شخصياتنا مختلفه دي جمله اكيد سمعتوها كتيييير 

لكن أثبتت الدراسات أن كل إنسان جواه شخصيه وعكسها كل انسان بنشوفه بارد هادي ما بيتعصبش بسهوله وبياخذ الامور ببساطه هو هو نفس الانسان ده لو اتحط في موقف ما او في ظروف ما ممكن يبقى انسان عصبي عنيف حاد مؤذي لنفسه وللي حواليه نفس الفكره لو تعرف انسان عصبي جدا بيغلط بسهوله ومبيتحكمش في نفسه قاسي ممكن لو اتحط في ظرف ما او مكان ما تلاقيه اتحول وبقى شخص هادي وطيب وحنين وتستغرب جدا بقى معقول فلان اللي معروف ان هو شديد جدا هو اللي حنيه الدنيا دي كلها فيه او معقول فلان اللي حنيه الدنيا فيه هو اللي اتحول وبقى قاسي كده 

مفيش شخصيه ماشيه على نمط معين طول الوقت كلنا بنبقى في حياتنا زي مطبات والمطبات دي يا اما بتبقى عاليه قوي ممكن تغير نمط شخصيتنا على طول يا اما بتبقى مطبات بسيطه بتخلي مجرد اهتزاز شويه في شخصيتنا وبترجع شخصيتنا الاساسيه تاني زي ما هي

 ابطالنا هنا عدوا بمطبات كبيره مش صغيره منهم اللي شخصيتهم اتغيرت تماما وفي منهم اللي شخصيتهم اتهزت بس فضلت زي ما هي 

نرجع للروايه

صباح يوم جديد بكر وبهاء اتفاجئوا لما راحوا القسم بحركه ودربكه جامده ولما سالوا عرفوا ان رحمه انتحرت كانوا سايبينها في اوضه الظابط وقافلين عليها ولما بهاء سأل ازاي دا حصل العسكري اللي كان واقف قدام الاوضه قاله انها طلبت منه كوبايه ميه وهي بتعيط فصعبت عليه وجاب لها الميه وسابها وخرج مفيش دقايق ودخل لقاها كسره الكوبايه وقطعه شرايين ايديها الاثنين كانت كاتبه ورقه وسايباها على المكتب بتامن فيها اللي هيقراها ان يدفنها جنب ابنها 

بصلهم كلهم بياس واحباط وسابهم ودخل مكتبه وقفل عليه بكر فضل بره شويه متابع الاجراءات اللي بتحصل وبعدين دخل لبهاء 

ــ ادخل يا باشا ولا مشغول في حاجه 

ــ تعالى يا بكر

ــ انا عارف ان مود حضرتك قفل خلاص كده بس ده نصيبها هي كانت صغيره قوي على كل اللي بيحصل لها واكيد على قد تفكيرها هي هو ده اللي جه في بالها ان هيبقى راحه ليها انها هتروح لابوها وابنها 

ــ كان نفسي اوريها ان في ناس لسه كويسه كان نفسي اعرفها اني هجيب لها حقها وحق ابنها بس ما لحقتش 

ــ اديك قلت يا باشا ملحقتش احنا سواد الليل وجينا لقيناها ماتت ربنا يرحمها ربنا ارحم بيها مننا كلنا فك كده بس وشوف ورانا ايه متضايقش نفسك 

ــ وفيها ايه لما اضايق نفسي عشانها ده حتى جات الدنيا ومشيت وما حدش هيتضايق عشانها هنستخسر فيها ان احنا نتضايق عشانها ( خد نفس واتكلم) سيبك مني انا وقول لي انت كنت جاي ليه 

ــ انا اتصلت بصراحه بكذا سمسار ومش لاقي حجز خالص ثلاث ايام ولا اسبوع كمان الوحيد اللي عنده يعني مكان فاضي اسبوع مقفول بعد اسبوعين 

ــ طيب يا بكر ما تقلقش بعد اسبوعين يا سيدي هديك اسبوع مقفول يكون بس رجب رجع من اجازه المرضي اللي هو واخدها يبقى هو هنا معايا على ما انت ترجع 

ــ هو احمد باشا واخد اجازه جواز قد ايه بالظبط 

ــ واخد شهر اشمعنا يعني ما تقلقش انا مش هربط اجازتك باجازته

ــ انا عارف انا بس الصراحه بفكر لو ناجل الاجازه دي لما احمد باشا يرجع وزي ما هو خد هو والامين بتاعه اخذ انا كمان اجازتي وانت كمان معايا حضرتك بقالك كتير اوي مخدتش اجازه ومحتاج تفصل برده ايه رايك 

ــ والله يا بكر انا فعلا تعبت ونفسيا مبقتش احسن حاجه مشاكل ورا بعض وحوارات وموت ايهاب يعني حاسس ان انا فعلا تعبان ومحتاج اريح 

ــ خلاص يبقى كنسل بقى الاجازه ام ثلاث ايام دي ولما احمد باشا يرجع ناخذ لنا انا وانت  اسبوع مقفول و محدش يقدر يتكلم معانا 

ــ طيب ماشي يا بكر بس مش تقول لبدور الاول لاحسن تكون اتحمست وبدات تحضر للمصيف وانت تروح تحبطها كده فتزعل منك 

ــ لا متقلقش بدور عارفه ظروف شغلي وعارفه ان انا ممكن في ثانيه اكون خلاص باخد الاجازه وتيجي قضيه معرفش اخد اجازه هي متعوده على كده وبعدين هقول لها ثلاث ايام ولا اسبوع فاكيد هتختار الاسبوع وتفرح بيه طبعا 

ــ ماشي بس كده احنا عندنا مشكله يا حلو 

ــ مشكله ايه دي 

ــ موضوع الشغل عمتي وبسمة مش هيستنوا المده دي كلها على ما انت تبقى تسافر وتفكر وانت مسافر وترجع وتقرر مش هينفع الشركه واقفه ومحتاجين ناس

ــ والله يا باشا وانا اتكلمت امبارح مع بدور وهي برده رايها من رايك قعدت تحمس فيا بصراحه خصوصا ان هي لفتت نظري ان اهل امجد على قد حالهم شويه واحمد كتر الف خيره شايل امه واخته لسه بتدرس وهيجوزها فاكيد مش هنتقل عليه باي مصاريف تخص تاليا 

