البداية 

شهد : انا عارفة ان نفسك يكون لك ابن و ذرية تشيل اسمك وتورث ثروتك .

ابتسم سلطان قائلا : ارادة ربنا اللهم لا اعتراض .

شهد : قولتلك كتير يا سلطان اتجوز وانت اللي رافض !!! 

سلطان : عمري ما اقدر اكسر قلبك ابدا يا شهد ، مش بعد الحب الكبير اللي بينا  و العشرة اكتر من ١٦ سنة أكون السبب في جرح مشاعرك وكسرة قلبك !!

 شهد  : لكن انا راضية وانت اللي رافض !!

سلطان : انا رافض لأني عارف ان كلامك بتقوليه من ورا قلبك وانتي مجروحة من جواكي لكن نفسك ترضيني .

شهد : لا صدقني المرة دي بقولهالك وانا راضية تماما ، انت لسه سنك مش كبير ولسه عندك فرصة تخلف وتربي اولادك ، اتجوز يا حبيبي وانا راضية وهكون سعيدة لما اشوفك شايل ابنك علي ايدك ومبسوط .

انتهي الحوار بين الزوجين علي رغبة  وموافقة شهد بأن يتزوج سلطان من أمرأة اخري حتي يرزق بالذرية !!!

مرت عدة اسابيع والحال كما هو ولم يجد جديد !!

فسألته زوجته : عملت ايه في موضوع الجواز ؟

سلطان : انتي لسه مصممة يا شهد ؟؟

شهد : ايوة .

سلطان : انا مش عارف افكر في الموضوع ده ، و علي افتراض اني وافقتك اتجوز مين و ازاي وانا في العمر ده ؟؟ للكاتب عادل عبد الله

شهد : انت ليه مكبر نفسك ؟!  ٤١ سنة مش كبير !! فيه كتير من سنك لسه بيفكر في الجواز للمرة الأولي ، وبعدين انت صحتك كويسة وشكلك حلو ومعاك فلوس وألف واحدة تتمناك .

سلطان : مش قادر ولا عارف افكر في الموضوع ده .

شهد : ليه مكبر الموضوع كده !! انا مراتك بقولك وبترجاك تتجوز !!

سلطان : ماشي هسمع كلامك وأتجوز ، بس اتجوز مين ؟؟؟

شهد : ايه رأيك في جميلة ؟؟

سلطان : جميلة الخد.امة ؟!!!!!!!!!

شهد : ايوه .

سلطان : عايزاني اتجوز خد.امة بتشتغل عندنا يا شهد ؟؟

شهد : وفيها ايه !! انت يهمك نسبها و شغلها ولا يهمك انك انها تجيبلك الاولاد اللي نفسك فيهم ؟؟ وبعدين جميلة حلوة ويتيمة ومطاوعة وبتسمع الكلام وهتريحك وتريحني انا كمان .

سلطان : تريحك انتي كمان ؟؟ انتي عايزاها تبقي مراتي وفي نفس الوقت تعيش معاكي في نفس البيت !!

شهد : وفيها ايه ؟ بالنسبالي انا عادي جدا ، هنخصص لها غرفة تنام فيها وانت هتقسم لياليك بينا احنا الاتنين بالعدل .

سلطان : انتي موافقة بكده ؟!!!

شهد : ايوه موافقة .

سلطان : وبعد الجواز جميلة هتفضل  تخدمك ؟؟

شهد : طبعا .

سلطان : ولما اتجوزها ونعيش معاكي في نفس الشقة مش هتتضايقي ؟؟

شهد : لأ ، مش هتضايق .

سلطان : مادام مش بتغيري عليا يبقي بطلتي تحبيني يا شهد .

شهد : بالعكس انا بحبك اكتر من الاول لكن مادام انت هتكون سعيد وهتحقق اللي نفسك فيه انا كمان هكون سعيدة .

سلطان : خلاص يا شهد اللي تشوفيه ، مادام انتي عايزة كده كلميها ورتبي معها كل حاجة .

شهد : كلمها انت يا سلطان .

سلطان : لأ ، انتي صاحبة الفكرة والاقتراح ، كلميها وابقي قوليلي عملتي ايه .

