رواية عاجر الفصل الاول 1 بقلم زينب ماجد
رواية عاجر الفصل الاول 1 هى رواية من كتابة زينب ماجد رواية عاجر الفصل الاول 1 صدر لاول مرة على موقع التواصل الاجتماعى فيسبوك رواية عاجر الفصل الاول 1 حقق تفاعل كبير على الفيسبوك لذلك سنعرض لكم رواية عاجر الفصل الاول 1
رواية عاجر الفصل الاول 1
بغداد_مدينة الصدر_الداخل
كاعدة ع الكرسي ورجلي على الدواسة وايدي لازمة الثوب واعدل بيه جو اثوب المكينة اخيط .. وموبايلي دمعة مخليته يمي ومشغلة بيه قصيدة لأحمد الساعدي :
أنت لجروحي دوا ومن كل جرح داواني .... شلون أنساك
گلبي ساكن بالنجف وأسمك سكن بلساني ... روحي وياك
شلون عن عيني تغيب
وانت لجروحي طبيب
القصيدة مشتغلة وصوت المكينة عالي .. وفكري بعيد عن كل هالأصوات .. قطع سلسلة افكاري (سويسو) وهو يصيح : صبا صبا هاي مرة جاية عليج تريدج
-اي چا دخلها
حجيتها واني استعجل بالقطعة البيدي حتى اكوم للمرة ..
لحد ما طبت : مسا الخير شلونچ حبيبة
-يا ام حسين هلا بيج خية
عفت من ايدي وگمتلها اتلكاها واسلم عليها
باوستها : اتفضلي افضلي كل الهلا
ورديت كعدت كدام المكينة وهي كعدت كبالي : شلونچ خية شلون الأحوال
صبا: تحت رحمته الحمد لله على كل حال
- اخوتج ما جوج محد منهم مرج نشد عنج جا شني ذابينج هيج ؟
-لا والله ما شفت اخد منهم
- وچم دوب اظلين مكسور ظهرج على هالمكينة هاي وانت عدج اثنين اخوة كون هسه عايشة ببيوتهم معززة مكرمة مو مشمورة ابيت عمج وكاعدة بالصريفة هاي الما يعيش بيها بشر
-چا بعد شسوي المحنة لا تنشرى ولا تنباع خاطر اشريها هاي قسمتي بعد
-وطليقج ما نشد عنچ ما دز وادم تردج ؟
-عصفور وانكطع خيطه الله وياه، ما بعازة الزلمة
-وجم دوب اظلين هنا ابيت عمج
-شبيدي يخية الله كريم
-هم شلونهم وياچ زينين ؟
-مرت عمتي انسانة مومنة وطينتها طاهرة وخوش مرة بس الجناين يخربن ويوزن .. وعمي هالتشوفينة ساعاته براحاته وبعد يم ربچ
-جا الجناين شعدهن وياج ماكلة اكلهن شاربة شربهن شو مشمورة بالسكيفة هاي انت وزعابيلچ شيريدن منچ
-يخافن لا واحد من الولد يطخ ويريدني اله مرة وانا واجتافي لابو فاضل اشوفهم مثل اخوتي والشاهد اللهم همه هم هيج يحسبوني بس بعد المطلكة مالها عيشة بين هالناس.
-خية جا انت كلش ما تخلفين ما رحتيلج دكتورة زينة يوصفون دكتورة كدام مستشفى القادسية يكولون اديها شفى شلون دكتورة الله مبارك بيها ما تروحيلها وتكشفين بلكت الله واطيح على علتچ ؟
-علتيش يخية ، مو علة وادورلها دكتور .. انا عاجر لا تجين الشهرية ولا عندي رحم مثل النسوان خاطر ادورلي دكتورة واطيح بعلتي
-عليج العباس ... يماااي يا قسمتج خية لا ام لا اب لا خوان بيهم خير ولا ضنا عمت عيني
-لا اسم الله على عينج
كاعد نحجي دخل سويسو وهو يجر ببت ام حسين الصغيرة صايرة زركة من البچي : خالة هاي جابوها تبجي عليج
-يووووه من ساعة الگشرة كون كلتلج ما اطول اودي القماش وارد شبيج تنغطيين
جرتها وكعدتها بحضنها .. تهدي بيها
كتلها : على كيفج وياها خطية
طلعت موزة من الجرارة واطيتها للطفلة
حجت امها : لا يا ما تاكل ما تحبه اتوسل النهار كله ان جان يحطون الفاكهة بحلوكهم فالحين يهالجبس الاكشر يا هالعصاير المتروسة شكر
-جهال بعد شتسوين الله يحفظهم ، اي ابو حسين شلونه وضعكم اموركم شخباركم
-كلنا بخير
اكلج كبل لا انسى اجيت انشدج اتعرفين تحفين مو
-اي اعرف
-هاي هاي وحدة من كرابتنا ام وسام تعرف تصبغ وتميش وكلشي بس الحفافة ما تضبطها ورادتلها حافوفة وياها تعاونها كلت الها خلني اشوفلج صبا بت اخو الحجي
- غير اعرف من يا ساعة ليا ساعة ؟ شكثر تحسبلي ! اني هم عندي خياط منا، وناس تريد هدومها ما اكدر اليوم كله !
