صباح يوم جديد فى فيلا عزام اللى صحى من بدرى وبيتأمل ملامح نورة اللى بيعشقها وحس بيها بدات تصحى بعد عنها وعمل نفسه نايم عشان يشوف رد فعلها

نورة بدات تصحى بتفتح عينيها وتقفلها تانى وافتكرت الاوضه الضلمه اللى كانت فيها وفتحت عينيها بخوف على امل انها لسه موجوده فى البدروم لاقت نفسها فى اوضه اول مرة تشوفها لسه هتقوم بصت جمبها شافت عزام نايم جمبها استغربت هى جت هنا امته وازاى اخر حاجه فكراها انها كانت فى الاوضه الضلمه وبصت لملامحه اد ايه هادى جداا وهو نايم وملامحه حلوة مع بشرته السمرا وشعره الاسود الناعم اللى نازل على وشه مخلياه وسيم جدااا نورة بعدت نظرها عنه لما افتكرت اللى عمله فيها وقامت قعدت

عزام عمل نفسه لسه بيصحى ولما شافها قاعده قعد وسند ضهره على السرير:صباح الخير

نورة جسمها اترعش لما سمعت صوته:انا جيت هنا ازاى

عزام:انا اللى جبتك لما اغمى عليكى

نورة بصتله:اغمى عليا

عزام:ايوا

عزام مسك فونه وكلم رحاب فى المطبخ وقالها تحضر الفطار وتطلعه الجناح

عزام:دقايق والفطار هيكون هنا عشان تفطرى وتاخدى علاجك

نورة:علاج ايه

عزام:انتى شكلك بتخافى من الضلمه وكمان ماكلتيش اى حاجه عشان كدا اغمى عليكى وجبتلك الدكتورة وكتبتلك شويا علاج

نورة:انا مش عايزة اكل ولا اخد علاج

نورة قامت من على السرير

عزام قام وقف قدامها:راحه فين

نورة بتحاول ماتبصش فى عينيه:راحه اوضتى

عزام:لا انتى مش هتروحى اوضتك

نورة خافت فكرت انه هينزلها البدروم وانهارت:لالالا مش عايزه انزل تحت تانى لوسمحت انا مش بحب الضلمه ولا انى افضل لوحدى  هعمل كل اللى انت عايزه بس بلاش تنزلى تحت تانى ونبي

عزام:مش هتكلمى اخوكى تانى ولا اهلك

نورة عيطت اكتر وعزام مقدرش يشوف دموعها بشكل ده وضمها لحضنه ونورة حاولت تبعد بس عزام شدد على حضنها فمسكت فى التيشرت بتاعه وعيطت اكتر وعزام كان حاسس بقلبه هيخرج من مكانه من قربها

نورة بتعيط فى حضنه:انا مقدرش ابعد عن ماما ولا يوسف وفيروز مقدرش والله مش هقولهم حاجه تاني بس بلاش تبعدنى عنهم عشان خاطر ربنا

عزام:هششش اهدى ادخلى اغسلى وشك وتعالى يكون الفطار جه عشان تاكلى

نورة بعدت عن حضنه بكسوف ودخلت الحمام ووقفت قدام المرايه وبتفكر اد ايه حضنه دافى

نورة فاقت من تفكيرها وغسلت وشها وخرجت كان عزام قاعد على الكنبه وقدامه الفطار على التربيزة

عزام قام وقف:هدخل الحمام واخرج نفطر سوا

نورة هزت راسها باه

وبعد شويا عزام خرج وفطرو سوا وعطى لنورة علاجها ولبس عشان يروح المعرض وقال لنورة ترتاح فى الجناح ومتخرجش منه

****************

فى معرض الصياد

يوسف:يعنى كانت عنده امبارح

امير:اه ولسه عنده لحد الوقت

يوسف:امير عايزك توصل لحد من اللى بيتعامل معاهم شادى

امير:قصدك اللى بيتاجرو فى مواد البناء المضروعه

يوسف:ايوا لان لو طلعو بيستخدمو مواد مضروبه يبقي دى احلى ضربه لابن الشرقاوى

امير:بس عزام سمعته معروفه فى السوق واستحاله يدمرها بسهوله هو اصلا مش محتاج فلوس عشان يعمل كدا

