الحياة صعبه ف ياريت لما نختار أشخاص يكملو معانا رحلتنا نختار اللي يهون علينا ومش شرط أن الاختيار دا يكون في شريك حياتنا ممكن يكون في وظيفة مريحة صحاب سالكين جيران مش بتوع مشاكل اي حد بنتعامل معاه مفروض نختار علي اد ما نقدر ناس مريحة تسهل علينا صعوبه الحياة مش تزودها 

نكمل روايتنا 

عدي المرة دي تلت شهور كاملين في حياة ابطالنا تلت شهور غيرتهم واصبحو أشخاص تانيه نتيجة اللي مرو بيه تلت شهور بس مش زي ما انتم متوقعين أنها نهايه مثاليه وسعيدة بالعكس 

بدور بتحاول ترجع لنفسها من تاني بتتخبط ساعات بتكون طايرة من الفرحة وكتير بتكون حزينه ومكتئبه 

بكر لسه زي ما هو سند وضهر لأخته لكنه وحيد عمره ما فتح قلبه لاي حب كان حاسس انه مش مؤهل ل الحب والجواز ولحد دلوقتي وحيد وشايف أنه هيفضل كدة العمر كله 

علا لسه أهلها ضاغطنها نفسيا ولسه هي باره بيهم مهما عملو ولما مؤمن يضايق ويقولها لحد أمتي الوضع دا ترد عليه أن هيتردلها في ولادها أن شاء الله غير رضي ربنا عليها 

بهاء ....

بهاء كل حاجة في حياته اتغيرت بدايه من موت مهاب اللي مقدرش يثبت أنه قتل انهيار عيلته وتعب أبوة وكل دا كوم ويوم مواجهه سوزي وبسمة ب شريف كوم تاني كان يادوب مهاب مكمل شهر متوفي لما بهاء طلب منهم يروحو معاه مشوار ضروري وهما وافقو 

فلاش باك

سوزي 

ــ مش فاهمه مشوار اي دا اللي ميتاجلش في ظروفنا دي يا بهاء معرفش ازاي طاوعتك ونزلت وسبت عز في حالته دي 

بهاء 

ــ المشوار دا متاجل بقاله كتير يا عمتي خلاص كدة مينفعش تأجيل تاني وبعدين انا سايب مؤمن مع بابا وهو وعدني مش هيتحرك من الشقه الا لما ننزل متقلقيش عليه 

بسمة 

ــ طب قولنا رايحين فين يا أبيه ؟

بهاء 

ــ دلوقتي تعرفو كل حاجة يا بسمة

وصلو قدام مخزن  وسط منطقة باين أن كلها مخازن ومصانع ومترفه شويه سوزي وبسمة بصوت ل بعض باستغراب ونزلو ورا بهاء عشان يشوفو جايبهم هنا ليه وقبل ما يدخلو لف وبصلهم 

ــ قبل ما ندخل هقولكم معلومة صغيرة اوي هتفرق معاكم جوة وتخليكم تستوعبو اكتر اللي هتفهموة شريف الكومي اللي انتي متجوازه عرفي يا عمتي هو هو شريف اللي مرتبط بيكي يا بسمة وكل شويه ياجل أنه يتقدم بحجة شكل وقبل اي اعتراض من اي واحدة فيكم يلا عشان تتأكدو بنفسكم 

دخلو معاه وهما مصدومين كل واحدة فيهم بتقول ل نفسها أنها اكيد فهمت غلط او يمكن تشابه اسماء واللي جوة دا مش حبيبها دخلهم في اوضه شبكها ازاز كاشف المخزن كله وطلب منهم يفضلو هادين وهو هيخليهم يشوفو ويسمعو كل حاجة 

بعد ربع ساعه دخل بكر ومعاه رجلين شايلين شريف ومغمين عينيه رموه علي الارض وشارولهم بكر أن يخرجوا من المخزن وخرجو في الوقت دا بهاء ساب بسمة و سوزي ونزل ل بكر وشريف

بهاء 

ــ اخيرا اتقابلنا تعرف بقالي اد اي مستني المقابله دي ... كنت اكتر قرار اتاخر فيه يا شريف معرفش دا كان غباء ولا ظروف ولا حسن حظ ليك بصراحة