عاد سلطان من عمله في نهاية اليوم التالي فوجد زوجته تبتسم وتقول له الف مبروك يا عريس !!

سلطان : الله يبارك فيكي ، مبروك علي ايه ؟

شهد : اتكلمت مع جميلة و اتفقنا علي كل حاجة .

سلطان : بتتكلمي جد ؟ ده الموضوع بجد بقي !!!

شهد : ايوه طبعا ، هو الجواز فيه هزار ؟!!

سلطان : واتفقتوا علي ايه ؟

شهد : اتفقنا علي كل الكلام اللي اتكلمناه البارح انا وانت .

سلطان : وهي وافقت ؟؟

شهد " تبتسم " : طبعا لازم توافق ، ودخلتكم الخميس الجاي كمان .

سلطان : بسرعة كده ؟!

شهد : خير البر عاجله ،  لما كلمتها واتفقنا هي كلمت خالها علشان يحضر يوم الخميس ويكون وكيلها في عقد الجواز .

سلطان : طيب المهم انك مترجعيش تندمي .

شهد " تضحك " : لأ مش هندم ، اطمن .

سلطان : انا هدخل اغير هدومي .

شهد : غير هدومك وتعالي علشان نتعشا سوا .

بدل سلطان ملابسه وعاد الي السفرة ليجد كل ما لذ وطاب !!!

سلطان : ايه الاكل ده كله ؟!!!

شهد " تضحك " : اكل عرسان بقي ، مش انت عريس ودخلتك كمان يومين يعني لازم تتغذا كويس .

سلطان : جمبري واستاكوزا وسبيط وكابوريا وسي فود !!! كتير قوي كده يا حبيبتي .

شهد : بالهنا والشفا يا حبيبي ، وانا كمان اللي هأكلك بأيدي زي اول جوازنا ، فاكر ولا نسيت ؟؟

سلطان : مفيش لحظة حلوة ببني وبينك يا شهد الا ومحفورة في تفكيري وفي قلبي .

انتهوا من تناول الطعام واحضرت جميلة اقداح القهوة لسلطان وشهد التي قالت لها : اغسلي الاطباق يا جميلة وغيري هدومك والبسي حاجة حلوة وتعالي اقعدي علشان تتكلمي مع عريسك شوية .

تعجب سلطان من كلمات زوجته ومن موقفها الذي يكاد لا يصدق ان يكون واقع يعيشه بالفعل !!

انصرفت جميلة فنظر سلطان لشهد وسألها بنوع من السخرية : قولتلها تيجي ليه ؟ هتكلم معاها في ايه ؟!!

شهد : عادي يا حبيبي لازم تتكلم معها شوية علشان ترفع حاجز الخجل اللي بينكم قبل الدخلة بعد يومين .

ضحك سلطان و هو يكاد لا يصدق ان من تتفوه بتلك الكلمات هي زوجته شهد حب عمره و التي طالما عاني من غيرتها منذ بداية حبهما !!!

غابت جميلة لأكثر من ساعة ثم عادت بعدما بدلت ملابسها وتزينت وجاءت ووقفت امامهما في صمت .

شهد : اقعدي يا جميلة ، هتفضلي واقفة كده ؟!!!

جميلة : تحت امرك يا هانم .

شهد : انا هسيبك مع سلطان بيه تتكلموا علي راحتكم وهدخل اوضتي ، فيه اي حاجة عايزة تسألي عنها قبل ما ادخل ؟

جميلة : ربنا يخليكي يا ست هانم ، انا بس لغاية دلوقتي مش قادرة اصدق وحاسة اني بحلم .

شهد : لا ده واقع مش حلم ولا حاجة ، بس اهم حاجة انك تنفذي كل اللي اتفقنا عليه بالحرف .

جميلة : حاضر يا ست هانم ، هو انا اقدر أنزلك او انزل لسلطان بيه كلمة !!

شهد : طيب انا داخله اوضتي تصبحي علي خير يا جميلة .

ثم وجهت كلامها لزوجها : انا داخلة اوضتنا يا سلطان هستناك جوه .

سلطان " بأرتباك " : حاضر يا حبيبتي مش هتأخر .

دخلت شهد غرفتها وجلست جميلة تضم يديها الي رجليها وتضع نظرها الي الارض في خجل !!