يوسف:اهو نشوف اى حد وخلاص ونعرف اخرهم

امير:اللى تشوفه هخلى رجالتى يعرفو مين اكتر حد بيتعامل معاه شادى

يوسف:تمام شحنه قطع الغيار هتوصل امته

امير:ده الموضوع اللى كنت عايزك فيه

يوسف:موضوع ايه

امير:الشركه عايزة تعلى السعر ياما هتغلى الطلبيه

يوسف بعصبيه:نعم ماهما اخدين فلوسهم وفوقهم زياده كمان

امير:انا اصلا مش مطمن لشركه دى حاسسهم بيلعبو معانا معقول يبقو متفقين مع عزام

يوسف بتفكير:معقول

امير:مش عارف يايوسف انا اتكلمت معاهم كتير وهما رافضين يبعتو البضاعه غير لما ياخدو باقى المبلغ

يوسف:طالبين كام

امير:١٠٠ الف

يوسف:ليه ان شاء الله بلاش تتواصل معاهم تانى هتلاقيهم هما اللى بيجرو ورانا

امير:بس احنا محتاجين بضاعه

يوسف:اطلب من الشركه اللى كنا بنتعامل معاها الاول

امير:تمام صح الواد اللى اسمه شادى الراجل اللى ماشي وراه قالى انه راح قابل واحد وانا قولته يمشي وراه يشوف طلب منه ايه بس المفاجاه بقي انه الراجل اللى قابله كان واقف عند العمارة وبيسال عليكم