شريف وهو بتلفت حواليه بخوف 

ــ انت مين ؟ انت فاكر البلد سايبه ولا اي ... دا أنا هوديك في ستين داهيه 

بهاء 

ــ اتكلم علي قدك يا بابا ... قولي يلا ناوي علي اي بالظبط مع مراتك سوزي الدميري ؟ 

شريف 

ــ انت مين انت ؟ سوزي اللي بتاعك مش كدة ؟ قولها ردي زي ما هو معيش اى فلوس ادهالها كل فلوسي في السوق اعمل اي يعني هي فين أنا هفهمها سوزي حبيبتي خلينا نتكلم وبلاش الطريقه دي انتي مراتي واكيد مش هعز عليكي فلوسي اللي هي فلوسك في الأساس حبيبتي والله الفلوس في السوق بضاعه لسه متابعتش اصبري طيب عليا شويه 

بهاء ضحك بصوته كلو 

ــ اي يا يلا الحلاوة دي بقا أنا اقعد تلت ايام بفكر اازاي اخليك تعترف علي طول انك متجوز سوزي تقوم انت تقر بكل حاجة كدة من غير لمسه ايد حتي لا لا عجبتني بصراحه 

شريف ضم حواجبة 

ــ اعترف !! هو هو مش سوزي اللي جابتك ؟

ــ هي طلبت منك فلوس وانت رفضت تصدق معرفش يلا اهو جت بفايدة بس لا مش هي اللي بعتاني 

ــ اومال مين ؟ انت مين ؟ وعرفت موضوع جوازي من سوزي ازاي ؟

ــ دا أنا مش بس عارف جوازك العرفي من سوزي دا أنا كمان عارف ارتباطك ب بنت اخوها

ــ بسمة !!! انت ميييين ؟ 

ــ مين زقك عليهم انطق انت مش هتخرج حي من هنا غير لما اعرف مين زقك عليهم يا حيوان وعشان ننجز أنا بهاء الدميري اخو بسمة يا كلب

ـــ ب بهاء .. أنا ... أنا والله 

بهاء في اللحظة دي مقدرش يمسك اعصابه اكتر من كدة وضرب شريف بغل وغضب في وشه قرب بكر منه قبل ما يكمل ضرب وقيده وهو بيقول

ــ باشا اهدي صدقني هو ميستهالش انك توسخ ايديك ب دمة هو هيطلع عاقل وهيقول كل حاجة دا لو عايز يطلع من هنا علي رجليه 

شريف 

ــ اقول اي انتم عايزين اي مني 

بهاء وهو بيحاول يسيطر علي غضبه 

ــ مين زقك علينا 

شريف بصدق

ــ والله ما حد زقني عليكم أنا عرفت سوزي الاول بحكم صداقتها مع ماما وبعدين اتجوزنا عرفي وبعدها شوفت بسمة صدفة في النادي ماما اللي عرفتني وقتها عليها و وحبيتها والله العظيم حبيتها بجد بس كنت خلاص اتطورت مع سوزي مكنش في أيدي حاجة اعملها صدقني يا بهاء 

بكر وهو بيضربه علي قفاه 

ــ بهاء باشا يلا انت هتخيب ولا اي

شريف 

ــ اااه ما براحة يا عم اي قفا المخبرين دا 

بهاء ابتسم 

ــ خليك معايا أنا يا حيلتها امك تعرف عمايلك دي وشريكة معاك علي كدة ولا مستغفلها هي كمان ؟

شريف 

ــ لا ولا والله ما تعرف اي حاجة امي بعيد عن الحوار دا متعرفش والله ما تعرف 

بهاء

ــ ممممم طيب وتفتكر عقاب اللي انت عملته اي بقا يا حلو ؟ 

شريف

ــ عقاب  إزاي مش فاهم !؟

بكر 

ــ اومال مفروض نكافاك يعني أنك ضحكت علي عمته واخته ولا اي ما اكيد هنعاقبك يلا 

ضربه بالقفا تاني

شريف 

ــ اااه يا عم ما تتكلم بلسانك بس ايديك اي لزمتها وانت مييين اصلا مش فاهم ؟

بهاء

ــ ملكش دعوة هو مين المهم أن عقابك بسيط خالص يا شريف ودا ليه بقى لأن احنا في ظروف وحشه موت وسرقه وحاجة اخر ارف مش ناقصاك بصراحة ف عشان كدة مش هعملك اي حاجة غير انك ترجع مكان ما جيت وبنفس حالتك قبل ما تقابلهم 

