ينتهي الحديث بين باسل وبسام و مازال باسل يفكر في تلك الفتاة ذات الجمال والاخلاق وجرأتها في الدفاع عن اخلاقها ومبادئها والتي لا يعرف عنها شئ حتي اسمها !!!

في اليوم التالي 

يذهب باسل الي الكافية فيجد بسام ونور ويجلس معهم بينما عيناه تجولان ارجاء المكان بحثا عنها !!!

بسام : ايه يا معلم انت قاعد معنا وعينيك بتلف يمين وسمال !! انت بتدور علي حد ؟؟

باسل : لالا عادي ، هكون بدور علي مين !!

بسام " يضحك " : عيبك الوحيد انك فاكر نفسك ذكي ومحدش فاهمك ، رغم ان اي حد يفهمك بسهولة !!! البت ام لسانين بتاعت البارح عجبتك وجيت تشوفها تاني ، صح ؟؟

باسل : انت شوفتها النهاردة ؟

بسام : لأ ، علفكرة انا اول مرة كنت اشوفها هي وصحبتها البارح .

باسل : يعني ايه ؟؟

بسام : يعني معرفش هتيجي تاني ولا لأ  ، ممكن يرجعوا تاني و ممكن تكون مرة قعدوا هنا ومش هتتكرر تاني .

باسل : لااا ، انا لازم اشوفها تاني !!

بسام : طيب يا عم انت دايما تنصحني !! ياريت مترجعش تعمل عليا الكبير تاني وتقعد تنصح فيا ، اهو انت بنفسك جاي تقابل بنات اهوو !!!

باسل : لا يا بسام ، انا غيرك ، البنت دي عجبتني وعايز اخطبها مش العب واتسلي ببنات الناس زي ما انت بتعمل !!

بسام : طيب من خبرة اخوك الصغير بالبنات بقولك البنت دي وصاحبتها مش جايين هنا تاني ، ريح نفسك ومتفكرش فيها احسن .

يظل باسل يفكر في تلك الفتاة التي سحرته بلباقتها وجمالها حتي يشعر بأنه وقع بالفعل في حبها !!

ولكن كيف !! تلك هي المرة الاولي التي يقع فيها في الحب و من اول نظرة !!

يظل باسل لفترة طويلة يحاول الوصول اليها او اللقاء بها دون جدوي !! يسأل عليها في كل مكان ، في الكافية ، في الجامعة ، في كل مكان يحتمل ان يجدها فيه دون جدوي !!

للكاتب عادل عبد الله

وبعد ان يفقد الامل في لقائها يدخل في حالة من الحزن والاكتئاب حتي انه لم يفكر في الارتباط املا في ان يجدها يوما !!

بعد عدة سنوات...

الساعة السابعة صباحا ( في حديقة الفيلا )

سلطان يجلس ويتناول طعام الافطار مع شهد .

سلطان : نور ابنك صحي ولا لسه ؟؟

شهد : لا لسه نايم .

سلطان : مش هتصحيه يروح معانا الشركة ؟؟

شهد : لأ سيبه لما يصحي لوحده ، اصله بينام متأخر .

سلطان : انا مش عارف يا شهد هتفضلي تدلعي فيه لحد امتي ؟!! اهو اتخرج من الجامعة وبردو بتدلعيه !! 

شهد : واحدة واحدة عليه يا سلطان ، اهو بقي بيروح الشركة دلوقتي غير الاول كان مبيرحش هناك خالص .

سلطان : يا حبيبتي نور بيروح الشركة كأنه ضيف يقعد ساعة ولا ساعتين ويمشي !! ميعرفش اي حاجة في شغلنا !! كل الشغل عليا انا وانتي واحنا كبرنا .

شهد : يا حبيبي ما انا بساعدك في كل حاجة .

سلطان : ايوه طبعا ، ما انتي دلوقتي العضو المنتدب ونائب رئيس مجلس الادارة ومعاكي تفويض في كل حاجة ، لكن ده مش كفاية !!

شهد " تضحك " : عايز ايه تاني يا حبيبي ما انا شيلت عنك شغل كتير .

سلطان : انا عايز نور هو اللي يتحمل مسئولية الشغل ، الشركة دي هتبقي بتاعته بعدنا ولازم يكون عارف كل كبيرة وصغيرة فيها ويريحنا احنا الكام سنة اللي باقيين من عمرنا .

