ميادة كانت متردده تاخد الخطوة دي ولا لا بس حبها ل علا كان أكبر من ترددها ... مسكت التلفون وخدت نفس طويل وطلبت الرقم وانتظرت الرد 

ـ الو

ـ ازيك يا نجاة عامله اي

ـ كويسه الحمد لله خير ! في حاجة لسه مقولتهاش انتي والمحروسه متصله تقولها بالتلفون ؟ 

ـ ممكن تهدي وتسمعيني ؟ 

ـ اتفضلي 

ـ نجاة بنتك بتحبكم 

ـ اومال لو 

ـ متقاطعنيش لو سمحتي وسيبيني اكمل كلامي للآخر وبعد ما تسمعيه انتي حرة في اي تصرف وحرة تصدقي كلامي أو تكدبيه بس سبيني اكمل من غير مقاطعه 

ـ اتفضلي كملي لما اشوف اخرتها

ــ بنتك بتحبك يا نجاة اللي حصل دا نتيجة الضغط عليها انتي كمان محدش يقدر ابدا يشكك في حبك ل بنتك بس المشكلة في الطريقه في وسط ما انتي مهتمه ب أن الناس تقول نجاة ربت احسن تربيه بعدتي عن بنتك خليتها ديما خايفه ومش واثقه في نفسها من كتر خوفها استعملت تكتم مشاعرها جواها ومتقولهاش ... علي فكرة حياتها مع مؤمن فيها مطبات كتير بسبب طبعها دا بس مؤمن بيحبها ويعلم ربنا أنه مستعد يعمل اي حاجة عشانها ... بنتك عمرها ما هتقدر تبعد عنكم ... واراهنك بعمري كله أنها بكرة الصبح هترفع سماعه التلفون وتتصل تعتذرلك كمان أن مجتلكيش لحد بيتك لأنها باقيه عليكم وبتحبكم ... ال حصل حصل وبنتك اتربت احسن تربيه والكل بيحلف بيها يبقي تحاولي تقربي منها بقا ... تشوفي هي عايزة اي واعمليه... طول عمرها تحت طوعك ومبتقولش غير حاضر وطيب ونعم ... جه الوقت اللي تسقي بنتك من حنانك واهتمامك من غير انتقاد طول الوقت حبي بينتك بتطريقتها زي ما هي تقبلت سنين كتير طريقتك اللي تعبتها نفسيا .... أنا كدة خلصت اللي متصله اقوله وقبل ما تبوظي المكالمه وتقولي كلام ملوش لازمة هقفل أنا واسيبك تفكري ف كلامي .. سلام

وفعلا ميادة قفلت قبل ما نجاة كبريائها يخليها تقول اي كلام وخلاص حبت تديها فرصه تفكر عشان لما علا تكلمها ودا اللي هي واثقه منه تكون نجاة خدت وقت كويس وفكرت في كلامها دعت من قلبها أن نجاة تفهم كلامها كويس وتحاول تصلح علاقتها ببنتها قبل فوات الاوان

ــــــــــــــــــــــــــــــــــــــــــــــــــــــــــــ

تاني يوم الصبح كانت حاجات كتير اوي اتغيرت 

بهاء صحي من النوم أو فاق بعد ما اغم عليه من الخبطة اللي خدها علي دماغه كانت الشقه منورة بنور الشمس مسك دماغه بوجع وهو حاسس بصداع شديد قام بهدوء وبص في الشقه بصه سريعه كانت كل حاجة مكانها دخل الحمام وحاول يشوف الخبطة اللي في رأسها حجمها اي معرفش فتح الحنفيه ونزل برأسه تحت الميه عشان يفوق يادوب رفع رأسه حس بطفلين وراه بيجرو في الشقه ضم حواجبة باستغراب لانه بقاله فترة مش بيشوف اي حاجه. خرج من الحمام ودور عليهم ملقهمش وقبل ما يتحرك شافهم بيجرو ورا بعض في الصاله تاني بس لما ركز شاف اللي خلاه اتجمد مكانه .... لما اتفاجا أن اللي بيجرو يبقا هو ومهاب اخوة وهما صغيرين بس إيهاب هدومة كلها دم وفي جرح كبير في رأسه بينزف ... كان مصدوم خرجة من صدمتة دي المرداي تلفونه اللي رن برقم بسمه رد بسرعه وهو خايف يسمع حاجة متوقعها بعد اللي شافه 