- زين احاجيها عودين واردلج خبر هسه اني جايتج على قطعة القماش هاي فدوة احبيبة اريدها كون فصال حلو اريدها للكشخة كلبية زينة اطلع بيها
_ هذا الالبوم يمج وسوفي واتخيري يا فصال تريدينه
لزمت الالبوم تباوع وبتها نزلت كامت تلعب بغراض الخياطة
صاحت بيها : هش تعاي ولج من غضب الله كون على راسج
-عوفيها يمعودة صدك جذب لا ادعين
بقت مستمرة تجر بيها والطفلة تريد تلعب جذبها شكل البلك والنمنم ... كتلها : عليج العباس عرفيها خية جاهلة وتريد تلعب ، دكومي خل اخذ قياسج
جريت الشريط واخذت قياسها والجاهلة تلعب
وهي اختارت فصال كتلها ب٧ كالت : لا هواي ب٥
-يحتاجله الفصال هاذ هواي شغل والله مو مال خسمة
-خمسة ومشيها عليج الله ما عدي غيرها علي الحسين جيوبي يغني بيهن داخل حسن
-هههههه هاهية بعيني
شالت الخمسة انطتنياها
دخلت علي هدى مرت رسول ابن عمي : صبا ما تجين تعاونيني بالمطبخ شوية شني ما خلصتي
- هسه بس اكمل المرة وبعيني
كاعد نحجي غصت الجاهلة وهي تبلع من البلك
تراكضنا الها وامها تشيل بيها وتمد ايدها بحلكها تريد اتطلعها والطفلة نطت من البجي
جريتها من عدها وكمت اضرب على ظهرها طلعت الخرزة من بلعومها وشهكت البنية وشالتها امها كتلتها
؛ دعوفيها عليج العباس خطية ما عليها شي جهال خواتي دومهم من يجون هنا هم يبلعون بهالخرز ونكلبهم ونطلعهن متعودين
-مو جاهلة تكول ملچ الكاع ما تشيلها كتلتني بوكاحتها خية خل اروحن بعد، عود اشوفلج خبر من ام وسام .. وانت هم خابريني ع الخياط لو كملتي اريدنها للجمعة كون مخلصة خاف اروحن لعيالي دشاديشي ذني عتكن مو مال اروحن بيها
-بعيني بس اخلصها ادزلج رسالة تودين عليها
-ان شاءالله ، اودعناج خية
- كل الهلا بيج يبعد گلبي .
راحت المرة واني رجعت بسرعة كلت بس اجرخ الثوب بيدي بسع خاطر اروح اعاون هدى مرت رسول بالمطبخ .
خلصت ومشيت للمطبخ هوسة .. بس ماكو احد
هستوني طبيت جان هدى تصير وراي وشايلة الصينية
المواعين فارغة : شني تعيشتو ؟
-جا ننتظرج ؟
-لا بالعافية
-دغسلي القوري وحطي الجاي يتخدر بين متخلصين اماعين خل اروح اخض جسمي
خدرت جاي ووغسلت المواعين ودزيت واحد من الجهال على جبن ب٥٠٠ من دكان عمي خاطر اتعشى بيه .. وشلت الصينية ومشيت للدوانية
دخلت عمي وعمتي والجهال كاعدين بالدوانية
كعدت وصبيتلهم الجاي وكتلها : هدى جيس الخبز وينه لعد شو ما لكيته !؟
-ضميته بثلاجتي خوما ابقي منا للصبح! يكضي غير وتعاي هم اعجني واخبزي! بيه حيل اني يومية عجن وخبز ؟
- ليش مو اني العجنت وخبزت اليوم ؟
- وشنو تعايرينا !؟
-هسه خية ما اعايرج بس اريدلي خبزة اتعشى !
- اي جان دزيتيلج على صمونتين بربع هاذ وينه الفرن دزي بيد الجهال
حجت عمتي : ااااالله الاحد هسه رادتلها خبيزة ادز من الفرن ليش جا مو عدنا خبز دطيها
لوت خشمها ما راضية وكامت تصيح : سويسووووووو روح جيبلها خبز امشيييي
وكامت راحت لغرفتها
صبيت الجاي وشربت وصبيت مرت الثانية وجزت روحي والخبز بعده ما جاي ..
حجه عمي : شكثر تشربين جاي تكول زلمة مو مرة .. بسج
استهضمت
خبز ما اطوني ويحاسبوني على استكانين جاي !؟
عيوني تلامعن لميت الصينية وشلتها باوعت غرفة هدى مطفية الضوا وسادة الباب .. ومغلسة على كرصة الخبز
عفتها ورحت لغرفتي
مو غرفة هي .. الحوش مال بيت عمي جبير بنص البيت
اخذتلي زاوية منه وسكفتها وحطيت جينكو وسويتلي معزل حتى انام واكعد واخيط واشتغل بيه
لان ما اكدر انام براحتي والولد موجودين يفترون بالبيت
بس بهالمعزل محد يفك عليه البردة ويفوت يعرفوني اذب حجابي واتفرع واخذ راحتي .
دخلت كوم الهدوم بكل مكان .. حتى على دوشكي شلتهن كومتهن ع السلة وكعدت اصفن بدنياي ..
اتذكرت عيشتي ويا طليقي
ما ادري ليش كل ما يضيق صدري اتذكر ذيج الايام واختنك اكثر
زوجني ابوي واني بعمر الثلثطعش ..
كالوا عود عد الزلمة تلحك .. راد يخلص من همنا
الله رحمة جان يصيح ( البنية هم ) اني وخواتي اثنين
باول قسمة واول واحد يطلبنا ينطينيا
ما يفكر زينة مو زينة ترتاح البنية بيها ما ترتاح ..
المهم البنية تتزوج ويصيح البنية مكانها ابيت رجلها اول ما تحس كبرت زوجها من تضل عدك تكسر عينك
جانت عدة افكار رجعية اتوارثوها اخوتي
تاليته من اتمرض اخوتي بالشغل ومحد فارغله سوينا جدول اني وخواتي كل يومية وحدة من عدنا تروحله بالبيت تخدمة واداري واترد .. وسمعنا واتحملنا مشاكل شكثر من عيالنا جيف كليوم والاخر نروح الاهلنا واتحملنا وجرعنا المر حتى ما نعوف ابونا مريض .
