يشاهد سلطان صورة الجنين في رحم جميلة فيبتسم : هو ده يا دكتور ؟

الطبيب " يضحك " : قصدك هي دي .

سلطان : هي بنت يا دكتور ؟

الطبيب : بنت زي القمر .

جميلة : بنت !!!

الطبيب : ايوه بنت .

تتغير ملامح جميلة ويبدو عليها الحزن !!

سلطان : مالك يا جميلة زعلتي ليه ؟! كل اللي يجيبه ربنا خير .

جميلة : كان نفسي اجيبلك ولد ، يا عب.يطة ده ربنا اللي بيجيب وكل اللي بيجيبه رزق وخير ، الحمد لله .

صباح اليوم التالي

يدق سلطان باب غرفة شهد ثم يدخل ويقول لها : شهد انتي حطتيني قدام اختيار صعب ما بين اني اطلق جميلة  او اطلقك وانا جاي اسألك ده أخر كلام عندك ؟

شهد : ايوه .

شيماء : انت جاي بعد اسبوع تسألها اذا كان اخر كلام ولا لأ !!!

سلطان : بعد اذنك يا شيماء انا بكلم شهد .

شهد : استني انتي يا شيماء ، ايوه يا سلطان ده اخر كلام ، والمهلة اخرها النهاردة ، اخترت ولا لسه بتفكر ؟؟

سلطان : مش محتاجة تفكير ، مينفعش يكون حب عمري في كفة وفي الكفة التانية فيه اي حد .

شهد : يا حبيبي يا سلطان ، بحبك اوي  ، كنت عارفة اني مش اهون عليك .

سلطان : انا هكلم جميلة النهاردة في موضوع الطلاق لأنها لسه متعرفش وهديها قرشين كتعويض ، والبنت الخدامة الجديدة هتفضل قاعدة معانا تشتغل مكان جميلة .

شهد : والبنت اللي في بطنها ؟؟

سلطان : بعد ما تولدها هديها قرشين واخدها منها تتربي هنا معاكي ومع اخوها .

للكاتب عادل عبد الله

في صباح اليوم التالي

يحضر خال جميلة الي المنزل بينما تتساقط دموع جميلة !!

سلطان يخرج شيك بمبلغ مالي ويعطيه لجميلة ويقول : ده مبلغ كويس يا جميلة ممكن يساعدك في حياة مستقرة لو شغلتيهم وعيشتي من ريعهم ، ورقة طلاقك هتوصلك بيت خالك خلال ابام ، وياريت في اليوم اللي هتولدي فيه تتصلوا بيا وتعرفوني علشان اكون موجود .

جميلة : هو ده كلامك معايا ؟؟ هي دي وعودك ليا ؟!!!

سلطان : معلش يا جميلة الظروف اتغيرت .

جميلة : ببساطة كده ؟!

خالها : هي البت دي عملت ايه يا سلطان بيه ؟؟ قولي وانا اقصف رقبتها .

سلطان : لا الحقيقة جميلة معملتش حاجة بس الظروف بتتغير ،  خدي يا جميلة الشيك خليه معاكي .

انصرفت جميلة مع خالها ، بينما كانت مظاهر السعادة والفرح تغمر وجه وملامح شهد وشيماء .

تبدو علي ملامح سلطان بعض ملامح الحزن والالم ولكن يحاول اظهار ابتسامته امامهما !!

شهد : بحبك قوي يا سلطان ، طول عمري واناواثقة من حبك ليا واسعد لحظات حياتي لما بتثبتلي حبك في اي موقف .

سلطان : اهم حاجة تكوني مبسوطة يا شوشو .

شهد : حبيبي لازم اكون مبسوطة وانت جنبي ، واكتر حاجة فرحانة لها اننا رجعنا زي الاول انا وانت بس وكمان معنا ابننا مفيش سعادة بعد كده .

سلطان : لأ يا حبيبتي فيه اكتر من كده .

شهد : فيه ايه ؟

سلطان : ان ابننا يكبر قدامنا ويبقي راجل ملو هدومه .

شهد : اناابني يا سلطان لازم يبقي احسن شاب واحسن راجل وكل الناس تتباهي به وتشاور وتقول ابن شهد وسلطان اهو .

شيماء : بمناسبة العيال بقي انا راجعة اسكندرية لأن ابو العيال وحشني ، وبالمرة اسيبكم تتهنوا وتفرحوا ببعض .

في منزل خال جميلة 

الخال : بردو مش هتقولي يا بت عملتي ايه علشان سلطان بيه يطلقك ؟

جميلة : والله ما عملت حاجة يا خال .

