بقسم الشرطة..

دلف محمود ليجد علي يجلس بغرفة الضابط صامت والدماء منتشرة بالمكان، أقترب من صديقه بلهفة قائلا :

_ إيه اللي حصل والدم ده بتاع مين أنت كويس؟!.. 

أوما إليه علي ثم قال بشرود :

_ ده دم الظابط البنت عملت فيه كدة.. 

_ بنت مين؟!.. 

_ أروى.. 

جذب محمود خصلاته بغيظ مردفا :

_ ما تقول القصة كلها هتفضل تنقط كدة كتير.. 

ماذا يقول وهو الي الان لم يستوعب ما فعلته تلك المجنونة، زفر بضيق وقص كل شيء حتى وصلوهم للقسم فقال محمود بغضب :

_ أنت سامع نفسك بتقول إيه، عايز ست متجوزة ودفعت لجوزها، مستوعب الوساخة اللي طلعت من بوقك والا دي تهيقات.. 

رد الاخر بهدوء :

_لما تشوفها هتعرف إني عندي حق وبعدين جوزها راضية وكنت فاكر إنها كمان راضية بس بتتقل، المصيبه مش هنا أنت متعرفش هي عملت إيه لما جينا هنا.. 

سأله محمود ساخرا :

_هو في أسوأ من كلامك ده قولي خليني أفكر إزاي أعيد تربيتك أنت كمان.. 

فلاش باااك.. 

وقفت بحالة من الذهول، تحولت من صاحبة حق لأخرى يجب عليها الإعتذار من علي الحسيني، جلس بالمقعد المقابل للضابط وظلت هي واقفة أمامهم، ألقى عليها نظرة غاضبة قبل أن يقول :

_ جوزها على وصول وهيقول حصل إيه بنفسه..

أوما إليه الضابط بإبتسامة واسعة مردفا :

_ من غير ما حد ييجي يا باشا أنا عارف أنك مستحيل تكذب، أتفضل أنت وهي هتمشي لما ييجي حد يستلمها..

ما هذا بحق الجحيم ما هذا؟!.. دلف الي قلبها شعور باليتم قهرها لم تجد بحياتها شخص واحد بداخله ولو قليل من الضمير، نظرت لضحكته المنتصرة ولم تتحمل أكثر بكل الاحوال هي الخاسرة فتأخذ حقها أولا، تحدثت بقوة :

_ هو ايه أصله ده، بتكذبوا الكذبة وتصدقوها أنتوا الاتنين، الراجل ده أتهجم عليا في بيتي وحاول يعتدي عليا ده غير جاري الغلبان اللي مرمى في المستشفى بعد ما أستقوي عليه وضربه، يبقى يمشي إزاي يا باشا..

ضرب الضابط على سطح مكتبه بقوة قائلا بغضب :

_ هما مين دول اللي كدابين يا بت ما تفوقي، بقى عايز تقولي ان علي باشا الحسيني عايز يقرب منك أنتِ..

_دي الحقيقة هكدب ليه؟!..

اجابها بسخرية :

_ يمكن عايزة قرشين ما أمثالك رخيصة..

تحولت معالم وجه علي مع سماع حديث الضابط لها، حدق به بغضب لا يعلم لما شعر به وقبل أن يفتح فمه بحرف كانت أتت هي بحقها، أخذت طفاية السجاير من فوق الطاوله المقابلة علي وبكل قوتها ضربت الضابط بها بمنتصف رأس، رفعت رأسها بكبرياء قائلة وهي ترى الدماء تسيل منه :

_ كدة بقى أنا أخدت حقي ولما تحبسني هيبقى على حاجة أنا عملتها يا باشا..

انتهي الفلاش باااك..

_ الظابط راح المستشفى وهي دخلت الحجز..

أتسعت عين محمود من كم المصائب الذي فعلها صديقه، حرك رأسه مردفا :

_ البنت دي بنت راجل وطلعت أرجل منك ومن الظابط ومن الكلب اللي هي متجوزاه، خليك جنبها هنا يا علي ووصي الكل عليها لحد ما أروح المستشفى أشوف الظابط ووصل لفين، مش هسيبها تبات هنا كفاية عليها اللي شافته النهاردة وحقيقة جوزها..