ــ طيب ايه اكلم عمتي بقى ونقول مبروك 

ــ انا فكرت بصراحه بس انا مش حابب اكون شريك يعني خليني اخد من هنا اجازه واحط برده الفلوس وديعه في البنك واشتغل معاها في الشركه موظف يعني فلو هو ده هيناسبها تمام هنزل اربط مع الناس واظبط الدنيا واقعد افهم الدنيا فيها ايه 

ــ انا المفروض كنت رايح اتعشى معاهم امبارح بس معرفش ازاي نسيت وسقطت الموضوع ده وبسمه اصلا زعلانه مني فهروح لهم النهارده فخليني اروح وافهم منهم الدنيا واقولهم على العرض بتاعك ولما ارجع بالليل هكلمك 

ــ طيب وحوار الاجازه ده حضرتك عارف ان لازم بيكون قبلها بمده حلوه يعني 

ــ هو انت مش هتربط مع الناس هتفهمهم وهتبقى متابع معاهم بالتليفون وكل ما يكون عندك وقت فاضي يطلع على الشركه لغايه اما الورق بتاع الاجازه بتاعك يخلص تروح واخد الورق بتاعك وطالع مظبط ورقك في الشركه ومظبط تعينك سهله يعني يا بكر 

ــ طيب تمام ماشي خلاص هستناك كده تكلمني وتقولي عمتك قالت لك ايه 

ــ طيب تمام معلش هتقل عليك النهارده تخلص انت حوار رحمه كله لان انا بجد مش فايق

ــ تمام حاضر عن اذن حضرتك هطلع اكمل انا 

ــ اتفضل لا استنى استنى كنت عايزه اكلم معاك في حاجه كده 

ـــ خير يا باشا حاجه ايه 

ــ انت ايه مشكلتك في شغل اختك بدور من البيت انت مش شايف ان عندها وقت فراغ كبير وخصوصا انها مختاره مجال هتبقى قاعده فيه في البيت ومش هتحتك فيه بحد يعني مش هتخاف عليها رافض ليه بقى 

ــ هي لحقت اشتكيت لك 

ــ يا سيدي ولا اشتكت ولا حاجه كل موضوع ان لما دخلت تتكلم في البلكونه بقول لها تسلم ايدك وانتي شاطره اوي في المطبخ راحت قايلالي ان كل ما تفتح الصفحه بتاعتها انت تقفلها 

ــ مش عايزاها تتبهدل غلطان انا يعني عشان عايز اريحها 

ــ ما هو كتر الراحه ده تعب يا بني ادم هي ماشي مشغوله مع تاليا والبيت والاكل بس عندها وقت تاني فراغ كبير جدا مبتعملش فيه اي حاجه غير انها بتقعد تفكر وتتعب دماغها في التفكير طب ما تشغل وقتها احسن يعني 

ــ والله يا باشا ما عارف بقى انت مالك كده ملخبط لي دماغي كلها مره واحده في ايه 

ــ هههههههههههه ايوه انا عملك الاسود 

ــ احلى عمل والله 

ــ طب انجز بقى فكر في حوار بدور كمان هي بجد بتبقى زهقانه اوي وبتقول انها بتعمل حاجه بتحبها وبعدين لا بتخرج ولا بتحتك بناس يعني 

ــ طيب ماشي على ما تيجي كده ترد عليا في الحوار بتاع الشركه هكون ان شاء الله دورت الموضوع في دماغي عن اذنك بقى اطلع اشوف موضوع رحمه اللي بره 

ــ ماشي يا اخويا يلا روح كمل شغل

ـــــــــــــــــــــــــــــــــــــــــــــــــــــــــــــــــــ

علا تاني يوم خدت معاها علبه فيها حمام محشي وعلبه تانيه فيها ممبار وعملت صينيه كيك وراحت لمياده 

ــ مكنش له لازمه كل ده يا علا ايه يا بنتي ده كله بقى انا هاكل كل الكميه دي وانا قاعده لوحدي كده

ــ بالهناء والشفاء على قلبك يا حبيبتي كلي زي ما انتي عايزه وابقي شيلي الباقي جوه في الثلاجه المهم قوليلي نيجار تعبتك ولا قعدت مؤدبه

ــ وهي حبيبه ستها دي تتعب حد ابدا طب والنبي دي هاديه مش طالعه لابوها ابدا وهو صغير الحمد لله 

ــ ههههههههه  هو مؤمن كان شاي اوي كده 

ــ يا اختي مش قادره اقولك كان على طول مسمع الجيران حسي ياما كسرلي في حاجات وبوظلي حاجات 

ــ معقول مع اني بحس ان مؤمن هادي يعني

ــ والله انتي اللي هاديه ده وهو صغير كان شقي جدا مكنش بيقعد خمس دقائق على بعض يتنطط من الركنه للانتريه للسرير ناقص كان يمشي لي على الحيطه ولا اجيبه من على النجفه 

ــ هههههههههههه لا الحمد لله نيجار مش كده هي زنانه وبتعيط كتير بس مش الشقاوه دي لا ان شاء الله مش هتطلع كده  

ــ ان شاء الله يا حبيبتي هتاخد هدوءك انتي مش هتاخد حاجه من ابوها المهم طمنيني انت عامله ايه واخبار ابوكي وامك ايه معاكي 

ــ كويسين يا ماما الحمد لله 

ــ لسه زي ما هما يعني مفيش اي تغيير 

ــ تغيير ايه يا ماما اللي حضرتك ومؤمن مستنينه وبعد العمر ده كله  السن اللي هما فيه ده مش سن يتغيروا فيه ابدا يعني ممكن ياخدوا بالهم شويه من كلامهم لكن اساس شخصيتهم معايا هيفضل زي ما هو وانا خلاص اتاقلمت يمكن الاول كنت تعبانه لاني كنت لوحدي لا في حد اتكلم معاه ولا في حد اشاركوا حياتي او اعرف حتى افضفض معاه لكن دلوقتي بقى عندي انتي ومؤمن ونيجار فيعني عندي جانب بيخليني استحمل جانب لكن ان انا اقول ان هم هيتغيروا او اضغط عليهم او اقاطعهم مش هيحصل طبعا هبقى بكذب على نفسي 

