حجه رسول : صبا 

-ها 

-عودينه فد شوي البسي عباتج واكبعي لبيت ابو اسعد افتهملينا الفلم شنهو بروح موتاج 

- اطك وتموت لا ما عرفت السالفة 

- اي بالعباس 

ضحكت ومشيت جان تكلي : صايرة تتمضحكين هواي 

- جا مو اخير ما نبچي شبيج داده ؟ 

حجيتها واني اتعداها رحت للدكان مديت راسي عمتي وسويسو واكفين يمشون : عمه عوفي الدكان وتعاي اتعشي 

- اي يمه بس خل امشيهم خطية 

كاعد تحچي اندكت الباب

حجت عمتي : وفاء صاحبتج فتحيلها شوفيها شتريد 

مشيت فتحت الباب واللفة والكلاص بيدي ، شفتها تبجي وحالتها حالة بسع فاتت : اسم الله شبيج ؟ ياهو وياچ 

- وديني لغرفتج 

- امشي 

اخذتها ورحنا للغرفة : شبيج دحجي شجاريلج شصاير 

- مصيبة وابوي متحلفلي 

- عليمن ؟ 

- رحت للسوك العصر وحسن وصلاني من اجيت وابوي شافني نزلت من سيارته وتسودن تعارك وياه واسعد طلع يتعارك وصارت هوسة وسودة ومصخمة على راسي 

- عزا العزاج كون وهسه 

- طول العركة اني فوك امي كالتلي لا اتظلين امشي اذا كضوني هسه وعلي سووني وذر 

تحجي وتبجي 

طبت عمتي : شمالها البت ، شجاج يمه شصاير وياج 

- متعاركة هي واهلها عمة 

- سهلة سهلة اذكري وصلي ع النبي واهدي مصارين البطن تتعارك .. جيبيلها اعشي خل تتعشى وتكعد تستراح 

- اي هسه جنها على عشى اوديلها اطيب عشى 

وفاء : لا والله ما اشتهي الزاد بس رايدة اكعدلي شوية 

- سهلة ان شاءالله دجيبلها مي يمه 

رحت للمطبخ جبتلها مي .. واجيت عماي واكفة تهدي بيها 

كتلها : عمة دوحي اتعشي كملي عشاج 

- شتحتاجين يمه احنا اهلج لا اضوجين البيت بيتج بنيتي

- الله ينطيج العافية فدوة رحتلج خالة 

راحت عمتي واني انطيتها الماي : دشربي واذكري الحسين وربج يهدي النفوس 

- سلام الله عليه والله لو ادري فلا اصعد شجاني وصعدت 

- وهو شمدري انت بالسوك واجاج 

- خابرني وكتله بالسوك كال جايج اوصلج 

على كد التوصيله وحتى ما ذبني بالباب غاد من الفرع اني ادري بابوي يمر ويشوفني رجعت اركض للبيت . 

- دهر الدهرج هسه عسباله طالعة ويا شوف وين شيقنعه انت جنتي بالسوك عاد اشتريتي غراض شي حتى يصدك 

- ششتريت هو حسن خلا على حالي حال 

كال اطلعي اوصلج احجي وياج 

- وشيريد هاذ مضروب الجلوة ؟ 

- ما يريد هيج بس يحاجيني جيف صالي يومين صاده عنه 

- يا ولج حكه صدك تذكرت كبل شوية اتصل عليه واحد رد سويسو اسمه حسن بس لا حسنج هذا !؟ 

- وهو منين يعرف رقمج 

- واني شدراني منين جاب رقمي حتى رقم غريب ما رديت عليه خليت سويسو يرد من شفت الرقم بلايا اسم 

- هسه كليلي شسوي !؟ 

- دهدي ارتاحي والله كريم ، بس لو اتوبين من حسن هاذ جان انت بخير 

خل اكوم اشوف موبايلي وين ذبيته. 

هستوني طلعت من الغرفة 

رسول بالممر طلع صار بوجهي ، حجه بصوت ناصي : ها شني 

-يمعود متعاركين هي وابوها 

-اي غير نفهم عليمن !؟ 

- شغله هيج بيناتهم 

ينصي بصوته ويكلي : يا بيناتهم رحمة لموتاج اكلها عركة الفرع كله دك ودبچ بيها تكلي بيناتهم 

ضحكت : هسه انت شعليك 

-ولج اتشعوط لو ما عرفت السالفة بعلي 

-رسول معليييك وخر مني خل اسوف تليفوني 

تعديته وهو اندار وراي صارت هدى بوجهي : من أكول ما تستحين يلوموني شعدج تتمضحكين ويا رجلي 