خرج من غرفة المكتب وترك عليه بمحله، يسأل نفسه سؤال واحد يتركها وشأنها أم يقترب أكثر خصوصاً بعد شجاعتها تلك وبعد تفكير عميق قال :

_ بصراحة أنا عيل زبالة وهستغل الموقف لصالحي، مش هسيبها هي خلاص بقت بتاعتي، هتخرجي من هنا على قصر الحسيني يا أروى.. 

_____ شيما سعيد _____

بمنزل علام.. 

بداخل مرحاض غرفة سارة، أغلقت الماء ورفعت وجهها للمرايا، حدقت بانعكاس صورتها بأرهاق جسدي ونفسي، بدأت عينيها تسير على ملامحها الجميلة بحسرة، رأت بحياتها الكثير والكثير وإلى الآن تدفع ثمن زواج أبيها من والدتها، عادت ذكريات ليلتها مع محمود تطاردها، ليتها أغلقت عينيها ورفضت أمره برؤية كل ما حدث.. 

طبول تضرب رأسها بقوة، صرخات كثيرة تسمعها بقوة تذكرها بكل لحظة مرت عليها بحياتها، سقطت دموعها ومازالت تحدق بنفسها قائلة :

_ يا خسارتك يا سارة حلوة، حلوة أوي بس الدنيا أخدت منك كل حاجة وسابك شوية الحلاوة بس، الله يرحمك يا ماما كنتي دايما تقوليلي بلاش تفرحي بشكلك كدة الجمال ميسواش حاجة في سوق الحظ.. 

أبعدت وجهها عن المرايا، يكفي ما وصل إليها من مشاعر مؤلمة الي الأن، فتحت الماء ووضعت رأسها تحتها لعلها تغسل روحها المتألمة من الاوجاع، أخرجها رنين هاتفها من حالتها لتخرج من المرحاض والماء تتساقط على وجهها، رفعت الهاتف لتجد إسم مريم ابتسمت بسخرية وردت عليها :

_ خير لسة فاكرة إن ليكي حد تتصلي بيه.. 

وصل إليها صريخ الأخرى الحادة لتجلس على فراشها وتأخذ تنهيدة عميق ثم قالت :

_ أتكلمي بصوت واطي عشان أفهم أنتِ عايزة تقولي إيه يا مريم أو أقفلي لاني مش ناقصة صداع.. 

_ أختك اللي ربتك وفتحت بيتها ليكي بقت صداع دلوقتي يا ست سارة، عاملة نفسك هانم وخليتي البية يطرد علاء من الشغل وكل ده ليه عشان شافك وهو بيبوس فيكي صحيح رخيصة.. 

أتت لها بوقتها الصحيح، كانت تنتظر أحد يفتحها حتى تنفجر بوجهه :

_ لو كنت رخيصة كانت خليت الكلب بتاعك يقرب مني، الرخيصة فعلا اللي تعرف ان جوزها بيقرب من أختها وتكذب اختها وتصدق جوزها، فاكرة لما ترني تقولي الكلمتين دول هعيط وقولك حقك عليا كتر خيرك، لا يا حلوة أنا كبرت وفهمت الليلة ماشية إزاي، سنين وأنا بصرف عليكي أنتِ وجوزك مستحملة أعيش في بيت أقل من أوضة الكلاب في قصر أهلي عشان بس أفضل جنب أختي حبيبتي أصلي لو روحت لأهلي الخير اللي بييجي لاختي الغلبانة هيروح، العبيطة بتاعت زمان ماتت خدي جوزك وارجعي البلد خليه ينزل الغيط بدل مهو عاطل كدة والاحسن تبعدوا عني لأني من هنا ورايح لا عندي حاجة أخاف عليها ولا حاجة أخسرها وهاخد حقي من الكل.. 

أغلقت الهاتف بلا كلمة إضافية، لن تعود لبرائتها القديمةوحتى لو تمنت فالأمر خرج من بين يديها وأنتهى، لو لديها حق ببطن الحوت ستأخذه فهي الآن معها "محمود علام ".. 