ــ ربنا يكملك بعقلك يا حبيبتي ويجعل صبرك على معاملتهم ليكي يا رب في ميزان حسناتك ويقعدهولك في بنتك وتشوفيها احسن الناس هي و ان شاء الله اخوها اللي هيجي في السكه قريب 

ــ هههههههههههه خلاص بقى اخوها كمان وجاي قريب 

ــ هههههههههههه طب بكره تقولي مياده قالت مش هتعدي عليكي السنه غير وانتي حامل وهتجيبي واد

ــ  كل اللي يجيبه ربنا كويس بس يعني شويه كده عشان تكون نيجار شدت حيلها وانا كمان وربنا يسهل 

ــ ان شاء الله يا حبيبتي ربنا ييسر لك امورك يا رب انا بدعيلك كل يوم في صلاه الفجر ربنا اللي عالم انك مش مرات ابني بس يا علا انتي زي بنتي بالظبط ربنا يعلم بحبك ازاي 

ــ حبيبتي يا ماما وانا كمان والله بحبك اوي ربنا يخليكي لينا يا رب وما يحرمناش منك ابدا 

ــ طب بقولك ايه بقى عشان الكلمتين الحلوين اللي احنا قلناهم لبعض دول هتقعدي النهارده تتغدي معايا وخلي مؤمن يجي على هنا ونزود اي حاجه كده جنب الاكل اللي انتي جايباه ونتغدى مع بعض هتفتحوا نفسي ايه رايك 

ــ ودي عايزه كلام مفيش راي بعد رايك يا مياده يا قمر انتي خلاص هكلم مؤمن واقوله 

ــ حبيبتي ربنا ما يحرمني منك ابدا طب يلا كلميه بقى وانا هخش اشوف في ايه في المطبخ نعمله 

ــ ماشي يا ماما وانا هاجي وراكي على طول 

ــــــــــــــــــــــــــــــــــــــــــــــــــــــــــــــــ

النهار عدي بدون تفاصيل تانيه واخر النهار خرج بهاء من القسم وراح الفيلا اللي قاعد فيها ابوه وعمته واخته بعد السلامات والعتاب علي بعده عنهم اتكلم بهاء معاهم في موضوع بكر 

سوزي 

ــ ايوه يا بهاء بس ده مش شغال في السيراميك يعني ده مخبر عندك خبرته ايه هو في المجال اللي انا بتكلم فيه 

بهاء 

ــ بكر مش مخبر بس بكر حد اجتماعي جدا وليه علاقات كتير لسانه حلو بيعرف يقنع اللي قدامه بسهوله باللي هو عايزه بيعرف يجيب معلومات عن اي حاجه من اي حته وبعدين هو هيبقى مسؤول عن التيم اللي فاهم في السيراميك كويس جدا اظن حضرتك هتبقى محتاجه نتائج حطي التيم كله زي تحت اختبار كده لمده ثلاث شهور مثلا وشوفي هيجيبوا نتائج ولا لا 

بسمة

ــ واضح ان حضرتك بتثق فيه جدا 

بهاء ابتسم 

ــ فوق ما تتخيلي يا بسمه 

عز 

ــ انا شايف ان احنا مش هنخسر حاجه كده كده بنبدا من اول وجديد فخلينا نبدا في ناس بنثق فيهم بدل ما يجي حد تاني ينصب علينا 

سوزي 

ــ انا عن نفسي شلت كلمه ثقه من قاموسي نهائي مبقتش اثق في اي حد 

بهاء 

ــ من غير ما تثقي يا عمتي زي ما قلتلك ثلاث شهور لاقيتي نتائج يكمل ما لقيتيش نتائج خلاص يروح لحاله

بسمة

ــ انا شايفه ان احنا نجرب يا عمتو مش هنخسر حاجه فعلا 

سوزي 

ــ خلاص طالما كلكم موافقين نجرب

بهاء 

ــ بس معلش في كده شرط صغير 

سوزي بسخريه 

ــ كمان هيتشرط 

بهاء

ــ المثل بيقولك اللي اوله شرط اخره نور مش تسمعيني بس الاول هقولك ايه 

سوزي 

ــ قول يا بهاء لما نشوف اخرتها 

بهاء 

ــ بعد الثلاث شهور لو اثبت انه شاطر وقدر يرفع معاكوا الشركه ويبقى لها اسم يبقى له نسبه بعد كده من اي عمليه هتتعمل نقول 5% مثلا 

سوزي بضيق

ــ ايه! نسبه ايه؟ هو هيبقى موظف زي اي حد طب قول نعلي له مرتبه مدير تسويق بقى وبتاع لكن ياخد نسبه ليه ان شاء الله 

عز ابتسم 

ــ انت هتعمل مصلحه لصاحبك على خاطرنا احنا ولا ايه 

بهاء 

ــ خليني اكلمكم بلغه البيزنس اللي انتم تعرفوها دلوقتي انتي لو زودتي مرتبه زيه زي اي مدير تسويق هيعمل برده زي ما اي مدير تسويق بيعمل هيشتغل على قد المرتب اللي انتي بتديهله لكن لو اديتيله نسبه حتى لو صغيره هو هيجيب اقصى اقصى ما عنده علشان النسبه بتاعته تعلى ويبقى له دخل تاني من شغله غير المرتب هيحس بالانتماء ليكم اكتر يعني انتي هتكسبي اكثر من اللي انت هتديه 

بسمة 

ــ بس 5% كتير اوي يا ابيه دا غير ان احنا هنعلي له كمان مرتبه

سوزي كشرت 

ــ لا طبعا مش موافقه بص يا بهاء بعد ثلاث شهور لو بقى زي ما انت بتقول كده هيتظبط المرتب كمدير تسويق وهياخد نسبه 2.5% وده اخر ديل عندي قلت اي

بهاء 

ــ تمام يا عمتي وانا واثق انه هيوافق على العرض ده ولو ما وافقش انا هقنعه 

عز 

ــ تصدق ان انت حمستني اني اشوف بكر ده من كتر طريقه كلامك عنه 

بهاء 

ــ لما ينزل الشركه وحضرتك كده تشد حيلك وتبطل الدلع اللي انت فيه ده وتنزل الشركه هتشوفه اكيد 

