طلبت ندي من  واحده من جيرانها إنها  تساعدها في تنظيف البيت وترتيبه وبعد كده خرجت من البيت بعد ما قفلته كويس  وبلغت الجيران أنها هتسافر تدفن والدتها في المنصوره ذي ما كانت موصياها وإن أخوالها منتظرينها هناك بعد ما بلغتهم ومجهزين كل حاجه .

بعد أسبوع 

 حسن كان واقف في المكتب، غضبان ومش قادر يسيطر على أعصابه بعد ما عرف إن ندى اختفت بعد جنازة والدتها. بصّ لوحيد، خادمه الوفي، بعينين مليانة نار وقال له بصوت عالي:

حسن: البت  راحت فين يا وحيد؟! إزاي تختفي كده من غير ماحد  منكم يعرف عنها حاجة؟!

وحيد : والله يا باشا خالها طردها بعد ما عرف من الناس اللي حصل وأن امها ماتت بسببها  دة حتي ما خلاهاش تآخد عزا أمها وهي من ساعه ما إختفت  ما رجعتش شقتها تاني .

حسن : أنا مش عايز مبررات فارغه ... أنا قولتلك تبقي زي ضلها وما تفارقيهاش  ..إنت شوفت أخر مرة عملت في نفسها إيه ..أناعايز أعرف هي فين دلوقتي وبتعمل إيه .

وحيد، وهو مرتبك وبيحاول يهدّي حسن، قال له

وحيد :  "والله يا بيه، دورنا في كل مكان، وسألنا الناس كلها، حتى أبوها مش عارف هي راحت فين ومش  ساكت ومسرح رجالته وصبيانه يدوروا عليها  في كل حته وإحنا  بنراقبهم كلهم وحاطينهم تحت عنينا بس للأسف كأن الأرض انشقت وبلعتها!"

حسن بان عليه الغضب أكتر وضرب بيده على المكتب وقال بصوت مليان قسوة: أنا ماليش دعوه بحد ...أنا مش هسمح إنها تضيع  عايز كل رجالتنا يدوروا عليها، في كل شارع وكل حارة. ومافيش مانع انهم يدوروا في بيت بيت لو حصلت ...مفيش حتة إلا وتدوروا فيها! فاهم؟ علشان لو جرالها حاجه مش هسامح أي حد فيكم!"

وحيد، وهو مرعوب من ردة فعل حسن، رد بسرعة: "حاضر يا بيه، هنتصرف حالًا وهنلاقيها مهما كان...بس ..بس كنت عاوز أقولك حاجه كده حصلت .

حسن :إنت لسه هتبسبسلي ..قول حصل ايه يا تغور من أدامي .

وحيد :أصل يا باشا الواد أيهم إبن عبدالرحيم وأخو الانسه ندي ..واللي كان السبب في موت أخت حضرتك 

ضرب حسن هلي مكتبه بعصبيه 

حسن :ما تنطق يا بغل أنت وتقول ماله ..إنت هتعرفني بيه ولا هتحكيلي قصه حياته 

وحيد : حاضر يا باشا اصله كان مختفي من يجي كده ٣ أيام كده وبعدين المباحث  لقوه ميت وجثته معفنه في شقه مشبوهه من إياهم بجرعه مخدرات زياده لسه الرجاله جيبالي خبره من شويه ..ولما عبد الرحيم عرف دخل المستشفي والدكاترة بتقول إنه إتشل .

قشعر حسن من الخبر المقزز ده ورد عليه بغضب 

حسن: يغوروا الاتنين في داهيه ..المهم دلوقت ندي .

 وكأن الزمن وقف عند اللحظه دي ، وحسّ بغصة في قلبه. وأفتكر الكلمات اللي كانت ندي بتدعي عليه بيها وافتكر الكلمات اللي دايما كان وحيد بيقولهاله وأنه يسيب ندي في حالها وربنا هيجيب حق أخته من عبد الرحيم وابنه  دة ربنا إسمه المنتقم الجبار ..ودلوقتي مافيش غير كلمه  كما تدين تدان"هي بس اللي  رجعت تدوي في دماغه، وربنا رجع حق أخته من اللي ظلمها وموته موته بشعه ما يرضهاش لحد من ألد أعدائه وهو ما كانش ليه أي دخل في موته رغم كل اللي خطط له واللي كان عاوز يعمله .. وحسّ كأن القدر هيرجع يعمل معاه نفس  اللي عمله في ندى ومامتها وهما مالهمش ذنب.

عيونه اتملت بالندم، وافتكر كل حاجة عملها معاها ، وأدرك إنه كان السبب في جرح وتدمير حياتها هي  ومامتها ..ودلوقت ربنا إنتقم لأخته من اللي ظلموها وجاب لها حقها وهي في دار الحق ...وهو دلوقت اللي هيعمله إنه هيستني دوره علشان  ربنا ينتقم منه  علي اللي عمله في ندي .