زفرت بضيق عندما دق باب الغرفة ثم قالت :

_ أدخل.. 

دلفت الخادمة الخاصة بعايدة قائلة :

_ مدام عايدة طلبت تشوفك.. 

عايدة!!! تريد رؤيتها؟!.. لماذا؟!.. طلب منها عقلها رفض تلك المقابلة، لن تستطيع تحمل ضغط فوق ضغطها، حركت رأسها بقلة حيلة ثم أشارت للخادمة قائلة :

_ طيب عشر دقايق هسرح شعري واروح لها.. 

بعد ربع ساعة.. 

خطت بساقيها أول خطوة لغرفة محمود مع عايدة، صدمت من المنظر أمامها، أمرأة تبدو انها كانت جميلة لكن كان للمرض رأي أخر فأخذ منها ما أخذ، جهاز أكسجين معلق بجوارها بجواره محلول يصل إلى كفها، الغرفة كانت عبارة عن مشفى صغيرة.. 

ابتلعت ريقها ببعض التوتر قائلة :

_ أنا سارة.. 

كانت الأخرى مغلقة العينين تائهة بدنيا غير الدنيا، مع صوت سارة الناعم فتحت عينيها، راتها ويا ليتها لم تراها، جميلة جدا وجذابة جدا جدا، فتاة خلقت بقدر عالي من الفتنة، أخذت نفسها بتعب ثم قالت :

_ طلعتي حلوة أوي يا سارة.. 

ابتسمت إليها مردفة :

_ شكرا كلك ذوق، حبيت كتير أشوفك بس قالوا إنك بتحبي تبقى بعيد عن الكل، رأيك إيه ننزل نقعد تحت سوا.. 

رفضت عايدة بحركة سريعة من رأسها مردفة :

_ بحب أفضل في أوضة نومي مع محمود عشان لما أموت أموت فيها وأخر حاجة أشوف هو والأوضة اللي عشت معاه فيها وفيها كل ذكرياتي.. 

أشفقت سارة على حالها، فجلست على الفراش بجوارها ووضعت قبلة حنونة على رأس عايدة قائلة :

_متقوليش كدة ربنا يشفيكي وتفضلي مع جوزك وإبنك.. 

ابتسمت إليها عايدة بتعب ثم قالت :

_ مهو بقى جوزك أنتِ كمان.. 

صدمتها الجملة، أنتفضت جسدها على أثرها، نظرت لعايدة لتراها تبتسم كما هي، حاولت الحديث الإنكار لتكمل عايدة حديثها بهدوء :

_ شميت ريحة حريمي على بدلة جوزي أكتر من مرة، عشان كدة طلبت أشوفك ريحتك نفس الريحة اللي على الهدوم، محمود مش بيعمل حاجة حرام.. 

قامت من مكانها يجب عليها الفرار الان، لا لا قولي اي شيء يثبت عكس حديثها قبل الفرار، ضحكت ضحكة متوترة وقالت بنبرة حاولت أن تبقى قوية :

_ ابية محمود ده أخويا الكبير مفيش أي حاجة من الكلام ده، لو حاسة إني وجودي هنا هيشكك في جوزك أنا همشي.. 

_ يا ريت مشيك من هنا هيحل المشكلة، أنزلي أنا محتاجة أرتاح شوية.. 

_____ شيما سعيد ______

بعد ساعة بقسم الشرطة.. 

عاد محمود ودلف للمكتب الموجود به علي وجوده نائم على الاريكة بكل هدوء، جز محمود على أسنانه بغيظ من الآخر، أقترب منه وضرب على ساقه بقدمه قائلا :

_ أصحى يا بغل بدل ما أطلع بروحك في أيدي.. 

فتح علي عينيه بضجر بعض الألم من شدة الضربة، نظر لمحمود بطرف عينه ثم مرر يديه على عينيها ليفيق مردفا :

_ في إيه هو في حد يصحى حد كدة يا جدع أنت.. 

