تلت ايام عدو وقسمت بتتحرك وتعمل كل حاجة من غير اي رد فعل 

مبتعيطش مبتتعصبش مبتعملش حاجة خالص تدل انها عايشة غير انها بتقوم تلبس وتروح الشغل وترجع البيت صباح تحطلها اكل تأكله وتنام لتاني يوم 

في الأول يسرا بدأت تتضايق من تصرف قسمت 

اللي هو يعني انتي متضايقة من عيلتك قافشة من خطيبك انا ماليش ذنب تتجاهليني 

وكانت ماسكة نفسها بالعافية ان متتخانقش معاها 

النهاردة كالعادة قسمت وصلت الشغل من سلام ولا كلام دخلت مكتبها قعدت فتحت الكمبيوتر عنيها على الشاشة بتشوف تاسكات النهاردة 

يسرا في مكانها كانت متغاظة حقيقي فقامت تكلمها 

دخلت مكتبها رزعت الباب ووقفت قدامها بعصبية 

: انتي ايه حكايتك بقى فهميني طب هما مزعلينك انا تتجاهليني ليه 

قسمت رفعت رأسها على صوت زعيق يسرا 

اول ما يسرا شافت وشها صرخت : إسعاف حد يلحقنا بسرعة 

واتصلت بهشام:  الحقني قسمة بتموت 

في أقل من ربع ساعة كانت قسمة ممدة في سرير مستشفى خاصة 

حواليها يسرا هتتجنن من القلق عليها وهشام  بيسألها 

: مش هنكلم اهلها 

: اهلها ايه انت كمان ده تلاقيهم هما اللي عملو فيها كده 

: هو ايه اللي حصل 

: من يوم ما شدت معاك وهى بتيجي الشغل وتمشي وتتحرك من غير ما تنطق ولا كلمة بالكتير قوي حاضر نعم ان شاءالله  

النهاردة دخلت اعاتبها لانها حتى متجاهلاني 

كلمتها وانا بزعق رفعت وشها كان شكلها غريب حوالين عنيها اسود وشها باهت زي المدمنين  وفجأة نزفت من بؤقها وانا واقفة 

: غريبة قوي دي كانت زي الوردة الاسبوع اللي فات 

: ماهو ده اللي بقوله انا شاكة ان عمتها العقربة دي عاملة فيها حاجة 

: ياخبر دي جريمة 

: عشان تصدقني يستاهلو اللي قولتلك عليه 

: موافقك 

:طيب عايزين نتحرك بسرعة قبل اجازتك ما تخلص 

: مش مشكلة همد شهر كمان عشان بصراحة بقيت خايف اسيبها وامشي وهى في الحالة دي مش هسامح نفسي ابدا 

: طيب كويس قوي وعموما انا بعد ما تسافر هاخدها تقعد عندي 

تليفون هشام رن رفعه في وش يسرا وهو بيهمس:  دي شاكيرا 

: اوعى تقولها حاجة عن قسمت خالص 

: اوك انا نازل وراجع بعد الضهر عايزين حاجة  من برة 

: هكلمك . 

خرج هشام من الاوضة اللي قسمت نايمة فيها  فتح التليفون ورد على شاكيرا 

: اهلا شوش

: ايه ده محدش بيقولي الدلع ده خالص 

: اها بصراحة اسمك صعب شوية عليا في النطق فقررت ادلعك كده ولا هتتضايقي 

: بالعكس انا بمر بأيام صعبة ومحتاجة حد يدلعني 

: ايام صعبة ..؟ ايه اللي حصل ؟ 

: المشاكل في بيتي مش بتخلص ومش عارفة اقعد مع ماما قسمت طردتني 

: ياخبر ازاي تعمل كده 

: تخيل النهاردة قالتلي عايزة ارجع ملاقاكيش في البيت 

: اوووف انا بتفاجئ كل يوم بتصرفاتها كنت فاكرها بنت لطيفة وطيبة 

: انت اللي طيب 

: اسمعي مش بعرف اتكلم وانا سايق لو عندك وقت نشرب قهوة في اي حتة 

هشام رجع يبلغ يسرا انه مضطر ينزل يقابل شاكيرا 

يسرا: استنى نشوف الدكتور هيقول لنا ايه اهو جاي  طمنا يا دكتور من فضلك 

الدكتور:  الحقيقة الحالة غريبة جدا تهتك شديد في جدار المعدة وقرح كتير كأنها واكلة قزاز 

هشام : في خطورة عليها يا دكتور 

الدكتور : هى تعبانة وضعفانة جدا لكن مافيش خطورة ان شاء الله شوية راحة ورعاية هتبقى كويسة 

يسرا : يعني نخليها هنا أفضل يا دكتور ؟ 

الدكتور : والله لو في رعاية كويسة في البيت نخلص فحوصات وتروح 

هشام : لا لا الأفضل تكون هنا 

يسرا: صحيح الأفضل تكون هنا 

خرج هشام من من المستشفى شارد ومحتار ليه ممكن عمة تإذي بنت اخوها كده 

: لما تعرف القصة مش هتستغرب 

قالتها شاكيرا وهى بتتنهد قدام هشام 

هشام : احكيلي 

: انكل محمود بابا قسمت كان كبير اخواته ولما جم يقسمو الورث نكر حق ماما وقالها اللي جوزك استلفه مني اكبر بكتير من حقك وكده خالصين ماما وقتها حست بالظلم لكن كتمت في قلبها 

