لن تنال ما تريد إلا بترك ما تشتهي!

_قبل شهور من وقتنا الحالي كان سيف قاعد في شقته هو وشرين ومستنيها ترجع من بره وشكله متعصب جداً.. ورجعت شرين بعد شويه وكان شكلها تعباان اووي، واول ما دخلت قالها سيف بعصبيه. 

سيف

انتي كنتي فين كل ده وبكلمك مش بتردي عليا ليه؟.. 

قعدت شرين قدامه علي الكنبه وقالت بدموع

كنت بنزل البيبي مدام ادايقت اني حامل وما فرحتش بيه قولت اخلصك منه خالص.. 

سيف بحده

انتي اتجننتي ازاي تعملي كده؟.. 

شرين ببكاء

ده الصح مدام قبلت اتجوزك في السر يبقي استاهل اي حاجه بعد كده، انا ليا اتعاقب عشان سيبتك زمان باني افضل زوجه تانيه في السر والست ريناد بتاعتك تبقي هي الكل في الكل وام ولادك، هي مش حامل زيي تقدر تزعل قدامها انها حامل بالعكس ده هيبقي الدلع كله ليها والفرحه كلها ليها هي وبس.. 

سيف بحده 

لا يا شرين انتي زيك زيها وزي ما اللي في بطنك نزل انا هخليها هي كمان تنزل الحمل بتاعها، ولما تهدي هبقي اجيلك.. 

_قال كلامه وسابها وطلع ورجع لبيته هو وريناد اللي كانت شايله تيا علي ايدها بتنيم فيها ولما هو دخل ابتسمت بهدوء وقالتله.. 

ريناد 

حمدلله علي سلامتك يا حبيبي دقيقه واحده هنيم تيا جوه واجي اجهزلك العشا.. 

سيف بجمود

لا انا مش جعان نيميها وتعالي عايزك.. 

ريناد بقلق

في ايه يا سيف عايزني في ايه؟.. 

سيف

نيمي تياا وتعالي عايزك في موضوع مهم يا ريناد يلا.. 

ريناد 

حاضر ثانيه واحده.. 

_ودخلت فعلا نيمت بنتها وطلعت قعدت جنبيه علي الكنبه اللي في الصاله وقالت بهدوء.. 

ريناد 

ايوه يا سيف خير موضوع ايه اللي عايزني فيه؟.. 

بصلها بجمود وقال

انا مش عايز البيبي اللي في بطنك ده.. 

ضحكت بعدم تصديق وردت عليه

انت بتهزر صح ده انت فرحت اكتر مني لما عرفنا الخبر ده.. 

سيف بحده

لا ما فرحتش لما فكرت كويس ما فرحتش كفايه علينا تيا بس دلوقتي ولما تبقي تكبر شويه نبقي نخلف وقتها.. 

ريناد بضيق

لا لا انت اكيد مش بتتكلم جد، انت من كل عقلك عايزني انزل اببنا او بنتنا اللي لسه عمره اقل من شهرين.. 

سيف بعصبيه

انا حر انا مش عايز عيال تاني دلوقتي والقرار ده يخصني اكتر منك، انا اللي اقرر وانتي تنفذي وبس.. 

ريناد بدموع

لا انا مش هنزله يا سيف، لو ما كانش خير ما كانش ربنا جابه وحرام اصلا اللي انت بتقوله ده، ولو علي مسؤليته والتعب فانا اللي هتعب انا اللي هربيه زي ما بربي تيا لوحدي وانت فاهم كلامي كويس، من لما اتجوزنا وانت بتهرب من موضوع الخلفه وبعد خمس سنين من جوازنا سمحتلي اخلف ودلوقتي تقولي انزله، هو انت كده بتحبني ولا بتحب ولادي بطل كلامك ده يا سيف عشان دماغي ما تفهمش حاجات انا بهرب من التفكير فيها.. 

سيف بحده

خلصتي كلامك يا ريناد، اللي في بطنك ده هينزل يا كل واحد فينا يروح لحاله.. 

طلعت في الوقت ده لميااء من اوضتها وقالت بضيق

يعني حتي وانا بايته عندكم يا ريناد منكده علي ابني، وبعدين ده لسه جااي من الشغل لحقتي تتخانقي معاه، تعالي يا حبيبي انا هجهزلك العشا وانتي يا تنامي يا متتكلميش معاه خالص دلوقتي، وانا بقول الواد بيبان عليه ليه الكبر قبل اوانه ليه.. 

_نزلت دموع ريناد بحزن ودخلت اوضتها وفضلت تعيط، وفي الوقت ده بره كان قااعد سيف مدايق وامه قالتله بحده.. 

لمياء

انت اهبل يا واد انت يعني انت اللي منكد عليها، وتنزل اللي في بطنها ليه، طيب استني نعرفه ولد ولا بنت يمكن يطلع ولد وتجيب اللي يشيل اسمك  وتفرحنا بجد.. 

سيف بحده

انا حر مش عايز عيال منها تاني، اصلا هي لو بتفهم ما كانتش حملت بسرعه كده وتيا لسه صغيره بس هتكلم مع مين... 

لمياء

طيب اهدي كده انا هدخل اعملك قهوه، وشيل الموضوع ده من دماغك، لو مراتك قالت لابوها علي اللي انت عايزه ده هينفخك.. 

_وسابته ودخلت المطبخ وهو طلع موبيله وكان لسه هيبعت رساله لشرين يطمن عليها بس لقاها بعتاله رساله علي موبيله كتباله فيها... 

شرين

"اوعي تخلي ريناد تنزل البيبي بتاعها، لو بتحبني اوعي تعمل كده هي مالهاش ذنب في حاجه وانا كويسه ما تقلقش عليا".. 

_اتنهد بهدوء ومسح الرساله وقام دخل اوضته عند ريناد لقاها قااعده علي السرير وبتعيط، فقعد جنبيها ومسحلها دموعها وقال بهدوء.. 

سيف

خلاص بقي ما تزعليش حقك عليا.. 

ريناد ببكاء

مش هتخليني انزله صح؟.. 

سيف خدها في حضنه ورد عليها

ايوه يا حبيبتي مش هتنزليه، انا فكرت كويس وخلاص نعديها المره دي بس بعد كده ناخد بالنا.. 

ابتسمت ريناد وحضنته وقالت بسعاده

كنت عارفه اني مش ههون عليك يا حبيبي.. 

سيف بعد عنها وقال

طيب بصي بقي ومن غير عصبيه انا عندي شغل مهم انتي عارفه ان عبدالله سايبلي كل حاجه ففي ملفاات هروح اخلصها في الشركه وهطبق هناك بس هرجع بدري بكره عشان ارتاح شويه.. 

ريناد بضيق

مااشي يا سيف وخلي بالك من نفسك.. 

سيف

حاضر يا حبيبتي خلي بالك من تيا وماما، يلا سلااام.. 

قال كلامه وسابها وطلع من الشقه وهو وفي الاسانسير بعت رساله صوتيه لشرين وقالها.. 

سيف

شرين انا جايلك هفضل معاكي النهارده مش هسيبك لوحدك وانتي تعباانه نص ساعه وهكون عندك.. 

_وفي الوقت الحالي كان سيف سايق عربيته وهو متعصب جدا وجنبيه لمياء اللي قالتله بغيظ.. 

لمياء

فاكر اليوم ده اهو تلاقيه الواد حس ان ابوه مش عايزه وزعل ومات وهو في بطن امه، وبعدين هي مراتك دي ازاي ما حستش بتعب قبل ما ده يحصل مش بتتعالج الاطفال وهما لسه في بطون امهاتهم لما يتعبو دلوقتي، ده تقصير منها هي ومنك انت كمان جاي تزعلها وتتجوز عليها وهي حامل، خساره الواد نعوضه منين.. 

سيف بحده 

لو سمحتي يا ماما اسكتي انا فيا اللي مكفيني من لما خالي عز كلمني وقالي، دلوقتي الكل هيلوم عليا انا ويقلولي ان انا السبب.. 

لمياء

واحنا مالنا هو انت اللي كنت حامل فيه ولا هي، انت ما تتعصبش بس وانا هتصرف.. 

_ما ردش عليها سيف وبعد شويه وصلو المستشفي اللي كانت فيها ريناد ومعاها مامتها وعزالدين اللي قال لريناد بهدوء.. 

عز

يا بنتي كفايه عيااط هتدخلي العملياات ازاي بالحاله دي.. 

ليلي

خلاص يا ريناد مالكيش نصيب فيه يا حبيبتي اهدي شويه.. 

ريناد بحزن وندم

انا السبب يا ماما انا اللي اخدت ادوية المنوم دي اللي خلته يموت وما حستش بيه لما مات كنت مشغوله عنه ولولا اني جيت المتابعه مع الدكتور ما كنتش هعرف انه مات، انا السبب.. 