ــ الو أبيه ؟ ... أبيه انت لازم تيجي دلوقتي والنبي ... أبيه مهاب مش في وعيه خالص وقافل علي نفسه وعمال يكسر في كل حاجة ... تعالي بسرعه يا أبيه أنا خايفه اوي

مستناش يسمع اكتر من كدة ورد ب كلمتين بس 

ـ أنا جاي 

قفل معاها وقام بسرعه يلبس عشان يلحق اخوة .... مبيحبهمش بس مبيكهرهمش واستحاله يفرح ب رؤيه زي اللي شافها ل مهاب ... دول دم واحد مهما حصل 

ـــــــــــــــــــــــــــــــــــــــــــــــــــــــــــ

في فيلا عبد الرحمن كان قاعد علي السفرة هو ومراته ونصر ابنه بيفطرو في صمت تام وبعد حوالي تلت دقائق بس استأذنت دولت مرات عبد الرحمن وقامت عشان وراها مواعيد في النادي واول ما خرجت سئل عبد الرحمن ابنه 

ــ عملت اي يا نصر ؟ قلتلي أنا هتصرف يا بابا يا تري اتصرفت ولا خلاص كدة سيرتنا بقت علي كل لسان ؟ 

ــ هو انا لحقت يا بابا ؟ اديني يومين بس وانا هظبطلك كل حاجة متقلقش 

ــ نعم اديك يومين !! انت اهبل يلا ولا اي ؟؟ أنا من امبارح قافل كل تلفوناتي ومينفعش خالص اعمل كدة انهاردة كمان أتصرف يا نصر قدامك ساعتين زمن وتكون مخلصلي الموضوع دة فاهم ولا لا

ــ ساعتين ؟ انت سامع نفسك يا بابا ؟ بابا يا حبيبي انت كدة أو كدة خلاص قربت علي المعاش لكن أنا حركة زي دي هتدمرني لو ملحقتش اتصرف ف أنا عايز اخلص من الموضوع اكتر منك بس مش لدرجة ساعتين يعني 

ــ وانت فاكر اني خسارتي متوقفه علي وجودي في الخدمة بس ولا اي ... انت ناسي شغلنا يا استاذ حركة زي دي تفتح العين علينا واللي عايز يخلص مني ما هيصدق والناس الكبيرة مبتحبش الشوشره اول ما اسمي هيبقي ترند هيصفوني علي طول احنا في مصيبه يا نصر مصيبه تمنها حياتنا كلنا وانت تقولي معاش وخدمة 

خلص كلامة وقام من علي السفرة وهو غضبان وحاسس أن ابنه مش مقدر حجم الكارثه اللي هما فيها 

نصر لما أبوة ضم ايديه لبعضها بغضب وعجز وهو مش عارف ازاي يضغط علي بهاء واصلا هل الضغط علي بهاء دلوقتي هو الحل ولا دا هيزود المشكله اكتر بعد ما بقا الموضوع كله مباح علي السوشيال ميديا ؟

ـــــــــــــــــــــــــــــــــــــــــــــــــــــــــــــــــــــــــــ

الندم اوقات كتير بيكون متأخر وبدون اي فايدة مجرد وجع بينهش في قلبك وبس وياريت بتعرف تتخلص منه لكن دا انت وقتها بتتاكد أن الوجع دا هيفضل ملازمك لحد الموت 