يوسف:ابن🐶باعت حد يجيبله معلومات

امير:الظاهر كدا

يوسف:خلي عيونك عليه ياامير

امير:ده اللى انا عامله ..يوسف

يوسف عرف انه عايز يسال على نورة:كلمتنى ياصاحبي

امير:وهى عامله ايه

يوسف حكاله اللى حصل

امير بخوف:والكلب ده عملها حاجه

يوسف:مش عارفه بحاول اتصل على الرقم بس اتقفل اكيد كسره

امير:واحنا هنفضل ساكتين وسايبنها معاه كدا

يوسف:بقت مراته ياصاحبي وده اللى معجزنى

... انا لازم ارجع المحل لان جيلى بضاعه جديده

امير:تمام ياصاحبي

********************

شادى قاعد فى صاله شقته وجمبه شيرين وبيرن على ابوه

شادى:ازيك يا والدى

منصور:لسه فاكر ان ليك اب

شادى:مشغول يابابا والله

منصور:دراعك عامل ايه

شادى:لسه اسبوع وهفك الجبس بقولك ايه

منصور:عايز ايه

شادى:انا عايز رقم سوسن مرات عم يوسف الصياد

منصور:هتعمل بيه ايه مش عايزين نلعب معاه انت شوفت اخر مرة عمل فيك ايه

شادى:اطلع منها انت هاتلى رقمها يلا

منصور:هقفل وابعته ليك

شادى:تشكر ياوالدى سلام

منصور:سلام ياخويا بس انا ماليش دعوة بيك

شادى:حاضر

شادى قفل وابوه بعت الرقم

شيرين:حلو اوى هات اكلمها

شادى:وماكلمهاش انا ليه

شيرين:عشان انت معروف لكن انا لا وبعدين احنا ستات وهنفهم دماغ بعض

شادى:اتفضلى ياست

شيرين اخدت الرقم واتصلت عليه

سوسن:الو

شيرين:سوسن هانم

سوسن ضحكت:هانم ايوا ياختى سوسن هانم مين معايا

شيرين:انا شيرين وعايزاكى فى موضوع مهم

سوسن:شيرين مين انا معرفش حد بالاسم ده

وايه الموضوع اللى عايزانى فيه

شيرين:صح انا وانتى منعرفش بعض بس هدفنا واحد

سوسن:هدف ايه ده

شيرين بغل:عيله الصياد

سوسن:شكلك بتحبيهم اوى

شيرين:جداااا

سوسن ضحكت:وعايزه ايه منهم بقي

شيرين:بنتهم اخدت حبيبي منى

سوسن:قصدك نورة يعنى هى اتجوزت بجد

شيرين:انتى متعرفيش

سوسن:سمعت طراطيش كلام كدا بس لما سالت عنها بيتهربو

شيرين:اتجوزت وجوزها اتجوزها بالغصب عشان ينتقم من اخوها

سوسن:الله الله وايه المطلوب منى

شادى شاورلها انهم يبعدو فيروز عن يوسف

شيرين:فى الوقت الحالى عايز ابعد يوسف عن مراته

سوسن:دانتى جيتيلى فى ملعبي وده نفس طلبي

شيرين:انا عارفه انك عايزة تنتقمى منها عشان بنتك

سوسن:وانتى عرفتى منين

شيرين:مصادرى ياسوسن هانم

سوسن:والمطلوب

شيرين بدات تقولها اللى المفروض يعملوه وسوسن كانت مبسوطه انها هتاخد حق بنتها سوسن:فهمت وهعمل كل اللى انتى عايزاه بس مش ببلاش طبعاا

شيرين:دانا يعتبر بساعدك

سوسن:لااا انا من غيرك كنت هعمل كدا يعنى انتى اللى محتاجانى

شيرين:عايزة كام

سوسن:٢٥٠

شيرين باستغراب:٢٥٠ ايه جنيه

سوسن:جنيه ايه ياحلوة ٢٥٠ الف

شيرين:بس ده كتير اوى

سوسن:ولا كتير ولا حاجه

شادى شاورلها توافق

شيرين:حاضر هجهز المبلغ واول ما تنفذى هبعتهملك

سوسن:حلو اوى سلام ياحلوة

سوسن قفلت ودخلت اوضت بنتها وحكتلها اللى حصل عشان تساعدها وايه فرحت وحلفت انها تبعدهم عن بعض

******************

نورة قاعده زهقانه قررت تقوم تتفرج على الجناح لانه كبير جدااا

وهى كانت قاعده فى الاوضه اللى كانت كبيرة جداا وكانت بالوان فاتحه

وخرجت لريسبشن الكبير  اللى فيه شباك كبير من الازاز بيخرج على البلكونه الكبير الخاصه بالجناح وفيها حمام سباحه

وفى اوضه اللبس والحمام ومطبخ خاص بالجناح واوضه جيم ومكتب لعزام

نورة:ايه كل ده ... وانا اللى كنت مفكرة شقتنا واسعه .... اوووف انا زهقت وقالى ممنوع تنزلى تحت

نورة بصت على صورته الكبيرة اللى فوق السرير وقربت منها وسرحت:حلو اوى ... حلو ايه ده مز المزز الصراحه...الله يخربيتك يانورة بتعملى ايه انتى ناسيه هو عمل فيكى ايه

نورة بصت لصورة تانى:بقولك ايه انا مش هتخدع فى وسامتك دى ولا تهز شعره فيا انا بقولك اهو ... انا هروح اتفرج على مسلسل ولا فيلم احسن

******************

بليل شيرين رجعت على الفيلا

شيرين:رحاب عزام بيه هنا

رحاب:لا ياهانم لسه مرجعش

شيرين:حاضر

شيرين طلعت وقررت تعمل مفاجاه لعزام لما يرجع وراحت اوضتها الاول اخدت شاور ولبست قميص نوم قصير لا يستر شئ ولبست فوقه روب قصير وعملت ميكب كامل وخرجت من اوضتها وراحت على جناح عزام وفتحت دخلت واتفاجأ بنورة قاعده على الكنبه وبتتفرج على مسلسل على الشاشه الكبيرة الموجوده فى الجناح واتفاجت بشيرين قدامها بالمنظر ده وقفت مصدومه ازاى جايه هنا وباللبس ده

شيرين بعصبيه:انتى بتعملى ايه هنا

نورة.....