عزالدين

لا مش انتي السبب ده نصيب واهدي بدل ما اسيبكم وامشي وانا نفسي اعمل كده ماليش في النكد.. 

ليلي

لا والنبي يا عز خليك معانا اهو الاسم معانا راجل وخلاص لحد ما يجي طارق.. 

عز بغيظ

شايفه امك يا ست ريناد والله لولا احترامك انتي لكنت رديتهالها الاهانه دي.. 

_ابتسمت ريناد بهدوء وفي الوقت ده دخل عندهم سيف ومعاه لمياء وقال بعصبيه لريناد.. 

سيف

الكلام اللي قاله الدكتور ده صح ابننا مات في بطنك بسبب ادوية الزفت المنوم اللي كنتي بتاخديه.. 

قبل ما ترد ريناد قالت ليلي بحده

وانت مالك انت وايه اللي جابك وعرفت منين.. 

عزالدين

انا اللي قولتله يا ليلي ما فيهاش حاجه يعني دي مراته وابنه ولازم يبقي موجود.... 

ليلي بحده

يبقي موجود ليه هينزله مكانها مثلاً.. 

ريناد بحده

انت ايه اللي جابك هنا؟.. 

سيف بسخريه

جاي اوريكي انك مش فالحه في حاجه حتي ابنك ما عرفتيش تحافظي عليه مش انا بس اللي خسرتيني.. 

ليلي بصت لعز وقالت

اهو اللي انت كلمته عشان يجي يقف جنب مراته يا عز... 

عز بضيق

انت ايه اللي بتقوله ده يا سيف هو ده وقته.. 

ريناد بنبره غاضبه 

هي عادته ولا هيغيرها، علي فكره هو بيعمل كده منظر قدامكم عشان ما حدش يلومه علي حاااجه انا ما حدش يعرف البني أدم ده قدي، بس خلينا نعمل نفسنا مصدقينه وما تزعلش اوووي روح يا راجل خلفه من مراتك التانيه ولا هتخااف تطلب منها حاجه زي دي لتسيبك وتمشي مع واحد تاني.. 

_اول ما خلصت كلامها نزل بأيده علي وشها وضربها بالقلم تحت صدمة ليلي وعز وطارق اللي كان لسه جاااي واول ما شافه ضرب ريناد قرب منه وبكل عصبيه لكمه في وشه وقال بغضب.. 

طارق

بتمد ايدك عليها يا حيوان، ده انا هطلع **&&&

وقف عز بينهم وقال بحده

اتلمم منك ليه.. 

لميااء بعصبيه

بتضرب ابني يا طااارق شايفه عيالك يا ليلي دول مش متربيين.. 

عز بحده

لا وانتي اللي ابنك متربي اوووي، خدي ابنك وامشي يا لميااء انا غلطااان اني عملتكم بني ادمين وكلمتكم عشان تيجو ونصلح الوضع... 

وبص لسيف بغضب وقال

وانت وحياة امك لاخليك تندم علي اللي عملته ده، بقي يا واطي بكبرك ومكلمك عشان تيجي تهون عليها تقوم تمد ايدك عليها قداامي، بس يبقي ما فيش فينا راااجل لو رجعتلك تاني يا سيف.. 

سيف بضيق

انا اللي ما بقيتش عايزها خلاص خليهالكم بس بنتي مش هتقعد معاكم وهخدها غصب عنكم.. 

طارق بحده 

وريني ياروح امك هتاخدها ازاي.. 

لميااء

مش وقته الكلام ده يا سيف يلا بينا يا حبيبي واحنا هنعرف كويس ازاي ناخد بنتنا من اختك.المهمله دي يا طارق... 

ليلي بحده 

امشي يا لمياء من هنا بدل ما وديني اقوملك وانكد عليكي كويس انتي والحيله اللي جنبك ده.. 

_خافت لمياااء واخدت سيف ومشيت من عندهم، واخدت ليلي ريناد في حضنها وقالت... 

ليلي

حقك عليا يا حبيبتي والله ما هيلمس منك شعره واحده تاني.. 

ريناد ببكاء وخوف

ماما هو ممكن بسبب اللي حصل ده ياخد مني بنتي صح؟! 

عز

مستحيل البنت في حضانتك غصب عنه وما حدش هيخسر غيره احنا كلنا جنبك ومش هنسيبك.. 

وبص لطارق وقال 

طارق تعالي هنروح للدكتور ما ينفعش تعمل العمليه وهي في الحاله دي حتي يأجلها لبكره.. 

بص طارق بحزن علي حالة اخته ورد علي عز وقال

حاضر وابقي خدهم انت وروح وانا هقعد مع بابا وهنيجي بكره ان شاء ابله البيت.. 

ــــــــــ #بقلم_الكاتبه_رحاب_القاضي ــــــــ

_وفي مكتبه بسيطه جدا وهاديه اووي كانت قااعده رضوي هناااك مع يوسف ومعاهم نورا واسلام ومحمود وميلاد واقف عند. الشبااك بعيد. عنهم بيتكلم مع خطيبته في الفون... 

اسلام 

واخدين بالكم يا جماااعه الواد ميلاد من لما خطب وبقي كل ما الموبيل بتاعه يرن عيونه بتقلب قلوب.. 

محمود

يا ابو عمو بطل قر علي الراجل ده احنا ما صدقنا انه بقي بيعرف يتكلم وخطب.. 

رضوي

طيب كفااايه كلام ونركز في الشغل كفايه البيه الرومانسي اللي مش عارفه ايه اللي حصله ده بس ليه روقه.. 

ركز كل واحد في شغله وهي قالت ليوسف بصوت واطي

مالك قالب خلقتك كده ليه؟.. 

يوسف بغيظ

يعني هو المفروض ان انا وانتي طالعين مع بعض نخلص شغلنا، يعني نروح كافيه هادي ونقعد قعده لطيفه مش جيباني في مكتبه كلها ناس مثقفه وجيبالي نورا والبغال التلاته، تعبتيني يا رضوي وانا بقياش عارف اعمل معاكي ايه.. 

تجاهلت كلامه وقالت بهدوء

كمل شغلك يا يوسف واحنا هنتقابل نشتغل مش نحب في بعض انت اللي فهمت غلط.. 

يوسف 

نحب في بعض ياااه الكلام ده عايزله معجزه عشان يحصل.. 

ابتسمت رضوي بهدوء وجه ميلاد وقال

يا شباب كلكم معزومين اخر الاسبوع علي الخطوبه بتاعتي.. 

نورا

مبروك يا ميلاد ربنا يتمملك بخير.. 

ميلاد 

الله يبارك فيكي يا نورا وعقبالكم كلكم يا جماعه.. 

رضوي

باركنا وعزمتنا اقعد خلص شغلك بقي يا ميلاد واقفل موبيلك ده خالص يلا.. 

ميلاد بقلق

بتقفش عليا لو قفلت الفون.. 

ضحكو كلهم ورضوي قالتله بنفاذ صبر

طيب ركز في الشغل يا ميلاد بدل ما تترفد وتسيبك إيڤون وقتها.. 

ميلاد

لا لا بلاش تقولي كده، بشتغل اهو بشتغل.. 

ــــــــــ #بقلم_الكاتبه_رحاب_القاضي ــــــــ

_وبعد شويه في بيت الاستاذ حسن روقت ليلي الاوضه بتاعت طارق لريناد اللي كانت قاعده في الصاله ومنيمه تيا بنتها علي رجلها ومعاها هنا وروفان وروز.. 

روز

يعني انتي مش هتجيبي نونو تاني يا ريناد؟.. 

روفان 

انتي غيبه يا بت مش ماما قالت ما نقولهاش كده عشان هي مدايقه وما نديقهاش اكتر وكمان ما نجيبش سيرة المكفي علي.. وشه او عينه مش فاكره هي كانت تقصد سيف ما نجيبش سيرته قدامها.. 

ضحكت هنا وريناد قالت بسخريه

لا كتر خيرك يا روفان عملتي الواجب بزيااده.. 

روز 

طيب انتي هتقعدي معانا علي طول يا ريناد انتي وتيا؟.. 

ريناد بهدوء

ايوه يا حبيبتي هقعد معاكم علي طول.. 

روفان 

وهنا كمان هتقعد معانا علي طول، ياريتك كنتي مشيتي من زمان يا روان بيتنا اتملي حاجات حلوه من بعدها.. 

طلعت ليلي عندهم وقالت

هاتي تيا يا ريناد وادخلي نامي انتي وما تفكريش في حاجه، ربنا هيسترها معانا.. 

ريناد 

سيبيلي تيا معلش يا ماما.. 

ليلي

اسمعي الكلام الدكتور قال ترتاحي عشان العمليه بكره وانا هنيمها في حضني والله وهاخد بالي منها.. 

_سمعت ريناد كلامها ودخلت اوضتها الجديده في بيت اهلها، وليلي قالت لهنا بغضب.. 