عز

ــ لا شركه ايه انا خلاص كبرت وما بقتش اقدر اتحرك من مكاني البركه بقى في سوزي وبسمه ربنا يعينهم

سوزي 

ــ ولا كبرت ولا حاجه انت اللي اخذت على الراحه وبس يا عز خلي بالك الشركه لما تشتغل انت هتنزل وهتساعدني وايدك هتبقى في ايدي زي ما كنا سوا دايما 

بهاء بسخريه حاول يخفيها 

ــ أيوة زي ما كنتم سوا ديما 

بسمة حاولت تكتم ضحكتها علي طريقه بهاء وهو بيقلد عمتها بس مقدرتش ف ضحكت بصوت عالي والكل بصلها باستغراب فبررت

ــ اسفه افتكرت حاجة بس ضحكتني سوري 

بهاء قام وقف 

ــ طب هستاذن انا بقى عشان ورايا شغل بكره بدري ومبقدرش اسهر اكثر من كده 

بسمة برجاء 

ــ ما تقعد شويه كمان يا ابيه انا ما لحقتش اشبع منك او اقولك بات معانا وروح شغلك الصبح من هنا 

بهاء وهو بيسلم عليها

ــ حبيبتي مش هينفع صدقيني عموما هكلمك بكرة أن شاء الله ولو عرفت ممكن نخرج نتغدي سوا ايه رايك ؟

بسمة بحماس 

ــ موافقه طبعا 

سوزي 

ــ طب ليه تخرجو ما تيجو ونتغدي كلنا هنا

بسمة حست أن بهاء مش عايز كدة فردت هي

ــ أنا محتاجه اغير جو يا عمتو من الشركة للبيت ومن البيت للشركة هكون مبسوطة اكتر لو أبيه خرجني 

بهاء بحب

ــ طلباتك اوامر يا حبيبتي خلاص بكرة ع الظهر كدة هكلمك اظبط معاكي تمام

بسمة 

ــ تمام هستناك .. معلش يا عمتو انا فعلا محتاجة اغير جو شويه 

سوزي بلا مباله 

ــ as you like 

بهاء خرج من عندهم وطلع علي الكافيه اللي بيسهر فيه واتصل ب ببكر يجيله ورن علي مؤمن كمان بس تلفون مؤمن كان غير متاح 

بعد نص ساعه كان وصل بكر وبهاء قاله علي الاتفاق اللي عمله مع عمته عشانه 

ــ بس انا اتفقت معاك اني هشتغل موظف بس اللي لازمة النسبه دي ؟ بلاش مشاكل مع عمتك يا بهاء أنا مش قدها 

بهاء ابتسم 

ــ اي الحلاوة دي اول مرة من يوم ما عرفتك تتشجع وتقولي بهاء حاف كدة لا لا اتغيرنا اهو 

بكر بحرج 

ــ هو .. احم هو مش حضرتك 

كشر ورد 

ــ لييييه هتعك ليه ما كنا ماشيين كويس وفرحت وقلت إنك فعلا متقبلني ك صديق

ــ ما انت خضتني ب الدخله دي 

ــ سلامتك من الخضه يا سيدي المهم ... بكر انت قد اي حد لازم تروح هناك وانت واثق من نفسك أنا من كتر كلامي عنك بابا بنفسه عايز يشوفك مينفعش عمتي تحسك هزوز هتضيع كل اللي انا عملته  وبعدين النسبه دي صغيره جدا مش هتخسرهم هما حاجة لكن حافز ليك انت عشان تشتغل اكتر وانت واثق أن أي تعب هتتعبه هيكون ليه نتيجه

ــ تمام اللي تشوفه سعادتك

ــ بردو مفيش فايدة يعني 

ــ ههههههههه والله بحكم التعود هاخد وقت بس 

ــ تمام لما نشوف 

قضو سهرتهم سوا وكل واحد رجع بيته وعدي بعد اليوم دا شهر بحاله كانت اتغيرت فيه حاجات كتير اوي 

بكر استلم الشغل مع سوزي كان جد جدا ونشيط وشاطر جدا وسوزي حست أنه فعلا مكسب ليهم وبقت تعتمد عليه في حاجات كتير مش التسويق وبس 

بكر كان مبسوط بالنقله والتغير اللي حصل في حياته كان حاسس انه رجع شاب في العشرين وهو بيحقق حلم عمر ما تخيل في يوم أنه يحققه حاجة واحدة بس اللي كانت واجعه قلبه وهو بيحقق حلمة وحس ان الدنيا لازم تعاندة عشان وقت ما يحقق حلم مستحيل يظهرله حلم مستحيل اكبر ينقص من فرحته ويوجع قلبه 

بدور رجعت الصفحة من تاني ويومها رجع يبقا مشغول بين تاليا والبيت والشغل والتفكير في اللي خطف قلبها بعد السنين دي كلها والحيره والفكر كانو ديما ملازمينها 

مؤمن وعلا حياتهم مستقرة مؤمن مبقاش بيحتك ب أهل علا وهي بطلت تحكيله علي كلامهم اللي بيضايقها واكتفت أنها مبسوطة كدة وراضيه وهو عارف دا بس مبيبحبش يضغط عليها 

أما بهاء فكان متاكد أن في حاجات كتير ناقصه في حكايه بدور وأمجد وبركات اللي اتقتل كان واثق أن صحبه مخبي عليه ومداري جزء كبير من الحقيقه ودا كان مخليه يستني ومياخدش قرار نهائي يخص بدور وعلاقتهم سوا

دا غير أنه بقاله كزا قضيه مبيشفش اي حاجة زي ما متعود ومكنش فاهم السبب واديه انهاردة حلم بحلم غريب كان مش فاهم معني الحلم اللي شافه اول مرة يحلم ب أمه زعلانه منه كدة اول مرة يشوفها مكشره في وشه ومش فاهم هو عمل اي غلط عشان تزعل منه 

كان قايم من النوم مخنوق ومضايق وحاسس أنه مقفول من الدنيا كلها 

خرج من اوضته وبعد وقت قليل كان جهز وفتح باب الشقه في نفس الوقت كانت بدور بتفتح باب شقتهم ونازله وهي شايله تاليا 