المهم اتزوجت واحد اسمه (عدنان ) واني ما اعرف معنى الزواج
وحتى ما اعرف شنهو يعني ما لاحكة
من طولت عدهم ست اشهر وما لحكت ( تنزل عليها الشهرية) اخذتني عمتي ام طليقي للدكتورة حتى تكشف علي
من كشفوا علي عرفوا اني ما عندي رحم حتى تنزل عليه الشهرية .. البنية ( عاجر ) يا ويل حالي شصعب ذيج الايام .. من دروا بيه عاجر وما اخلف
كاموا يكعدوني وهم يعايروني وانام وهم يعايروني
ويمنون عليه بلكمتي جيف اكل ومعيشيني عدهم واني عاجر ما اخلف ..
ضل ١٠ سنين ما اخذ عليه مرة مو معزةٌ بيّه بس شغل ما جان عنده، واني اشتغلت بالخياطة وحبيت هالشغل ذبيت روحي عليه من ضيمي وعدنان معتمد عليه ياخذ مني مصرف نوام ما يكعد الا الظهر .. منين يجيب ويتزوج عليه ولو اتزوج منو تصرف عليه بعد ؟
لحد ما صار بديه اطحين وفتحلا عربانة فلافل واسترزق منها
شافتلا امه مره من كرابتهم .. وطلكتني منه لان ما عدهم مكان يتزوج بيه غير غرفتي ، كالتلي : اني اريد اشوف بزر ابني كبل ما اموت وانت عاجر ما تخلفين واحنا ما عدنا مكان روحي لاهلج بعد اني رايدة ازوج ابني
الامانة لله هو بالبداية ما رضى يطلكني
كاللها خليها وياج بالغرفة بلكت اجمع وابنيلها غرفة تكعد بيها .. بس عمتي ما رضت كالتلها انت تتزوج تصرف على مرتك وع الجهال اليصيرون عندك لو تحير بالعاجر الـ الله ذابها عليك .. فك ركبتك من فگرها ماكو غيرها فگرك.
عاد كلي :روحي لاهلج اني هم حقي اتزوج ويصير عدي جهال اني ما افيدج .. رمى عليه يمين الطلاك وذبني ابيت اخوي
صح ما جانلي زلمة وما يصرف علي
بس العشرة ما تهون عشر اسنين مو شوية
كعدت واكلت ونمت وضحكت وياه وفتحت عيني عليه .. ومالي غيره واله جانت معزة بكلبي من ذبني حيل انكسرت وانهضمت .
ضليت عد بيت اخوي فترة .. ادزله رسايل واتوسله يردني
بس ما جان يرد على رسايلي ..
واخوي جان منتظر خبر
ما جان رايد كعدتي عنده
شلون مطلكة يحسبني فضيحة ابيته
يكول شگل لنسابتي اختي اطلكت وذبوها علي
اني ما اتقبلج خابري وشوفي شلون تقنعينه خاطر يرجعج لذمته ، بس ما رجعني عاد اخوي سواله عركة وياي واجا عمي حتى يحل المشكلة اخذني وخلاني ابيته عسى الله يهدي طليقي يردني اله او شوف شتزوج ويفتكون مني وبقى هذا وضعي ...
بس اني يوم السمعت بعدنان اتزوج وسواها صدگ وما رداني
بجيت لحد ما خويت ومات كلبي وانغسل بدموعي من خلگ الله كلهم .. لا تطيبلي نفس بزلمة ولا اثقلي باحد ..
ليش اچذب على روحي اني عاجر
الزلمة اليتوددلي شرايد مني ؟
اعمرله بيت ؟ لو اخلفله جهال ؟
كاع صبخة اليتوددلي ما رايد غير يتونس بيه ويذبني من يمل
واغم روحي لو خليتها ونسة لواحد .
متمددة على فراشي وذابه ايدي على كصتي وعيوني بالسكف وبالي سرح يفكر والهموم اتلال اتلال على كلبي
شلون تخلص ؟
شيفكها وشيحلها ويا ناس
لا رايديني ولا جارعين
عاجر ومطلكة ولا ام ولا اب
ياهو اليحمل حملي وياهو اليريدني ؟
قدمت على راتب مال رعاية اجتماعية ولهساه ما طلع ..
هم حظي هذا وين ما احطها سودة مصخمة
نمت على بطن فارغة
وتوني بديت اغفي .. كمت اسمع نكط على المسكف
حديد وصوت النكط مسموع ..
شلت راسي باوعت لناحية الباب ..
اني حاطة باب حديد للسكيفة
بس الباب عطلان كوة ينجر وكوة ينسحب
فداكة بطانية بالباب خاطر لا كلساع اشيله اسده واشيله وافتحه .. الباب مفتوحة والبطانية علوها عن الكاع شبر
باوعت كاعد تمطر خفيف
انكلبت على صفحة خاطر اكمل نومي
لشوية وما احس الا شي ينكط
.. فزيت ولنها السكيفة تخر
نفضت البطانية وكمت بسرعة جريت المكينة والكهربائيات خاف يوصلهن مي .. وشلت الهدوم عليهن ودفعتهن المكان ما تخر منه السكيفة ..
زاد المطر والسكف كام يخر اكثر ..