ليلي

هنا كلميلي مقصوفة الرقبه اللي اسمها رضوي خليها تيجي حالاً.. 

هنا

ما هي قالت عندها شغل.. 

ليلي

شغل ايه اللي بيبقي ليل ونهار ده، امسكي البت انا هكلمها.. 

_قالت كلامها واخدت هنا تيا ودخلت اوضتها وليلي كلمت رضوي اللي ردت عليها وقالت.. 

رضوي

ايوه يا ماما.. 

ليلي

انتي فين يا بت انتي كل ده؟. 

رضوي

ما انا قولت يا ماما عندي شغل لهنا هي ما قالتلكيش؟.. 

ليلي

شغل ايه ده اللي ليل نهار وفي الظروف اللي احنا فيها دي، اسمعي يا رضوي يا ترجعي البيت دلوقتي وتتعدلي يا ما فيش شغل خالص.  

رضوي 

يا ماما في ايه لكل ده انا عندي ضغط شغل وو.. 

ليلي بحده

سمعتي قولت ايه يا زفته انتي، اقل من نص ساعه وتكوني في البيت والا والله هيبقي يومك اسود.. 

_قفلت معاها ليلي وكلمت روان اللي ما ردتش عليها، فكلمت علياء اللي ردت عليها فوراً.. 

علياء

يا ست انتي بكلمك اليوم كله مش بتردي ومش عارفه اسيب اسرار لوحدها البنت كمان حالتها صعبه.. 

ليلي

معلش يا علياء والله المشاكل نازله ترف علي دماغي انا والولاد من كل ناحيه، ما اعرفش ايه اللي حصل وليه كل ده بيحصلنا بس.. 

علياء

قدر الله وما شاء فعل، احمدي ربنا المهم حسن يقوم بالسلامه وربنا يعفيلك عن ريناد.. 

ليلي بدموع

شوفتي يا علياء اختك وابنها بقي يعملو كده في بنتي والواطي قليل الاصل يجي في عز ما البنت مقهوره يمد ايده عليها قدامي انا واخوها وعز اخوكي كمان كان موجود.. 

علياء بصدمه

اخص عليك يا سيف اطمني يا ليلي كل حاجه هتتحل هو غلطان من ساسه لراسه بس نهدي الدنيا ما نعملش مشاكل اكتر عشان لو كانت في نيه للرجوع ما نقفلهااش عشان حتي بنتهم وانا قولت لريناد كده.. 

ليلي

قولتيلها امتي؟.. 

علياء

ما هو الحقيقه ان ريناد لما عرفت ان سيف متجوز عليها انا كنت بايته عندهم وجات وقالتلي وانا غلطت وقولتلها ما تتكلمش عشان فرح روان وعبدالله.. 

ليلي بغيظ

حتي انتي كمان يا علياء هي لو كانت بنتك كنتي هتسكتي كنتي هتقولي انها ترجع للي وجعها وخانها وكدب عليها بس هي مش بنتك واكيد هتاخدي برضو صف ابن اختك... 

علياء

ايه اللي بتقوليه ده يا ليلي بناتك دول بناتي وو.. 

ليلي بحده 

فين روان يا عليااء انا اصلا مكلمااكي اطمن علي بنتي انتو عيله واطيه وانا مش طايقه حد منكم.. 

علياء ضحكت وقالت 

ههههه ماشي يا ليلي احنا واطين وانتي العاليه، وبنتك مش في البيت وكنت هشتكيلك منها يس قولت مش وقته... 

ليلي بقلق

مالها دي كمان هي واطيه اااه وكأنها ما صدقت خلصت مننا بس مش ناقصه مصيبه جديده والله.. 

علياء اتنهدت بضيق وقالت

بصي هي كل يوم بتخرج تسهر مع صحابها ودي مش عادتنا يا ليلي وبتلبس حاجات كده مش عجباني دايق ومحزق وملزق وعبدالله لو هنا ما كانش هيحصل كويس.. 

ليلي بضيق

وابنك فين مش كفايه بقي هيسيب البنت كده متعلقه لامتي.. 

علياء

هو سايبها مع اهله مش لوحدها هيحل كام مشكله في البلد وهيرجع ياخدنا علي طول.. 

ليلي

طيب يا علياء هبقي اكلمها لما ترجع بس قوليلها تكلمني ضروري.. 

علياء

من عينيا وانا بكره هاجي معاكم اطمن علي ريناد.. 

ليلي

ان شاء الله مع السلامه.. 

قغلت معاها ليلي وقالت بغيظ 

ااه يا روان الكلب كل ده يطلع منك بس مااشي فاكره انك اتجوزتي ومش هنعرف نلمك.. 

_وحاولت  تكلمها تاني بس كالعاده مش بترد، فكلمت عبدالله اللي رد عليها علي طول وقال.. 

عبدالله

مساء الخير يا مرات خالي.. 

ليلي

مساء النور، فينك مش شيفينك اليومين دول.. 

عبدالله

اكيد حضرتك عارفه الظروف.. 

ليلي

طبعا.. بس خلاص العزا واخدته مقعد مراتك وامك ليه في مكان وانت في مكان تاني بعيد عنهم؟.. 

عبدالله

بظبط الدنيا هنا يا مرات خالي وهاخدهم علي طول يومين تلاته بالكتير.. 

ليلي

طيب اليومين تلاته دول معلش انا هاخد بنتي عندي، امك مش هتقدر علي روان يا عبدالله وانت طول ما بعيد عنها مش هتعرف هي بتعمل ايه ولا ما بتعملش ايه، فخليها تيجي عندي اليومين دول لحد انت ما تيجي.. 

عبدالله 

معلش يا مرات خالي سبيها براحتها وانا هعرف اتعامل معاها كويس.. 

ليلي

يا عبدالله انت مش عارف هي بتعمل من ورااك وو.. 

عبدالله قاطعها وقال

لا عارف وعارف مراتي فين ومع مين وبتعمل ايه، ولو ما عرفتش احكم عليها واخليها تمشي مظبوطه وقتها هبقي اجيبهالك يا مرات خالي، بس سيبوها براحتها دلوقتي يا مرات خالي وانا يومين وجاي.. 

ليلي بقلق

ماشي هي طايشه شويه بس بتسمع الكلام.. 

عبدالله 

انا هقفل يا مرات خالي دلوقتي عشان عندي شغل، تؤمري بحاجه؟.. 

ليلي

لا شكرا يا حبيبي تسلم وخلي بالك من نفسك.. 

عبدالله 

علي الله مع السلامه.. 

قفلت معاه ليلي وقالت لنفسها

هو انا يعني كان لازم اكلمه واقوله، عبدالله عصبي وروان مش قده استرها يارب واهديها علي نفسها.. 

دخلت في الوقت ده رضوي البيت وقالت

اديني جيت يا ماما في ايه؟.. 

ليلي 

انتي بتكلميني كده ليت با بت انتي، وبعدين شغل ايه دلوقتي ما انتي لسه راجعه من الشغل.. 

رضوي بغيظ

يا ماما شغل مع الفريق بتاعي، كان شكلي وحش اوي واما يشخط فيهم وبطلب منهم يشتغلو وانا ماما تكلمني تهزاني وتخليني اسيبهم وامشي.. 

ليلي

بصي يا رضوي شغلك من الساعه 9 الصبح لحد الساعه 9 بالليل الساعه تسعه وربع تكوني في البيت واظن كده عداني العيب انما ترجعي من شغلك وتنزلي تاني وترجعيلي في نص الليل لا يا حبيبتي احنا عيله محترمه ولو انا رضيت بالكلام ده لا ابوكي ولا اخوكي ولا عمك هيرضو بيه.. 

رضوي بغيظ

حاضر ياماما حاجه تاني؟ 

ليلي

ايوه الزفت كمال كلمك في حاجه.. 

رضوي بضيق

اطمني يا ماما لو اتكلم هيبقي قدامكم وده مش وقت كلام.. تصبحي علي خير.. 

ليلي

طيب بصي ما تخليش هنا تعمل حاجات كتير في شغل البيت خليها تهتم بمذاكرتها اكتر،وادخلي هاتيلي تيا من عندها عشان هبيتها معايا.. 

رضوي 

حاضر يا ماما بعد اذنك... 

_سابتها رضوي ودخلت اوضتها ولقيتهنا نايمه وجنبيها تيا فأخدتها من جنبيها وطلعت اديتها لمامتها ودخلت غيرت هدومها وجات تنام بس رن موبيلها برقم يوسف فقامت فتحت الشباك اللي في اوضتها ووقفت عنده عشان تتكام وهنا ما تسمعهاش.. 

رضوي

نعمم؟.. 

يوسف 

ايه.. بطمن مامتك عملتلك حاجه؟.. 

رضوي

لا بس هي مدايقه بسبب اني بتأخر بره.. 

يوسف 

احسن اخرة ظلمك ليا، بس هي معاها حق انتي لازم تروحي بدري.. 

