رجعت شاكيرا من عند الشيخة على المحامي 

سألته عن الخلع وانها مستعجلة 

المحامي قالها انه هياخد اسبوعين بس لو معندهاش اسباب قوية لازم ترجعله المهر بتاعه عشان نختصر وقت 

راحت لأمها تقولها اللي حصل واللي طلبه المحامي 

صباح وقت جواز شاكيرا من راجي كانت قابضة مهر كبير وكتبته في القسيمة علشان تكيد الاعادي 

وللاسف النهاردة مضطرة ترده بالكامل وخصوصا ان راجي كان زوج طيب ومتحمل بنتها طول الوقت فمافيش اسباب كافية لخلق مشاكل معاه 

لكن هى طمعت في هشام خصوصا لما اتأكدت ان عيلته ليها أملاك كتير في مصر وهو المتحكم الوحيد فيها 

فقالت انا وبنتي اولى من قسمت  

 وقررت تمشي في مشوار الخلع بالتوازي مع تثبيت دماغ هشام 

لدرجة  انها مركزتش كتير في غياب قسمت عن البيت دي بالعكس قررت تستغله لصالحها  

هشام كان متفق مع يسرا انه مايجيبوش سيرة لصباح ان قسمت في مستشفى 

يسرا : انا هقول انها في مؤتمر تبع الشغل 

هشام:  وانا هسألهم عنها اشوف هيقولو ايه 

لما هشام راح البيت يسأل صباح عن قسمت كان متوقع مثلا تقوله معرفش او حتى تقوله إسألها كان متوقع اي إجابة الا اللي قالته 

تخيلي كده عمتك اللي مربياكي لما حد يسألها عن غيابك وتكون إجابتها 

مصمصة شفايف : ربنا يستر على ولايانا ياما حاولت معاها حالها يتعدل غلبتني يابني  اهو تلاقيها طلعت رحلة مع حد من صحابها 

في تلميح قذر ورخيص ان سلوكها مش محترم 

في اللحظة دي هشام مكانش قادر يخبي شعوره بالتقزز من الست دي وحس انها تستحق كل شر هى وبنتها 

فقعد مكانها على الكنبة وعمل نفسه مرهق او متفاجئ 

: طنط ممكن فنجان قهوة من فضلك حاسس اني مش شايف قدامي 

: عنيا يابني اقعد ارتاح 

فك هشام سوستة الجاكيت اللي هو لابسه وشال الكوفية اللي كانت على رقبته وقعد يستنى القهوة 

جابتها صباح وهى مبتسمة 

: مش عايزاك تزعل يابني بس الصراحة انا بصلي وبخاف ربنا ومش عايزاك تاخدها وانت مش عارف طبعها 

: كتر خيرك يا طنط متشكر انا هبعت اقطع اجازتي وارجع النمسا وخلاص حقيقي صدمتي فيها كبيرة 

: لا لا ياخبر تبوظ اجازتك ليه خليك هنا براحتك انت دخلت قلبي زي ابني تمام والنبي ما تزعل نفسك 

خلص القهوة ونزل 

وهو في العربية افتكر انه نسي الكوفية بتاعته طلع علشان يجيبها 

الباب كان لسة متوارب مش مقفول 

سمع صباح بتتكلم في التليفون 

: ايوة ياستنا معايا اتر واحد عاوزاه يتجنن على شاكيرا بنتي عاوزاه يجيني حافي كده يطلب ودها اه هجيلك حالا 

سمع الكلام ده ونزل بسرعة دور العربية وخرج من الشارع ووقف يستنى شوية 

بعد كام دقيقة صباح نزلت 

ركبت تاكسي وهو مشي وراها لحد عرف العمارة اللي نزلت قدامها ورجع 

كلم يسرا حكالها على كل حاجة 

يسرا : يا ولاد الكاااالب كده بدأت افهم 

هشام تفهمي ايه 

: الحالات الغريبة اللي بتيجي لقسمت توهان وضعف وشعرها اللي بيقع بكميات مهولة  والسواد اللي بيترسم على وشها وسدة نفسها عن الأكل بالايام ده تأثير السحر 