ذبيت نايلونه على الهدوم والمكينة واخذت تليفوني
وردت اروح لغرفة عمي وعمي انام يمهم
بس من وصلت .. لكيت الباب مقفول
واذا ادك الباب وعمي نايم يصير اعصاب ويطلع حركته بيه
جا هسه وين اروح بهالليلة !؟
رحت اخذت دوشكي وبطانيتي ومشيت للدكان مال عمي يصير من ضمن البيت بس باب ع الشارع وباب مفتوح ع البيت .. مقفول من باب الشارع فرشت دوشگي بالكاع توني جاي اريد انام مر رسول ابن عمي كال : ها خوية جا شلج نايمة هنا
-السكف خر عليه بالغرفة
-انا اخوك جا ما حاطتلها نايلونة السكيفة
-لا والله خوية ما حاطتلها
-سهلة بلكي باجر اشوفلج نايلونه واني اسويلجياه كومي بغرفتنا نامي
-لا يطيك العافية عساك سالم
-وتضلين هنا
-هي سواد الليل ويفك الصبح واكوم شسوي
-جا خل اجيبلج بطانية بعد خاف تبردين
راح واني كعدت بالدوشك تلمسته اطرافة بيهن بلل كمت اخذ طرف حتى ما اتبلل اجا رسول جايبلي بطانية ثانية
يطيك العافية خوية تعبتك
-شني الحجي هاذ غير اختي انت
اخذ باكيت جكاير من دكان عمي ومشى
واني اخذت الغطا ولفلفت روحي ونمت كوا
بردت بهالليلة بردة .. بالعظم
اعظامي ضلع بضلع يطكطكن من البرد
گول كوة غفت عيني ونمت
ماكو چم ساعة وما اهيس الا عمي فوگ راسي : ياهو هاذ ؟ ياهو النايم هنا ؟
- ها ها عمي اني صبا
- هاه صبا جا شعدج نايمة هنا ؟
-عمي مطرت الدنيا والسكيفة خرت واجيت هنا
- وما جيتي لينا نمتي ؟
- جيت ولگيت الباب مسدود
- ها اي دهمي روحج عمي وكومي سويلنا ارويگ وخلني افتح الدكان الوادم راح تجبل تشتري ريوكها .. يلا بوي نفضي روحچ
- اي عمي صار
كمت لميت فراشي من الدكان وهو فتح
رحت للمطبخ حطيت قوري الجاي ونصيت جواه ورحت واتوضيت كبل لا تطلع الشمس، كاعد اصلي كعدت عمتي : ها بنيتي اصباح الخير الله يتقبل
- هلا يعمة اصباح النور
- اخذيلج بيضات من عمج وطكيهن على ما اخلص صلاتي خاطر نتريگ
مشيت كتلا على بيض
انطاني ٣ اخذتهن ومشيت للمطبخ سويت طاوة طماطة وبيض صحت على عمتي علمود ادك الباب على غرفة رسول تجيب خبز .. كالتلي ؛ رجلية ما يعينني من يمج انت دكي
مشيت دكيته طلعلي رسول بطرك الشورت
اندرت عنه وكتله ع الخبز كال : هسه اني اجيبه واجي اتريگ وياكم
اخذت الصينية وعمتي فرشت مدة كدام باب الدكان وحطت الصوبة مالتها علاء الدين ورسول انطاها الخبز وكعد يم الصوبة بردان وعمتي كامت تحمي بيه ع الصوبة واني اصب الجاي وعمي يبيع بدكان صاحتلا : سد الشباك حجي وتعال تريگ
اجا كعد: رسول ماخذ جكاير من الدكان
-انا !؟
-جا انا مو ماخذ
-ياهو الكالك
-انا حاسبهن غراضي واعرف الينكص منهن
-لا ماخذ ولا واصلهن شوف خاف يوسف ماخذ
-ولد ما بيكم كل خير من اريدكم تكعدون بدالي ساعة واحدكم يتكلب علي وعدي شغل وتعبان ومن اريدولكم حاجة اتسلتوها بلايا ما احس شمسهلها عدكم ولد الچلاب
ضحكنا وعمتي كالتله : هسه دتريك حجي اذكر الله
حجه : لا اله الا الله
واندارلي يحجي : وانت هسه شلون بسكيفتج راح تضل تخر
رسول : لا فد شوية لهناك امشي اجيبلها لفة مالت نايلون من حازم ابو الانشائية
- وحازم يفتح الصبح ؟ هو مو موظف بالكهرباء ؟
- اي الجمعة للعشرة هيج يفتح ، بس بايام دوامه ما يكعد الصبح .
عمي : هسه لو تشوفلها رجل وتعرس كعدتها هاي شنهي تتأمل عدنان يردها
حجت عمتي : هسه انت كل ما كعدت البنية جبت هالسيرة يا حجي شو جاي تشتغل وعايلة روحها وكاعدة بصريفتها يمك احذاك .
-جا انا كايل متعاجز منها بس غير تشوفلها رجل ليمتى تضل كاعدة هالكعدة هاي ؟
-وهو اجا الزين وكلنا لا .. شو وين الـ الله ذابه يجيها شكو واحد حالته تعبانة ورايد يعيش براسها .. هم تتزوج ويومين ويذبها غير واحد ابن اصول خوش ادمي يصونها يسترها مو كل اليدگ الباب انگله الك ، شو المسكينة لا اب لا خوان بيهم خير وهم ترد تتورط بزلمة ما بيه خير .
سكتته بهالحجي
وهم ياكلون ، حجيت : عمة انا فد شوية راح اطلع للسوگ اتسوك كم حاجة محتاجتهن للخياط ، محتاجين شي اتسوگلكم بطريقي ؟
- اي والله عمة اتسوكيلنا وياج امس هدى تكلي ما عدنا مسواك .. رسول شوف مرتك شمحتاجة
هز راسه وهو ياكل
خلصنا ريوكنا مشيت لغرفتي مسحتها وعزلت الهدوم والمكينة وشفت الاحتاجة والاريدة ولبست عباتي وطلعت من البيت اريد امشي رديت لعمي للدكان كتله : عمي فلوس المسواك عمتي كالت اخذيهن من عمج
- اطي منج وبعدين اطي
- ما عندي البجيبي رايحة اتسوك بيهن للخياطة والله ، اطينياهن عمي فدوة
- هسه عوفي الخياطة وهالسوالف الما بيهن خير دروحي اتسوكيلنا وردي راح يصير الضحى يمتى تجين يمتى تسوون الغدا استعجلي .. خياطة خياطة ما عدها غير الخياطة
- عمي جا منين اعيش غير بيهن ، دطيني
- كتلج ادفعي منج واني اطيج انكلعي
عفته ومشيت الفرع طلعت لشارع الداخل وكفت كية ركبت
بربع ذبني بالسوك القريب علينا ...