ازاحه ليجلس بجواره مردفا :

_ في دي عندك حق اللي زيك لأزم يصحى بالجزمة.. 

علي :

_ تشكر يا ابن الأصول، قولي عملت إيه؟!.. 

سند ظهره على المقعد ليأخذ بعض الراحة ثم قال :

_ اتنازل عن المحضر بعد ما أخد 100 ألف جنية، البنت الغلبانة هتطلع دلوقتي هاخدها لحد بيتها يا علي وأياك تقرب منها.. 

قطع حديثه نغمة هاتفه، فتح الخط سريعاً مع رؤيته لاسمها مزين للشاشة مصاحب بأحد صورها، قبل أن ينطق بحرف سمع صوتها المرتجف :

_ محمود تعالي في الشقة بتاعتنا دلوقتي حالا.. 

أغلق الخط وقام سريعاً فسأله علي بقلق :

_ ايه اللي غيرك كدة في إيه؟!.. 

_ مفيش حاجة بس أنا لازم امشي دلوقتي، علي خلي البنت تروح بيتها وخليك بعيد عنها.. 

ذهب بخطوات سريعة فتح باب المكتب ورحل، بنفس اللحظة رأت أروى طيفه أمامه، توقفت محلها قائلة بخوف :

_ محمود وهو ده محمود بجد والا أنا بتخيل؟!.. 

_ يلا يا بت أمشي خلي أم اليوم ده يخلص بقى.. 

فاقت على صوت العسكري لتمشي معه بصمت للمكتب، أول شيء وقعت عينيها عليه إبتسامة الأخر السعيدة، أقتربت منه بقوة وحاولت رفع يدها عليه قائلة :

_ مشفتش في حياتي واحد واطي زيك.. 

وضع ساق على الآخر ثم أشار إليها بهدوء مردفا :

_ تعالي أرتاحي أكيد أتعلم عليكي جوا أصلي بصراحة كنت موصي عليكي جامد.. 

كتم غيظها من نبرته المستفزة ثم جلست على المقعد المقابل إليه واضعة ساق على الآخر بنفس طريقته، قبل أن تأخذ راحتها بسند ظهرها قائلة ببرود :

_ اه تقصد جوز البقر اللي حاولوا يمدوا ايدهم عليا جوا؟!.. عموما هما دلوقتي في الاوضة اللي جنب الظابط لو حابب تلقى نظرة عليهم.. 

أتسعت عينيه بعدم تصديق مردفا :

_ أنتِ ضربتي دول إزاي؟!.. 

_ زي الناس ما أنا ست قادرة ومفترية وأيدي ولساني أطول من بعض، حاول تقرب مني وأنت تجرب.. 

ضحك ضحكة مستمتعة بالحديث معها رغم كل ما قالته، حك ذقنه وعينيه تتجول على جسدها أسفل العباية مردفا :

_ تستحقي أخوض عشانك التجربة، هديكي فوق اللي أخده جوزك ونتفاهم بالود.. 

رأت بعينه الإصرار عليها، زوجها اللعين ادخلها بمعركة كبيرة تركها تواجة بمفردها، يبدو أن الفرار الآن أصبح مستحيل ولابد من الدخول بالمعركة وتقبل الفوز والخسارة، تحركت بالمقعد لتقترب منه وجذبته من مقدمة ملابسه لينزل لمستوى طولها هامسة :

_ عايزني جامد أنت يا باشا مش كدة؟!.. 

أوما إليها مثل المسحور من تأثير قربه منها لتكمل هي بعدها عادت الي محلها بعيداً عنه :

_ يبقى تنفذ شروطي تأخدني بالرضا.. 

شروط!!.. من تلك التي تجرأ ووضعت شروط لعلي الحسيني؟!.. فاق من حلاوة اللحظة وعاد الي جبروته مردفا :

_ لسة متخلقش اللي يحط ليا شروط فوقي بدل ما ارجعك التخشيبة تاني.. 

أطلقت ضحكة رنانة قبل أن تقول :

_ لأ أتخلق وقاعد قدامك كمان تحب تسمع والا نمشيها بالبقاء للاقوي؟!.. 