رضوي 

انت كمان هتتكلم زيهم.. 

يوسف 

لا عشان انتي بنت يا رضوي وما ينفعش تقعدي بره للوقت ده.. 

رضوي

خلاص يا يوسف انا عارفه العقليه اللي زيك مش هعرف اتفاهم معاها.. 

يوسف

لا لا خلاص براحتك يا اسطا اعملي اللي انتي عايزااه انا راجل متفاهم جداً علي فكره.. 

ابتسمت رضوي وقالت

وده لامتي بقي.. 

يوسف 

لحد ما ربنا يقرب البعيد.. 

رضوي

طيب تصبح علي خير بقي انا هنام، ومش هاجي الصبح بكره ممكن اجي علي الساعه 2 كده.. 

يوسف

ليه في حاجه ولا ايه؟.. 

رضوي بنبره حزينه 

اختي هتعمل عمليه ولازم اكون جنبيها.. 

يوسف 

الف سلامه عليها عملية ايه دي؟ 

رضوي

اجهاض للاسف.. 

يوسف

الف سلامه عليها ربنا يقومها بالسلامه.. 

رضوي

الله يسلمك، باي.. 

_قفلت معاه وراحت نامت وكل تفكيرها بيوسف واهتمامه بيها اللي خلاها فعلا ما تتأثرش باللي عملو كمال ولا تزعل عليه بالطريقه اللي كانت متوقعاها.. 

ــــــــــ #بقلم_الكاتبه_رحاب_القاضي ــــــــ

_وتاني يوم الصبح في بيت فيروز طلعت من اوضتها لما الباب كان بيخبط... 

فيروز

يا زين قولتلك خد معاك المفتاح وانت نااازل.. 

_واول ما فتحت الباب اتفجأت ان اللي بيخبط عزالدين مش زين، فأتنهدت بضيق وقالت.. 

فيروز

خير يا عز؟ 

_بصلها عز من فوق لتحت لهدومها البيتي اللي كانت قصيره شويه وقال... 

عز

انتي ازاي تفتحي الباب كده؟ 

فيروز

كنت فاكره زين وو.. 

قبل ما تكمل كلامها بصتله بحده وقالت

وانت مااالك اصلا.. 

عز دخل وقفل الباب وقال

والله لو احنا اطلقنا فانتي ام ابني ومالي ونص.. 

فيروز ببرود

انت ايه اللي جايبك عندنا من وش الصبح.. 

عز

في ايه يا وليه ما احنا كويسين وجيتي ووقفتي جنبي واخويا تعبان وكنا ثنائي حلو اووي.. 

فيروز

ثنائي ايه يا عز احلص ايه اللي جايبك؟ 

عز 

ابنك قصدي ابننا كلمني وقالي تعالي عايزك انت وماما في موضوع مهم.. 

فيروز

طيب زين مش موجود اتفضل بره لحد ما يجي ابقي تعالي.. 

عز قرب منها وقال بخبث

ده انا من حسن حظي اني جاي وزين مش موجود.. 

رجعت لورا كام خطوه وقالت بقلق

قصدك ايه يعني.. 

عز قرب منها اكتر وغمزلها وقال

في ايه. يا وليه ما وحشتكيش ولا ايه وانتي حلوه كده ولا كأنك كبرتي ولا حاجه.. 

فيروز بحده

الله واكبر في عينك وتوحشني عليه ايه ده انا عمري ما اتمنيت حااجه قد ما اتمنيت اني ما اشوفش وشك تاني بس اعمل ايه في النصيب.. 

عز بخبث

كداابه انتي ما بتتعصبيش كده غير لما بتكوني عايزه تداري اللي جواكي هو انا هتوه عنك. ياا فيرو.. 

فيروز بتوتر

انت عايز توصل لايه اقولك ااه وحشتني وهننسي اللي فات ونفتح صفحه جديده انت بتحلم يا عزالدين.. 

ذقها علي الكنبه اللي وراها بهدوء وقرب منها جدا وقال

ما تفكك بقؤ من كلام الافلام ده وخلينا نعيش اللحظه.. 

اتصدمت فيروز من تصرفاته وقالت 

انت اتجننت ابعد. عني يا عز احسنلك.. 

عز بهدوء

والله العظيم وحشتيني ومن زمااان اوي وو.. 

_في الوقت ده دخل زين واول ما شافهم كده اتصدم وبصلهم بضيق وغضب، وقام بسرعه عز بعد عن فيروز اللي وشها قلب احمر بأحراج وكسوف.. 

عز

اقسم بالله احنا ابوك وامك عادي يعني احنا مخلفينك قبل كده اصلا... 

فيروز بتوتر

اا انا هكمل تجهيز الفطار جوه وو وانت خليته ليه يجي ده؟.. 

زين بضيق

نفطر طيب وبعدين اقولكم عايزكم ليه.. 

فيروز 

انا مش جعانه افطر انت وابوك.. 

عز قعد وقال

انا جعان يلا جهزلي الفطار وتعالي نفطر سوا.. 

فيروز بغيظ

ما شوفتش برود كده في حياتي، هات يا زين انا هجهزلكم الفطار.. 

_اداها زين الاكياس وهي دخلت المطبخ وزين بص لغز بغضب وغيظ، فعز بص وراها وقال بقلق.. 

عز

في ايه يا زين بتبصلي كده ليه يا حبيبي.. 

زين قعد جنبيه وقال بضيق

ممكن اللي شوفته ده ما يتكررش تاني يا بابا ولو سمحت مالكش دعوه بماما تاني.. 

عز 

انت. اهبل يالاا دي كانت مراتي وامك.. 

وتابع بصوت واطي

وقريب اووي ممكن اردها.. 

زين بضيق

لا لا لا ما ينفعش انا ما بحبش ماما تبقي حد غريب حتي لو حضرتك.. 

ابتسم عز وقال

بتغير علي امك. مني، انت عبيط. يا زين انا ابووك وهي امك والوضع الطبيعي اننا نبقي احنا التلاته عيله واحده.. 

زين بنبره حزينه 

بس انا عمري ما اتعودت علي اي وضع طبيعي، انا متعود علي الحاجه المختلفه اللي عكس كل النااس فخلينا كده احسن.. 

عز 

قوم انت بالسلامه بس والباقي ساهل.. 

ــــــــــ #بقلم_الكاتبه_رحاب_القاضي ــــــــ

_وفي شركة يونس الصاوي نزل يزن من عربيته وكان لسه هيدخل الشركه بس وقف لما سمع صوت سدره وراااه اللي قالتله.. 

سدره

استني يا يزن لو سمحت.. 

بصلها بجمود وقال

عايزه ايه؟. 

قربت منه وقالت بهدوء

مسافره عند جدو وو.. 

قاطعها وقال

جايه تسلمي عليا لا معلش انا مش عايز اسلم عليكي ومش عايز اشوفك اصلا وما يهمنيش تسافري ولا تقعدي.. 

سدره بدموع

عارفه بس في كلمتين هقولهم ليك وخلاص مش هتشوفني تاني بجد عشان انا مش هرجع هنا تاني، انا لو كنت كرهتهم كلهم فانا ورحمة ماما ما حبيتش غيرك وو.. 

يزن بحده

ولا كلمه كمان انتي كداابه انتي واحده مريضه وما بتحبش حد، امشي يا سدره وريحنا منك.. 

_نزلت دموعها بحزن وقبل ما ترد عليه سابها ومشي بعربيته تاني وما دخلش الشركه، ورااح لشركة شهد اللي كانت قااعده في مكتبها ودخل عندها وقال.. 

يزن

فاضيه يا ماما ولا لا؟.. 

شهد 

افضالك يا حبيبي ايه المفجأه الحلوه دي.. 

اتنهد. يزن بحزن وقال

انا تعبت اووي يا ماما مش عارف ارجعلها ومش عارف اسامحها ومش عارف اعيش من غيرها.. 

قامت شهد وقربت منه ومسكت ايده وقالت 

ايه اللي حصل، انت شوفتها؟ 

يزن بدموع

الهانم مسافره عند جدها وو وجات تودعني وبتقول انها مش هترجع تاني تفتكري انا هقدر اتعود اني ما اشوفهاش تاني.. 

حضنته شهد وقالت بحزن

هتتعود وهتنساها وهتحب غيرها اللي هتكون بنت تستاهلك بجد المره دي... 

_وفي نفس الوقت في بيت الاستاذ حسن في اوضة ريناااد كانت قااعده بتعيط بحزن كبير وحطت ايدها علي بطنها وقالت ببكاء.. 

ريناد

انا اسفه والله ما كانش قصدي اخسرك، انا الغلطانه بس عشان ما عرفتش احافظ عليك.. 

دخلت عندها في الوقت ده ليلي وقالت بحزن

يا بنتي كفااايه احمدي ربنا علي اللي حصل ده، وفكري في بنتك دي خافي علي صحتك ونفسك عشانها لو احنا يعني مش فارقين معاكي.. 