شريف 

ــ يعني اي مش فاهم ... عايزني ابعد عنهم يعني حاضر هبعد والله الورقه اللي معايا هقطعها وبسمة هعملها بلوك بس سيبني امشي من هنا ومتاذنيش الله يخليك 

بهاء 

ــ حاضر اتفقنا .. بس في تفصيل صغيره اوي نسيتها 

شريف 

ــ تفصيله اي ؟

بهاء 

ــ قلتلك هترجع زي ما كنت بنفس حالتك يعني من غير الشركة والحساب اللي في البنك اللي من فلوس عمتي وافقت كان بها هتخرج من هنا زي ما دخلت رفضت بقا 

قاطعه شريف 

ــ نعم !! شركة اي دي شركتي أنا أنا بقالي سنتين تعبان فيها عشان اعملها اسم في السوق عايز انت تيجي تاخدها دلوقتي علي الجاهز بعد ما فلستم ومبقاش حليتكم ولا مليم. مش كدة لااا دا بعدكم اعمل اي تعمله واعرف اني لو خرجت من هنا عايش هكون سبب انك تخسر وظيفتك للابد واضح انك فكرتني ضعيف وقلت تلقبني لا لا شوفلكم حد تاني بعيد عني يا باشا 

بكر وهو ببسقف 

ــ لا حلوة النمرة دي يا شرشر عجبتني بجد اداءك رائع ولا اي رايك يا باشا 

بهاء بهدوء 

ــ انت فاكر يا شريف انك مخير في الحوار دا ؟ فاكرني بخيرك يعني ؟

شريف 

ــ أنا قولت اللي عندي يا باشا واللي عندك اعمله 

بهاء 

ــ اللي عندي كتير ... زي مثلا اقل حاجة فيهم اني اعرف الست والدتك حقيقتك ونشوف هيرضيها الكلام دا ولا لا واللي اعرفه انها مريضه قلب وسكر والانفعال غلط عليها واكبر حاجة عندي اني اقدم الورق اللي معايا للنيابه اللي بيثبت أن آخر صفقتين انت قمت بيهم مشبوهين وكانو غسيل أموال ل فتحي النجار ومحمود سرور أعضاء مجلس الشعب ومش ورق تؤ دا مدير اعمالك طلع بيحبك اوي وسلم بكر مقابل مبلغ عبيط الورق وفلاشه فيها فيديوهات ليكم وانتم بتتفقو ع النسب وبتمضو علي العقود اللي ما بينكم ... شوفت بقا اني كريم اوي اوي معاك لما قلتلك هعاقبك عقاب بسيط اوي انك ترجع زي ما كنت لأن العقاب الأكبر انك تتحبس مش هنكسب أنا وعمتي يبقي الكل يخسر يا شرشر والبادي اظلم

شريف الصدمة لجمته وخلته ساكت بيحاول يشوف مخرج بس مش عارف التفاصيل اللي قالها بهاء حقيقة ١٠٠ في ١٠٠ يعني لو بلغ عنه هو مش بس هيتحبس لا دا ممكن الناس الكبار اللي كان هيتعامل معاهم يخافو اسمهم يتجاب ويخلصو منه يعني مش سجن بس دا ممكن يخسر حياته فيها

في الوقت دا خرجت سوزي وبسمه من الاوضة اللي بهاء سابهم فيها الاتنين كانت دموعهم نازله والصدمة لسه مسيطرة عليهم بهاء كان هيمنعهم يقربو بس بكر شاورله أنه يسيبهم وهمسله 

ــ شريف مشتت وبيفكر في مخرج سيبهم يشتتوه اكتر عشان يمضي ونخرج من هنا بقا 

سكت بهاء واول حد اتكلم كانت سوزي

ــ ليه يا شريف ؟ ليه تعمل فيا كدة ؟ دا أنا حبيتك واديتك كل حاجة ... أنا قولتلك اكتر يوم ما تحس ان حبي في قلبك خلص قولي وهننفصل بكل هدوء ليه تخدعني كدة ؟ عشان الفلوس ؟؟ كل دا عشان الفلوس ؟؟ بس انت مش فقير يعني انت باباك سابلك ميراث كويس ... عملت كدة ليه انطق ... انطق أنا من حقي اعرف ليه ليييييه