السوك كله مي نص مفتح نصه لا ..
وتجفص تجفص ونوم ما شابعة وروحي طالعة من الحجي والتسمعه اذني ويصمه الساني ما يحجيه وكلبي يحترگ بيه .
اتسوكت الاحتاجة ونص من مسواك البيت اليردونه
لان ما ضل عندي غير ربع دينار ارجع بيه للبيت ، ركبت كية وذبني براس الشارع مال بيت عمي .. اسحول بالعلاليك وامشي واريد اعبر للفرع بس اكو جيحة
ومناك اكو طين يابس
افتريت عود اريد امشي ع اليابس
توني اريد احط رجلي ع الطين ما احس الا رجلي تطمس بنص الطين وتفوت غميج اريد اطلع رجلي جلبت شحاطتي كمت اجر بيها .. جان تنكطع شحاطتي وتلزك بالطين
صحت : يمن دهر الدهركم كوووووون لا ليل نرتاح بيه وانام
لا نهار نرتاح بيه ونمشي براحة لا وادم زينة ونعيش وياها
شهالدنيا يربيييييي
ساعة الكشرة بيوم ما جابتني وذبتني
ما عرفت تنام ذيج الليلة وتعدمني وما تجيبني الهالدنيا الغبرررررة
كمت ادرم ويا روحي وعيوني دمعت واحجي بهظم
ورجليه طامسة بالطين
فزعلي رجال من ورا اجاني صوته : ها خير خوية كولي يا الله شصايرلج هااااااي
- ما صاير بس ميل عني انت
- اها جيتج عونة كلت خاف تحتاجين شي شمالج !؟
تنهدت وكتله : المعذرة منك خوية بس طك كلبي من هالدنيا هاي والله هسه شلون ارد للبيت حافية ما ادري ما ادري
- كولي يا الله كولي يا الله
شو ميلي منا وتعاي غسلي واطيني عنج العلاليك ذني بعد اخوچ
اخذ من ادية العلاليك
واني كمت اسحب برجلية من الطين وعفت شحاطتي لازگة
باوعلي ضحك
اندرت عليه : چا ناقصتك اني وتضحك عليّ ؟
- لا والعباس مو قصدي
دتعاي منا اغسلي رجليج بس غسلي
مشيت لمحل الانشائية
رفع الباب فتحه .. وكالي : هذا البوري غسلي رجليج بيه
- وشلون ارد حافية وهم اتطين !؟
- هسه دغسلي وخل اشوفلج بلكي عايفلي نعال تكرمين هنا تروحين بيه لهيلتج
فكيت البوري وذبيت جواريبي وكمت اغسل رجليه من الطين ..
طلع وهو يكلي : خوية بيتكم قريب لو بعيد ؟
- لا قريب بيت دكان الحجي ابو يوسف
-هاه انت من بيت حجي ابو يوسف ! شو ما شايفج !؟
-بت اخوه
-يا هلا ومرحبا خوية، ما طولج من بيت الحجي دخذي شحاطتي روحي بيها للبيت وعود وديلياها بيدي اي واحد
- وانت تضل حافي ؟
- اكعد بمحلي لبين ما توديلي الشحاطة شسوي ما لكيت النعال تكرمين خوما تروحين هيج ؟
-نعم الله عليك خوية الله ينطيك
بس العلاليك بلا امر عليك
- اي
اطاني علاليگي ونزع شحاطته من رجله
واني لبستها، شو رجلي فاتت كبل نص رجلي طلعت من الشحاطة لو باقية رجلي طامسة بالطين ولا طامسة بشحاطته
قياس رجلي ٣٨ والشحاطة قياس ٤٤ .. صرت فلم
هو باوع لرجلية شطحت ونزلن من الشحاطة جنهن مشط
شو هذا الله ذب عليه ضحك ، انداريت اباوع عليه حچه : علي العباس ما بقصدي اضحك عليج بس هي بعد
وضحك ..
- جا خوية هي ضلت عليك
كمت امشي واقبقب بالشحاطة
انداريتله : ادري شحاطة قبقاب رحمة لاهلك
- افا فوك ما عايفتني حافي تعيبين على شحاطتي ؟
ضحكت على ضحكته وهزيت ايدي ومشيت
واقبقب وبيدي العلاليك وامشي كوا جن بيه كساح حجيت ويا روحي : يا من دهيرة الطكتك كون على هالقبقاب
رد : هاه هاي عليّ ؟
-خوية مو عليك شني معلك اذنك يمي ..
هز ايده عفته ومشيت لحد ما وصلت بيت عمي يمكن نص الفرع كعد على صوت الشحاطة
حطيت علاكتي بغرفتي والمسواك بالمطبخ
ونظفت الشحاطة وحطيتها بعلاكة وصحت على هدى : هدى سويسو وين
ما جاوبتني
احاجيج
اندارت عليه باوعتي ودارت عني بمعنى ما تريد تحجي وياي
اني هم عفتها ومشيت لغرفتي اخذت الكلبيات الخيطتهن امس ومشيت صاح علي عمي : ها صبا رديتي؟
- اي عمي بس راح اطلع معتاز شي ؟
-وين رايحة
-شحاطتي انكطعت براس الشارع ورجال الله ينطي ابو انشائية اطاني شحاطة كالي ارجعي ودزيلياها بس سويسو ماهو وادزه، هل راح ارد بنفسي ارجعها
-ديلا لا تبطين
-ان شاءالله ، بس اكلك عمي صدك رسول وينه ؟
-طلع بشغله عليش ؟
-مو كال على السكيفة يحيطها بنايلون خوما تخر عليه اليوم مثل ليلة امس
-ما ادري عنه خابري وشوفي !