الخال : يا بنت اختي من البارح وانا بسألك وانتي مش عايزة تقولي الحقيقة !!

جميلة : يا خال انا لو كنت عملت حاجة كان هيفع المبلغ اللي في الشيك ده كله !!

الخال : اومال يعني طلقك من الباب للطاق كده ؟!!

جميلة : شهد مراته واختها شيماء هما اللي قالوله يطلقني .

الخال : وانتي عملتلهم ايه علشان بطلبوا منه كده ؟؟ ما شهد هانم كانت موافقة وهي اللي مشيت في جوازتكم !!

جميلة : علشان هي كمان بقيت حامل .

الخال : معقول !! بعد العمر ده كله !!! ده انتي يابنت اختي .....

وفجأة يأتي اليها سلطان........

الخال : يا مرحب يا سلطان بيه ، ده انت اول مرة تشرفنا .

سلطان : مرحب بيك يا حاج ، يلا يا جميلة هاتي شنطتك وتعالي .

جميلة : شنطتي !! هنروح فين تاني يا سلطان بيه ؟ هتوديني المحكمة اخد ورقتي من هناك ؟؟!

سلطان : ورقة ايه يا جميلة !!! انتي صدقتي اني ممكن اطلقك بجد ؟؟

#للكاتب_عادل_عبد_الله

جميلة : مش فاهمة !!

سلطان : لما شهد صممت علي الطلاق  انا حسبتها قولت لما اخدلك شقة لوحدك هتعيشي مرتاحة اكتر من البيت .

جميلة : شقة لوحدي !!!

سلطان : ايوه شقة ليكي لوحدك .

جميلة : لكن كده انت هتبقي بعيد عني !!!

سلطان : هبقي جنبك علطول ، يلا بقي علشان نلحق نرجع قبل المغرب علشان مبحبش اسوق بالليل .

بعد مرور عدة شهور

في شقة جميلة 

سلطان : احتمال اغيب عنك كام يوم .

جميلة : ليه يا حبيبي ؟

سلطان : شهد المفروض هتولد بكره .

جميلة : صور البيبي وابعتلي صورته بعد ما يتولد علطول .

يضحك سلطان : حاضر .

جميلة : هتسميه ايه يا سلطان ؟

سلطان : امه عايزة تسميه نور .

جميلة : وانت هتسمع كلامها .

يضحك سلطان : ايوه مضطر .

جميلة : وانا المفروض اولد الشهر الجاي ، هتسمي بنتنا ايه ؟

سلطان " يضحك " : هسميها جميلة .

جميلة : لاااااا  انا نفسي اسميها غرام .

سلطان : غرام ..... اسم جميل قوي ، بس اشمعني غرام ؟ 

جميلة : علشان يفضل اسمها شاهد ودليل علي حبي لك .

بعد شهرين

يستيقظ سلطان من النوم صباحا فيجد شهد تحت.ضن ابنها نور وتلعب معه في فرح وسعادة بالغة .

سلطان : صباح الخير يا شوشو ، صباح الخير يا بشمهندس نور .

شهد : لأ اسمه الدكتور نور ، انا نفسي يطلع دكتور ومشهور وعنده عياده كبيرة قوي ويطلع في التليفزيون زي الدكاترة المشهورين اللي بنشوفهم .

سلطان : يارب يا حبيبتي ، هاتي بقي دكتور نور العب معاه شوية .

تشاهد شهد السعادة في عيون سلطان وهو يلاعب طفله الذي انتظروه طويلا .

ثم يخطر شيئا في خاطرها فتسأله : جميلة ولدت ولا لسه ؟

سلطان : ايوه ولدت من عشرين يوم .

شهد : وروحت شوفت البنت ؟؟

سلطان : ايوه طبعا .

شهد : سمتها ايه ؟

سلطان : غرام .

شهد : غرام !!! ايه الاسم البلدي ده !!

سلطان : مامتها اللي سمتها .

شهد : اسم بلدي قوي ، و ليه مش جبتها لحد دلوقتي زي ما قولتلي ؟؟

سلطان : قولت اسيبها مع امها احسن .

شهد : لااا ، لو سبتها عند امها يبقي كل شوية هتروح تشوفها وتشوف امها ، وبعدين اللي زي جميلة دي مش هتعرف تربي البنت ، هاتها تتربي هنا مع اخوها احسن .

#ألف_قصة_و_قصة

سلطان : انا مش عايز اتعبك ، كفاية عليكي تربية نور .

شهد : متشغلش بالك انت بالتربية ، المهم لازم تجيب البنت تتربي هنا مع اخوها قدام عينيا .

سلطان : حاضر يا حبيبتي .