شيرين:ياانتى بتعملى ايه هنا

نورة:هكون بعمل ايه يعنى

شيرين:طب يلا امشي روحى على اوضتك ولما عزام يجى هقولك انك دخلتى جناحه فى غيابه

شيرين قربت من نورة اللى واقفه متسمرة مكانها وزقتها بقوة:يلا برا

نورة وقعت وراسها اتخبطت فى التربيزة ومسكت راسها وجع

شيرين:يلا يابتاعه انتى اخرجى

نورة قامت وقفت:انتى بتستعبطى ازاى تعملى كدا وانا مش هخرج من هنا

شيرين:ده جناح عزام انتى فاهمه

نورة:لا الظاهر كدا انتى اللى مش فاهمه حاجه واديكى قوليتلها بلسانك ده جناح عزام يعنى جوزى يعنى انا افضل هنا وانتى تغورى برا ولمعلوماتك انا مدخلتش فى غيابه لا ده هو اللى جابنى هنا بنفسه كمان فيلا كدا يابتاعه انتى اخرجى برا

شيرين:انتى ازاى تكلمينى كدا وبعدين جناح ايه اللى عايزة تفضلى فيه ياروحى انتى اخرك تنزلى تقعدى فى المطبخ مع الخدمه ماهما من نفس الطبقه الحقيرة اللى انتى منها وانا اللى هفضل هنا اصل زومى مش بيقدر ينام بعيد عن حضنى

نورة برقت بصدمه:انتى بتقوليلى انا الكلام ده

شيرين بصت حوليها:انتى شايفه حد غيرك هنا اوجهله كلامى

نورة:انتى اللى جبتيه لنفسك

شيرين:مش فاهمه

نورة:افهمك انا

نورة هجمت على شيرين جابتها من شعرها وشدتها وخرجتها برا الجناح كله ووقعتها على الارض

شيرين:يابيئه ازاى تعملى كدا

نورة بصوت عالى سمعه عزام اللى لسه واصل الفيلا:انا بيئه ياللى مشوفتيش بربع جنيه تربيه اما وريتك

نورة هجمت عليها وقعدت فوقها وشديتها من شعرها وكانت بتضربها بغل وطلعت فيها كل غيظها من عزام ومنها

عزام لما سمع صوتها طلع جري ورحاب ومريم كمان طلعو يجرو وعزام اتصدمو من المنظر وجرى على نورة شالها من فوق شيرين وبعدها عنها

نورة:ابعد عنى سيبنى اربيها

شيرين:ااااه شايف ياعزام البت البيئه دى عملت فيا ايه

نورة بتحاول تفك نفسها من قبضه عزام:والله العظيم لو مسكوتيش هتشوفى هعمل فيكى بقي انا جايه من طبقه حقيرة والله مافى احقر منك

شيرين قامت وقفت بتعب واستغلت ان عزام ماسك نورة ولسه هتهجم عليها عزام مسك ايدها:ايدك لو اتمدت عليها هتندمى

شيرين:البت الحقيرة دى غلطت فيا وضربتنى ياعزام وكمان دخلت جناحك بدون علمك تلاقيها كانت بدور على اوراقك المهمه تديها لاخوها ماهى خانتك مرة قبل كده

شيرين صرخت لما عزام ضربها بكل قوته قلم على وشها ووقعت على الارض ونورة اتصدمت ومش مصدقه انه عمل كدا

عزام:اياكى تانى مرة تغلطى فى مرات عزام الشرقاوى وانا اللى جبتها الجناح لان ده مكانها هى ست البيت كله والهانم اللى هنا انتى سامعه يلا قومى روحى على اوضتك احسنلك

شيرين قامت بتعب وبصت لنورة بغل وغيظ ونورة كانت بتبصلها بانتصار وراحت على اوضتها وهى مش قادرة تمشي

نورة بصت لعزام وجواها فرحان انه دافع عنها وكمان جبلها حقها منها

عزام بصلها وشاف فوق حاجبها متعور:ايه ده انتى اتعورتى من ايه

نورة حطت ايدها على الجرح واتوجعت:وقعت واتخبطت فى التربيزة

عزام بص لرحاب:هاتى علبه الاسعافات بسرعه

رحاب:حاضر

عزام مسك ايد نورة ودخلو الجناح وقعد على الكنبه وهى قدامه ورحاب جت وجابتله علبه الاسعافات وبدا يمسح الدم اللى نازل وعقمها ولزق عليها لزق طبي