ردت بسمة بصوت موجوع

ــ طب لو عملت كدة مع عمتي عشان الفلوس قربت مني انا ليه ؟ ازاي جالك قلب تبقي معايا وانت متجوز عمتي وتنام في حضنها وانت لسه قافل معايا وقايلي بحبك ؟ طب طب انت كنت شايف آخرة اللي بتعمله دا اي ؟ كنت هتعمل اي في الاخر ( مسحت دموعها بعنف ) بجد عايزة اعرف كنت بتفكر في النهايه ازاي يا شريف ازاااي ؟

شريف بهدوء

ــ أنا اتجوزت سوزي قبل ما احبك يا بسمه ولما حبيتك كان أمر واقع ومكنتش عارف نهايه للي احنا فيه كل اللي كنت عارفه اني بحبك ومينفعش اخسرك واكيد كنت هطلق سوزي وأشوف طريقه نكون بيها سوا أنا وانتي أنا بجد حبيتك يا بسمة انتي الحاجة البريئه اللي في حياتي

بسمة بسخريه

ــ حبتني !! هو انت اللي زيك يعرف يحب اصلا ؟ حسبي الله ونعم الوكيل فيك ( بصت ل بهاء ) أنا عايزة امشي من هنا يا أبيه ارجوك 

بهاء بحنان 

ــ حاضر يا حبيبتي 

سوزي 

ــ خلينا نمشي من هنا أنا مش طايقه اشوف البني ادم دا قدامي حيوان وحقير وزباله 

بكر 

ــ اخلص يا شريف نخرج من غير ما تمضي ولا تمضي وتروح ل حالك ؟ اخلص مش فاضين احنا اليوم كله 

شريف 

ــ موافق بس بشرط 

بهاء 

ــ انت هتتشرط كمان 

شريف 

،ــ اعتبروه طلب ... همضي علي تنازل عن الشركة ل سوزي وهقطع الورقه اللي معايا وهختفي من حياتها حتي الفلوس اللي في البنك بتاعتها هرجعها وهسيب الوديعه بتاعت ميراثي وبس مقابل كل دا تسبلي بسمة في حياتي هبدء من جديد من الصفر بس انا عارف ان بسمة ليا في الاخر واني مخسرتهاش. ارجوك

بهاء 

ــ انت مستفز كدة ليه يلا انا مشفتش في بجاحتك بجد 

هجم عليه تاني وبدء يضربه سوزي وبسمة بيعيطو في صمت وبكر بيحاول يشد بهاء ويخلص شريف من ايديه واخيرا عرف بعد ما شريف خد علقه معتبره 

بهاء بحدة وصوت عالي 

ــ اقسم بالله العظيم يا شريف لو عدت خمس دقائق بالظبط وانت ممضتش علي الورق اللي قدامك دا لكون طالع من هنا علي النيابه ومقدم كل اللي معايا وعليا وعلي اعدائي ودا اخر كلام عندي

الصمت سيطر علي المكان بيقطعه بس شهقات سوزي وبسمة من وقت للتاني وبعد مرور دقيقتين اتكلم شريف بحزن 

ــ طيب طيب خلاص همضي هفكني عشان امضي

بهاء ادي بسمه سوزي مفتاح عربيته وطلب منهم ينتظروة بره ولما خرجو فك شريف وداله الورق 

بهاء 

ــ خلي بالك بكرة الساعه تسعه الصبح هتكون قدام الشهر العقاري عشان توثق التنازل وبعدين هنطلع علي البنك عشان تسحب الفلوس وتسملهملنا ولو فكرت تلعب بديلك انت عارف انا هعمل اي كويس اوي

شريف هز رأسه من غير كلام وبدء يمضي علي الاوراق ولما خلص بهاء خد الورق وخرج الاول وبعد ما اتحرك بعربيته خد بكر شريف ورجعه قدام بيته تاني ومشي من غير كلام 

كانت ليله صعبه علي الكل مكنش حد فيهم عنده اي كلام يقوله للتاني كل واحد فيهم قفل عليه اوضته وفضل لوحده

لكنها عدت عدت زي ما قضيه عمر عدت بس قضيه عمر غير متخلفه واكيد نهايتها مش هتكون عاديه لازم تبقي نهايه مختلفه زيها 

نصر وعبد الرحمن ومراته بعد حلقه البرنامج اللي كسرت الدنيا اختفوا تماما وبعد اسبوعين تقريبا اتعرف أنهم باعو كل حاجة يمتلكوها بالخسارة وسابو البلد وسافرو من بلد ل بلد لحد ما بقي صعب حد يعرف مكانهم ....