ريناد بدموع 

غصب عني يا ماما انا مش عارفه استوعب اللي حصل ده يعني خسرت جوزي وابني وحياتي باظت، هو انا عملت ايه عشان يحصل فيا كل ده... 

قعدت ليلي جنبيها وقالت

الحمد لله ووصلنا لهنا ما حصلتش حاجه اوحش من كده، الله واعلم ربنا حكمته ايه في كل اللي بيحصل ده، احنا ربنا بيبتلينا عشان نصبر ونحتسب ونستني عوضه ونصبر واحنا راضيين مش نفضل نقول ليه وليه، لا غلط احنا نصبر ونخلي عندنا يقين ان ربنا مش هيسيب حقنا وهعوضنا عن الفتره دي بحاجات حلوه، فقومي بقي عشان نروح نعمل العمليه وادعي ان ربنا يقومك لينا بالسلامه الدنيا مش هتقف هنا لسه في سنين طويله جايه بادينا نخليها حلوه وبادينا تفضل فاكرين الوحش اللي عدي ونعيش بيه.... 

دخلت عندهم رضوي وقالت

ماما بابا وطارق طالعين اهو واختك وبنتها الرزله دول بره.. 

ليلي

ااه يا قليلة الادب اختي دي اسمها خالتك وروحي اقعدي معاهم وانا واختك طالعين حالاً

رضوي

طيب انتي هتروحي مع ريناد انا اقعد اعمل ايه ما تسبيني اروح شغلي وهخلص وهجيلك علي طول والله يا ريناد المستشفي.. 

ليلي

وبنت اختك وابوكي التعبان واخواتك لما يرجعو من المدرسه مين هيقعد قبالهم.. 

رضوي

ما هنا موجوده يا ماما.. 

ليلي

وهي هنا دي الشغاله بتاعت امك، بت انتي البت عندها مذاكره هسمعك عامله دوشه في الاوضه او حتي تخليها تعمل حااجه هديكي علي دماغك.. 

ريناد

ماما معاها حق يا رضوي معلش ما جاتش من اليوم. ده وانا بكره هاجي وهاخد تيا مش هشيلكم همها خالص.. 

ليلي

لا شيلينا مالكيش دعوه وما تشليش هم حاجه انتي.  

رضوي

يعني هي بنتك وانا بنت البطه السودا، هي ما تشيلش الهم وانا اشيله عادي.. 

سمعو صوت حسن بره فقامت ليلي بسرعه وقالت

اوعي كده من قداامي يا عديمة الاحساس انتي، حبيبي رجعلي بالسلامه اوعي.. 

ـ وطلعت ليلي بسرعه وريناد ورضوي ضحكو عليها، وقعدت رضوي جنب ريناد وقالت بهدوء.. 

رضوي 

احنا كلنا جنبك ما تزعليش.. 

ريناد بتنهيده حزينه

علي رأي ماما الحمد لله ان انتو معايا.. 

رضوي

طيب تعالي نسلم علي بابا.. 

_وقامو فعلا وطلعو بره وراحو لحسن في اوضته وكانت ليلي قااعده جنبيه وطارق وهنا وخالتهم ناهد وهند بنتها واقفين.. 

ريناد

حمدلله علي سلامتك يا بابا.. 

بصلها حسن بحزن وقال

تعالي يا حبيبتي جنبي هنا.. 

قعدت ريناد جنبيه وهو قال بدموع

والله كل الوجع اللي حسيت بيه كوم ولما عرفت اللي حصل وانا مش معاكي كوم تاني.. 

ريناد ابتسمت بصعوبه وقالت 

عادي يا بابا المهم انك. كويس وبخير.. 

ناهد 

هو ايه اللي حصل مالك. يا ريناد في ايه؟.. 

ليلي بضيق

مشكله يا ناهد بينها وبين جوزها هبقي اقولك عليها بعدين.. 

 ناهد 

طيب الف سلامه عليك يا حسن مره تانيه، وعايزه انزل المره الجايه الاقيك انت اللي بتفتحلي الباب.. 

حسن 

الله يسلمك يا ام هند وان شاء الله خير.. 

ناهد 

يلا يا هند بينا.. 

هند بصت لهنا بغيظ وقالت 

اوكي يا ماما بس معلش يا خالتو انا مستغربه هي البنت دي بتعمل ايه هنا؟.. 

_بصت هنا للارض بأحراج وعيونها اتملت دموع، وقبل ما ترد عليها ليلي قال حسن بجديه.. 

حسن

قاعده في بيتها يا هند، واسمها هنا علي فكره هنا من النهارده بنتي وقااعده معانا هنا علي طول.. 

لوت ناهد بوزها وقالت

ااه ما انا ليلي قالتلي ونسيت اقول لهند، يلا بينا بقي يا هند.. 

مشيت ناهد وبنتها وقال طارق بسخريه

بقولك ايه يا هنا اتعودي مدام هتقعدي معانا ان تلاته ما تاخديش علي كلامهم وهما خالتي ناهد وبنتها هند بنت عتبه وعمتي لمياااء ولو اخدتي عليهم مستشفي المجانين مستنيااكي يا بنتي.. 

حسن

اهو الواد ده اول مره يقول حاجه صح اسمعي كلامه.. 

طارق

اول مره طيب ده انا كلامي كله حكم، المهم انا هدخل انااام عشان فاصل.. 

ليلي

استني هنا انا نقلتلك حاجتك من امبارح للاوضه الفاضيه اللي في شقة عمك اللي جنب اوضة زين.. 

طارق بغيظ 

وانتي يا ماما تنقلي حاجتي ليه ما انتي عارفه اني ما بحبش حد يشوف حاجتي ولا يدعبس في اوضتي.. 

ليلي

بلا نيله ده انا كل اللي لقيتهم 2000جينيه وسط هدومك وشيلاهملك احوشلك عليهم... 

طارق بغيظ 

الله يرحمهم يا ست الكل، ونقلتو التكيف بتاعي ولا لا؟.. 

ريناد 

لا التكييف يلزمني انا وبنتي هاتلك غيره.. 

طارق بنفاذ صبر

طيب ابقي كملي القساط بتاعته بقي يا روح امك.. 

ضحكو كلهم علي عصبية طارق وحسن قال

ااه يا قليل الادب طيب والله ما حد هيكمل القسااط غيرك، وانت بتعمل ايه هنا علي شقة عمك يلا يا حبيبي.. 

طارق بنبره دراميه 

ماشي يا ابو علي ده انتي لو لقيني في كيس شيبسي مش هترميني عند اخوك بالطريقه دي.. 

_طلع طارق من عندهم وهما فضلو يضحكو عليه وحسن قال لهنا بهدوء... 

حسن 

ما تاخديش الكلام عليكي يا هنا، انتي هنا زيك زيهم واللي يرخم عليكي اوعي تيجي تقوليلي رخمي عليه هنا كل واحد عايش بدراعه.. 

ابتسمت هنا وقالت

حاضر يا.. 

حسن 

ها ها يا ايه؟.. 

هنا بابتسامه واسعه 

يا بابا حسن.. 

ليلي

وحاجه كمان انتي زي ما حسن قال واحده مننا يعني هنتشارك كلنا مع بعض اسرار البيت ده وطبعا ما فيش حد بيطلع اسرار بيته بره حتي لو كان لمين ، فاهمه يا حبيبتي.. 

هنا 

حاضر فاهمه يا طنط.. 

ــــــــــ #بقلم_الكاتبه_رحاب_القاضي ــــــــ

_وفي بيت فيرو كانت قااعده هي وعزالدين قدام زين اللي قالهم بجديه وهدوء.. 

زين 

الموضوع اللي انا عايزكم فيه، هو اني بحب واحده وعايز اتجوزها.. 

فيروز بحمااس

يارا صح؟.. 

عز

يارا مين وبتحب من غير ما تقولي، هي امك تعرف وانا لا ليه هي احسن مني في ايه؟.. 

فيروز

في حاجات كتير طبعا انت ما تتقارنش بيا اصلا.. 

عز. 

والله انا بتكلم مع ابني اصلا مش بتكلم معاكي، وانت قولي مين يارا دي؟.. 

زين 

يارا يونس الصاوي.. 

عز ابتسم وقال

طيب والله انا كنت مستنيك تقوم بالسلامه واقولك اخطبهالك، البت كده بسكوته بس هي عندها كام سنه؟.. 

زين 

عندها 16 سنه وسبع شهور بالظبط.. 

عز غمز لفيروز وقال

لا ابنك مهتم طالع لابوه.. 

فيروز

فشر انا ابني متربي ومحترم.. 

كتم زين ضحكته وعز قال

كأنها ما قالتش حاجه كبرت وخرفت المهم، انا هجوزهالك ودلوقتي.. 