شهد : ربنا يخليك لينا يا حبيبي ويطولنا في عمرك يارب .

سلطان : افرضي دلوقتي عايزين نطلع مصيف ، افرضي عايزين نروح نحج ، مين اللي يتحمل مسئولية الشغل في غيابنا ؟!!!

شهد : حبيبي خلاص انا هكلمه علشان يهتم شوية بالشغل .

سلطان : وابنك ده اكيد هيفكر يتجوز ، تقدري تقوليلي هيتحمل مسئولية بيت واسرة ازاي وهو لسه كده ؟؟

شهد : حبيبي علشان خاطري كفاية عصبية وكل حاجة هتبقي زي ما انت عايز مع الوقت .

#للكاتب_عادل_عبد_الله

الساعة الواحدة ظهرا ( في الشركة )

يجلس نور في مكتبه غير مبالي بالعمل و مشغول في هاتفهه حتي يأتيه اتصال من بسام .

بسام : انت فين يا نور ؟

نور : في الشركة .

بسام : ايه يا صحبي بقيت تصحي بدري وتروح الشركة زي الناس المهمين .

نور : ده انا لسه جاي الشركة من نص ساعة وبابا فضل يكلمني كلام قد كده !!

بسام : طيب انا هقوم افطر واعمل اصطباحه علي ما تخلص شغلك ونتقابل بعد ساعة في الكافية .

نور : خليها كمان ساعتين علشان مش هعرف امشي من هنا قبل ساعتين .

بسام : ماشي يا صحبي بس متتأخرش عليا علشان عايزك في موضوع مهم .

نور : موضوع ايه ؟ اتخانقت مع جوز امك تاني ؟؟

بسام : تاني وتالت ومفيش فايدة ، انا نفسي الرجل ده يختفي من حياتنا .

نور : انت بتكر.هه قوي بالشكل ده ليه يا بسام ؟!

بسام : معرفش يا نور ، من يوم ما دخل حياتنا واتجوز امي وانا مش طايق اشوفه ونفسي اغمض عيني وافتحها يختفي من حياتنا للابد .

نور : اكيد فيه سبب يا بسام لكرهك الشديد للرجل ده !! الكره ده كله اكيد مش من فراغ .

بسام : اصل انت مجربتش تشوف رجل غريب بيضحك ويهزر مع امك ، ده غير لما يدخلوا اوضتهم وتسمع صوت ضحكهم وانت دمك بيغلي في عروقك .

نور : متنساش انه جوزها يا بسام يعني مش بيعملوا حاجة غلط !!

بسام : طيب واحساسي انا كرجل بيغير علي امه اعمل فيه ايه ؟!!

نور : ده مش وضع جديد علشان تتضايق ، هما متجوزين من زمان !!

بسام : ومن زمان وانا بكرهه .

نور : اعمل زي باسل اخوك متقبل الوضع عادي .

بسام : باسل ده معندوش دم ، المهم كفاية بقي كلام في التليفون خليني اقوم اصطبح ونكمل كلامنا لما نتقابل .

في منزل جميلة 

جميلة : غرام ،، غرام ،، اصحي بقي يا حبيبة ماما .

غرام : صباح الفل علي عيونك يا حبيبة قلبي .

جميلة : صباح الهنا والسعادة علي عيونك يا قمر ، يلا الساعة ٨ يلا قومي علشان نفطر ونلحق نروح حفلة التخرج .

غرام : حاضر يا ماما هقوم حالا .

جميلة : عارفة اني منمتش من البارح ؟

غرام : ليه يا حبببتي ؟

جميلة : كنت مستنية النهار يطلع بفارغ الصبر علشان اشوفك وانتي بتتخرجي من الجامعة وتبقي دكتورة قد الدنيا ، النهاردة اسعد يوم في حياتي كلها .

غرام : ربنا يخليكي ليا يا ماما وتبقي اسعد واحدة في الدنيا كلها علطول ، انتي نسيتي كمان يا ست الكل ان بنتك طلعت التانية علي دفعتها !!