نهايه غير عادله... لواقع بشع غير عادل ... واقع عيشينة كل يوم وبنشوف فيه أن مش ديما الخير بينتصر علي الشر ساعات كتير الشر بيكون له مليون طريقه عشان ينتصر هو في الاخر حتي لو كانت الطريقه دي الهروب ...

ـــــــــــــــــــــــــــــــــــــــــــــــــــــــــــــــــــــــــــــــ

وحاليا بهاء ساكن قدام بكر ... رغم أن ابوه وعمته وبسمة نقلو ل فيلا صغيره وبدأت بسمة هي وسوزي يتابعو شغل الشركة بس علي نظافه واتحيلو علي بهاء يفضل معاهم 

لكن بهاء رفض ولا راح عاش معاهم ولا رجع شقته من تاني ولحد دلوقتي مش عارف سبب ل تصرفه دا وقرر أنه ميفكرش ويعمل اللي مرتاح فيه وبس من غير تفكير 

ـــــــــــــــــــــــــــــــــــــــــــ

صباح يوم جديد خرج بكر من اوضته وهو بيظبط هدومة كانت بدور بتحط الفطار علي السفره

ــ صباح الخير يا حبيبتي 

ــ صباح الخير يا حبيبي... اوعي تقولي مستعجل ومش هتفطر دا أنا محضرالك فطار ملوكي والله 

ــ ما هو باين اهو وانا مستعجل جدا لاني ورايا مشوار ضروري قبل القسم بس هقعد افطر معاكي الاول أنا عندي كام بدور يعني 

ــ أيوة كدة حبيبي حبيبي .. بس مشوار اي دا 

ــ في حد عايز يشتري شقه بركات وكلمني هقابله كمان شويه عشان يشوفها من جوة ولو عجبته واتفقنا هنمضي انهاردة بالليل أن شاء الله 

ــ ماشي يا حبيبي خير ان شاء الله 

ــ اومال فين توتي ؟

ــ نايمة الحمد لله البت بتصحي في أوقات غريبه يا بكر وترجع تنام في أوقات اغرب 

ــ مش امها بدور يبقي طبيعي البت تبقي غريبه يعني معروفه 

ــ نيني نيني نيني خفه اوي 

جرس الباب رن بكر وهو رايح يفتح 

ــ هفتح وارجعلك اعرفك مين الخفه يا بدور صبرا بس ... اهلا يا باشا اتفضل اتفضل حماتك بتحبك والله لسه كنا هنفطر 

بهاء 

ــ تسلم يا بكر أنا كنت رايح ع القسم قلت اشوفك لو رايح نطلع سوا بالعربيه 

بكر 

ــ تعالي بس نتكلم واحنا بنفطر والله العظيم ما هفطر الا لو دخلت فطرت معايا

بهاء كشر

ــ انت بتحلف ليه يا جدع انت 

بكر ابتسم 

ــ اهو حلفت واللي كان كان ولعلمك بدور صاحيه من بدري ومحضرة فطار إنما اي تخيل كدة لو دخلت قولتلها اني مش هفطر هتعمل فيا اي لو يرضيك خلاص براحتك 

بهاء ابتسم 

ــ هتعمل منك بطاطس محمره 

بكر وهو بيدخل بهاء ويقفل الباب

ــ طب كويس انك عارف اتفضل ادخل بقا

بهاء وقف

ــ طب ادي اختك بس صوت اني داخل معاك الاول 

بكر هز رأسه ودخل الصاله عرفها أن بهاء بره وهيفطر معاهم هزت راسها من غير كلام وفضلت ثابته مكانها ... دخل بهاء ورمي السلام ردت بدور بصوت واطي وفضل ساكته

بكر 

ــ اتفضل يا باشا انت مش محتاج عزومة طبعا 

بهاء 

ــ اكيد يا بكر ... هتيجي معايا بعد الفطار ولا اي ؟

بكر

،ــ لا هروح مشوار كدة في واحد عايز يشتري الشقه بتاعت بركات هيروح يشوفها ولو عجبته واتفقنا هنمضي العقد بالليل ان شاء الله 

بهاء 

ــ أن شاء الله خير تمام خلص مشوارك وحصلني ورانا شغل كتير انهاردة بصراحة قدامك تلت ايام الشغل فيهم كتير شويه عشان الإجازة اللي بعدهم 

بكر بعدم فهم 

ــ إجازة اي ؟ أنا مطلبتش إجازة !