بينما يجلس سلطان في مقابلها لا يعرف من اين يبدأ !!!

طال الصمت لدقائق حتي سألته جميلة : أقوم اعمل لحضرتك قهوة يا بيه ؟

سلطان : لا لا شكرا مش عايز دلوقتي ، بس قبل ما نتكلم عايز اقولك علي حاجة مهمة قوي .

جميلة : أؤمر يا بيه تحت امرك .

سلطان " يبتسم " : اولا انتي عارفة قد ايه الحب اللي بيني وبين شهد هانم .

جميلة : ايوه عارفة يا بيه ، ربنا يخليكم لبعض .

سلطان : علشان كده عايز موضوع الجواز ده مش يأثر عليها ابدا !!

جميلة : ايوه يا بيه ، انا اتفاجئت بالموضوع ده لما الهانم كلمتني !! ولا كان عمري يخطر ببالي .

سلطان : انتي يا جميلة بنت حلال وتستاهلي كل خير ، لكن لازم اقولك الكلام ده وأكد عليكي علشان بعد الجواز ميحصلش منك حاجة تضايق الهانم !! لأن ساعتها هتشوفي مني موقف مش هيعجبك . 

جميلة : انا يا بيه ؟!! ده انا مستحيل اعمل حاجة تضايقها ابدا ، دي اوامرها سيف علي رقب.تي .

سلطان : تمام يا جميلة يبقي متفقين ، الحاجة التانية اللي عايز اقولك عليها ان طول ما شهد هانم موجودة بينا تقوليلي يا بيه زي ما انتي متعودة ، لكن لما نكون لوحدنا تقدري تقولي يا سلطان بس عادي .

جميلة : أاأنا يا بيه ؟؟ مقدرش اقول لسعادتك كده .

سلطان : لا يا جميلة تقولي براحتك مادام لوحدنا ، انا هبقي جوزك وانتي مراتي يعني عادي تناديني باسمي بس بيني وبينك علشان الهانم متضايقش .

جميلة : حاضر يا بيه .

سلطان : دلوقتي بقي عايز اعرف جميلة اللي انا معرفهاش .

جميلة : ازاي يعني يا بيه ؟

سلطان : يعني تكلميني عن نفسك شوية ، عن الحاجات اللي معرفهاش عنك يا جميلة .

جميلة : انا يا بيه بنت غلبانة ملهاش حد في الدنيا بعد ربنا الا انت والهانم ، بعد موت ابويا وامي اخواتي الاتنين سابوني عند خالي وسافروا يشتغلوا بره ، ومن ساعة ما سافروا معرفش عنهم حاجة ، وخالي كان عنده عيال كتير ، قعدت معاهم لحد ما خالي جابني هنا علشان اشتغل عندكم .

سلطان : تمام ، عايز اعرف بقي جميلة الانسانة بتحب ايه ومبتحبش ايه ؟ بتحبي تاكلي ايه ؟ بتسلي نفسك ازاي لما بتكوني فاضية بعد الشغل ؟

ضحكت جميلة وقالت : يا بيه انا اللي زيي ملهاش حق تحب حاجة او تكره حاجة تانية ، اديني عايشة زي الناس اللي عايشين والسلام .

سلطان : ازاي الكلام ده !! يعني مفيش اكلة بتحبي تاكليها ؟ مفيش حاجة بتحبي تعمليها في وقت فراغك ؟؟

جميلة : يا بيه كل نعمة ربنا حلوة ، بس الصراحة لما باكل محشي وفراخ ببقي مبسوطة قوي ، ولما بكون فاضية بعد شغل البيت بحب اقرا قصص و بحب ارسم .

سلطان : بتقرأي قصص ؟

جميلة : ايوه يا بيه ؟ 

سلطان : بتقرأي قصص لمين بقي من الكتاب ؟

جميلة : بقرأ قصص من اللي بتنزل علي النت دي يا بيه بتبقي حلوة وببلاش مش بدفع فلوس .

سلطان : وبتحبي ترسمي ؟

جميلة : ايوه يا بيه ، اهو بشخبط شوية كده بالقلم .

سلطان : طيب ممكن توريني حاجة من اللي بترسميها ؟

جميلة : مفيش يا بيه ، اصل انا بعد ما بخلص الرسمة بقطعها وارميها .

