ريهام برقة: تعالوا شوفوا جبتلكم مين معايا بما ان فرحى انا وفهد قرب وخطوبة مالك ومليكة فمكنش ينفع معزمش لمياء 

بصت مليكة وفهد ومالك بدهشة

مليكة بهمس: لا... مش معقول

ريهام: تعالى يالمياء واقفة عندك ليه سلمي على صحابك 

جرى مالك على لمياء اول ماشافها وحضنها بااشتياق وحب مكنش مصدق انه حبيبته اخيرا رجعت بعد كل الغيبة دى

مالك وهو لسة حاضنها: كل دى غيبة ياحبيبتي انا مش مصدق انك رجعتيلى اخيرا الحمدلله انك بخير

بعدت لمياء مالك عنها بخفة وبصت لمليكة الل كانت حاسة بااحراج شديد 

لمياء: ايه يامليكة مش هتسلمى عليا؟ 

راحت مليكة حضنتها وبادلتها لمياء الحضن بهدوء

لمياء بهدوء: مش هتقوليلى ايه الل حصل فى غيابى؟ 

بصت مليكة ومالك لبعض باارتباك

ريهام بلؤم: هما اكيد محرجين يقولوا لحظة انا هشرحلك 

مليكة بحدة: ياريت تخليكى فى نفسك محدش طلب منك تتكلمى وانت يافهد لم خطيبتك

ريهام: تؤ ليه الغلط بئا ياملوكة! 

لمياء: اتكلمى ياريهام انا سامعاكى

ريهام بخبث: كل الل حصل يالولو ان مليكة كانت نفسيتها مدمرة بعد قصص حبها الفاشلة ومالك كمان كانت حالته النفسية مش تمام بسبب بعدك عنه فالاتنين قرروا يداوا جروح بعض ويبدأوا قصة حب جديدة بس الظاهر ان دى كمان فشلت

مالك بغض*ب: بسسس انتى ايه ياشيخة شيطا*نة... لمياء اسمعينى كل الكلام الل هيا قالته مش مظبوط

دى.. دى مليكة انا بعتبرها زى اختى بالظبط مش كدة يامليكة

مليكة باارتباك: هاا اي.. ايوة 

قالت بنت من الل بيتفرجوا بسخرية 

=مش على اساس يامليكة ان انتى ومالك بتحبوا بعض ومخطوبين ولا كانت مجرد تمثيلية هيهييي

ردت واحدة تانية وقالت: خلاص بقى بلاش نحرج البنت 

لمياء: بسسس اسكتوا كلكم 

بصت لمياء لريهام وقالت بحدة: مليكة تبقى صديقة عمرى وانا مش هسمح لاى حد يغلط فيها قدامى.... خلاص الكل يلزم حدوده وهو بيتكلم مع مليكة والا هتشوفوا وشى التانى وبالنسبة لعلاقتها هيا ومالك فدى حاجة خاصة ياريت محدش يدخل فيها

فى الكافتريا

كانت مليكة ومالك ولمياء قاعدين مع بعض

مليكة بحزن واحراج: بجد أنا آسفة يالمياء انا غلطت اوى فى حقك انا كنت مقهو*رة اوى عشان فهد هيتجوز ريهام وملقتش حد اوثق فيه اكتر من مالك عشان يساعدنى كنت فاكرة ان فهد هيغير عليا ويوقف جوازه من ريهام بس محصلش

لمياء باابتسامة: مليكة انا مش زعلانة منك بس قلقانة عليكى اوى أخرة كل  الل بتعمليه ده ايه؟..... انا عايزاكى ترجعى مليكة بتاعة زمان الل مكنش فى دماغها غير مذاكرتها وبس وفكك من آسر وفهد والل فيه الخير ربنا هيقدمه 

مليكة: صح معاكى حق انا هرجع اهتم بمذاكرتى هحقق حلمى وحلم ماما وبابا وهبقى دكتوره فى الجامعه ان شاءلله 