: طب وقسمت ذنبها ايه 

: وماما كان ذنبها ايه الأذى دايرة بتلف وتطول الكل 

: ايوة بس لازم حد يكسر الدايرة دي مش معقول نعيش كده 

: عندك حق انا شخصيا متعاطفة مع قسمت بس ظروف حياتي مانعة ان اقدر اعمل حاجة 

: انتي مش لسة قايلالي في التليفون انها طردتك 

اتنحنحت شاكيرا وارتبكت:  اه لكن ده ما يمنعش انها صعبانة عليا برضه 

: حنينة وقلبك رقيق والله 

: ماتحرجنيش  

: ها طمنيني عملتي ايه مع جوزك وصلتي لحل 

بصت لبعيد وهى بتجاوبه غالبا مافيش حاجة هتغيره  وانا تعبت 

: انا الحقيقة مستغرب الظروف اللي عرفتكم فيها 

: ازاي 

مسك دقنه بنعومة وهو بيقولها 

: كنت اتمنى لما اعرفكم ان تكون قسمت صديقتي والاقيكي مش مرتبطة 

: انت بتقول ايه 

: بقول ان كنت محتاج في حياتي ست رقيقة ناعمة كده 

: طب وقسمت 

: نموذج قسمت تنفع صديقة انما ماتنفعش زوجة وانا راجل عملي ومحبش أخوض تجارب فاشلة  لكن هنقول ايه كل حاجة قدر  وبص في ساعته 

: عن اذنك مرتبط بميعاد مع المحامي بتاعي سلميلي على طنط صباح 

رجعت شاكيرا البيت تحكي لأمها عن اللي دار بينها وبين هشام 

صباح ابتسمت بجشع  : ياسلام لو تلفق دي يبقى ضربنا كل العصافير بحجر واحد لما يسيبها هتتجنن  واعرف احجر عليها وبرضه يبقى مراحش مننا انتي أولى بيه 

: ياماما راجي مش هيطلقني 

: اخلعيه ياعين امك ارفعي خلع مستعجل 

: طب وبنتي 

: هنرميها لابوها بلاش قرف هو احنا مش هتتعدلنا عيشة ابدا يعني 

: الصراحة ياماما هو عاجبني انما يعني 

: انتي تنزلي على بيتك تجيبي الطلب اللي قولتلك عليه وتخرجي من هناك جري على الحاجة صابرة وهى الحاجة  سخنة اوعي تتلكعي إلا تبوظ 

: انا خايفة يا ماما 

: اتحركي بقى شوية بلاش خيبة 

يسرا في المستشفى كانت قررت أن قسمت تفضل هناك كام يوم وقررت تخبي على عمتها انها تعبانة 

فاتصلت بيها تبلغها انها هتسافر مؤتمر مع الشغل تغيب يومين 

صباح ارتاحت لفكرة غياب قسمت يومين شافت ان دي احسن فرصة تلف هشام وتاخده لبنتها 

شاكيرا خرجت من عند امها جري على بيتها 

لقت راجي قاعد يتفرج على ماتش فهجمت عليه تبوسه وتقوله انه واحشها 

بعد ساعة نزلت جري من البيت نطت في اول تاكسي على بيت الحاجة صابرة 

قدمتلها حتة قماشة محطوطة في كيس مسكتها صابرة بالماشة بتاعة الفحم من بعيد وهى بتقول : ده لازم البنت دي تاعباكم قوي ان تجرو في اذاها بالشكل ده 

شاكيرا اتهزت وسألت : هى هتتضر جامد يعني 

الحاجة صابرين هزت راسها وقالت بسخرية : مسم امال جاية ليه ياختي دنتي وامك دوبتو الاعتاب قومي ياختي وبلاش محن لما الرابطة تجهز هشيعلكم  قال يعني ضميرها صحي 

خرجت شاكيرا من عند صابرين وكأن حد ضربها على وشها 

هى مش حابة وجود قسمت لكن كمان هى مش مجرمة ومش فاهمة حجم الضرر اللي ممكن السحر ده يسببه ومفهمتش غير من نظرات الست الشيخة المخيفة دي 

تليفونها رن 

: الو هشام ! 

:انا بس بتطمن عليكي لانه قولتي هتروحي بيتك خفت عليكي 

: ايه خفت عليا انا عمري ما حد خاف عليا 

: ازاي بقى الرقة والجمال دول لازمهم خوف عليهم 

سرحت شاكيرا في كلامه وافتكرت تعاستها في كل جوازة تتجوزها عمر ما حد خاف عليها ولا اهتم بيها 

حلاوتها مقدرتش تخلي حد يحبها زي ما بتتمنى