سلطان : خسارة ، طيب لما ترسمي حاجة بعد كده عايز اشوفها .

جميلة : حاضر يا بيه .

سلطان : طيب ممكن بقي قبل ما نخلص كلامنا و نقوم تقوليلي يا سلطان بس ؟

جميلة : يالهوي ، مقدرش .

سلطان : ولو قولتلك علشان خاطري ؟

جميلة : خاطرك غالي اوي يا بيه بس مقدرش لا لا مقدرش .

سلطان " يضحك " : طيب هنبقي نشوف الموضوع ده لما يتقفل علينا باب واحد ونكون لوحدنا .

احمر وجه جميلة خجلا ثم وقفت و سألته : حاجة تانية يا بيه ؟ 

سلطان : لا شكرا ، ممكن تدخلي تنامي .

جميلة : طيب اعملك قهوة ؟

سلطان : لا يا جميلة انا هدخل انام ، يلا تصبحي علي خير يا قمر .

ضحكت جميلة : وانت من اهل الخير يا سعادة البيه .

دخل سلطان الغرفة فوجد زوجته شهد تمسح عينيها فسألها : مال عينيكي يا حبيبتي ؟

شهد " تبتسم " : لا ابدا ده عيني دمعت علشان عايزة انام .

سلطان : مش عارف ليه حاسس انك مش بتقولي الحقيقة يا شهد !!

شهد " تضحك " : انا عمري كدبت عليك يا سلطان قبل كده ؟

سلطان : لأ .

شهد : وهكدب عليك ليه دلوقتي ؟

سلطان : قوليلي الحقيقة يا شهد ، موضوع الجواز ده انتي ندمانة عليه ؟؟ لو ندمانه قولي دلوقتي قبل ما الفاس تقع في الراس .

شهد " تضحك " : لأ طبعا مش كده ابدا ، وياريت يا سلطان بلاش تقولي كده تاني ، ده قرار واخدناه وانا صاحبة الفكرة ومش ممكن اغير موقفي ابدا ، خصوصا اني مقتنعة وراضية .

سلطان : طيب يا حبيبتي اللي تشوفيه ، انا هنام بقي تصبحي علي خير .

شهد : وانت من اهله يا حبببي .

في اليوم التالي

يعود سلطان من عمله فيجد المنزل خاويا !!! شهد غير موجودة وايضا جميلة لا اثر لها في المنزل !!!

يمسك هاتفهه بقلق ويتصل بزوجته و ترد عليه ...

سلطان : انتي فين يا شهد ؟ 

شهد : في مشوار ، نص ساعة وارجع .

سلطان : اول مرة تخرجي من غير ما تعرفيني !! انا قلقت قوي لما رجعت و مش لقيتك ، حتي جميلة كمان مش موجودة !!

شهد : جميلة معايا في مشوار ، نص ساعة وراجعين .

سلطان : انتوا فين ؟

شهد : لما نرجع هتعرف ، يلا سلام بقي دلوقتي .

يدخل سلطان يبدل ملابسه ثم يدخل لأخذ حمام دافئ واثناء استحمامه يسمع صوت فتح باب الشقة .

انتهي سلطان من استحمامه ثم خرج ليفاجئ بمظهر جميلة وشهد المتألق !!! 

سلطان : كنتوا فين يا شهد ؟

شهد : اخدت جميلة وروحنا بيوتي سنتر عملنا شوية حاجات واشترينا شوية هدوم جديدة لجميلة .

لاحظت شهد تبدل نظرات سلطان لجميلة لتصبح نظرات اعجاب وانبهار !!

شهد : يلا يا جميلة ادخلي جهزلنا العشا .

جميلة : حاضر يا هانم .

سلطان : يا حبيبتي انتي جمالك طبيعي مش محتاجة تروحي بيوتي سنتر ولا تعملي اي حاجة من دي .

شهد " تبتسم " : بتضحك عليا بكلمتين يا حبيبي ؟؟

سلطان : يا قلبي اضحك عليكي ازاي !! شايفة عيونك حلوين ازاي ولا شفايفك طعمين ازاي !! ولا رموشك يا قلبي اللي ... 