بهاء وصل الفيلا بسرعه كان خايف ومتردد اول حد قابله كانت بسمة اللي منهارة من العياط 

ــ مهاب فين ؟؟ اي اللي حصل ؟؟ 

ــ كسرنا الباب عليه كان كان في حاله مش طبيعيه خالص يا أبيه خالص بابا كان مكلم دكتور توفيق اول ما دخل وشافه كدة خلي الخدامين كتفوه واداله مهدء قوي عشان يقدر يسيطر عليه وسحب منه عينه دم وقال ساعه وهيرجع يفهمنا في اي 

ــ بابا فين ؟

ــ بابا وعمتو فوق قاعدين جمبه 

ــ أنا عايز اشوفه يا بسمه ومش هستحمل كلمة من حد ممكن تطلعي تق

قاطع كلامة صوت ابوه 

ــ انت مش محتاج إذن عشان تشوف اخوك وتقف جنبنا يا بهاء تعالي يا بني 

ــ شدة وتزول يا بابا أن شاء الله هيبقي زي الفل 

ــ نيرة دمرتنا كلنا يا بهاء خلاص بقينا في الشارع يا بني خلاص

ــ متقلش كدة بس شارع اي احنا هنرفع عليها قضيه مش هنسيبها كمان هي جتلي وفي حد تبعها تقريبا دخل من باب المطبخ وخبطي ع راسي وانا عندي كاميرات ف الشقه شغاله ٢٤ ساعه مبتفصلش بحكم شغلي لازم اكون مامن نفسي هقدم التسجيلات للنيابه وهتتجاب هتتجاب متقلقش كلها مسأله وقت مش اكتر 

ــ ونجيب منين الوقت دا ؟ نروح فين بس 

ــ بيت ابنك موجود اي نعم هي شقه مش فيلا بس تحت امرك طبعا لحد ما كل حاجة ترجع أصلها من تاني

ــ بجد!!! انت يا مهاب مستعد تاخدنا شقتك ؟ كلنا ؟ 

ـ هو حضرتك مستغرب كدة ليه مش فاهم ؟

ــ اصيل يا بهاء اصيل يا بني 

ــ تسلم يا بابا ممكن اطلع ل مهاب ؟

ــ اتفضل يا حبيبي اكيد اتفضل 

طلع بهاء وخبط علي الباب خبطتين وبعدين دخل كانت سوزي قاعدة جمب مهاب علي السرير حضنه ايديه ودموعها نازله في صمت اتكلم بهاء بحرج وصوت واطي

ــ ممكن اطمن علي مهاب ؟ 

هزت راسها من غير كلام قرب بهاء من مهاب وقعد علي الكرسي اللي جمب السرير وعينيه دمعت من منظر اخوة اللي كان جارح نفسه كزا جرح بسبب حاله الهياج اللي كان فيها كان خايف رؤيته تتحقق اول مرة يخاف من الرؤيه اللي بيشوفها واول مرة يكره الهبه اللي طول عمره فخور بيها مكنش متوقع أن دا يكون احساسه تجاه أهله اتفاجا بكل المشاعر دي جواه ومش فاهم دا صح ولا غلط قاطع صوت تفكيره مع نفسه صوت سوزي 

ــ تعرف يا بهاء ... مهاب دا ابني مش ابن اخويا لا ... لما اتجوزت زمان وكل الدكاترة أكدوا اني مستحيل اخلف وقتها مهاب كان لسه عنده ست شهور تقريبا ... لاقتيني بقرب منه وبعوض حرماني من الأمومة معاه ... كنت مسؤوله عن كل حاجة تخصه... سره كله كان معايا ... مهاب مش بس ابني دا فرحة قلبي وحبيبي والسبب اللي عايشه عشانه ... لو جراله حاجة أنا هموت والله همووووت 