بصلها باستغراب ومقدرش يمنع نفسه من أنه يسألها 

ــ انتي رايحة فين علي الصبح كدة ؟

كشرت وردت 

ــ الناس لما بيشوفو ناس الصبح كدة اول حاجة بيقولها صباح الخير وبعدين بيقولو اي كلام تاني 

ــ خلصتي ؟ صباح الخير رايحة فين علي الصبح كدة ؟

كانت هتقوله ع طول وبعدين مسكت نفسها وحبت تغيظة فتراجعت 

ــ رايحة مشوار كدة وراجعه 

رفع حاجبه 

ـــ بجد ! مشوار وراجعه ؟ مشوار فين يعني ؟

فاجاته بسؤالها

ــ وانت بتسال ليه ؟ 

ارتبك شويه بس لحق نفسه بسرعه 

ــ ا عشان ا أيوة عشان بكر مسافر وانا مسؤل عنك لحد ما يرجع اكيد يعني هيكون ليه 

ردت بسخريه 

ــ مممم طب اطمن يا حضرة الظابط بكر عارف أنا رايحة فين متقلقش وخليك في اللي انت مسؤل منهم  انا مسؤوله من اخويا اخويا وبس

كشر ورد بحدة خفيفه

ــ بدور اصطبحي علي الصبح وقولي نازلة ع فين ؟ مش هتفضل نلف وندور علي بعض أنا ورايا شغل

ــ والله انا لا بلف ولا بدور أنا بسال سؤال طبيعي جدا اللي مش طبيعي سؤالك انت ليا عموما يا حضرة الظابط عشان معطلكش عن شغلك أنا رايحة عند والدة امجد هنقضي اليوم أنا وتوتي هناك وأحمد واقف تحت مستنينا هودينا وهيجبنا وبكر عارف عن ازنك بقا 

وقفها قبل ما تنزل 

ــ استني هنا وأحمد دا يجي ياخدك ويرجعك ليه ؟ ما استني لما بكر يرجع ويوديكي ويجيبك تروحي مع احمد دا ليه ؟؟ 

ــ هو في اي ؟ لو سمحت يا بهاء عديني عشان الجدع واقف باله كتير تحت ميصحش كدة 

ــ والله ؟ مستعجله اوي طب اي رايك بقا انك مش هتروحي خالص يا بدور اتفضلي ادخلي واتصلي قوليله اي سبب يلا 

ــ نعم !! لا طبعا مش هعمل كدة 

صوته علي وهو بيقرب خطوة منها

ــ هتعملي كدة يا بدور يلا بقولك

صوتها علي هي كمان وهي يتقرب خطوة كمان 

ــ واعمل كدة ليه هه انت مين عشان تقولي اروح فين واجي منين هه قولي اعمل كدة ليه اسمع كلامك ليه قوووول 

قطع المسافه اللي بينهم وهو بيقول بعصبيه وصوت عالي 

ــ عشان بحبك بحبك ومش طايق تنزلي مع راجل تاني بحبك يا غبيه يلي خلق الله كلها حست الا انتي 

صرخت في وشه بغيظ

ــ والله ما حد غبي غيرك انت لاني بحبك وعارفه انك بتحبني بس ساكت ومش بتنطق ايه هاجي أنا وبكر نتقدملك مثلا ونطلب ايديك للجواز انت اللي ساكت انت اللي متردد وخايف أو يمكن احنا مش قد المقام عشان كدة مش راضي تاخد خطوة انت اللي غبي يا بهاء مش انا واوعي بقا كدة هنزل يعني هنزل الست قاعدة مستنيه حفيدتها مش هكسر ب خاطرها أنا اوعي بقا عديني

نزلت وهي متغاظة منه ومضايقه من نفسها وأنها اعترفت بحبها من غير ما يكون هو واخد خطوة أو مقرر هيعمل اي 

لما نزلت لاقت احمد واقف مستنيها تحت اخد منها تاليا واتحركو علي بيت حماتها 

وبهاء فضل واقف مكانه متعصب غضبان غيران كان بيتنفس بسرعه  وضامم ايديه اوي لدرجة أن عروقه بارزه حاول يهدي دخل شقته تاني وفضل قاعد شويه يرتب أفكاره بهدوء وبعد ساعه تقريبا بعت مسج ل بكر علي وتساب قبل ما ينزل 

ــ أنا عارف انك مفروض جاي من دمياط انهاردة الفجر تقريبا علي ما تتم علي كل حاجة بنفسك بس انا مستنيك يا بكر في شقتي مش هنام ولا انت هترجع وتنام الا لما نتكلم انهاردة في موضوع مهم مش هينفع يتأجل تاني تحت اي ظرف هستناك سلام 

ــــــــــــــــــــــــــــــــــــــــــــــــــــــــــ

وصل القسم وشاف الأمين واقف مع ست كبيره بتعيط بانهيار وحرقه والأمين بيحاول يهديها قرب منهم 

ــ في اي يا مصليحي ... مالك يا امي بتعيطي كدة ليه 

مصليحي

ــ الحاجة مش مصدقاني أننا هنا منقدرش نساعد ابنها ومصممة نروح ناخده من البيت 

بهاء 

ــ ماله ابنها ؟

الست ردت من بين عياطها 

ــ ابني بيضيع مني وانا مليش اي حد يساعدني والله مليش حد بالله عليكم ساعدوني مش انتم الحكومة اروح لمين بس يا ربي 

