عدى يومين على شاكيرا في بيت قسمت مفوتتش لحظة تحبطها فيها سواء بتلميح او كلام صريح 

وكل شوية تسألها هشام هيجيلك امتى عايزة اشوفه 

ومن ناحية تانية قسمت كانت حقيقي متونسة بوجود هشام في مصر 

لاول مرة تجرب إحساس المكالمة الطويلة اللي متبقاش عايزاها تخلص 

هشام كلامه حلو وبقى فاهمها كأن هو اللي مربيها بيشم ريحة مخاوفها وقلقها ويطمنها بيفهم السؤال اللي هى خايفة تسأله ويديها إجابته فورا 

بقت تصحى على رسالة حلوة وتنام على صوته 

بقى يعدي عليها في الشغل يتغدو سوا ويوصلها 

النهاردة يسرا هتقولها نتيجة الاستعلام الأمني اللي عملوه عنه قسمت من كتر التوتر معدتها واجعاها لدرجة انها مكانتش قادرة تنزل الشغل حقيقي  بس جمعت نفسها بالعافية عشان تعرف 

وهى في التاكسي كانت شاردة وبتفكر ونطت في دماغها جملة كانت قرتها في كتاب كئيب كده بتاع واحدة اسمها مانجا 

اسمه ناس محطوط عليها 

أصعب حاجة انك تبقي هتموت وتعرف بس خايف تعرف فتموت 

الجملة دي فضلت تتردد في ودانها طول الطريق لدرجة انها مسمعتش الموبايل وهو بيرن  كان هشام زي العادة كل يوم بيفضل معاها عالتليفون لحد ما توصل الشغل 

النهاردة مش قادرة ترد خايفة 

وعمالة تكلم ربنا بينها وبين نفسها : يارب والنبي فرحني المرة دي بس 

لما وصلت الشغل اتخضت عشان لقت هشام مستنيها قدام الباب 

قابلها بابتسامة حلوة : صباح الفل القمر ما بيردش ليه بقى 

بلعت الخضة وجاوبت بصعوبة : انا اااا انت     

: اه انا وانتي ايه مالك في ايه 

: مش عارفة اخبي عليك 

ضحك اها عشان يعني النهاردة صاحبتك القاروبة اللي اخدت باسبوري وبطاقتي هترد عليكي 

اتخضت اكتر وردت مفزوعة 

: وانت عرفت منين 

يا حبيبتي انتي اللي قولتيلي من تلت ايام عايزة استعلم عنك واديتك الباسبور بنفسي وصاحبتك قالتلك في التليفون قدامي ان بعد ٣ ايام بالكتير هنعرف 

بلعت ريقها بصعوبة 

: اه خضتني  

قرب منها بهدوء وسألها 

: خايفة ؟ 

: همووت 

: ولو قولتلك متخافيش ؟ ولو حلفتلك على كتاب الله أن عمر ما هيجيلك من ناحيتي حاجة وحشة حتى لو مافيش نصيب 

اتقبضت من كلامه اكتر بدل ما تتطمن 

وافتكرت يوم ماخرجت من الجامعة مع مجدي علشان يوصلها وقالها كلام شبه ده كان بيقولها انتي انضف بنت قابلتها في حياتي لدرجة اني مستخسرك في الكلام معايا وافتكرت بمرارة بعدها بأسبوع لما عرفت انه لف في الجامعة يقول انها شمال وانه كان بايت عندها 

افتكرت الايام السودا اللي عاشتها  واحساسها لحظة ما العميدة استدعتها وعنفتها وقالتلها السلوك ده تعمليه برة الجامعة 

ليالي كتير قضتها حزينة وخايفة ونفسها تثبت براءتها  وللاسف ده محصلش 

وقهرتها لما مجدي خطب بنت من نفس دفعتها هى عارفة سلوكها كويس قوي 

يومها يسرا قالتلها الحياة بتطبطب عالمجرمين وتجمعهم مع بعض 

: قسمت قسمت سرحانة في ايه وبتعيطي ليه 

خرجت من شرودها وبصت لهشام اطلع اشوف يسرا ولا في حاجة مخبيها عليا 

طمنها 

: اطلعي شوفيها ولما تبقي كويسة هتلاقيني مستنيكي في بينوس الزمالك عازمك عالفطار ولو عايزة تعزمي يسرا  هاتيها معاكي 