ــ هيبقي كويس والله كلنا جمبه مش هنسيبه ابدا هيبقي كويس 

ـــــــــــــــــــــــــــــــــــــــــــــــــــــــــــــــــ

بعد مرور ٣ ايام الساعه التاسعه مساء في واحد من أكبر البرامج الحوارية في مصر كانت المذيعه ( مها علام ) الاعلي اجرا والاجراء بين أبناء مهنتها بتتكلم في بدايه حلقتها الاسبوعيه 

ــ الخير والشر وجهان لعمله واحدة جمله كلنا سمعناها كتير من زمان وهي بتتقال بس يا تري كلنا فاهمين معناها وأبعادها ؟ 

كل انسان مننا بيتولد وهو جواه الابيض والأسود مع مرور السنين نسبه كل لون منهم بتحدد لحد ما الشخص بيبان اي الاطغي جواه الابيض الا الاسود 

بس الاعتقاد الخاطئ بقا أننا نفكر أن طالما الإنسان دا اتحدد اللون اللي طاغي عندة بالابيض أن الاسود اللي جواه اتمحي اتردم عليه بالبلدي كدة ... لان الاسود بيفضل مكبوت جوانا وسهل اوي أنه يسيطر ويحول شخصياتنا تماما 

كان مرة صادفت جريمة قتل لأسباب تافهه جدا ؟ كام مرة شوفت فيديو ل خناقه طرف فيها مصمم ينهي حياه الطرف التاني ؟ كام مرة سمعت أن فلان اللي انت تعرفه ابو قلب ابيض وحب لكل الناس قتل أسرته مثلا بالكامل لا وكمان مثل بجثتهم ؟ كام مرة قريت عن الأهالي اللي قتلو أبناءهم أو الأبناء اللي قتلو اباءهم ؟  

كل الناس دي كانت ناس عاديه جدا بتمارس حياتها زي وزيك بالظبط بتعمل خير وبتحب اللي حواليها ومرة واحدة انقلبوا للنقيض تماما

الطب النفسي قالك اي بقا قالك أن في جزء منهم الشر موجود جواه وحبه للازيه فطري موجود بس هو كان بيقاومه لحد ما مقاومته ضعفت والجانب الشرير قدر يسيطر عليه 

وجزء التاني منهم هو خير بالفطرة لكن كتر الضغوط والكبت هي اللي حولته ل شخص عنيف وبيكون عنف وليد اللحظة فقط وبعدها الشخص بيفوق وبيحس بالذنب والندم علي اللي عمله 

وجزء صغير اخير بيكون مريض نفسي ب امراض كتير جدا مش هنقدر نحصرها كلها 

طب ليه يا مها المقدمة دي كلها ... اقولك بسبب أن الجريمة اللي هنتكلم عليها انهاردة جمعت بين كل ما سبق ماشاءالله يعني مسبتش حاجة مش موجودة فيها ف عشان كدة كان لازم نبدء بالمقدمة ... نقول بقا الجريمة يلا بينا الاعداد جاهز بالصور؟ تمام ؟ اوك 

الحكايه بدأت في دار ايتام عاديه جدا للبنين بيراعاها اكتر من رجل اعمال واكتر من رجل من رجال الدوله مراكز يعني في الداخليه والجيش وكدة ومن اكتر الأشخاص تفاعلا في الدار كان المهندس عمر عبد الرحمن ابن اللواء عبد الرحمن وأخوة عقيد في الجيش ... المهندس عمر بقا كان متواجد بصفة دايمة في الدار تقريبا من تلت مرات ل مرتين في الاسبوع كان مرتبط بالأطفال جدا جدا وكل اللي في المكان كان بيحبوه اطفال وعمال وإداريين ... بس المهندس عمر كان مهتم ب طفلين زيادة شويه عن باقي الاطفال ومكنش بيندهلهم غير ب يا صاحبي !