بهاء 

ــ طيب تعالي بس معايا واهدي وانا أن شاء الله هساعدك تعالي يا امي 

خدها بهاء علي مكتبه وطلبلها لمون واستني خمس دقائق تكون هديت فيهم 

ــ احسن دلوقتي ؟ هتعرفي تتكلمي ؟ ولا استني شويه كمان ؟

ــ أنا احسن الحمد لله 

ــ يارب ديما ها بقا يا ست الكل ماله ابنك ؟

ــ ابني في اخر سنه كليه تجاره مليش غيره في الدنيا دي بعد ما ابوه مات وسابنا بطولنا في الدنيا كان بيخلص الكليه بتاعته ويطلع ع مطعم بيشتغل طيار علي موتوسيكل جبتهوله بكل الفلوس اللي حيلتنا واهو اللي كان بيجيبو ع معاش ابوه كانت مستورة والحمد لله لحد من ست شهور كدة منه لله واحد اتعرف عليه في الشغل علمه يشرب سجاير والسجاير جابت مخدرات وبقا طول الوقت مش في وعيه وبيغم عليه كتير صاحب الشغل مشاه والموتوسكيل اتخبط منه واهو مرمي قدام البيت ابني نور عيني بيروح مني مش قادر يصلب طوله وبقا يرفع صوته عليا ويزعقلي الواد اللي حيلتي اللي عمرة ما زعلني ولا كلمني كلمة وحشه بيعلي صوته عليا عشان عايز فلوس يجيب الهباب اللي بيشربه أنا مش قادرة عليه مش قادره والله اتصرفو انتم بقا 

ــ لا حول ولا قوه الا بالله العلي العظيم ... طيب يا امي قوليلي بس اقدر اساعدك ازاي ؟ احنا هناخدة نوديه فين ؟

ــ هو مش طول الوقت اعلانات اد كدة في التلفزيون انكم بتعالجو المدمنين ؟ خدوه عالجوة أنا مليش غيره والله

ــ احنا هنا قسم شرطة في مصحات تبع الدوله خديه علي واحدة منهم و

قاطعته برجاء

ــ أنا معرفش فين دي طب قولي فين وانا اروح والله فين ؟؟

بهاء صعبت عليه جدا وحس انها مش هتعرف تتصرف ومخدش وقت كتير في التفكير ورد عليها 

ــ طيب تعالي معايا هروح أنا وانتي ناخدة وهنروح سوا 

مسحت دموعها بفرحة واتكلمت بلهفه في صوتها

ــ بجد !! ربنا يسعدك ويستر طريقك يارب وميحوجكش لحد خالص ولا يحكم عليك ظالم ابدا 

ابتسم 

ــ ربنا يخليكي اهو الدعوتين دول عندي بالدنيا كلها يلا يا ست الكل وان شاء الله مش هسيب ابنك الا لما يرجع زي الاول باذن الله 

ــ ربنا يكرمك يارب 

اتحركت معاه وهي طول الوقت بتدعيله وهو مبسوط وحاسس أن اللي ملحقش يعمله مع رحمة بيعمله مع الست دي دلوقتي  وقرر أنه مش هسيب فعلا ابنها الا لما يتعالج تماما 

ـــــــــــــــــــــــــــــــــــــــــــــــــــــــــــــــــــــــــــ

بكر كان بيظبط مع المولات اللي في المحافظات دي كانت فكرته أن القاهرة والجيزة والإسكندرية في ناس واخدين السوق بتاعهم والمنافسة مش هتكون لصالحهم ابدا ففكر في المحافظات يبدء بيها ويعمل عروض عشان يبقاله سوق ويعرف يعمل اسم للشركة 

وهو مندمج في شغله وصلته رساله بهاء اللي شتته وخلته محتار ومش عارف ايه اللي لازم يتكلمو فيه وميستناش للصبح ؟ واللي زود حيرته تلفونه اللي رن برقم بسمه واول ما رد قالتله كلمه واحدة كانت كفيله تخلي التلفون يقع من ايديه من الصدمه

ــــــــــــــ

ابيض واسود 

مني محمود بركات 

الخامس والعشرين والاخير ٢

بهاء كان بيشتغل من غير تركيز خالص شويه يفتكر الحلم بتاع أمه وميبقاش فاهم هو عمل اي غلط زعلها منه ؟ 

وشويه يفتكر بدور وبكر وايه اللي ممكن يكونو مخبينه عليه وايه الخطوة اللي مفروض ياخدها دلوقتي 

الباب خبط ودخل احمد وهو بينهج 

ــ شوفت اللي حصل يا بهاء ؟

استغرب طريقته ورد

ــ في اي يا بني ؟

اتكلم احمد بترقب لرد فعل بهاء

ــ اللواء عبد الرحمن 

قام وقف من علي مكتبه 

ــ ماله !! ظهر ؟ 

هز رأسه بأسف

ــ اتقتل ... لاقو جثته في الشارع جمب عربيه زباله في تركيا 

رد بدهشه 

ــ ايه ؟ هما كانو كل دا في تركيا ؟ طب ونصر نصر فين ؟

ــ ملوش اثر ملقوش هناك غير مراته اللي انهارت ولما حاولو يعرفو منها اي حاجة معرفوش كل اللي قالته ان نصر مكنش معاهم ومتعرفش هو فين وان جوزها اختفي وفجأة لاقو جثته 

بهاء كشر

ــ يعني ايه متعرفش ابنها فين ؟ اكيد بتكدب طبعا 

ــ ممكن تهدي شويه الموضوع لسه قيد التحقيق وفي وفد هيسافر من هنا يتابع التحقيق هناك 

ــ نصر يا اتقتل زي أبوة ... يا هيظهر ينتقمله مش هيفضل مختفي كدة 

ــ طب لما انت عارف كدة مضايق. ليه بقا لو لسه عايش هيظهر يا بهاء أنا عايزك بس تتحكم في اعصابك وملكش دعوة بالموضوع دا ومتسالش اي حد علي اي حاجة ولا كان الموضوع في دماغك وانا هعرف كل جديد بطريقتي وهاجي ابلغك 

ــ ليه كل دا ؟

ــ يا بهاء انت عديت من موضوع النقل بمعجزة خليك بعيد ومتلفتش الأنظار ليك وكل اللي عايز تعرفه أنا هعرفهولك 

ـــ ماشي يا احمد بس مش هوصيك 

ــ من غير ما توصيني أنا زي ما عرفت اللي قولتهولك اي جديد هيظهر هعرف واجيلك 

ــ تمام حاضر يا احمد 

ــ أنا هروح مكتبي اكمل شغلي وانت ركز في شغلك هه التقرير اللي اتدوهولي امبارح كان ناقصه بيانات كتير اوي أنا عدلته وبعدين سلمتة للواء ركز يا بهاء متخليش حد يمسك حاجة عليك 

