دخلت قسمت ويسرا الكافيه .

هشام رحب بيهم وطلب فطار  وقعدو يتكلمو .

قسمت : يعني ما سألتنيش النتيجة طلعت ايه !!

ضحك بثقة وقالها :انتي كنتي متوقعة يطلع ايه يعني يابنتي 

قسمت : مش عارفة اعذرني انا متعودتش اشوف الحلو في حياتي 

يسرا لقطت الكلام منها بسرعة 

: مافيهاش حاجة ياباشمهندس من حقها تتطمن خصوصا انكم لسة عارفين بعض من وقت قصير 

هشام عدل نضارته وكلم يسرا وهو عنيه في عيون قسمت 

: الغريبة يا بنات وستات مصر عاملين نفسكم ناصحين قوي وبتخافو من اي حد لسة عارفينه قريب مع ان الخازوق الحقيقي دايما يجيلكم من عشرة السنين بس ما بتتعلموش الدرس . 

ضحكت يسرا : ماهو في الحالتين خازوق برضه 

هشام : لا طبعا تفرق اللي لسة عارفاه امبارح ده حتى لو طلع وحش ف كتر خيره وفر ومضيعناش وقت 

يسرا : طب واللي عشرة سنين ؟؟

هشام : لا بقى ده بيبقى خازوق مغري .

وضحكو التلاتة على طريقته وهو بيقوله بتأثير اللكنة الأجنبية 

في البيت كانت شاكيرا هتتجنن 

: تخيلي قفل السكة في وشي يا ماما منتهى الجليطة تلاقيه عرة زيها 

صباح : لا عرة ايه ده شكله يخض شياكة ايه وحلاوة ايه 

شاكيرا : مسم شياكة وحلاوة وانا اتجوز راجي اللي وشه لازق في قفاه عاجبك كده يا ماما 

صباح : ما تشغليش بالك هو بس ركك يشوفك مرة والنبي ماهو باصص في وشها تاني هو حد يشوف البسبوسة بالقشطة ونفسه تروح للمش طولي بالك 

شاكيرا : ماما ! انتي نسيتي اني متجوزة ....؟! 

صباح بخبث : وماله العدة تلت شهور يا عين امك 

صوت ضحكهم بيشبه صوت الضباع اللي اتلمت على جثة خاطفينها من نمر جريح 

لما رجعت قسمت من شغلها لقت صباح في انتظارها مبتسمة على غير العادة 

: اهلا يا قسمت حمدلله عالسلامة اسخنلك تتغدي 

استغربت قسمت : بتكلميني انا يا عمتي 

: اه انتي باين عليكي زعلانة من اختك شاكيرا دنتو يابنتي مالكوش غير بعض وهى يعني بتتدلع عليكي 

: لحد امتى يا عمتي ؟؟ 

: ايه هو يابنتي 

: لحد امتى هتفضل تتدلع عليا هى الدنيا مش اخد وعطا انا هاخد امتى عشان بصراحة عطا خد عمري وطفش 

ضحكت عمتها ضحكة الضباع اللي بتخلي قلبها يتقبض 

:يا حبيبتي انتي الاعقل والاحسن 

ومسحت صباح دموع مش موجودة اصلا وهى مخبية وشها في ايديها وكملت كلام 

: مش كفاية طول عمرها بختها مايل 

: طب معلش يا عمتي متزعليش انا مقدرش اخاصم شاكيرا 

قامت صباح حضنتها جامد 

: طول عمرك حنينة وطيبة يا ست البنات 

وندهت على شاكيرا 

: شاكيرا بت يا شكشوكة تعالي بوسي راس بت خالك وباركيلها يابت 

دخلت شاكيرا اوضة قسمت وهى بتمثل المسكنة 

: متزعليش مني يا قسم اعمل ايه بحب اتدلع عليكي انتي اللي معوداني على كده 

قسمت : خلاص يا شاكيرا مش زعلانة منك 

شاكيرا : بجد والنبي طب أحلفي 

ضحكت قسمت بطيبة قلب حقيقي : والله مش زعلانة 

صباح : وعشان تكوني مبسوطة ياستي اعزمي هشام عالغدا بكرا وانا وشاكيرا اللي هنطبخ ونوضب البيت وانتي تقعدي كده قمر 

قسمت : متشكرة يا عمتي هكلمه اعزمه 

دخلت اوضتها محتارة 

طول عمرهم مبتسموش في وشها كده إلا وبعدها علطول مصيبة 

لكن راجعت نفسها 

اصل دول في النهاية اهلي هيكونوا عاوزين ايه يعني 

مهما كانو صعب في النهاية هما اهلي ربنا يهديهم 

وبعدين فكرت في حاجة وطلبت يسرا 

......

: الو ايوا يا يسرا 

: ...... 

: تفتكري لو فكرتي تإذي حد طول عمره بيأذيكي تبقي كده شريرة ولا تبقي خدتي حقك 

:..........