بهاء وهو بيبص بطرف عينيه علي بدور 

ــ لا طلبت عشان تاخد اختك وتوتي وتطلعو مصيف أنا حاولت اجبلك اسبوع بس بسبب إجازة جواز احمد معرفتش اجيب غير خمس ايام بس يارب تكون مبسوط كدة يا بكر 

بدور وطت رأسها عشان محدش يلاحظ ابتسامتها 

بكر 

ــ حبيبي يا باشا تسلم والله مش عارف اقولك اي بس يارب الحق احجز والاقي مكان كويس 

بهاء 

ــ هتلحق أن شاء الله عندك تلت ايام شغل وتظبيط سفريتك أن شاء الله تحلق وتتبسط ابقي افتكرنا بقا هه 

بدور ابتسمت اكتر 

بكر 

ــ اكيد طبعا ... انا مقدرش انساك يا باشا مصر 

بهاء ضحك 

ــ بكاش طول عمرك مش هتتغير 

بكر 

ــ ابدا والله انت حبيبي وانت عارف 

بدور اخيرا طلعت صوتها 

ــ هقوم انا اعملكم الشاي 

بهاء 

ــ لا استني شاي اي أنا يا دوب اتحرك هبقي اشرب القهوة في القسم بكر متتاخرش عليا ورانا شغل كتير مش هوصيك 

بكر 

ــ أن شاء الله بعد ما تشرب قهوتك تلاقيني قدامك علي طول 

بهاء اتحرك علي القسم وبكر راح مشوار وبدور فضلت قاعدة سرحانه شويه تضحك وشويه تكشر وشويه تفكر فىترجع تكشر تاني 

ـــــــــــــــــــــــــــــــــــــــــــــــــــــــــــــــــــــــــ

بهاء وصل مكتبه لاقي المذيعه في انتظاره مها اللي قدمت الحلقه اللي كسرت الدنيا وخلت القضيه قضيه راي عام بجد استقابلها في مكتبه وبعد ما القهوة نزلت اتكلمت هي

ــ أنا عارفه اني دي قله زوق مني اني اجي من غير معاد كدة 

ــ لا طبعا مفيش قله زوق ولا حاجة حضرتك تنوريني اي وقت 

ــ بجد ميرسي لزوقك ... أنا بصراحة يعني كنت طمعانه في حاجة كدة واتمني حضرتك متكسفنيش

ــ اتفضلي اكيد لو في أيدي مش هتاخر 

ــ كنت عايزاك معايا 

ــ معاكي ازاي يعني ؟

ــ اقصد يعني تطلع ضيف معايا في حلقه 

ــ ااه... بس هطلع اتكلم في اي القضيه اتقفلت وبقي محظور فيها النشر 

ــ احنا مش هنتكلم عن القضيه دي خالص احنا هنتكلم عن الجريمة عموما الحلقه هيكون فيها دكتور علم نفس في الجريمة ومفروض حضرتك و مشرع قانوني هنتناقش عن الجريمة وأسبابها ونتائجها كدة يعني حلقه عامه مش عن قضيه محددة 

ــ امممممم طيب هتبقي أمتي ؟

ــ اسبوع. أن شاء الله عشان نحضر لها كويس أنا عندي هوا بكرة لو حضرتك وافقت بكرة في الحلقه هعلن عن أن الحلقه الجايه هتبقي عن اي وكدة يعني

ـــ تمام انا موافق انتي خدمتيني ولازم اردلك الخدمة بس ابقي عارف قبل ما اطلع هوا أنا هتسال في اي بالظبط ويحقلي أن اي سؤال ميعجبنيش اطلب أنه يتمسح نهائي اتفقنا ؟

مها بابتسامة عريضة 

ـــ اتفقنا طبعا حضرتك تؤمر 

بهاء 

ــ الأمر لله 

مها 

ــ طيب ممكن رقم حضرتك عشان اخلي الاعداد يتواصل معاك يتفقو ع التفاصيل كلها وكدة 

بهاء 

ــ اكيد طبعا 

مسك ورقه وقلم وكتب رقمة وادهولها وهي شكرته مرة تانيه واستاذنت ومشيت بعدها بهاء رجع انشغل في القضايا اللي معاه 