الولدين دول كانو حسن ومحمد ١٠ سنين و١٤ سنه ولما ارتباط عمر بيهم زاد دا لفت نظر اخصائيه هناك اسمها نعمة بالمناسبه دي صاحبه الفيديو اللي مكسر الدنيا المهم نعمة جابت الولاد وحاولت تفهم منهم بيعملوا اي مع عمر الوقت الطويل اللي بيقضوه معاه وكانت إجاباتهم غريبه بالنسبالها ... قالولها احنا صحاب بيقعد عمر اه هما قالو عمر كدة علي طول هو كان بيطلب منهم يقولو عمر المهم قالو أن عمر بيقعد يحكي لهم عن مشاكله مع أهله أو صحابه أو حتي لو عندة مشروع جديد في شغله ياخد رأيهم فيه 

الاجابه كانت غريبه جدا بالنسبالها ازاي مهندس في السن دا بيصاحب اطفال في سنهم وبيحكلهم حاجات كبيره جدا علي استيعابهم 

محمد قالها أنهم بدؤ يضايقو منه ولما سألته ليه قالها عشان بقا عصبي ولما بيطلب رأينا في اي مشكله تخصه ونقوله منعرفش وأننا عايزين نقوم نلعب مع اخواتنا كان بيتعصب علينا وكزا مرة خلانا نرجع هديه يكون جايبها لينا ك عقاب عشان معرفناش نساعدة في مشكلته وان منهم مرة مسك تشيريت كان جايبه لحد منهم وقطعه نعمة اتصدمت وحست أن الموضوع فيه حاجة مريبه استحكمت وقتها في انفعالتها وطلبت منهم أنهم يقولو له أنهم مش صحاب هو كبير وهما صغير وفهمتهم بطريقه بسيطه أن الصداقه دي متنفعش وان دا تصرف غلط والولاد اقتنعوا وبعدها اي حصل ... بعدها اتفاجات نعمة ب الولاد مقتولين مطعونين كتير جدا لدرجة أن امعائهم كلها كانت برة منظر كان بشع طبعا مين بقا شاف المنظر دا ؟؟؟ هل هي بس !!! دا اللي هنعرفه من ضفتي اللي حضرت شخصيا عشان توضح الحقيقه كامله مش هنخفي اي تفاصيل كل حاجة هتتقال بالاسماء وانا بتحمل المسؤولية كامله انتظرونا بعد الفاصل مع الاخصائيه الشجاعه نعمة ابقو معانا مش هنتاخر عليكم 

ـــــــــــــــــــــــــــــــــــــــــــــــــــــــــــــــــــــ

في بيت بكر ... كانت بدور بتلاعب تاليا دخل بكر من الباب

ــ السلام عليكم 

ـ وعليكم السلام يا حبيبي احضرلك العشا ؟

ــ شويه كدة مش جعان دلوقتي ... اي دا القمر لسه صاحي يعني ؟ تتحسد

ــ الله اكبر دا أنا ما صدقت ابتسمت في وشي بعد العياط اللي مكنش بيفصل خالص دا 

ــ معلش يا حبيبتي مسيرها تتعود علي حضنك هي بس عشان يعني 

سكت لما حس أنه هيعك الدنيا ابتسمت بوجع وردت وعيونها بتلمع بالدموع 

ــ عشان متعودة علي وجود امجد الله يرحمه مش كدة ؟ ( اتنهدت تنهيدة طويله ) محدش هينسي اللي حصل يا بكر في يوم وليله رغم أنه الله يرحمه حرمني منها سنين بس مسمحاه والله وقلبي وجعني اوي علي فراقه ربنا يرحمه ويغفر له يارب 

قام من مكانه وحضنها هي وتاليا 

ــ اللهم امين يارب ... اي يا بت النكد دا ما بتصدقي عشان تعيطي ولا اي

مسحت دموعها وحاولت تبتسم 

ــ أيوة أنا عيوطة هانم فاكر الاسم دا 

ضحك من قلبه 

ــ الا فاكر فضلت طول طفولتنا ومراهقتنا كمان مش بندهلك غير بيه وانتي كنتي تتعصبي اوي وتقوليلي اهو انت اقولك أنا هانم ازاي يا بنت انتي واجري وراكي وانتي تجري وتطلعلي لسانك 