: بس ده يبقى شر احنا مفروض نسيب ربنا يعاقبهم واحنا نصبر 

: .......

: مش ملائكية ولا حاجة احنا كلنا ذنوب ونقص ومفروض نحاول نقللها مش نزودها 

:.....

: لا لا اللي بيؤذيني ربنا يصلح حاله 

صوت خبط على الباب  وجه صوت شاكيرا من برة : ممكن ادخل 

قسمت : ادخلي يا شاكيرا 

: ها كلمتي خطيبك تعزميه 

: هكلمه بعد ما اتغدى واصلي 

: كلميه دلوقتي 

: لا لا المكالمة بتاعته بتطول  هخلص صلاة واكلمه 

: هيييح مكالمات طويلة يا سلااام  بتقولو ايه يا قسوم 

بصتلها قسمت باستغراب 

: بقى انتي يا شاكيرا يا فاتنة حدايق القبة مش عارفة بنقول ايه في المكالمات الطويلة عيب عالخمسين قصة حب اللي عيشتيهم دنتي بدأتي حب من ابتدائي يا شاكيرا 

ضحكت شاكيرا : وحياتك كلهم محدش حبني بحقيقي ولا انا حبيت حد 

قسمت : ولا حتى اللي اتجوزتيهم  ....!!!

: دول بقى خصوصا محبيتش حد فيهم ابدا .

سندت قسمت  رأسها على ضهر السرير وافتكرت بمرارة 

: حتى سمير يا شاكيرا ؟

وطت شاكيرا رأسها في الارض وهى بترد على قسمت 

هو انا عارفة يمكن متسامحنيش على الحكاية دي لكن صدقيني سمير كان شر ربنا بعده عنك ووقعني انا فيه 

افتكرت قسمت وقت ما سمير المعيد في الجامعة جه يتقدملها وهى في سنة تالتة 

كانت فرحانة قوي اولا ان حد من طقم تدريس الجامعة يتقدملها بعد فضيحة مجدي السقا ده كان أكبر رد اعتبار ليها 

ثانيا كانت معجبة بيه فعلا وسعيدة انه قرر يدخل البيت من بابه ويخطبها الاول وبعدها يتعرفو على بعض براحتهم 

في الوقت ده ابوها وامها كانو  لسة متوفيين مكملوش سنة 

كانت حزينة ووحيدة  

عمتها اللي دخلت البيت وقت العزا وفضلت مبلطة فيه مرجعتش بيتها تاني 

وقتها شاكيرا كان عندها مشاكل مع جوزها الاولاني عمرو وسابت البيت وهربت وفضلو شهور ما يعرفوش عنها حاجة لحد ما رجعت لوحدها 

يوم ما رجعت امها وقفت قدام أخواتها الرجالة وقالتلهم محدش يكلمها ولا يمد ايده عليها بركة انها رجعت بالسلامة 

طبطبو عليها وهى طفشانة من بيت جوزها مع واحد صاحبه 

لكن قسمت لو اتأخرت في الشغل ساعة عمتها تقول مسم عيارها فلت 

رفعت قسمت رأسها وبصت لشاكيرا 

: ومع ذلك اتعاطفت معاكي وطبطبت عليكي وقولتلك بيتي بيتك عشان ما تروحيش بيت اخواتك يبهدلوكي  وكانت النتيجة انه بعد شهر واحد كنتي متفقة مع سمير يسيبني ويتجوزك ازاي جالك قلب ....!!!

دمعت شاكيرا 

: كان غصب عني والله اصلك ماتعرفيش ايه اللي حصل 

: مش عايزة اعرف حاجة اكتر من اللي عارفاه وشايفاه طول عمري 

: ليكي حق قلبك يسود من ناحيتي لكن والله انا بحبك انتي اختي سامحيني واديني فرصة اوعدك اصلح كل اللي فات 

انتي لو كنتي عاشرتي سمير ده يوم واحد بس كنتي تشيلاهالي جميلة مش تزعلي مني 

: عارفة يا شاكيرا انتي وامك عملتو فيا ايه 

: عارفة زعلناكي كتير 

: لا ياريتها تيجي عالزعل انتو خليتوني مبعرفش افرح مبعرفش اتطمن لحد دايما خايفة ومستنية الوجع والخيانة وده حاجة ملهاش دوا مهما حاولتو تصلحو 

: لا بقى انتي شكلك عرفتي انا كنت داخلة ليه وبتغلوشي 

: كنتي داخلة ليه 

: كنت هستلف منك فستان عشان مجبتش معايا هدوم من بيتي واكيد يعني مش هحضر عزومة خطيبك بلبس البيت أو بلبس عادي عايزة اشرفك 

شاورتلها عالدولاب وقامت تصلي 

قسمت ختمت الصلاة لقت شاكيرا واقفة قدام المراية بفستان 

صرخت فيها 

: يعني مافيش حاجة عجبتك غير ده اقلعيه لو سمحتي حالا