ــ أنا مش عارف اركز حاولت بس مش عارف 

ــ خلاص اكتب طلب إجازة وادخل قدمة دلوقتي افصل من الشغل وضغطه وانا هبقي معاك علي التلفون 

ـــ تمام بكرة هبقي اقدم عليها 

ــ ليه مش دلوقتي طالما انت ناوي خلاص ؟

ــ بكرة يا احمد هكون ظبطت بس شويه حاجات انهاردة وبكرة ابقي اقدم عليها 

ــ خلاص يا عم متزقش انا راجع مكتبي ولو في حاجة كلمني 

ــ تمام ماشي 

اتحرك احمد ناحيه الباب وقبل ما يفتحه وقف علي صوت بهاء 

ــ احمد 

لفله 

ــ نعم ؟ 

ــ شكرا علي 

قاطعه احمد وهو مكشر

ــ اسكت يا بهاء اسكت متعصبنيش 

خرج احمد ورجع مكتبه وفضل بهاء دماغه مشغوله وبعد ما كان تفكيره في الحلم وبدور زاد عليهم نصر كمان 

ـــــــــــــــــــــــــــــــــــــــــــــــــــــــــــــــــــــــ

بكر رد علي بسمة اللي قاطعته قبل ما يقول اي كلام وهي بتصرخ في التلفون 

ــ الحقني يا بكر شريف ماشي ورايا بعربيته وانا مش عارفه اهرب منه وأبيه بهاء مش بيرد عليا بكر ارجوك الحقني أنا مش عارفه اعمل اي 

الصدمة لجمته هو لسه بيحاول يستوعب اللي حصل بينهم قبل ما يسافر اتفاجا بيها بتستنجد بيه هي دقيقه اللي اتجمد فيها من صدمتة وبعدها اتكلم بصوت هادئ عشان يطمنها 

ــ اهدي يا بسمة وقوليلي انتي فين بالظبط دلوقتي 

اتكلمت بتوتر 

ــ في أكتوبر كنت رايحة مول مصر اقابل صحابي بس شريف شريف لاقيته ورايا و 

قاطعها بهدوء 

ــ اهدي كملي في طريقك للمول عادي جدا بس سوقي باقصي سرعه مش مهم المخالفات 

استغربت

ــ انت بتقول اي اكمل ازاي في نفس طريقي 

رد بنفس الهدوء 

ــ ثقي فيا يا بسمة الطريق دا كله عربيات وكل ما هتقربي من المول كل ما هتكون الدنيا زحمة وكل ما كانت الدنيا زحمة كل ما كان امان ليكي فهمتي 

اتكلمت بخوف

ــ طب وبعد ما اقف أنا هخاف انزل من العربيه 

ــ اتصلي ب صحابك يخرجو للأمن اللي في المول ويبلغوهم ويستنوكي قدام البوابه اللي هتكوني عندها 

ــ انت بتتكلم بهدوء كدة ليه انت مش خايف عليا يا بكر ؟

غمض عينيه بضيق ورد عليها بوجع وصلها 

ــ ربنا اللي يعلم انا عامل ازاي دلوقتي جوايا نار ممكن تحرق اي حد بس لازم تهدي عشان تتصرفي أنا في محافظة تانيه يا بسمة مش هلحق اجيلك ولا هلحق ابعتلك حد لازم اتصرف ب اللي حواليكي دلوقتي ... هو لسه وراكي؟

شريف كان وراها وبيحاول يلحقها وملامحة كانت مش مبشرة خالص

ــ اه ورايا ووشه يخوف اوي يا بكر 

ــ طيب متقفلش معايا حطيني ع هولد واتصلي ب صحابك اعملي اللي قولتلك عليه انتي قدامك اد اي وتوصليلهم

ــ خمس دقائق ع سرعتي دي 

ــ طيب يلا كلميهم عشان يلحقو يوصلو للأمن يلا أنا معاكي اهو

بسمة عملت زي ما بكر طلب منها كانت سائقه بسرعه ومهاره وهدوء بكر اتنقل ليها وهدوئها وهي بتسوق خلاها سبقت شريف اللي الغضب كان ماليه 

صحاب بسمة راحو للأمن وبلغوهم والأمن اتحرك معاهم للمكان اللي بسمه هتقف فيه ووصلت بسمة وقبل ما شريف ينزل من عربيته كان الأمن واقف قدام العربيه وسلاحهم في أيديهم وبيطلبو منه يغادر المكان بهدوء يصلها بتوعد وشر ومشي بعربيته بسرعه قبل ما الموضوع يكبر ويتصلو بالشرطة

كل دا وبكر معاها علي التلفون مسبهاش لحظة واحدة ولما اطمن أنها بقت كويسة وشريف مشي طلب منها تفضل مع صحابها في المول وهو هيتحرك دلوقتي من دمياط ويجليها يوصلها للبيت بنفسه ومش لازم تقلق بهاء باللي حصل وهو هيتصرف وهي وافقت 

ـــــــــــــــــــــــــــــــــــــــــــــــــــــــــــــــــــــــ

الوقت عدي بسرعه ووصل بكر للمول في وقت قياسي بسبب السرعه اللي كان سايق بيها وحصل بينه وبين بسمة حوار وهو بيوصلها خلاه محتار اكتر ما كان محتار قبل ما يسافر دمياط لكنه أجل اي كلام لحد ما يعرف بهاء بعتله الرساله دي ليه وصل البيت علي الساعه ١ ص اتصل ببهاء قبل ما يطلع رد عليه من اول جرس 

ــ ايه يا باشا صاحي ولا نايم 

ــ لا صاحي ومستنيك لما توصل كلمني 

ــ أنا وصلت تحت البيت اهو هركن العربيه واطلعلك 

ــ جيت بدري ولا أنا بيتهيالي ؟

ــ لا جيت بدري رسالتك شغلتني ف خلصت بسرعه وجيت علي طول

ــ طب اطلع يلا 

بعد ربع ساعه تقريبا كان بكر قاعد قصاد بهاء اللي كان بيختار كلامة بعنايه 

ــ احنا بقالنا كام سنه نعرف بعض يا بكر ؟

ابتسم بحب

ــ كتير يا باشا مبعدش الصراحة 

ــ خمس سنين تلاتة كانت علاقتنا شغل وبس واتنين كانا صحاب واخوات دخلتك حياتي وحكتلك كل ظروفي وعرفتك علي عيلتي حصل ولا محصلش 

بكر ابتدي يقلق

ــ في اي يا بهاء اتكلم علي طول مبحبش المقدمات دي 

ــ في انك مش صريح معايا زي ما أنا كنت صريح معاك أنا قولتلك عني كل حاجة وانت قولتلي كلمتين خايبين ونسيت اني بهاء الدميري يا بكر بس عدتها بمزاجي عشان مكنش وقته لكن دلوقتي أنا لازم افهم ومش بس عشان انت صاحبي يا بكر لا عشان أنا بحب بدور اختك ومن حقي اعرف كل حاجة عنها قبل ما ندخل في الجد والموضوع يبقي رسمي

بكر اتصدم من كلام بهاء اللي قاله بسرعه ومرة واحدة

ــ بتحب بدور اختي أنا !! 