-زين عمي اودعناك
-الله وياچ
مشيت واني اطلع تليفوني خابرت على رسول
رد : ها صبا
-رسول وينك ؟
-طالع بفاتحة صارت عد واحد صاحبنا خطية امه ماتت
-يا خطية الله يرحمها جا اخذ راحتك خوية عسبالي اخابرك ع السكيفة
-بس اخلص الفاتحة ان شاءالله اسويلجياها
-يطيك العافية خوية
كاعد احجي انكطع الخط رصيدي خلص
تنهدت بحسرة
رسول طيب وخوش ولد وصاحب فزعة
بس مشكلته بين الحجي والفعل يحتاج فد سنة سنتين
ووذرة السان تروح من الملحة يلا يكوم للسالفة
عجوزي ... يخلصها بهسه وفد شوية
مشيت على كيفي وعبرت ورحت للإنشائية
طبيت الزلمة كاعد يحجي بالتليفون .. اشرتله وحطيت العلاكة مال الشحاطة هز راسه ، هميت اريد اطلع شفت رولة مال نايلون ورولة مالت سيم حاطهن بالباب .. اندرتله : بيش مترة النايلون ؟
حجه : ان شاءالله خل اشوف الزبون بعدين اخابرك الله كريم عود نروحله ..
سده واندارلي : ياهو التريدينه
-نايلون مترة ابيش
-اكو نوعيات .. اكو بالف واكو بالف ونص المترة واكو بالفين
-وشنو الفرق بيناتهن ؟
-القوة المتانة مالتهن الزينة ما تنشگ بساع انت المن رايدتهن ؟
-اغطي بيها السكيفة مالتي حتى ما تخر بالمطر
- اذا سكيفة اخذي ام الالفين خاطر ما تنشك ولا تتأثر بالشمس تفيدج ، بس شكم مترة تريدين
-والله خوية ما ادري
-انت مو كاعدة ابيت الحجي ؟
-اي
-جا شتسوين بالسكيفة وانت خطار
-مو خطار كاعدة عد عمي وهم الله ينطي انطاني مساحة من بيته بس امس بالمطر السكيفة كامت تخرخر
- وعمچ مكعدج بسكيفة ما عده غرف ؟
تنهدت : هسه بيش تحسبلياهن خوية
- غير اعرف كم مترة محتاجة ؟
- ما ادري يمكن عشر مترات
- يعني ب٢٠ الف
- يا دهر ومنيلي الـ ٢٠ نزل بعد
- هي شكدها الغرفة ؟
- تطلع تلاثة بتلاثة
- واذا تلاثة بتلاثة شلون ١٠ مترات؟ لازم بفيتة تقيسين شكد تحتاجين ويحتاج زلمة خوية هاذ مو شغل نسوان ينراد واحد يقيسلج ويجي ياخذ ويصعد ع السكيفة يشدها خو ما انت شمعرفج بهالأمور
- والله يا خوية ما ادري .. الله كريم عود اشوف رسول مشكور
- تريدين اجيج من اسد المحل اقيسلج واسويلجياها ؟
- تگدر ؟
- ان شاءالله بس خبري الحجي وخلي يخابرني وبعيني
- الله ينطيك العافية ومشكور ع الشحاطة
- الله يستر عليج خوية
مشيت للفرع وكفت اباب الدكان مال عمي كتله : عمي هذا ابو الانشائية اللي براس الشارع تعرفه ؟
- حازم ابو علي شماله ؟
- حاجيته على مود النايلون للسكيفة كال خلي يخابرني الحجي واني اجي اسويها ، فدوة عمي خابرله فد شوية بلكت الله ويجي يسويها ، رسول صارت عده فاتحة بسنة ما يسويها والله وبلياها اضل بالضيم
- هسه خل اخلص صلاة واخابرله ، وين رايحة شو واكفة ما اتطبين
- اريد اروح لوفاء بس انطيها غراض موصيتني عليهم وارد
- خوش روحي ولا تبطين
- عمي بروح الزهرة ما تنطيني عصير من البراد عليك العباس ريكي نشف من الروحة والردة
- اي اطيني فلوس
- كصهن من فلوس المسواك عود
- بت الچلاب تعايرينا بالمسواك
- يا اعايرك شنو غير دين تردلياهن عمي ترا ما عندي وام البنين مو تغلسهن
اطاني عصير وهو يكلي : دهاج هاج انكلعي لصاحبتج فضينا ولي .
ضحكت ويا : عمي والله مالي غرض فلوسي تطينياهن مو تكووول
- انكلعيييي
اخذت العصير وفتحته شربته بارد سرسح على كلبي
بالليل باردة بالنهار حارة مو شهر مصيبة
كملته واني بطريقي لبيت صاحبتي شمرته بالحاوية
ومشيت حتى احط الكلبيات الخيطتهن عد وفاء صاحبتي تشتغل من البيت حفافة و صبغ شعر وتبيع مكياج وملابس واني احط الاخيطه عدها يشترنه النسوان والها ع القطعة الف دينار.
صاحبتي هاي هم حالها امر من حالي ...