- خيه شضحكت حاجاني بسالفة وكتله معليك شلون بالله واكفتلي وكفة 

- واكفتلج وكفة شنهي انت ما تعونين تاخذيلج زاوية حتى تنحصرين ويا رجلي وتتمصحكين وتكليلي واكفتلي 

رسول : دستحي على روحج مثل اختي واتقشمر وياها انت شوكت اجوزين من اسوالفج 

- والله ما اجوز من السالفة هسه تكلي عليمن جنت تتمضحك وياها 

-مرة خطار عدنا اسكتي 

عفتهم وطبيت للدوانية ادور تليفوني حجت عمتي : شمالها مرت رسول 

- بطرانة هاي عمة تريدلها عركة بس ما جاي تعرف شلون تبدي بيها ، ما شايفة تليفوني 

- ذاك يم المخدة ، مدري شجاريلها هالمرة هاي متسودنة 

رسول ومرته طلع صوتهم ضربها وهي كامت تعيط 

فزت عمتي من مكانها راحتلهم .. 

اني بقيت واكفة بمكان وهم هوستهم بنص الممر ... 

وهي تصيح : مالي غرض لو اني لو صبا البيت يا هذا البيت والله ما ابقى بيه 

بنص عياطهم وصريخهم اندگ الباب 

اندارت عمتي فتحته طلعت الحجية ام وفاء رحتلها 

رحبت بيها عمتي ودخلت للدوانية 

ام وفاء : اتعذر منكم احنا هم كلفناكم ووازيناكم بمصايبنا وفاء يمكم 

عمتي : يا خية صدك جذب شني الحجي هاذ جا انتم غرب غير جورتنا واهلنا دكعدي اكعدي صبا يمه سوي لعمتج اسكين جاي .. هلا ومرحا ام اسعد زارتنا البركة 

- وبيج اكثر ام يوسف وينها وفاء 

- دكعدي استراحي وهسه تجيج وفاء 

مشيت 

رسول جا مرته للغرفة يتصايحون ويتعاركون .. 

خدرت جاي وجريت ماعون وحطيت بيه وحدات من كعك ابو الدهن عمي دوم يجيب منه يحبه .. وسويتلي صينية طب يوسف 

: ذولة اشمالهم اليوم بصلتهم محروكة 

- والله يا خوية هدى سالفتها سالفة 

رسول كاعد يستفسر عليمن وفاء اجت تبجي والسالفة عركة نسوان كتله شعليك وضحك يريد يعرف السالفة تكلي ليش ادورين زوايا حتى تنحصرين ويا رجلي وتتمضحكين 

- بالله هذا حجي ما تستحي شنو تنحصرين شنو تتمضحكين هاي شمالها 

- بعد 

-هي وفاء شبيها !؟ 

- يا يوسف انوب انت عليّ ؟ 

ضحك : لا والله مو هم كتلني الفضول صارت عركة بالشارع واجت وفاء تبجي انوب امها غير نفتهم شكو 

-عركة اهل 

-خير ان شاءالله صبيلي جاي وياج خوية وخل ارجع للدكان جاي يصيحون 

-اي بعيني 

صبيتله واخذت الصينية انطيته ورحت صحت لوفاء كامت وياي ورحنا للدوانية كعدنا يمي عمتي وامها ، وامها تحچي بحركة وتكلها : ولج بربوك تصعدين وياه وتجيت بيه بالفرع ولج ما استحيتي ما كلتي اخوتي ما كلتي ابوي اهلي طاير راسج بحسن لحد ما يكصون راسج 

عمتي : والله خالة امج تحجي حك ما يصير 

وفاء : خالة مو رايدني وابوي ما يطيني بعد شسوي 

امها : ولج بت الجلاب شيطيج متعة 

- لا متعة ليش زواج على سنة الله ورسوله وانتم تدرون 

- وشفرقه عن المتعة يا ام يوسف جابليني ودكي وياي يريدها بالسر اهله ما يدرون وكون تشتغل وتساعده بالاجار والعيشة يعني نهارها كله يمنه وبس بالليل تروح 

ويمكن هم ما يرضى بالليل يجيها لا كم ساعة 

خية متعة هاي لو مو متعة 

- لا مو صحيح سر شنو شناقصج بتي شو بنية وسباعية والف واحد يتمناج ليش ادنجين راس ابوج واخوتج 

-شسوي خالة امه زوجته بت اخوها اني شبيدي 

صبا : بيدج تعوفي الرجال اليدوس على كرامتي وكرامة اهلي نعلة ابو زينة شبيج انت تسودنتي يا سر هو لو بيه خير امه تغصبه ؟ 

امها : هسه ابوها واخوتها متحلفيلها يكسرون ظهرها شلون بيه كليلي يا ام يوسف 

-خيه عوفي البت الليلة عدنا يجي الحجي ابو يوسف وياخذها بيده ويحط العباس وياهم ما يكضوها ولا ياذوها بس خلي تعدي هالليلة كشرة سلامات والصباح رباح ربج يحلها . 