زين 

دلوقتي ازاي يا بابا انا لسه بقولكم وبعدين هروح اكلم يونس بيه لوحدي وو.. 

عز 

لوحدك ليه ما عندكش اب.. 

فيروز بحده 

ما تسيبه براحته يا عز وانا معوده ابني يعتمد علي نفسه.. 

عز 

ده كان زمان انما دلوقتي يعتمد عليا انا وهو يطلب ويشاور وانا تحت امره وبكره هكلم يونس.. لا بكره ايه دلوقتي هكلمه واخطبهالك.. 

وطلع موبيله وزين قاله 

يا بابا استني الموضوع مش لعب عيال ده جواز.. 

عز اتصل بيونس وقال

اسكت انت مش فاهم حاااجه.. 

ورد عليه يونس فقال عز بسرعه

ايوه يا يونس عامل ايه؟.. 

لطم زين علي وشه ويونس قال

انا كويس الحمد لله، في حاجه ولا ايه يا عز مش من عادتك تكلمني وتسأل.. 

عز 

لا ما انا ليا حاجه عندك وعايزها.. 

يونس بعدم فهم

حاجة ايه دي يا عز بص انا مش فايق لهزارك ده انت راجل عاطل انما انا عندي مشاغل.. 

عز 

يا جدع افهم انا عايز بنتك،انا طالب ايد يارا.. 

يونس بحده 

يا نهار ابوك اسود هي حصلت عايز تتجوز بنتي.. 

عز 

والله بني ادم براس حمار، انا عايز بنتك لزين ابني، هااا نيجي نقرا الفاتحه امتي؟.. 

يونس

اقفل يا عز عشان ما اخليش الفاتحه دي تتقري عليك، وبنتي مخطوبه يا حبيبي لابن عمها حامد ابن محمد الصاوي.. 

عز بص لزين بحزن وقال

ااه طيب لينا كلام تاني بقي مع السلامه.. 

قفل معاه عز وقال لزين 

يا ابني الراجل بيقولي ان البنت مخطوبه لابن عمها.. 

زين بغيظ

يا بابا ما انا كنت لسه بتكلم وانت مش راضي تسمعني، انا عارف الموضوع ده وعشان كده بقول انا اروح ليونس الصاوي الاول انا مش هينفع اسيب يارا وهحاول عشانها لاخر نفس، حتي لو كان مكتوبلي اموت ما ابقاش قصرت فحق البنت اللي حبيتها.. 

فيروز بدموع

بعد. الشر عليك يا حبيبي.. 

قعد عز جنبيه وقال 

وغلاوتك عندي لاجوزهالك غصب عن ابوها واللي جابوه، وانت هتخف وهتبقي زي الفل وهتتجوزها وهتفرحنا انا وامك بيك.. 

ابتسم زين ورد عليه وقال

ان شاء الله يا بابا.. 

ــــــــــ #بقلم_الكاتبه_رحاب_القاضي ــــــــ

_ وفي بيت يوسف ابو سدره، كان قاعد مدايق وقعدت جنبيه بطه وقالتله... 

بطه 

يوسف ما انت اللي قسيت عليها اووي، هي ما كانتش عايزه انك تشد. عليها في الوقت ده بالذات كان محتاجه تشوف ان في نااس بتحبها.. 

يوسف بحزن

بعتالي رساله تقولي انها ماشيه ولو بحبها فعلا ما اوريهاش وشي خالص ولا اخليها تشوفني عشان هي ما بتكرهش حد قدي انا ويونس، وبتقولي اعتذرلك بالنيابه عنها عشان انتي كويسه مش زينا.. 

بطه بحزن

طيب نسيبها تهدي شويه وبعدين نسافر انا وانت عندها.. 

دموعه نزلت وقال

اسافر عند بنتي اللي بتكرهني، انا همها عملت مش هعرف اكسب محبتها وانا اللي عملت كده فيها، ما انكرش اني ما كنتش حابب وجودها زمان لما امها ماتت وكانت ديما بتفكرني بدارين وبحس بتأنيب ضمير، بس دي بنتي في الاخر وحته مني، كنت بتمني كل الخير ليها في الاخر وعايزها احسن واحده ومهما حاولت ارضيها ما عرفتش عشان انا اصلا اب فاشل.. 

بطه 

طيب اهدي دلوقتي ووالله كل حاجه هتبقي كويسه، هنسافر عندها وكل حاجه هتتصلح بينك وبينها وزي ما انت قولت دي حته منك ومهما لفت وراحت وبعدت ما حدش هيبقي قريب ليها ولا تحتاجله غيرك، بس هما شوية الزعل اللي بينكم دول اللي معقدين الدنيا وربنا كبير وان شاء الله كل حاجه هتتحل.. 

يوسف 

ياريت انا ماليش غيرك انتي وهي، ونفسي نبقي عيله بجد بدل الحال اللي احنا فيه ده.. 

حضنته بطه وقالت بدموع

كل حاجه هتتحل، والله هنبقي عيله مع بعض احنا التلاته سدره مش وحشه دي عبيطه ومش فاهمه حااجه.. 

ــــــــــ #بقلم_الكاتبه_رحاب_القاضي ــــــــ

_وفي شقة عبدالله دخل كمال البيت وكانت عليااء قااعده متعصبه جداً.. 

كمال

مالك يا ماما؟.. 

علياء 

مرات اخوك البنت دي انا مش عارفه ازاي حسن مدلعها اووي كده، سمعتها بتقول لواحده صاحبتها انهم هيروحو يرقصو في الناادي وتقولها جوزي ده كأنه مش موجود اصلا ينفع كده؟.. 

كمال

سيبك من روان دلوقتي، مرات عمي ماتت كلموني من المستشفي قالولي فاتصرفي وقولي لاسرار انا مش ناقص ندب.. 

علياء بحزن

لا حول ولاقوة الابالله، راحت بحسرتها علي ابنها، يا قلبي عليكي يا اسرار تلاقيها منين ولا منين البنت.. 

طلعت اسرار من اوضتها وقالت بلهفه 

كويس انك جيت يا كمال انا مستنيااك من بدري عشان توديني عند امي.. 

بص كمال لامه اللي قالت

والله يا بنتي ما عارفه اقولك ايه؟. 

اسرار بقلق

في ايه امي جرالها حاجه، ردو عليا وقالو انها زينه والنبي.. 

كمال بضيق

لا للاسف امك ماتت يا اسرار.. 

اسرار دموعها نزلت وقالت بعدم. تصديق

لا لا انتو قولتولي انها هتخف.. 

بصت علياء بغيظ لكمال وقالت

ادعي عليك بأيه يا عدم الدم والاحساس انت.. 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصاوي اول ما دخل بيته لقي شهد وولاده قااعدين مع بعض وبيتكلمو وبيهزرو.. 

يونس

ده ايه الروقان ده كله، ولابسين ورايحين فين؟.. 

يوسف

لا مش رايحين ده احنا في نااس جيانا النهارده.. 

يونس

نااس مين؟.. 

يارا بحمااس

ماما قالتلي يا بايا انك خليتها تعزم ياسمين صاحبتي وباباها علي العشا عندنا النهارده عشان تصالحني بجد انا مبسوطه اوي وعمري ما هزعل منك ابداـ.. 

يونس ابتسم ببلاهه وقال لشهد 

ااه قولتلها امك دي مش ساهله.. 

شهد بخبث

مش مراتك يا حبيبي لازم اتعلم منك.. 

يونس بغيظ مكتوم 

امم طبعا تعالي عايزك. طيب نقيلي حاجه حلوه كده البسها عشان اقابل بيها الضيوف.. 

شهد قامت بهدوء وقالت

بس كده من عينيا يا حبيبي.. 

_وطلعو هما الاتنين فوق ويوسف مسك موبيله وقال بقلق.. 

يوسف

مالها دي كمان مش بترد ليه؟. 

يزن

رضوي مش كده؟.. 

يوسف 

ااه المفروض انها في المستشفي عند اختها، اسكتو ده اختها دي سبب وكستي.  

يارا بفضول

ازاي يعني؟.. 

يوسف 

اختها دي متجوزه من زمان وحامل تقوم علي وشي تكتشف ان جوزها متجوز عليها من سنين وبيخونها وحاجات انما ايه تسد نفس اي حد من الجواز والارتبااط وتسقط كمان علي وشي، وتخلي البت اللي هموت واتجوزها تقفل من صنف الرجاله كله.. 

_ضحكت يارا ويزن افتكر اليوم اللي شاف فيه ريناد وكانت فعلا بتتكلم علي حد خانها، واول ما سمع كلام يوسف عن اخت رضوي عرف انه يقصد ريناد... 

يوسف

مالك انت كمان سرحت في ايه اوعي تكون كرهت انت كمان صنف الرجاله.  

يزن 

يا تقل دمك ما تهزرش معايا تاني، وانتي كلمي صحبتك تيجي هي وابوها بسرعه انا جعان.. 

