كل ست في الدنيا تقف وتطلب الطلاق وتصرخ وترفص لكن اول ما بتسمع الكلمة في حاجة فيها بتتهز او تتكسر 

ده كان إحساس شاكيرا لما سمعت طالق من راجي 

دي تالت مرة تسمعها لكن حاسة المرة دي أصعب 

راجي كان طيب معاها واهله كانو واخدين بالهم من بنتها اللي هى مش بنتهم 

لكن كانو احن عليها من صباح 

دلوقتي هى واقفة على باب البيت حاسة بضياع ورعب 

هيجرى ايه لو ترتيب امها خاب 

هيجرى ايه 

للحظة اتخيلت حياتها وهى عايشة مع صباح اللي بتعامل بنتها اللي عمرها سبع سنين معاملة اسؤ من معاملة الساحرة الشريرة 

سألت نفسها : هو انا ليه بسمع كلامها من غير تفكير  

وصلت عند امها شنطة هدومها في ايد وبنتها في ايد 

لقت هشام هناك 

شاكيرا : انت هنا اااا قصدي صباح الخير 

هشام : صباح النور 

صباح اول ماشافتها 

:اهو الحبايب اتجمعو انا كنت عازمة هشام عالفطار ومفطرش  اهو يلا افطرو سوا 

جريت عليها بنت شاكيرا : هنفطر ايه يا تيتة 

زقتها بعنف وخشونة ادخلي انتي العبي في اوضة قسمت وهعملك سندوتش 

هشام لمح ملامح وشها والشر اللي اترسم عليهم وهى بتتعامل مع البنت قلبه اتقبض افتكر للحظة قسمت ممكن تكون عانت قد ايه مع الست دي اللي مش عارفة تكون لطيفة ولو ثواني مع حفيدتها 

شاكيرا بصت لأمها انه خلاص حصل 

صباح من غير ما تحس رقعت زغرودتة خلت هشام اتخض 

هشام : فيه ايه 

صباح : اتطلقت اخيرا كده اتطمنت على بنتي 

شاكيرا: بس بقى يا ماما دي مش حاجة كويسة انا كده خلاص حياتي انتهت 

صباح : انتهت ده ايه دنتي الف مين يتمناكي مش كده يا باشمهندس 

بصلها هشام نظرة ليها معنى : طبعا يا طنط طبعا 

في المستشفى كانت قسمت بدأت تتحسن ويسرا قاعدة جنبها 

يسرا : الحمدلله يا حبيبتي  بقيتي احسن 

قسمت وهى شبه تايهة : هو انا كان عندي ايه 

يسرا وهى متأثرة : متشغليش بالك شوية التهابات في المعدة الظاهر ان معدتك عصبية بتتاثر لما تزعلي 

قسمت : فعلا طول عمري كده 

يسرا : خلاص يا حبيبتي اوعدك معدتك مش هتتعبك تاني .

مش عايزة تسألي عن هشام 

قسمت : لا هو لما يعوزني هيسأل وكمان زمان إجازته خلصت 

: طيب خلاص مش مهم  بصي الدكتور كتبلك خروج تحبي تروحي بيتك ولا تيجي معايا بيتي 

شردت قسمت كده لثواني : بيتي !!! غريبة هى عمتي مسالتش عني يا يسرا دي كانت بتعملي فضيحة لما اتأخر ساعة في الشغل 

يسرا : قسمت في حاجات كتير لازم تعرفيها قبل ما تروحي 

: حاجات ايه 

: توعديني ان متزعليش 

: في ايه يا يسرا قلقتيني  

: الاول تعالي نلبسك ونخلص خروجك من هنا وفي السكة هحكيلك 

في البيت كان هشام قاعد جنب شاكيرا بيفطرو  وصباح بتقدملهم شاي 

: والنبي اللي يشوفكم جنب بعض يقول مخطوبين 

شاكيرا : الله ماما انتي بتقولي ايه 

هشام بص لشاكيرا : هو انا أطول 

صباح : وتطول ليه يا حبيبي ماهي قاعدة جنبك اهي 

هشام : بس هو الموضوع محرج علشان قسمت يعني 

صباح : ولا يهمك منها وبعدين تشوف روحها كانت فين اديلها عشر ايام 

هشام : اه صحيح مش غريبة يا طنط انك متحاوليش تدوري عليها طول الفترة دي 

: دورت يابني بس انا مبحبش اقلقك معايا زميلتها في الشغل قالت انها خدت اجازة واختفت 