نورة بصاله اوى وافتكرت كلام شيرين انه مش بينام غير فى حضنها وقامت وقفت بسرعه

عزام:مالك

نورة:مافيش انا راحه اوضتى

عزام:اوضه ايه انتى هتفضلى هنا فى الجناح

نورة بغيظ:لا شكراا مش بحب اخد مكان حد

عزام وقف قدامها باستغراب:تاخدى مكان مين مش فاهم

نورة:اصلك  مش بترتاح ولا بتنام غير فى حضن شيرين هانم مش كدا

عزام ابتسم ودى كانت اول مرة نورة تشوفه بيتسم:وهى اللى قالتلك كدا ... ادخلى غيرى هدومك يانورة عشان ننام يلا

نورة:ننام فين حضرتك هو انت خدت عليها ولا ايه انا هروح انام فى اوضتى مش هفضل معاك هنا

عزام مستغرب قوتها وفرح ان اخيراا نورة رجعت تانى هى دى البنت القويه اللى عشقها قلبه وكان نفسه يشكر شيرين انها رجعت حبيبته ليه

عزام قرب عليها:اه اخدت عليها وانتى مش هتنامى غير هنا فى جناحى وفى حضنى كمان

نورة برقت:مستحيل ده يحصل

عزام:لا هيحصل وبلاش تعندى معايا احسنلك

نورة خافت من تهديده:اوووف

نورة راحت قعدت على السرير والباب خبط وعزام فتح ودخلت رحاب ومريم ومعاهم كل هدوم نورة

نورة:دى هدومى

عزام:بما انك هتفضلى هنا فطلبت منهم ينقلو كل حاجاتك هنا

نورة راحت اخدت بجامه من الهدوم ودخلت الحمام وقفت قدام المرايا وحطت ايدها على قلبها:ماتهدى ياعم انت عمال تدق ليه كدا

نورة غيرت وخرجت كان عزام قاعد على الكنبه بيدخن وراحت نامت على طرف السرير وبعد شويا عزام اتاكد انها نامت راح نام جمبها وشدها لحضنه ونام

******************

عند فيروز كانت واقفه فى البلكونه بتستنى يوسف لانه اتاخر فى المحل اوى اول مالمحته داخل العمارة وهى عارفه انه هيطلع شقته لانه لما بيجيله بضاعه جديده بيطلع شقته عشان يظبط كل حاجه تخص الشغل والحسابات خرجت من شقتهم ولسه هتنزل السلم وقفت لما سمعت صوت ايه

ايه:اااه يايوسف

يوسف:انتى كويسه

ايه بدلع:رجلى يايوسف رجلى

يوسف:انا اسف والله ماخدتش بالى

فيروز نزلت بسرعه وشافت يوسف مسند ايه وهى لابسه بجامه ضيقه جداا وبشعرها

ايه لمحت فيروز واقفه على السلم بصتلها بصه غريبه فيروز استغربتها ونزلت وقربت منهم:فى ايه يايوسف

يوسف:ولا حاجه ياحبيبتى انا كنت طالع مستعجل وخبطت فى ايه ووقعت على السلم

فيروز:لا والله وانتى ايه اللى مخرجك من شقتكو ياايه هانم

ايه بدلع:كنت طالعه اشم شويا هوا ياچو والله

فيروز زقت يوسف بعيد عن ايه اللى كتم ضحكته على فراشه قلبه اللى اول مرة تبقي غيرانه عليه كدا

فيروز:عنك ياحبيبي انا هسندها

فيروز فتحت شقه ايه لان المفتاح كان فى الباب:ادخلى ارتاحى يايويو ولو تعبانه خلى عمو حسن يوديكى المستشفى يمكن تكون انكسرت انشالله

ايه:فال الله ولا فالك ياروزة

فيروز زقتها جوا شقتهم وقفلت الباب وبصت ليوسف بغيظ وهو كاتم ضحكته

فيروز:اضحك اضحك بلاش تكتمها

فيروز طلعت السلم ويوسف طلع وراها وهو بيضحك اوى:انتى رهيبه ياروزة

فيروز وقفت قدام شقتها وقربت من يوسف: اياك تقرب من البت الملزق دى تانى يايوسف والله هقلب عليك