_ رغم أني الاقوى بس هسمعك.. 

_ سيد تأخد منه الفلوس اللي دفعتها وتطرده من الشركة وتخلي أي شركة تانية ترفض تشغله، عايزة صاحب الشقة اللي كنت ساكنة معاه فيها يطرده، من الاخر ينام في الشارع ويأكل اللقمة من الزباله.. 

_ اممم وبعدين؟!... 

_ خلينا ماشيين خطوة خطوة، نفذ ده الأول وبعدين نشوف بعدين.. 

______ شيما سعيد ______

بمنزل محمود وسارة.. 

دلف لغرفة نومه صافحا الباب خلفه بقلق، رآها تجلس بالشرفة المطلة على الحديقة الصغيرة، مظهرها بمفرده لا يبشر بالخير، جسدها يرتجف، تفك كفيها ببعض بقوة غريبة، أقترب منها بلهفة قائلا :

_ سارة في إيه ومالك مش على بعضك ليه؟!.. 

رفعت رأسها اليه ثم قالت بنبرة صوت متوترة مصحوبة بالكثير والكثير من الندم :

_ مراتك عرفت أننا متجوزين.. 

جملة صغيرة هزت كيانه، يستحيل أن يستوعب عقله تلك الحقيقة، عايدة كيف عملت بزواجه من سارة وكيف هي حالتها الأن؟!.. تغيرت معالم وجهه لتفوح منه النيران ثم سألها بنبرة صوت مريبة :

_ مين اللي عرفت أننا متجوزين؟!.. 

أنكمشت حول نفسها بخوف، شعرت ببوادر الخطر تدلف الي أعماقها ليرتجف قلبها رعبا ولا تعمل لما، همست بتقطع تتمنى أن يأخذها بين أحضانه الان ويجعلها تشعر ولو بقليل من الأمان :

_ الصبح كنت قاعدة في أوضتي والخادمة بتاعتها جات وطلبت مني أروح لها، روحت لها واتكلمت معاها عادي فقالت فجأة اني مراتك قولتها إيه الكلام ده قالتلي إنها شمت على هدومك ريحة معينة وطلبت تشوفني عشان تتأكد وتأكدت فعلاً لما شمت ريحتي، طردتني برة الأوضة بتاعها قبل ما أقول أي حاجة.. 

تركها تتحدث مثلما تريد، أوما إليها وعلى تعبيرات وجهه غضب أعمى، جذبها من فوق المقعد لتقف امامه نظر إليها نظرة كانت كفيلة تجعلها تفقد الوعي ثم قال من بين أسنانه :

_ اممم، بقى هي دي لعبتك، تعرفي عايدة وتحطيني قدام الأمر الواقع، طيب كنتي أستنى شوية على الاقل اتعلق بيكي وأبقى باقي عليكي، كنتي اعملى حاجة واحدة تخليني أقف قصاد مراتي عشانك.. 

حركت رأسها بنفي وقالت :

_ أنت بتقول إيه أنا مستحيل أعمل حاجة زي دي، هقول لست مريضة جوزك أتجوز عليكي؟!.. أنا مش زبالة للدرجة دي.. 

عض على شفتيه وأخرج هاتفه مردفا وهو يقوم بالاتصال على الخادمة :

_ هنشوف دلوقتي البنت طلبت إنك تروحي لعايدة والا لا لأني قولتها ممنوع دخولك لعايدة حتى لو عايدة طلبت ده.. 

فتحت الخادمة الخط وقالت ببكاء :

_ عايدة هانم تعبانة جدا يا محمود بيه، آنسة سارة دخلت لها غصب عني وقالت لها إن حضرتك متجوزها عليها.. 

كانت بحالة من الذهول وهي تسمع تلك الكلمات، للمرة المليون تتعرض للظلم، حركت رأسها عدة مرات برفض قائلة :

_ والله العظيم ده كذب صدقني انا.. 

قطع حديثها قائلا بنبرة محتقرة :

_ أنتِ طالق... 

______ شيما سعيد _____