هشام : زميلتها مين يسرا ؟؟؟ 

: اهو اسمالله عليك أديك عرفت 

: غريبة اصل يسرا دي قالتلي انها في مؤتمر 

: بتداري على صاحبتها قدامك امال يعني عايزها تقولك بتصيع ولا طفشانة دنا استويت من عمايلهم يابني والنبي .   قومي يا شاكيرا يا حبيبتي غيري هدومك على ما اتكلم مع هشام كلمتين 

قسمت سألت يسرا : انتي جايباني فين وايه المكان الغريب ده 

يسرا : بصي ياستي 

هنا بيت واحدة ست دجالة من اللي بيعملو سحر واعمال سفلية وحاجات قذرة كده 

: طب وانا مالي بالكلام ده 

يسرا : الست دي عمتك بتتعامل معاها من وقت ما باباكي ومامتك اتوفو بتعملك سحر علشان تتجنني وهى تستولى على ورثك  انتي مخدتيش بالك انه صحتك بتتدهور فجأة حالات الزغللة وشعرك اللي بيقع والضعف والدوخة 

قسمت افتكرت كل المرات اللي كانت صباح بتتخانق معاها فيها يبقى البيت قايد نار ومع ذلك تصمم تعملها الاكل مخصوص وتقدمهولها بنفسها  

افتكرت مرات كتير تلاقي سايل اصفر على مخدتها وعمتها تقولها ده عرق 

افتكرت حاجات كتير قوي مكانتش منطقية ودلوقتي لقت لها تفسير فبصت ليسرا 

: يلا نطلع للست عايزة اسمع وافهم 

طلعو للست اللي اول ما شافت قسمت شهقت : انتي انتي عايشة وواقفة على رجلك ازاي 

قسمت : ايه كان مفروض اكون ميتة 

الست : اللي شربتيه طول سنتين يخليكي يا مشلولة في سريرك يا متجننة بتقطعي في شعرك يا 

قسمت : يا ميتة مش كده 

وطت على الست : حيث انك عرفتي انك سحرك فشل معايا ممكن اعرف بالظبط الموضوع بدأ ازاي 

اكتر من ساعة الست بتحكي لقسمت 

انه بعد وفاة ابوها وامها علطول صباح جابتلها لبسها الأسود اللي في اترها يعني ما صبرتش العزا يخلص 

وكل طلباتها كانت أذى وقف حال وجنان وشلل وضعف ومرض 

قسمت: يعني نصيبها من ثروة بابا كله ضيعته على الكلام ده طب ليه هتستفيد ايه فلوس ما خدت وخدت اكتر مني وبرضايا دنا سايبالها بيت جاردن سيتي من بابه وكنت ناوية لو سافرت اسيبلها كل حاجة 

الست : من نظرتي للناس عمتك دي الكره عاميها  معادتش بتدور على مصلحتها قد ما بتدور على اذاكي 

قسمت : لا حول ولا قوة الا بالله من فضلك يا يسرا روحيني 

الدجالة استغربت : انتي مزعقتيش يعني ولا قولتي عايزة البوليس  

قسمت بكل الهدوء اللي في الدنيا : الله يعينك شيلتك تقيلة قوي لا يفلح الساحر حيث اتى يلا يا يسرا 

رجعت قسمت البيت 

صباح اول ما شافتها حضنتها : يا حبيبتي  كنتي فين قلقتيني عليكي 

قسمت : صحيح يا عمتي قلقتي عليا !!!! 

صباح : يوه يابنتي طبعا وسألت عليمي يسرا وقالت منعرفش 

برقتلها قسمت بدهشة : بقى قالتلك منعرفش ؟ 

صباح : اه والنبي  اقعدي بقى اعملك تتغدي 

قسمت : اه والله انا جعانة قوي هى شاكيرا رجعت بيتها 

وقفت صباح محتارة شوية وبعدين قعدت جنب قسمت وحطت ايدها على كتفها 

: قسمة انتي عارفة انك عندي زي شاكيرا بالظبط انتو الاتنين اخوات 

: ايه يا عمتي مالك محتارة ليه مش عارفة تقوليلي ازاي ان شاكيرا اتطلقت وهتتخطب لهشام !!!؟؟؟

اترمت صباح مكانها من الخضة : ماهو يعني 

قسمت من غير ما تبصلها خالص : لا عادي يا عمتي ده نصيب ربنا يهنيهم 

صباح : والنبي يعني مش زعلانة 

قسمت : لا الزعل عالحاجات المهمة بس يا عمتي 

صباح : حاجات مهمة ....!!!!؟؟؟