_وفوق في اوضة يونس وشهد، اول مل دخلو قغل الباب ومسكها من دراعها جامد وقال بغضب.. 

يونس

جيبااه لحد البيت يا شهد؟.. 

ردت عليه بألم من دراعها اللي في ايده

وفيها ايه بطل تفكيرك الشمال ده انا مش زيك.. 

يونس بغضب

ما تعصبنيش يا شهد وانزلي الغي ام العزومه دي.. 

شهد بحده 

لا وانت هتنزل معايا وتتعامل مع الراجل بطريقه كويسه قداام ولادك، والا والله هيبقي النهارده اخر يوم ليا معاك يا يونس واللي يحصل يحصل، انا بصلح بينك انت ويارا اللي بقيت بعيده عنك بسبب تحكماتك الغريبه فيها، بس اطمن بنتي انا بعرف احميها واللي بتعمله مش هيترد فيها فمتخافش عليها اوي كده وتخنقها.. 

يونس بغيظ 

انا اتخنقت منك ومن كلامك ده، بس مااشي بتدبسيني قدام عيالي ما تزعليش بقي من اللي انا هعمله.. 

_وبعد شويه جه زيد وياسمين بنته وكانو قاعدين مع عيلة يونس الصاوي بيتعشو.. 

ياسمين 

يارا قالتلي يا طنط ان حضرتك اللي عامله الاكل ده بجد تسلم ايدك.. 

شهد 

بالهنا والشفا يا حبيبتي.. 

زيد 

معقوله انتي في وسط مشغالك فاضيه للمطبخ والجو ده.. 

شهد 

طبعا بيتي وولادي ليهم حق عليا برضو.. 

يونس بجمود

عايز مكرونه يا حبيبتي، انتي عارفه اني بحبها اكيد عملاها عشاني مش كده؟.. 

ردت عليه شهد بابتسامه صفراء وقالت

طبعا.. 

مال يزن علي يوسف وقال 

انا اول مره اشوف ابوك وهو غيران علي ماما.. 

يوسف 

انا حاسس انه كمان شويه هيقوم يولع في الراجل ابو توكه ده.. 

يزن 

ياريت انا مش عجبااني نظراته لماما اصلا.. 

يوسف 

يا عم مالها نظراته وبعدين ما تبقاش انت وابوك علي ماما.. 

زيد 

وانتو بقي يا زين انت ويوسف ما حدش فيكم ورث موهبة ماما؟.. 

يزن 

انا يزن مش زين ماما اصلها بتحب بابا اووي بتعشقه وعشان كده مسميانا كلنا بأول حرف من اسم بابا.. 

_ابتسم يونس بهدوء وبص لشهد اللي اتنهدت بضيق وبصت للناحيه التانيه، ويوسف قال بجديه 

يوسف

لا انا ويزن تفكيرنا مختلف شويه، احنا هندسه معماريه فشغلنا بقي خشب واسمنت ورمل وظلط ومساحات رايحه وجايه، انما بابا ده بتاع عربيات وماما بتاعت هدوم ناس راقيه مالنااش دعوه بيها.. 

ضحكو كلهم بهدوء وهو بص لموبيله وقال

طيب انا هكت بقي عشان عندي حاجه مهمه.. 

شهد 

مش وقته اقعد كمل اكلك.. 

يوسف 

والله اكلت يا ماما، باي يا عمو زيد اتشرفت لمعرفة حضرتك  بااي ياسمين.. 

مشي يوسف وزيد قال

لذيذ اووي يوسف وشخصيته مرحه.. 

يونس بغيظ

اتفضله ده كمان هيبصلي في ابني.. 

ضربته شهد في رجله فقال بابتسامه صفرااء

اتفضلو كلو قصدي البيت بيتكم.. 

ــــــــــ #بقلم_الكاتبه_رحاب_القاضي ــــــــ

_وفي الناادي اللي سهرانه فيه روان مع صحاابها كانت قااعده مع صحابها وحواليهم شباب وبنات بيرقصو مع بعض ولبسهم وشكلهم مش كويس بس هي مش مختلفه عنهم، لان لبسها وطريقتها زيهم بالظبط.. 

وقالت واحده من صحابها

روان امير هنا.. 

روان 

وانا اعمله ايه يا جماعه افهمو بقي انا بقيت واحده متجوزه خلاص يعني امير انتهي من حياتي.  

بصتلها واحده صاحبتها بحقد وقالت

بس امير بيقول للكل انه بيحبك وانه ندمان اووي عليكي.. 

ردت صاحبتها التانيه وقالت بسخريه

وهو هيجي ايه امير في الAtm اللي روان اتجوزتو ده احنا بقالنا من لما اتجوزت للنهارده بنخرج علي حسابها.. 

بصت روان لامير اللي كان قاعد قدامها وقالت 

اتعودو علي كده بس عدو بقي جمايلي انا ما بقيتش دلوقتي اي حد، ده انا مرات مليونير.. 

قام امير وقعد معاهم وقال 

عاملين ايه يا بنات.. 

ردت صاحبة روان وقالت 

كويسين نسيبكم لوحدكم بقي شويه، يلا بينا يا بنات.. 

قامو صحابها وسابوهم لوحدهم وامير قال

بس اتغيرتي اووي بعد الجواز يا روان واحلويتي.. 

روان 

كويس ولسه فاكر اني متجوزه، يعني خلي عندك دم وقوم من هنا.. 

امير

مش بتحبيه علي فكره والجوازه دي كلها مش بمزاجك، اكيد باباكي هو اللي غصبك بعد ما شافك عندي.. 

روان بحده

لا هو كويس اووي انه شافني عندك عشان ينقدني من القرف اللي كنت عايز تعمله، وانا مش مغصوبه علي جوزي علي فكره بالعكس ده انا اتجوزت واحد احسن منك بكتير راجل مش لسه بياخد المصروف من باباها، بعد اذنك.. 

_قالت  كلامها وسابته وقامت قعدت مع صحااابها وما كانت واخده بالها من الولد اللي قااعد علي مساافه بعيده منها، وطلع وقف في مكان هادي واتكلم في الموبيل وقال... 

الولد 

ايوه يا عبدالله بيه الهانم لسه في المكان اللي قولتلك عليه، والصور اللي وصلتك دلوقتي دي انا لسه مصورها حالاً.. 

عبدالله 

طيب خليك متابعها زي ما انت لحد ما توصل البيت وما تخليش اي حد يدايقها تمام.. 

الولد 

تحت امر حضرتك يا باشا.. 

قفل معاه عبدالله اللي كان سايق عربيته ولسه واصل القاهره، وبص للصوره اللي روان بترقص فيها بفستانها القصير مع صحابها، والصوره التانيه هي وقاعده مع امير لوحدهم، واتحولت ملامحه للغضب والعصبيه وقال لنفسه.. 

عبدالله 

براحتك يا روااان اغلطي براحتك.... 

ــــــــــ #بقلم_الكاتبه_رحاب_القاضي ــــــــ

_وفي المستشفي عند ريناد كانت قااعده رضوي بره الاوضه مع يوسف اللي قالها.. 

يوسف 

بس الحمد لله ان اختك قامت بالسلامه.. 

رضوي

فعلا الحمد لله العمليه كانت صعبه اوي نفسياً وجسدياً لها الله والله.. 

يوسف 

المهم برضو لما الزفت ابن خالتك ده قالك انه عايز يخطبك تاني من جديد قولتيلو ايه؟.. 

رضوي

هو ابن عمتي علي فكره مش ابن خالتي، وانا قولتله زي ما اتفقنا موافقه بس يجي بخطبني قدام الغيله كلها.. 

يوسف 

وقالك ايه كمان؟.. 

رضوي 

عادي كلام ملزق كده فاكرني لسه هصدقه، بس هو كدااب او خايف اكتشف كدبه عشان كده بيكلمني شاات علي الوتسااب مش هيعرف يواجهني وهو شايف اني شااكه فيه.. 

يوسف 

اممم طيب بعد ما الخطه بقي تخلص، وضعنا انا وانتي هيبقي ازاي بقي؟.. 

رضوي بهروب من سؤاله 

ااا هو انت صح عندك امتحانات مش كده كمان شهر تقريباً او اقل، انت هتتخرج السنه دي.. 

يوسف 

اااه بس انا لو ذاكرت ليلة الامتحان بس هعرف احل وانجح، وما تهربيش من السؤال يا رضوي انا عايز اتجوزك وفي اسرع وقت.. 

رضوي بضيق

مش وقته يا يوسف لو سمحت.. 

يوسف بحده

اومال امتي، رضوي انتي عايزااني في حياتك ولا لا جو اني مش عارف انا بالنسبالك ايه ده مدايقني.. 