ـــــــــــــــــــــــــــــــــ

في شركة شريف سابقا كانت سوزي وبسمة مجتمعين مع تيم جديد تماما غير التيم اللي مع شريف وبيشوفو الخطة الجديدة اللي هيتعاملو بيها

سوزي 

ــ أنا عايزة اغير نشاط كله مش هشتغل في استيراد الادوات الطبيه دي مبفهمش فيها 

مدير الشؤون القانونية 

ــ بس تغيير النشاط دا مش حاجة سهله هياخد وقت ومصاريف كتير 

المحاسب القانوني 

ــ لا يا متر متقلقش البطاقه الضريبيه للشركة مش متحدد فيها نشاط مكتوب شركة الشريف للاستيراد والتصدير والتوكيلات التجاريه فقط احنا من حقنا نستورد ونصدر اي حاجة ونعمل توكيلات مع شركات برة كمان بس اللي مش هينفع هو تغير العلامة التجاريه والاسم التجاري دول اللي هياخدو فلوس كتير ووقت اكتر 

بسمة 

ــ لا مش لازم نغير الاسم والعلامة التجارية علي الأقل دلوقتي ممكن قدام شويه ولا ايه يا عمتو

سوزي 

ــ مع اني مكنتش حبه اكمل بنفس الاسم بس تمام ماشي 

المحاسب

ــ وحضرتك حبه نغير النشاط ل ايه ؟ في حاجة معينه في دماغك حضرتك ولا هنفكر ونشوف السوق 

سوزي 

ــ احنا شركتنا كانت متخصصه في العقارات ودا صعب دلوقتي للاسف بس انا اتفقت مع تلت مصانع سيراميك كبار في مصر ومصنع من الصين أن نكون وكيل ليهم ونوزع لهم احنا هي اه حاجة بعيد عن العقارات بس احنا لينا علاقات كتير نقدر نستغلها في الموضوع دا 

بسمة 

ــ يعني هنعمل اي مش فاهمه 

المحاسب بهدوء 

ــ حضرتك تسمعي عن مولات السلاب اللي في كل مكان ؟

بسمة 

ــ اه اسمع عنها

المحاسب 

ــ احنا هنبقي زيهم بس علي صغير عشان لسه بنبدء هناخد من المصانع الكبيرة ونوزع أو نبيع احنا بيكون لينا عموله وهامش ربح غير حوار المصنع اللي من الصين دا بيفتح لينا سوق باسمنا احنا بس لأننا الوكيل الوحيد بتاعه فهيفرق جدا معانا

بسمة 

ــ تمام فهمت ... بس دا سوق مختلف خالص يا عمتو

سوزي 

ــ معلش يا بسمة هنتعب شويه بس أن شاء الله هنلاقي نتيجة واسم الدميري هيرجع تاني السوق حتي لو النشاط مختلف احنا كدة محتاجين مين تاني معانا عشان نبدء ؟

المحامي

ــ محتاجين مدير تسويق وتيم تحت منه يكونو شاطرين جدا وليهم خبره في المجال دا ومحتاجين اسماء تجار وموزعين جمله عشان نبدء نعرض عليهم الشغل 

سوزي 

ــ طيب تمام نعمل اعلان ونشوف اللي هيتقدمو ونختار وبعدها نبدء علي طول 

اتفقوا علي التفاصيل اللي هتم الفترة الجايه وبعد الاجتماع بسمة اتصلت علي بهاء 

ـ حبيبتي اخبارك اي

ـ الحمد لله يا أبيه انت اخبارك ايه وحشتني 

ـ الحمد لله انتي كمان وحشتيني اوي ... اخبار الشغل ايه ؟ في جديد ؟ 

ــ يختي دي ليله كبيرة اوي ساعات بحس اني اتسرعت لما سبت شغلي وجيت اساعد عمتو وساعات اقول لا كدة صح هي مكنتش هتقدر لوحدها 

ــ انتي مقدمة علي إجازة بدون مرتب مسبتيش شغلك دا اولا ثانيا أنا معاكم في اي حاجة تحتاجوني فيها بس من بعيد ل بعيد 

ــ طب احنا محتاجين تيم تسويق عندة خبره في مجال السيراميك تعرفها دي ولا اي ؟

بهاء فكر شويه 

ــ بصي هو أنا معرفش بس انا اعرف حد بيعرف في كل حاجة وشاطر هساله وارد عليكي 

ـ دا رجل أعمال يعني ؟

بهاء ضحك

ــ والله هو دماغه متكلفه ولا اجدعها رجل اعمال بس هو مش بيزنس مان لا دا شغال معايا هنا في القسم دارعي اليمين وصديقي كمان ف متقلقيش أنا واثق أنه هيتصرف 