صبا : دشربي چايج خالة واهدي وكولي يا الله شفافج غدن بيض من الهبطة 

- والله يا خالة روحي راحت من خوفي عليها كلت هسه يحطون طلقة براسها ويكتلوها . 

بقت عمتي تهدي بيها والمرة لمت عبايتها وهمت تريد دكوم خاطر لا تعوف البيت كاب .. اول ما خطتلها خطوتين ولنها المرة تموع وتوكع 

تراكضنا الها ونتصايح 

يوسسسسسسف رسووووووول 

اثنيهم اتراكضوا على صياحنا .. وعمتي تصيح : عباتي ولج ناوشيني 

رسول شال المرة وطلع يركض بيها ورسول فتحلا سيارته وعمتي صعدت وياهم .. ووفاء تسودنت كامت ادك على راسها .. 

كامت تضرب بيه وتكلي : خابري على اسعد خلي يلحك امي ولج خابري 

- واني منين اعرف رقمه دخابري انت 

-لو خابرته يهد عليه دخابري وكليله امك طاحت علينا 

ناوشتني رقم اسعد خابرته رد بصوت عصبي : ياهو 

-اني صبا بت اخو الحجي ابو يوسف خوية الحجية امك اتخربطت وطاحت علينا ورلدنا اتراكضوا بيها 

- شوووكت هاي وينها امي هسااااا 

- خذاها رسول ويوسف وركضوا بيها للمستشفى خابر على واحد من الولد والحكهم فدوة خوية 

سده بوجهي والدكان خبصونا خبص بالصياح 

ويدكون الشباك يريدون يشترون 

كمت اصيح على سويسو ما هو .. ووفاء تبجي والبيت كب نار 

شهالليلة هاي يربي 

مديت راسي من الباب مال الدكان كتلهم : روحو ماكو احد 

جاي احجي طب عمي : جا الولد وينهم مو كتلهم اكفوا بمكاني ساعة على ما اروحلي ساعة واردن كل خير ما بيهم 

- عمي ام اسعد اتخربطت عدنا وتراكضوا بيها 

- هاه يمتى هالحجي 

حجه وانتبه لوفاء واكفة تبجي : وينهم هسه ؟ 

- ما ادري احتمال طلعوا لمستشفى القادسية 

-هاج هاج ددكيلي على واحد منهم خل بس امشي ذول 

اخذت تليفونه ودكيت على عمتي .. دك تليفونها بالدوانية 

دكيت على رسول ما رد .. دكيت على يوسف اجت هدى انت كاعد ادكين على رسول من تليفون عمي 

عمي : ها حصليتيهم 

-غير كون واحد منهم يرد كلهم ما يدون عن تليفوناتهم 

رد يوسف كتله : اي يوسف رد هاك 

رد كام يصيح عمي بالتليفون : هااااا وينكم شنهي شمالها المرة ، لا تعيفوها بويه لا تعيفوها ليما يجون اهلها خلني اخابر ع الحجي ابو اسعد زينة هي زينة 

اي اي الحمد لله

جا خلني اخابر 

ياله روح. 

.. سده ووفاء تكله : ها عمي شني امي 

- مكعدينها بالسيارة وهسه وصلوا المستشفى ان شاءالله زينة لا تنقهرين بويه ان شاءالله ما بيها شي بجاه الحسين خل اخابر ابوج 

خابر واني اهدي بوفاء 

واخذتها للغرفة .. اطيتها مي وهي ادك على وجهه وتصيح كل الصار مني اني السويت هيج بهلي عساني متت ولا اذيتهم الله ياخذني كون الله ياخذنيييي 

- دكولي يا الله يمعودة هالصحت شبيج صلي على محمد 

اجا عمي : خابرت ابوج وطمنينه وهسه بس يجون الولد نروحلهم هو شصاير صبا هكو شي شو وضعهم مو لوام 

-صارت عركة عمي بعدين عمتي تحجيلك 

-سهلة بويه سهلة درتاحي جبتيلها عشا بويه خاف جوعانة ادزلج شي ؟ 

وفاء : لا يطيك العافية عمي بس اذا ما اصير حمل عليك الليل اني بياته ابيتك تتحملني 

- افا شمالج بويه غير لو ما شالج البيت تشيلج عيونا صدك جذب .. صبا جيبيلها فريش خل تنام وتهود لا تخافين هسه يجيبونها ما عليها شي لا تضوجين 

رحت لنضدة عمتي جبتلها دوشك و بطانية 

وعمي اجا من الدكان شايل بيده بطلين عصير وحلويات 

كال : خليها كدامها وديري بالج ع البت بوية 

- ان شاءالله عمي، صار . 