ــ ربنا يخليك ليا يا بكر وتفضل العمر كله سندي وضهري وأماني في الدنيا دي 

ــ ويخليكي ليا يا حبيبتي وميحرمنيش منك ابدا لا انتي ولا القمر الصغنن بتاعي ... هاتيها بقا وحضرلنا العشا واعملي حسابك لو مش هتتعشي معايا مش هتعشي وذنبي هيبقي في رقبتك 

ــ لا هتعشي معاك متقلقش 

دخلت المطبخ وهو فضل يلاعب تاليا يادوب خمس دقائق وخرجت من المطبخ 

ــ صحيح يا بكر هو احمد اخو امجد كلمك في حاجة ؟ 

ــ اه يا بدور كلمني ... بيني وبينك كنت هخبي عليه واحور واقول اي كلام بس هو فهمني وقالي أنه كان واقف وقت ما امجد قال انه قتل حد واتكلم علي الدم وكدة ف مكنش ينفع اكدب قولتله كل حاجة وطلبت منه ميقولش ل والدته حاجة يقول إنه اختفي بسبب خلاف بينكم ولما رجع توفي عادي جدا 

ــ وهو قالك اي ؟ 

ــ سكت شويه وبعدين قالي رغم اني مخنوق ومش طايقكم لأن ابوكم السبب بس بدور كمان عانت كتير ببعد بنتها عنها وشايلنا اننا مقلناش ع امجد انه قتل بركات وانا أنكرت اني اعرف مين اللي في الفيديو بس قلت علي مشاكل بركات الكتير مع الديلر وصحاب السوء اللي كان يعرفهم ف احمد قالي دي قصاد دي وأنه هيقول لأمة زي ما طلبت منه خوفا عليها طبعا وطلب مني اقولك متحرمهمش من البنت هي اللي فاضلالهم مش ريحة المرحوم 

ــ طب الحمد لله أنه عدي الموضوع كنت خايفه ياخد البنت مني 

كشر ورد بحزم

ــ ميقدرش احنا مش هنكرر غلطتنا مرتين بركات غلط واحنا دفعنا التمن معاه وسمعه اخوه وعيلته أنا حافظت عليهم رغم اني خالفت ضميري المهني بس مع بركات اي حاجة مباحة ربنا بجحمة بقا 

ــ خلاص طيب من غير عصبيه يلا تعالي حط العشاء معايا 

ــ لسه فاكرة يختي عكننتي عليا عشان متعشاش اوي عارفك طول عمرك بخيله 

ــ هههههههههههه أنا يا بكورة 

ــ امشي يا بت هاتي العشا مش جايب معاكي حاجة طالما قلتي الاسم الماسخ دا امشي 

ــ هههههههههههه 

ـــــــــــــــــــــــــــــــــــــــ_ــــــــــــــــــ

عند مؤمن كانت علا طول الوقت مكشرة ومضايقة بعد ما حاولت تتواصل مع ابوها وامها والاتنين رفضو يتكلمو معاها وعملولها بلوك جزء جواها زعلان ومقهور منهم وجزء تاني بيأنبها أنها زعلتهم للدرجة دي وما بين الجزئين كانت تاههه وسرحانه ديما ومؤمن كمان كان مشغول مع بهاء في القضيه كان خايف علي صحبه من التهديدات اللي بتجيله طول اليوم ملازمة ومش بيسيبه الا وقت النوم وبس 

ميادة كانت صعبانه عليها علا بس مفيش حاجة في ايديها تعملها حاولت تخرجها كتير من الحاله دي بس للاسف فشلت 

 بس كل دا اتغير لما جرس الباب رن ولما فتحت ميادة اتفاجات ب نجاة وصبري قدامها 

يتبع ....