رد عليه بسخريه 

ــ اومال اختي أنا في اي يا بكر ما تركز معايا 

ــ أنا مركز بس انت اللي بتقول كلام كتير مرة واحدة يلخبط يا بهاء

ــ طيب وبعد ما اتلخبطت ها رد بقا علي كلامي 

ــ عايز تعرف اي يا بهاء 

ــ كل حاجة يا بكر كل حاجة وياريت تقدر اني كنت اقدر اعرف بطريقتي لكني محبتش اعمل معاك انت بالذات كدة ياريت اعرف منك انت يا صاحبي 

اتنهد بكر وبدء يحكيله كل حاجة عن حياتهم من اول ما وعيو علي الدنيا مع اب عاطل وبيشرب ديما لحد ما امجد رجع ظهر وقتل بركات والموضوع اتقفل علي كدة 

طول الوقت بهاء كان بيسمعه وهو مصدوم مصدوم في الاول علي طفولتها الصعبه ومراهقتها الاصعب ومصدوم من رد فعلها بعد اللي حصل ل بنتها وهروب امجد بالبنت وسلبيه بكر ومصدوم من ظهور امجد وقتله ل بركات والتكتم علي الموضوع ولا كان حاجة حصلت 

بكر كان بيتكلم وهو متعمد ميبصش ل بهاء ولما خلص كلامه رفع وشه وبصله ونظرات بهاء ل بكر كانت غريبه ومش مفهومه

ــ أنا كدة حكيتلك كل حاجة يا بهاء و

قاطعه بهاء بحده

ــ بقا انت يا بكر يلي بحلف بيك في كل مكان واي حد اتكلم عليك قدامه يبقي عايز يشوفك تبقي بالسلبيه دي ؟ تداري ع مجرم ؟ طب لو مكنش امجد مات كنت هتخليه يرجع لأختك ويعيشو سوا بقا حياة سعيدة ويربو بنتهم ولا كأنهم هما السبب في كل اللي حصلهم اصلا ... كنت فين انت واختك بتقرر تسيب البنت مع بركات وتنزل تشتغل هه مش دا بركات اللي طول حياتهم بتكرهوه ازاي امنت أنها تسيب البنت معاه ؟ ازاي انت وافقت عقلك دا كان فين ؟ ازاي مضغطتش عليها عشان تعرف جوزها خد البت واختفي ليه وازاي مشكتش ايييي زكائك مبيطلعش غير علي جرائم الناس وبس ولا اي هه ازاي لما ظهر امجد وبعدها مات اتعاملتو عادي كدة ولا كان في حاجة حصلت اي الجمود والجبروت دا دا انتم يتخاف منكم بقا علي كدة 

ــ بهاء انت بتقول اي بهاء أنا

قاطعه بغضب 

ــ بهاء باشا حضرة الظابط بهاء انسي اننا كنا صحاب يا بكر انسي عشان أنا من اول ما هتخرج من الباب دا هنسي اني عرفت في يوم واحد اسمه بكر 

اتكلم بكر بغضب مماثل

ــ انت باي حق تحاسبني هه وبعدين مصدوم اني كنت سلبي وسكت انت مصدوم فيا وعايز تقطع علاقتك بيا وجاي دلوقتي تفكرني بالفرق اللي بيني وبينك وتقولي بهاء باشا طيب يا بهاء باشا متنساش انك سلبي اكتر مني مليون مرة انت ابوك قاتل وقاسي وظالم وحرامي وعمتك شريكة في كل أعماله وانت عملت اي بعدت عنهم من غير ولا كلمة حتي لما عرفت عملو اي في أهل نيره عملت اي هه اتصرفت ك بهاء الظابط وجبتلها حقها ولا رحت تقف جمبهم هما وترفع عليها هي قضيه عشان ترجعلهم الفلوس اللي مش حقهم اكتر وقفت جمب الظالم بحجة أنهم اهلك أنا حسن منك مليون مرة أنا بعدت عن بركات خدت بدور وبعدنا وفضلت ارازي فيه عشان يقولي عمل فيها ايه لأنها أضعف من اني اضغط عليها الراجل اللي مات دا مينفعش نجيب سيرته ونقول لو كان عايش الله اعلم كان اي حصل هو مات جاب حق بنته ومات الله يرحمه بقا وانا عملت اللي شوفته صح بلاش تعمل نفسك قاضي عشان أنا كمان شاطر اوي واعجبك في الدور دا واي حد يحاول يقيمني أو يعرفني عيوبي اي بعرف ارد عليه كويس اوي واعرفه عيوبه هو عيلته كلها وياريت بكرة الصبح الاقيك سايب الشقه دي وراجع شقتك ياريت مشفش وشك تاني خالص ومن غير سلام

خلص كلامه وخرج ورزع الباب وراه وساب بهاء واقف مكانه متجمد من الكلام اللي سمعه من بكر والدموع بتلمع في عينيه لمح في ركن الاوضه ظل اسود ل راجل في نفس طوله وهيئته مديله ضهره بصله بتدقيق واستغراب لحد ما لف الظل دا ومن صدمته رجع خطوتين لورا لما شاف نفسه بس بملامح غاضبه عيون حمراء شكله كان مخيف ومقبض  وفجأة حس ان الدنيا بتدور بيه ووقع علي الارض فاقد الوعي 

تمت بحمدلله الجزء الاول 1