هي اكبر مني .. بس ما متزوجة
جانت تحبلها واحد اسمه حسن من عمرها ١٩ سنة لحد ما هسه عمرها ٣٢ سنة
جاب السنين وياها اليوم باجر اخطبج وبس خلي اتمكن وبس خلي يصير عدي .. ساعدته وداينته وفتحتله مشروع حتى يكدر يكون نفسه ويتزوج .. من نجح شغلة والله وفقه طكله مرة عمرها ١٥ سنة ، بحجة امي ما موافقة وشني تاخذلك مرة جبيرة ورحمها يابس اريدلك صغيرة واتزوج بت خاله .. وخلا وفاء تاكل بروحها وتحترك
عود يكللها اريدج زوجة ثانية ونأجر بس كون مرته وامه ما يدرن .. واهلها ما يرضون وباقية معلكة لا بيها خير تعوفه ولا مشت حياتها وباقية معلگة .. وتشتغل وتكد على روحها واهلها .
بس هي الاخذ راحتي يمها شوية واسولف واطلع البگلبي .. لان خواتي متزوجات وبعيدات مو كل وكت اشوفهن واشكيلهن ..
دكيت الباب محد فتحه عاد جريت السيم وفتحته
الدرج بصف باب الحوش صعدت لغرفتها مسويتها صالون ومحل بالبيت .. واني اصعد صوت الاغاني وصل لاذاني سادات الباب وكاعدات يركصن هي واختها المتزوجة جاية عدهم ومرت اخوها، وامها كاعدة بالكاع تباوعلهم ..
فتحت الباب عليهن : ها ولجن يالبرابيـ* كاعدات تردحن
صاحت وفاء : حدج حدج لا اطببن
-خير ؟
-ذبي همومج وبلاويج بالباب وطبي اردحي ويانا
ضحكت واني على صوت الاغاني اخذني الواهس و كابلتها اهز جتف وركبة
انا وياج يم شامة ..
صاحت الحجي امها : يا خالة حتى انت اتخبلتي وياهن ؟
- خالة لو ما الخبال الواحد يطك ويموت شضال بينا
صاحت وفاء: دنزعي عباتج شني مستحية
نزعت عباتي ورفعت كلبيتي شكلتها منا ومنا
وجريت حجابي افر بيه مثل السبحة واكابلها واغني
( بكيفنا ونلعب لعب ونسوي كلشي اللي نحب اني وياج )
ونردح ونطخ ابعضنا وشبعانات ضحك
ونغني ( عدكم درج عدنا درج نصعد ومن الله الفرح اني وياج)
والحجية طكت من الضحك على خبالنا
حجت : بالله هسه اليصورج ويشوفجن تركصن هيج ما يكول ذني شكد مرتاحات وما على كلوبهن هم مكضياتها ركص
خلصت الاغنية وكعدت اجاوبها : ايييي نخرخر راحة هيج يجري من الخشم .. اريد بس يوم اشوفلي هم اضوج ماكو
طكت روحي من الراحة
وفاء : يا اكلها اني طكت صفحتي من النوم اكول هلبت عندي شغل عمل هم غم احتار بيه بس اكل ونوم متنا من الراحة عمي
كمنا نضحك بصوت عالي
انداريت على لقاء اختها المتزوجة : يا دهر ولج اني ما سلمت عليج
رديت كمتلها سلمت : التهينا بالركص
باوستها: شلونج شلون صحتج
- الحمدلله انت شلونج
كعدت : اااااايه اني شلوني بنص الخير شحجيلج
على غرفتي المطوفة لو على مرت رسول الدايرة عني
لو على عمي الساعة يعايرني وساعة يداين مني
وفاء : وشمالها هدى وياج ؟
-شمدريني عنها شادة وياي فد شدة
الحجية : تخاف لا تاخذين رجلها لو عمج ينومج براس واحد من ولده وتطيح برسول
-واني شذنبي عمة والله اشوفهم مثل اخوتي واكثر وحتى همه بس بعد تفكيرها .. هسه عوفج مني اني طراكيعي ما يكضن .. انت شنو وضعج ؟
- على حطت ايدج يريد نأجر ونتزوج بس ابوي ما راضي
الحجية : لمصلحتها ما راضي يخالة حسن عاميها بس على يا مال ينطيها ؟ والله تعاي نتزوج وتبقين بشغلج هذا ونتعاون بالاجار وامي ومرتي ما يدرن .. شني بس اسمك رجل يهواي من وحشة الليل؟ .. بس بالليل تروحله والصبح تردلنا تشتغل عدنا ومحد يدري متروجة هذا حال يخالة ويرضالها ابوها؟
-لا والله مو خاله حقه ، هذا مسترخصج .. تشتغلين شني وهو شنو دوره بس على كد النومة ؟ اذا ما ياجرلج ويتكفل عيشتج وترتاحين بجاله عساج لتعرسين .. فوك ما ماخذته على ضرة ؟
وفاء: والله يا خية ما قانعة بس جيبي اليقنع كلبي ويخليني اعوفه .. اقرر واكول هاهية وبعد مالي غرض بيه بس شفته داگ عليه طار كلبي ونسيت عقلي
-هذا هم بلاء الله يبتلي بيه ابنادم يعلكه بواحد طايح حظه ويشل حاله
-شسوي بعد حظي ..
الحجية : وخك هو ذاك ابو راس الحار كل قسمة جانت تجيها واتوسل بيها ولج وفاء وافقي ولج حسن ما يفيدج والله حتى ضباط تخطبوها وما رضت يا حسن يا طلّابة حسن .. تالي هالذبة هاي وهو نايمله بحضن وحدة ام خمسطعش بحجة امي
وهي تكعد من السبعة ما تحط راسها غير ال١١ وال١٢ بالليل
من الشغل والفرفرة ع العيشة ويريدها تستمر خاطر تشتغل وتحط بجيبه
- الله كريم الله موجود ..