جميلة : لا يا حبيبتي منستش طبعا ، عقبال يارب ما اشوفك احسن دكتورة في الدنيا و اشوفك في بيت جوزك سعيدة ومتهنية .

غرام : لااا ، موضوع الجواز ده مش في دماغي دلوقتي خالص ، انا المهم عندي الكرير بتاعي ، انا البارح وصلني عرض من مستشفي استثمارية كبيرة علشان اشتغل فيها وبأذن الله هتبقي خطوة مهمة جدا لما ابدأ حياتي في مستشفي زي دي .

جميلة : ربنا يوفقك يا غرام يا بنتي يارب وتحققي كل اللي نفسك فيه .

غرام : قوليلي صحيح يا ماما انت جهزتي اللوحات اللي هتشتركي ببها في المعرض الجاي اخر الشهر ؟؟

جميلة : ايوه خلاص فاضل لوحة واحدة بخلص فيها .

غرام : يارب يا ماما تبقي لوحاتك احسن لوحات في المعرض كله .

جميلة : يارب ، حتي علشان نبيع كام لوحة منهم يساعدونا في المصاريف .

غرام : متشيليش هم المصاريف يا ست الكل ، انا لما استلم شغلي كل حاجة هتبقي تمام .

جميلة : لأ اوعي تقولي ، فلوس شغلك دي ملكك انتي لوحدك .

غرام : وفيها ايه لما نساعد بعض يا ماما ؟

جميلة : لا يا حبيبتي انا المتكفلة بكل مصاريف البيت و مصاريفك لحد ما تتجوزي ، المشكلة عندي بس الايام دي اني من ساعة ما قفلت المحل بقيت استني كل معرض علشان ابيع كام لوحة نصرف منهم ، انما انا عمري ما هاخد منك فلوس لمصاريف البيت ابدا .

في فيلا سلطان

الساعة الواحدة بعد منتصف الليل

يعود نور من الخارج فيجد شهد في انتظاره !!!

نور : مساء الخير يا ست الكل .

شهد : مساء النور يا حبيبي ، تعالي يا نور عايزة اتكلم معاك .

نور : فيه ايه يا ماما قلقتلني !! اول مرة تسهري تستنيني !!

شهد : ينفع يا نور كل ليلة ترجع متأخر وتقعد سهران لبعد الفجر ؟!!

نور : وفيها ايه يا ماما ، هنام بدري ليه انا مش ورايا حاجة ، بسهر علي النت شوية لحد ما ازهق وانام .

شهد : مش وراك حاجة ازاي ؟!! وراك شركة ابوك اللي هتبقي شركتك .

نور : البركة فيكي انتي وبابا .

شهد : لا يا حبيبي الشركة دي بتاعتك ولازم تديرها انت بنفسك .

نور : لا يا ماما دي شركة بابا وانا مش حابب الشغل فيها .

شهد : طيب ولو قولتلك اني هكتبلك الشركة والمخازن والفيلا وكل حاجة باسمك هتغير موقفك وتهتم بها .

نور : بتتكلمي جد يا ماما ؟ 

شهد : ايوه يا عيون ماما ، انا كل حاجة باسمي ، اهتم انت بالشركة وشغل ابوك وانا هروح معاك الشهر العقاري وانقلك كل املاكنا باسمك علشان تحس انها ملكك وتهتم بها .

نور : ماشي يا ست الكل وانا موافق .

شهد : خلي بالك يا نور لما تبقي كل حاجة باسمك لازم تبقي عارف كل كبيرة وصغيرة علشان كل العقود والشيكات والاوراق انت اللي هتمضيها بنفسك .

نور : ايوه طبعا اكيد ، وانا اوعدك اني هتغير بجد واهتم بكل حاجة .

شهد : وهتبطل سهر وخروج مع بسام ؟

نور : اكيد طبعا يا ماما .

وفجأة يرن هاتف شهد فتجد المتصل اختها شيماء !!!

شهد : خالتك شيماء بتتصل دلوقتي !!! ياتري فيه ايه ؟؟

#ألف_قصة_و_قصة

نور : ردي عليها يا ماما شوفي في ايه .

شهد : خايفة ، حاسة فيه حاجة وحشة .

نور : طيب هاتي انا ارد عليها .

نور : ايوه يا طنط .

شيماء : الحقوووني ...........