: انا مش مقتنع بالحاجات دي ومش حاسس انها ممكن تسبب ضرر بجد 

: تعالى معايا هوريك مش بتقول عرفت عنوان الست اه يعني عرفت العمارة بس 

: الباقي سهل تعالى معايا 

يسرا وهشام وصلو البلوك اللي هو شاف صباح داخلة فيه 

هناك 

هشام : ها هنعمل ايه انا معرفش غير كده 

يسرا: صبرك بس ثواني 

وقفت يسرا كام دقيقة كده لحد ما لمحت واحدة داخلة البلوك وبتتلفت حواليها 

فدخلت وراها 

الست ساكنة في الدور التالت 

هشام سألها : انتي عرفتي منين ان الست دي رايحة للشيخة 

يسرا: عشان لو كانت ساكنة هنا كانت دخلت علطول ولو كانت جاية تزور حد عادي مكانتش هتتلفت حواليها كده  

هشام : مش سهلة انتي برضه 

يسرا وقفت على الباب خبطت فتحتلها واحدة 

فسألت عن الست المبروكة  البنت شاورتلها على واحدة قاعدة في الارض 

يسرا قربت منها وخطفت ايدها باستها : انجديني ياست يا مبروكة جوزي ده معملوله عمل بيشوفني قردة 

الست رفعت رأسها تبص لهشام بخبث ورجعت توطي عالارض تاني وزعقت في يسرا 

: ده لا جوزك ولا يعرفك انتي جاية ليه 

يسرا اتخضت وبرقت لهشام اللي اتخض هو كمان لما الست سألته 

: اديلك ياما عايش برة ؟ 

ارتبكو الاتنين لثواني 

وبعدين يسرا قالت مبدهاش بقى 

:اسمعي يا ست انتي انتي جالك واحدة اسمها صباح طلبت منك سحر لصاحبتي  والبنت بين الحياة والموت  وطبعا مكنتيش بتخدمي صباح لوجه الله انا هدفعلك قد اللي دفعته مرتين 

الست مرفعتش عينها عن الأرض وسألتها : هتدفعي عن صاحبتك وهو مين يدفع عنه 

يسرا : هو راخر معموله سحر 

الست :سحبت كوفية هشام من جنبها وحطتها عند مناخيرها معموله سحر يحب واحدة ويمشي وراها مغمض من بلاد لبلاد ينزهل وينسى شغله ويقعد جنبها 

هشام : ما تكمليش عارف عارف 

يسرا : طلعت رزمتين فلوس من شنطتها ولوحت بيهم 

ها قولتي ايه 

الست : مقدرش ده عهد والخدام صعب 

هشام : خلاص بقى انا سجلت الكلام ده كله نروح النيابة واكيد الخدام بتوعك هيقدرو يخرجوكي من القضية 

بصتله بغيظ وطلعت من جيبها قزازة فيها مية صفرا 

القزازة دي تسقو منها المسمومة تلت مرات وتكبو الباقي على رأسها  

والبيت يتفضى ويتمسح بمية وملح ويترش اركانه  ملح وتدبحو الزفارة متتحلش الا بالزفارة  

يسرا : وليا طلب تاني 

: عايزة تأدبي صباح. مش كده 

: اه هو كده 

: روحي قومي صاحبتك من رقدتها وبعد نهارين ونهار تشوفي بنفسك 

رمت يسرا الفلوس في حجر الست وقامت مشيت خطوة ورجعت تاني ميلت عالست دي 

: عارفة لو بعد ما نزلنا بلغتي صباح ولا لعبتي بديلك اقسم بالله عفاريت الدنيا ما هتخلصك مني  

لما خرجو هشام سألها :هنعمل ايه دلوقتي 

يسرا : انا عايزاك تفضل على تواصل معاهم لحد ماقسمت تبقى كويسة عايزين نكسب وقت  

هشام : اوك هبقى اكلمك اتطمن على قسمت خدي بالك منها 

مر اكتر من عشر ايام وبيت شاكيرا مولع حريقة لما اتعرف انها رافعة خلع 

راجي هيتجنن يفهم في ايه 

: انتي مجنونة يابنتي..؟ في نفس اليوم اللي تهجمي عليا وتقولي وحشتني تنزلي من جنبي ترفعي خلع 

والدته اتدخلت وهى بتبص لشاكيرا شذرا 

: وعلى ايه خلع يا حبيبتي شايفانا دايبين فيكي والنبي ده ربنا هينجيه  احنا يا حبيبتي كنا مستحملينك رحمة ببنتك الغلبانة ملهاش ذنب تبقي انتي امها 

وبصت لابنها بحزم : راجي طلقها حالا ووفر عليها الخلع 

راجي بنفاد صبر : شاكيرا انتي طالق