كاعد نحجي طبت مرة كامتلها وفاء ترحب بيها
كالتلها : بس حفافة وبسرعة اريد ارد بساع كبل ما يجي الزلمة وما يلكاني يلعب فلك
كتلها : ادري هالزلم ذولة ما من وراهم غير الهم ووجعان الراس
ردت عليه المرة : مصيبة مو زلم بالعباس شيبني هلبت الله الكاله مرة وافتك منه طلعت روحي
ضحكت : يا وتزوجين رجلج
- خية طك كلبي حاط كوره وكوري
الله فتحها عليه واشتغلت لو تسودن يدور ع الشر دواره حتى يبطلني
- جا فوك ما يعاونج
- شيعاون فدوة اروحلج هو لو بس يفكني من السانة اني بخير بس درمه حجي ما يخلص شلون اطلع صبح وعصر
وفاء : هم حقه يريله مرة بالبيت جا اذا انت اتطلعين الصبح وترجعين الظهر وتردين وره كم ساعة اطلعين يا زلمة يرضاها
- واعوف شغلي ورزقي بعد ما الله فتحها بوجهي لخاطر زلمة ؟ من عاب وجهه لا والله ما اعرف خلي يطك يروح يتزوج بس شغلي ما اعوفه وارجع اانطر من الكم فلس الينطينياهن للبيت والجهال ومحبوسة حبسة الجلب بالبيت بس طبخي و اخدمي ..
- وليش اتزوجي خو اطلكي منه الضرة مرة
- واعوف بيتي واتهجول خاطر هو ياخذ راحته ويتزوج ويضل البيت اله واني احتار بخلفته وبعيشتهم شمالني خو خل يتزوج ويحتار بالبيت وبالجهال والعيشة واني احتار بروحي
- مو هيج بس تكسبين راحة بالج
- با راحة فدوة اروحلج من اطلك غير ارد لاهلي جذب ما يخلوني اكعد وحدي بدون زلمة بالعباس يشكوني بالنص ، وارد اكابل الجناين واتحمل حجيهن ومسامرهن وتحريضهن ها طلعت ها اجت واسمي مطلكة وشيفكني من الحجي.. خو خل يتزوج ويشبع بالمرة والزلمة لو شبع ما بين رجليه وبين فيكه سد حلكه وسكت واني هذا الاريده .. يصم حلكه عني ويعوفني اشتغل واكبر شغلي براحتي
-شنشتغلين
- محل كماليات وملابس نسائية بسوگ الكيارة واخوتي محلاتهم بصفي واحد احذية والثاني ملابس
واريد افتحلي فرع ثاني اكبر شغلي
بس بالاول لازم اخلص من السان رجلي
لان اذا كتله اريد افتح فرع ثاني وهو اليتعارك وياي حتى اكعد
يبوي نصير دموم .. فهالاريد ازوجه ..
- الله يوفقج خية اني اروح بعد وفاء هاج ذني الكلبيات عود بس اكويهن وعلكيهن بلكت الله ينباعن واربحلي جم فلس منهن
حجت وفاء وهي تحف بالمرك :-سهله هسه اكويهن
-صدگ كبل لا اروح امس مرتلي ام حسين جابتلي قطعة وعرضت عليه اشتغل ويا ام وسام تريدلها حفافة وياها
- وام حسين شوصلها بام وسام ؟
-شبيج غير اختها ماخذة بت ام وسام چنة الها
-يااا ، لا تورطين روحج ترا ما تتعاشر والسانها ما يعرف غير الفشار تفشك بنص النسوان لا تحط حرمة لمرة جبير ولا تكول جهال كاعدين
-ما ادري كتلها شوفيلي شكثر تحسبيلي من يا ساعة ليا ساعة
- خوبينه تعاي اشتغلي هنا حفي واخذي نص الاجر الج وعاونيني علويش بعد متعنية مناك لهناك علمود جم فلس
- وفاء انت شغلج من الصبح لليل ما يخلص
-اي صبغ شعر بس حفافة احتاج عونة وانت بفرعنة بس ادكلج حولي علينا تعاي حفي واخذي فلوسح وارجعي وعلى كيفج التحفيها تاخذي ما عدج مجال وما جيتي محد اله عليج ومحد يحكمج
-والله ما ادري خل اگل العمي اذا رضى شكو بيها خو انت اقرب ، اكوم عمي كالي لا تبطين يلا مع السلامة
-وين اتغدي وامشي مسوين مركة سبيناغ طيبة والله
- الف عافية بس عمي مناك لو بطيت يكوم يحجي وهم اريد اسوي سكيفتي اذا اسهى عنها ومطرت اليوم معناها اضل بالضيم .
سلمت عليهن وطلعت ..
كربت من بيت عمي شفت سيارة اخوي جعفر بالباب
دخلت باب الدوانية مقابيل باب الشارع اول ما طبيت صار بوجهي
حجه : ها وين متخمة ما تعرفين تركدين انت ما تكعدين وتنسترين بالبيت شعدج اديحين
- هاي السلام عليكم خوية لو شني ؟ دكول الله يكويج شلون حالج خوية شمحتاجة .. بخيرهم ما خيروني بشرهم عموا عليه ؟
- شر منهو ولج العمى عليج ؟
- جا اسال كول اختي شمحتاجة ما محتاجة ما تكول نامت بردت شصار وياها منو حاجاها منو كدر خاطرها ابن امي ما يذكرني بس بالرزايل وعود اختك ويحقلك تحاسبني .. ما صايرة
كام من مكانه : شو انت السانج طولان ولج طالعلج صوت وتحجين ؟
-من ضيمي طلعلي صوت تعال شوف حالي
كاعد ابيتك وما تدريني عني ولو اجيت رزلتني
كاعد احجي وما احس يصم ايده ويلخني على وجهي
احس عيني طفت من قوة الضربة وجر راسي : ولج فوك ما مطلكة ورجلج ذبح علينا اسمعلج صوووووت ووووولج
اليوم اعلمج شلون اتطلعين صوتج ويااااااااي ولج طايحة الحظ..... يتبع
للانضمام لجروب الواتساب اضغط هنا