ضليت كاعدة يمها خابرني رقم غريب 

ضليت اباوعله كالت : دردي 

- دست رد بس ما حجيت اجاني صوت اسعد اخوها 

الو صبا 

-انت اسعد ؟ 

-اي صبا يمج 

- خوية كول يا الله واذكروا الله ولا تخلون مشاكلكم علج بحلوك الناس كلها جاي تجي للدكان وتسال بيت ابو اسعد عليمن اتعاركوا .. لموها خوية وسدوا السالفة بروح الحسين 

- كليلها خل تجي لا اكبرها من صدك 

- تعال لعمي واخذها عمي ما يرضى تطلع 

- ابو يوسف درا بالسالفة 

- لا ما درا بس عرف صايرة عركة بيناتكم وهي جاية عنده 

- هسه اودي امي واجيها كليلها خلي تتحضر 

سديته منه وهي كاعدة تبجي 

وحسن يخابر ما ترد عليه .. ضليت احجي وياها والشيها واحجيلها عن الفصال واشوفها الغراض الجبتها اليوم 

سألتني : ليش انت هم جنتي بالسوگ 

-اي رحت اتسوك غراض للفصالات 

وكمنا نسولف 

شوية واجا رسول ويوسف عمي يستفسر منهم ما يعرفون شي عن العركة .. عمتي كالتله : اسرار بيت حجي لا تنشد عنها وتخليها بحلوك الولد ما يصير 

- جا ولو اجو اهلها وناشدوني شكللهم ؟ 

-سهلة 

واكفين واجا اسعد رادها كاله : امش بس توصل ليجاي رجلك اكصها البت بتي وابيتي لو جيت مرت الاخرى احش راسك من تهدى البت اني اجيبها واجيكم 

كامت تحجي ويا عمتي وغمزتله محد يدري عن شي .. عاد وكتها اسعد اطمن وراح ، وعمتي اجت ما رضت تنام بالصريفة اخذتها للدوانية خلتني افرشلها وضلت يمها .. وعمي صعد بالهول ما بيت يوسف نام يمهم واني وعمتي وهدى بقينا بالدوانية 

ثاني يوم الصبح عمتي كايله العمي 

ان الزلمة رايد بتهم وهم ما يطونها وشايفها عد ما طالعة من السوك وتريد تركب كيا عاد صعدت ويا بالكيا مالته موصلها وابوها عسباله طالعة وياها لو شوف شمسوية من وراهم بس البنية تحلف وتتكفر تكول جنت بالسوك . 

عاد من كعدنا الصبح اتريكنا وعمي اخذ وفاء وعمتي وراحو على بيت ابو اسعد ودخل عليه وكاله : حاط العباس وياك لو كضيت البنية لو اذيتها خل نكول غلطت تضل البت بتك لا تشهر بغلطت البت وتكثر صوايحها مو زين لا بحكها ولا بحكگ وانت ابوها حط البنية كبال عينك وحاسبها بهداي .

كايم ابوها يحجي وياها ويسالها عن طلعتها 

جان تكله رحت اني وصبا للسوك اني محتاجة غراض للصالون وهي للخياطة وهناك هو عرضلنا وصعدنا وصلنا هي راحت لبيت عمها واني رحت لبيتي ما جنت وحدي وياه 

وحطتني بالسالفة كبال عمي 

واجا عمي مشتاط نار دخل للبيت وهو يصيح 

صبااااا .، وينج منعولة الواااااااالدين تعاااااي جاي 

كمت من كدام مكينتي اركض على صياح عمي واني اكله : ها عمي شكو 

ويلزمني كن راسي ويكلي : ولج تهرمين من وراي واني المخليج على حل سعرج اتطلعين واكول بت وتستغل تالي اتطلعين ويا صاحبها ولجججججج 

بعدني اريد احجي وما احس الا راكع راسي بالحايط

كامت عمتي اتجر براسي منه وهو يصرخ ويكلي 

صاعدة ويا حسن الفاسد ولججججج 

- عمي والله ما صاعدة والقران لا صاعدة ولا شايفة حسن 

- شلون ما شاييييفته وصاحبتج تكول جنتن سويا ووصلاكم للبيت تهرمييين من وراااانا 

- والعباس عمي ما اعرفه ولا شايفة حسن والقران ما شايفته 

هدى : شلون ما شايفته وانت البارحة المغرب تحجين وياه مو خابراج وسويسو هم حجه وياه لامه الزلم من كل صوب وحاطتهم وتتمضحك وياهم وتبيع شرف بروسنا 

عمي سمع هالحجي واتسودن ..... يتبع