شهد : طيب كفاية كفاية خلاص صدقتك .

سلطان " يضحك " : ايه رأيك ندخل نرتاح في اوضتنا شوية علي ما البنت تجهز الاكل ؟؟

تضحك شهد : لا يا حبيبي مش دلوقتي ، بعد العشا ، واعمل حسابك انت الليلادي بتاعي .

يضحك سلطان : الليلة دي وكل ليلة يا قلبي .

شهد " وعيونها تتلألأ بالدموع " : لأ الليلادي اخر ليلة هتبقي فيها بتاعي لوحدي ، من بكره جميلة هتشاركني فيك .

سلطان " يضحك " : جميلة ايه !! مفيش في القلب غيرك يا قلبي .

شهد : تسلملي و يسلملي قلبك يا حبيبي ، اعمل حسابك بكره طبعا دخلتك علي جميلة وهتقعد معها اسبوع كامل وده حقها ، لكن بعد الاسبوع هنقسم الايام زي ما اتفقنا .

سلطان : حاضر يا حبيبتي اللي تشوفيه.

في اليوم التالي " يوم الزفاف "

استيقظ سلطان في موعده المعتاد ليرتدي ملابسه استعدادا للخروج الي شركته محاولا اظهار لامبالاة امام شهد .

شهد : انت رايح فين يا حبيبي ؟ 

سلطان : رايح الشغل يا حبيبتي .

شهد : معقول يا حبيبي هتروح الشغل يوم دخلتك ؟؟

سلطان : ايه ده !! تصدقي كنت ناسي  ؟!!

شهد : طيب بلاش تخرج بقي خليك هنا .

سلطان : طيب هروح الشركة اخلص شوية اوراق وارجع بعد الضهر .

شهد : طيب متتأخرش ، خال جميلة هيوصل  الساعة ٥ علشان كتب الكتاب .

سلطان : هكون هنا قبل الساعة ٥ بكتير .

قبل الساعة الخامسة

عاد سلطان الي المنزل ومعه المأذون الشرعي .

و بعدها مباشرة جاء خال جميلة ومعه القليل من اسرتها ، وتم عقد القران وبعدها قدم العريس مبلغ من المال كمهر لجميلة كما قدم بعض المشغولات الذهبية كشبكة لها .

تناول اهل جميلة طعام العشاء ثم انصرفوا عائدين الي قريتهم .

بالرغم من ان شهد كانت متألقة المظهر وتبدو اصغر من عمرها كثيرا الا انها كان يبدو عليها كثير من الحزن والتوتر خاصة حينما لاحظت انبهار سلطان بجمال ومظهر جميلة !!!

#الكاتب_عادل_عبد_الله

ثم أمسكت شهد بيد سلطان وادخلته غرفتها و قالت " وعيناها تتلألأ بالدموع " : عايزاك تدخل لعروستك يا سلطان وتعيش حياتك عادي وكأني مش موجودة في البيت .

سلطان : انااا....

قاطعته شهد : الشئ الوحيد اللي مش عايزاك تنساه هو حبنا ، اوعي تنساني وتنسي حبنا يا سلطان ، ولازم تعدل بينا في كل حاجة .

امسك سلطان بيدها وضمها بين يديه  بلطف وقال : ايه الكلام ده ؟!! انتي عارفة ان مفيش في القلب غيرك والجوازة دي انتي اللي طلبتيها  انما انا ستات الدنيا كلها مش ممكن تملا عيني منهم واحدة غيرك .

#ألف_قصة_و_قصة

ضحكت شهد : ربنا يخليك ليا يا روحي ، يلا بقي روح لعروستك وزي ما قولتلك انسي اني موجودة هنا خالص ، انا دلوقتي هنام ، وبكره الصبح هجيبلكم الفطار لحد باب اوضتكم !! ثم ضحكت وقالت : متخافش مش هدخل طبعا ، واعمل حسابك دي المرة الوحيدة اللي هجيبلكم الفطار فيها علشان العروسة متاخدش علي كده ومتنساش نفسها !!

امسك سلطان بيديها وضمها بلطف اليه  ثم قال لها : هتوحشيني اوي لحد الصبح .

ابتسمت شهد وقالت : يلا بقي روح لعروستك .