رضوي 

صديق مقرب انت دلوقتي بالنسبالي كده، حد برتاح في الكلام معاه مبسوطه بأهتمامه، انا هديك فرصه واهو  بقولك بس مش دلوقتي، لاني محتجالك دلوقتي كصديق وحد افضفض معاه، انا ما عنديش صحاب يا يوسف من زمان وانا كل صحابي زمايل وبس، انت اول صديق يبقالي مقرب كده فبلاش تخليني افقد الاحساس ده.. 

اتنهد بحزن وقال 

تمام انا صديق وبس، انا همشي وانتي لازم تيجي الشغل بكره.. 

رضوي بحزن

انت زعلت، علي فكره انت رخمم امشي يا يوسف.. 

يوسف بغيظ

همشي علي فكره عشان بعد. كل ده طلعت صديق، تتحرقي انتي وصداقتك دي وانتي اللي رخمه علي فكره.. 

رضوي 

يعني انا غلطانه عشان اتكلمت معاك بصراحه.. 

يوسف قرب منها وقال بحده

يا غبيه افهمي انا بحبك مش هعرف اتعامل معاكي علي اننا اصدقااء والجو ده، انا مش عايز الف وادور عليكي انتي الوحيده اللي انا صريح معاها في كل حاجه وعايز افضل كده ديما معاكي، لو طاوعتك في كلامك ده يبقي بكدب عليكي وعلي نفسي عشان انا عمري ما هشوفك غير حبيبتي وبس يا رضوي.. 

_قبل ما ترد عليه وقف طارق جنبيه وحط ايده علي كتف يوسف وقال بسخريه.... 

طارق

اسم الله عليك وايه كمان يا حنين؟.. 

رضوي بصدمه وخوف

يا نهار اسود طااارق.. 

يوسف بقلق

والله العظيم انا عايز ادخل البيت من بابه ونيتي خير هي اللي رافضه وتقولي انا مش بتاعت جواز وعايزه تتسلي بيا.. 

_تفتكرو هيحصل ايه؟ 

ــــــــــ #بقلم_الكاتبه_رحاب_القاضي ــــــــ

_وفي شقة عبدالله رجعت روان بعد نص الليل ودورت علي علياء واسرار بس ما لقيتهمش حتي كمال مش موجود، فقعدت علي الكنبه اللي في الصاله وقلعت الجزمه بتاعتها وطلعت موبيلها من الشنطه ولقيت مكالمات كتير من علياء ومن مامتها وكمال بس ما سمعتهاش بسبب الدوشه اللي كانت في المكان اللي سهرانه فيه.. 

وكلمت عليااء اللي ردت عليها وقالت

ايوه يا روان.. 

روان 

انتو فين يا عمتو، رحتو فين؟.. 

علياء

هو انتي لسه راجعه البيت دلوقتي يا روان؟.. 

روان 

المهم دلوقتي انتو فين؟.. 

علياء

ام عمر البقااء لله قابلت وجه كريم، وجوزك جاي في الطريق استنيه بقي وياريت تيجي معاه وتخليكي جنبه.. 

اتنهدت روان بضيق وقالت

حاضر يا عمتو باااي.. 

_قفلت معاها وقامت دخلت اوضتها واول ما دخلت اتصدمت بخوف اول ما لقيت عبدالله قااعد علي الكرسي اللي قدامها ونظراته ليها مرعبه.... 

روان بخوف

انت ااا جيت امتي؟.. 

عبدالله 

كنتي فين؟.. 

روان بتوتر

فف في عيد ميلاد واحده صحبتي واتأخرت شويه.. 

_شاور عبدالله لرجليها اللي باينه اووي من فستانها القصير وقال بنبره غاضبه. 

عبدالله 

قاعده لبعد نص الليل بره بالمنظر ده، وعيد ميلاد صاحبتك ده بيتعمل كام مره في الاسبوع.. 

روان بخوف 

انت سيبتني وانا كنت زهقاانه شويه وو.. 

عبدالله قام وقف قدامها وقال بحده وصوت عالي

فتروحي يا هانم تتمسخري قدام الرجاله ترقصي وتلبسي القرف ده، لا والواد اللي انا كنت شاكك انه بينكم حاااجه وانتي كدبتي وقولتي لا بتقابليه من ورايا وانتي مراااتي وعلي ذمتي.. 

ومسكها من دراعها جامد وقال

ما تنطقي وتردي عليا.. 

روان بخوف 

انا عايزه امشي من هنا.. 

عبدالله 

كان في وخلص واللي عدي كوم واللي جااي كوم تاني يا روااان.. 

حاولت تبعد عنه وقالت بدموع وخوف

انت مالكش كلام عليا روح حل مشاكلك وانا هروح عند اهلي.... 

_ضربها بالقلم بكل قوته لدرجة انها وقعت علي الارض وقال بعصبيه.. 

عبدالله 

انتي ليكي عين تتكلمي كمان، لو كان ابوكي وامك دلعوكي فانا اللي هربيكي يا روان.. 

‌_وقلع الحزاام بتاعه ولفه علي ايده في منظر مرعب لروان اللي حاولت تقوم وتبعد من قدااامه وقالت ببكاء وخوف.. 

روان 

لا يا عبدالله والله العظيم مش هتتكرر تاني والله وهسمع كلامك.. 

_وقبل ما تقف قدااامه نزل بالحزام بكل قوه علي جسمها خلاها تصوت بألم وبكاااء..وبعد كام دقيقه سابها زي ما هي قاااعده بتعيط بألم علي الارض وواخد موبيله اللي بيرن وطلع بره الاوضه بعد ما قفل عليها ورد علي الرقم اللي بيرن عليه وقال.. 

عبدالله

ايوه مين؟.. 

خلف

كيفها يا ولد القاضي قالولي انك هملت البلد وسافرت عشان اختي اللي ماتت، بس انا سبقتك ومش بس إكده انا كمان خدت بت اختي ما هو بيت خالها اولي بيها برضك.. 

عبدالله بغضب

ازاي يعني اسرار فين؟.. 

ضحك خلف وقال

هههههههه في الحفظ والصون، هرجعهالك بس مش قبل ما اخليها تتنازل عن حق امها في ارضي وكمان لما انت ترجعلي تمن الخساير اللي خسرتها وعليهم تنازل عن المصنع بتاعك ليا، المصنع اللي خلاااك تكسب ملايين وتشوف حالك علي البلد كلها يا ولد القاضي، هكلمك تاني عشان اعرف ردك.. 

قال كلامه وقفل وعبدالله كلم كمال اللي رد عليه وقال

ايه يا عبدالله انت فين؟.. 

عبدالله 

اسرار فين يا كمال؟.. 

كمال

قاعده مع امك في المستشفي وانا روحت شقتي الجديده عشان اا.. 

زعق فيه عبدالله وقال

يا متخلف انا مش قولتلك ما تسيبهمش، اسرار اتخطفت يا كمال والله واعلم عملو في امك ايه، بس عشان انا مش سايبهم مع راجل.. 

كمال بقلق

يا عم انا هروح المستشفي دلوقتي وانت عرفت منين؟؟. 

عبدالله بجمود

روح علي المستشفي يا كمال وانا جاااي وراااك واول ما توصل طمني علي امك.. 

كمال 

امك بترن عليا اهو استني.. 

عبدالله 

حطنا في مكالمه مع بعض.. 

_سمع كمال كلاامه واول ما رد علي علياااء قالت بنبره كلها خوف وقلق.. 

علياااء

كمال تعالي بسرعه اسرار اختفت فجأه، طلعت من عندها كنت بكلم روان ورجعت مالقيتهاااش في الاوضه دورت عليها مالهاااش أثر.. 

عبدالله 

اهدي يا امي ما تقلقيش وانا جاااي علي طول.. 

علياااء بخوف

عبدالله بت عمك فين يا ابني دي امانه عندنا.. 

عبدالله بضيق

ما تقلقيش يا امي ما حدش هيمس شعره واحده منها.. وانت يا كمال بيه حصلني علي هناك ولا بنت عمك كمان ما تخصكش.. 

اتنهد كمال بضيق وقال

حاضر يا عبدالله.. 

_قفل معاهم عبدالله ودخل اوضته تاني هو وروان اللي كانت نايمه علي السرير وبتعيط وعلامات ضربه ليها ظاهره علي كتفها ودراعها، اتنهد بضيق وقرب منها وقال بجمود.. 

عبدالله 

انا رايح المستشفي وهخلي امي تيجي تقعد معاااكي لو عايزه اللي حصل ده يتكرر تاني اطلعي بره البيت لاي سبب من غير ما اعرف، واديني حذرتك اهوو.. 

وقرب منها اكتر خلاها اتنفضت بخوف وقال 

انا عمري ما اتمنيت أذيكي بس انتي اللي اجبرتيني يا روان.. 

_قال كلامه وسابها ومشي وهي بصتله بدموع وحزن وقررت انها؟... 

_تفتكرو روان هتعمل ايه، وعبدالله هيقدر يرجع اسرار ولا لا؟