يوسف:ابوس ايدك بلاش قلبتك انا ماصدقت انك رضيتى عنى وريحتى قلبي ياقلبي

فيروز ابتسمت:ماااشي هعيدها المرة دى بس يابن الصياد

يوسف:قلب وروح وعقل ابن الصياد يلا ادخلى نامى عشان عندى شغل كتير

فيروز:انت ماكلتش حاجه من زمان صح اعملك عشاا

يوسف:لا ياروحى انا هشتغل شويا وانام

فيروز:وتفضل تشتغل وقت طويل من غير اكل لا انا هعملك سندوتشات خفيف خفيف ايه رايك

يوسف:ماشي ياقلبي

فيروز:هجهزهم واطلعلك

يوسف:هستناكى

************

يوسف دخل شقته واخد هدوم ودخل الحمام ياخد شاور وبعد شويا فيروز طلعت معاها صنيه فيها سندوتشات وكوبايه عصير وحطيتها على تربيزة الركنه وقربت من اوضه النوم عشان تنادى يوسف سمعت صوت ميا عرفت انه بياخد شاور بعدت بسرعه وراحت قعدت على الركنه

بعد شويا يوسف خرج وهو لابس بنطلون قطنى وحاطط فوطه على كتفه ولما فيروز شافته شهقت:نهارك مش فايت ايه ده ادخل البس بسرعه

يوسف قعد على الركنه جمبها واتكلم بمكر:الجو حر يافراشتى

فيروز قامت وقفت:يووووسف ياصيااااد بلاش تلعب معاايا

يوسف:العب معاكى انتى عبيطه يافيروز دانتى مراتى ياهبله

فيروز:قول كدا بقي مفكر عشان مكتوب كتابنا تمشي كدا قدامى لاااا يابابا انسي دانا فيروز

يوسف:ماشي ياست فيروز وانا متعوده افضل كدا ولا تكونى مش واثقه فى نفسك

فيروز:مش واثقه فى نفسي ازاى يعنى

يوسف:انى اثر عليكى وتضعفى

فيروز برقت:ده على اساس انك هتغرينى بعضلاتك دى مثلا لا فوق يابابا ولا تقدر تقرب منى

يوسف ضحك:والله انتى هبله يافيروز مانتى قدامى طول الوقت لو عايز اعمل حاجه هعملها وخصوصاا انك الوقت حلالى بس انا مقدرش اعمل كدا لانك قلبي وانا مقدرش اوجع قلبي او ازعلها وبعدين دى مش اخلاق يوسف الصياد انا خرجت كدا قدامك لانك مراتى وانا جوزك فده عادى لكن عمرى مااخون ثقه صفصف وثقتك ابدااا

فيروز:تعرف انى بحبك اوى

يوسف بغمزة:وانا بعشقك يافراشتى ... صح فكرتينى فى حاجه جتلى النهارده مع البضاعه وعجبتنى اوى استنى اجيبها

يوسف دخل الاوضه وطلع علبه من البنطلون بتاعه ولبس تيشرت وخرج لفيروز ومد ايده ليها:ايه رايك

فيروز مسكت العلبه وفتحتها وكانت سلسله على شكل فراشه ودخلها لون البينك

!

فيروز:حلوة جداا وشيك

يوسف:مبروك عليكى

فيروز بصتله:ليا انا

يوسف:اومال ليا انا اول ماشوفتها قولت دى لفراشتى

فيروز:لا يايوسف انت جبتلى هدايا كتير اوى وكلهم غاليين جدااا كفايه بجد

يوسف:مافيش حاجه تغلى عليكى ياقلبي

فيروز ابتسمت:ربنا يديمك احلى نعمه فى حياتى ياچو

يوسف ضحك وقرب منها وباس راسهااا

فيروز:يلا كل بقي السندوتشات عشان تشتغل وانا هنزل بقي تصبح على خير

يوسف:وانتى من اهلى ياروزة

فيروز نزلت ويوسف قعد عشان ياكل ولما خلص دخل المكتب عشان يشتغل........

&&&&

واخيراا نورة رجعت لطبيعتها واخدت حقها من شيرين😂😂

احنا بناتنا مافيش اقوى منهم😂😂