ــ طالما حضرتك واثق فيه يبقي تمام هنتظر تلفون منك بقا متنسناش بس 

ــ مقدرش انساكم يا لمضه انهاردة بالليل هرد عليكي إذا كان هيقدر يساعدكم ولا لا ... قوليلي بابا عامل اي دلوقتي 

ــ تعالي اتعشي معانا انهاردة واطمن عليه بنفسك ممكن ؟

ــ مع اني مشغول اوي يا بسمة بس حاضر هاجي انت تؤمري يا حبيبتي 

ــ احلي أبيه دا ولا ايه 

ــ ماشي يا احلي بسمة يلا روحي كملي شغلك وخليني اكمل شغلي أنا كمان 

ــ ماشي يا حبيبي مع السلامة

ــ مع السلامة 

ــــــــــــــــــــــــــــــــــــــــــــــــــــــــــــ

علا كانت بتزور أهلها وتقضي اليوم معاهم وهما بيحضرو الغدا هي وماماتها دار الحوار بينهم

ــ جوزك هيجي علي الغدا ولا زي الاسبوع الي فات ؟

ــ مؤمن خد إجازات كتير يا ماما و

قاطعتها 

ــ خلاص خلاص يبقي زي الاسبوع اللي فات عموما براحته انتي وبنتك بس اللي تهمونا هو حر مش هيزودنا بطلته يعني 

ــ يا ماما والله عنده شغل انتي بس اللي فاهمه غلط صدقيني 

ــ خلاص بقا ما علينا ... شوفتي عملتلك اي كل الاكل اللي بتحبيه وعملتلك صينيه مكرونة بالبشاميل ف الفريزر تاخديها معاكي وانتي نازله انتي مبتعمليهاش حلو زي بتاعتي عملتلك دي تبقي تعمليها في البيت بقا اي يوم تاني

ــ اكيد مش هعرف اعمل حاجة زيك يا حبيبتي تسلم ايديك تعبتي نفسك عشاني

ـ وهو أنا ليا غيرك يعني اتعبلة يكشي يطمر بس 

ــ بيطمر يا ماما بيطمر 

ــ طب قومي ريحي جوة شويه شكلك مرهق قومي ريحي ولما اخلص الاكل وابوكي يجي هصحيكي أنا كمان وصيته يجبلك القهوة اللي بالبندق اللي بتحبيها وهو جاي 

ــ أنا مش تعبانه خليني قاعدة معاكي ... وتسلمولي حبيبتي متحرمش منكم ابدا 

ــ ولا منك يا نور عيني انتي 

ـــــــــــــــــــــــــــــــــــــــــــــ

بكر خلص مشواره ورجع علي القسم دخل ل بهاء علي طول 

ــ باشا 

ــ اهلا اهلا اخيرا شرفت هو دا اللي وراك علي طول اول ما تشرب قهوتك هتلاقيني قدامك 

ــ حبيبي وربنا معلش غصب عني والله الراجل فضل نص ساعه بيلف في الشقه تقولش فيلا بروح أمه وبيقيمها يلا المهم اننا اخيرا اتفقنا ع مبلغ كويس وهخلص معاه انهاردة بالليل أن شاء الله 

ــ طيب تمام الحمد لله انها تمت علي خير ... أنا بقا قبل ما ندخل في الشغل عايز منك خدمة 

ــ اامر يا باشا 

حكاله بهاء موضوع شركة عمته 

ــ ممممم بص أنا اعرف ناس بس لازم يكون في ريس مشغلهم يعني اعرف التيم نفسه لكن مدير التسويق نفسه لا معرفش حد بصراحة 

ــ هما لازملهم مدير يعني 

ــ اي شغل في الدنيا لازمله مدير يتابع ويشرف عشان الدنيا تمشي مظبوط 

ــ طب ما تبقي انت المدير ونخلص بكر الشركه فيها عمتي واختي لوحدهم أنا معنديش لا خبره في الأعمال ولا البيع والشراء ولا عندي علاقات ولا هعرف افيدهم ب اي حاجة لكن انت راجل يعتمد عليه وليك خبره في حاجات كتير واهو تبقي مكاني هناك قلت اي ؟

 يتبع ..