سابته وطلعت وقلبها بيدق مع كل خطوة لحد ما دخلت المكتب 

كانت يسرا قاعدة مكانها المعتاد وشها في اللاب توب 

: صباح الخير يا يسرا 

: صباح النور يا قسمت اتأخرتي ليه 

: منمتش غير ساعتين ومعدتي واجعاني من القلق ها طمنيني 

وطت يسرا رأسها على الجهاز وقالت 

 : هو يعني ااااا 

قسمت كان هيغمى عليها : لا لا ماتقوليش حاجة وحشة 

ضحكت يسرا : كنت هقولك هو يعني زي الفل بس باين عليكي مش مستحملة كنت عايزة العب باعصابك شوية 

اتنفست قسمت اخيرا 

: بجد والنبي بجد 

: بجد يا حبيبتي كل كلمة قالها حقيقية هو حتى مكانش قايل انه من عيلة كبيرة وان لهم أملاك كتير هنا بس سايبين كل حاجة ومهاجرين هو وأخواته 

اخواته بطلو يجو هنا من سنين هو اللي كل كام سنة ينزل زيارة سريعة ويمشي 

: الحمدلله  

: انتي بنت حلال يا قسم اتعشمي في ربنا خير هيعوضك صدقيني 

: فاكرة مهيب يا يسرا 

: يييييييييي يابنتي هو انتي بتدوري عالنكد بملقاط ليه كده ايه اللي فكرك بالقرف ده دلوقتي 

: فاكرة اول ما جه المكتب هنا وازاي كان لطيف معايا وفضل اسابيع يحب فيا ونكتشف بعد كده انه كان بيدور على طريقة علشان يخليني اسيب الشغل ويجيب خطيبته مكاني 

: قطع وقطعت سيرته جاته مصيبة تاخد تقل دمه محدش كان طايقه هنا انتي بس اللي نفسك حلوة 

: والله مش مسألة نفسي حلوة بس اديكي شايفة سنين وانا بختي مايل ومش قادرة اعرف السبب وكل اللي بيتقدمولي على رأي عمتي رجالة كسر 

: عارفة ليه يا قسمت 

: ليه 

: عشان انتي دايما شايفة نفسك قليلة شوفي نفسك صح واتعززي هتلاقي الف من يجري وراكي 

: مش عايزة الف كفاية عليا هشام ياخبر ده زمانه قاعد في بينوس 

: طب يلا مستنية ايه هعملك انا اذن يلا انتي 

: هو عازمك كمان عالفطار 

ضحكت يسرا وهى بتخطف شنطتها طب يلا بسرعة قبل ما يرجع في كلامه 

هشام قاعد منتظر قسمت موبايله رن 

: الو مين معايا 

: اااا استاذ هشام 

: مين يافندم 

: انا شاكيرا بنت عمة قسمت خطيبتك 

: أه اهلا يا فندم  

: لو سمحت كنت عايزة اقابلك ضروري بس بعيد عن قسمت 

: خير يافندم !

: عادي يعني انت بقيت من العيلة وفي موضوع كده بخصوص قسمت 

: اه طيب هشوف مواعيدي وارد على حضرتك تشرفنا . 

: من فضلك ما تقولش لقسمت اني كلمتك اصلي واخدة رقمك من وراها 

: مممم تفتكري ده صح ؟ يعني انا شخصيا مقبلش قسمت تكلم جوزك من وراكي حتى لو احنا عيلة واحدة انا راجل تفكيري قديم وبحب نلتزم بالحدود 

: اسفة بس اصلنا متخاصمين فكنت حابة تصالحنا على بعض 

: بجد والله امال كنتي بتصالحيها ازاي قبل كده  

: انا يعني 

: متأسف عندي مقابلة مهمة مضطر انهي المكالمة