مالك بااحراج: احم.. طب وانا يالمياء؟ 

مليكة باابتسامة: طب هسيبكم بقى تقعدوا مع بعض واروح اشوف معتز 

بعد مامليكة مشيت 

مالك بحب: لمياء انا بحبك اوى بجد صدقينى انا اتغيرت عن الاول حبك غيرنى وخلانى انسان تانى بعد ماكنت انسان تا*فه لمياء صدقينى انتى اغلى شخص فى حياتى ياحبيبتى

لمياء بحب: تعرف يامالك كل الظروف الل مريت بيها خلتنى اتأكد انك انت الوحيد الل حبيته انا ضايقتك كتير بسبب آسر بس صدقنى اما بعدت عنك كنت بتعذب اكتر منك بكتير الحمد لله ان ربنا جمعنا تانى 

باس مالك ايدها بعمق وقال بعشق

=انا مش هخليكى  تبعدى عنى تانى

بعد دقايق كانت بدأت المحاضرة 

قعدت مليكة ولمياء جمب بعض ووراهم مالك ومعتز

تارا بهمس: شايف ياآسر رجعوا اتجمعوا تانى ازاى

آسر بتجاهل: تارا ركزى فى المحاضرة انا مش فايقلك خالص

تارا: ده انت حتى مفروض تبقى مبسوط ان مليكة طلعت مش مخطوبة لمالك

آسر بتأفف: وايه الجديد!؟ مانا كنت متأكد اصلا انهم مش مرتبطين 

شهاب: اومال مالك مضايق ليه... لتكون سيلا وحشتك

آسر بشرود: حاسس بالذنب اوى

لاحظت مليكة ان ريهام موجودة معاهم فى نفس المدرج فقالت للدكتور

=لو سمحت يادكتور

وقف الدكتور عن الشرح وقال

=اتفضلى؟ 

مليكة: فى طالبة من قسم تانى حاضرة معانا المحاضرة

الدكتور بحدة: فين دى؟ 

شاورت مليكة على ريهام الل كانت شاردة لكن اول ماشافت عيون الكل عليها بصت بتوتر

الدكتور بحدة: اتفضلى قومى 

قامت ريهام بتوتر وبصت لمليكة بغض*ب

ريهام بتبرير: بعتذر لحضر.. 

الدكتور بغض*ب:: اتفضلى اطلعى برة انا طردتك لان من الزوق قبل ماتحضرى محاضرة دكتور مش من قسمك تستأذنى الاول 

طلعت ريهام وهيا بتبص على مليكة بغضب بادلتها مليكة النظرات بفرحة انتصار اما فهد فمكنش مهتم اساسا بالل بيحصل

وقبل مامليكة تقعد كان الدكتور قالها

= وانتى اتفضلى اطلعى برة عشان تتعلمى انك متفتنيش على اى حد تانى

بصت مليكة بصدمة

الدكتور: يلا لو سمحتى عشان وقت المحاضرة 

خرجت مليكة بااحراج وهيا بتبص على فهد الل بصلها ببرود  اما زمايلها فضحكوا بصوت واطى 

اول مامليكة خرجت فتحت تليفونها شافت رسالة وكان نصها بيقول 

«مليكة لازم اشوفك ضرورى جدااا انا عارفة انك مش بتوثقى فيا بس صدقينى المرة دى مهم اشوفك وكمان هعرفك حقيقة فهد الل انتى متعرفهاش لحد دلوقتي اتمنى توثقى فيا ولو لمرة واحدة انا هستناكى عند...... 

استغربت مليكة جدا وده لانها كانت عارفة ان سيلا بتتعالج فى المصحه واترددت كمان انها تروح تشوفها ولا لا خصوصا ان سيلا حاولت تقت*ل مليكة قبل كدة فمن المستحيل ان مليكة توثق فيها

بعد شوية كانت المحاضرة خلصت 

اول مامليكة شافت فهد خارج راحتله

مليكة: فهد انا كنت عايزة اقولك حاجه 

فهد ببرود: سامعك 

مليكة بتردد: بصراحة فى رسالة جتلى من.. من

فهد بااستغراب: اتكلمى يامليكة رسالة ايه؟ انا سامعك

مليكة: من س.. 

قاطع كلامها قدوم ريهام 

ريهام بدلع: فهد عايزاك تيجى تختار معايا فستان الفرح 

فهد بحدة: ريهام روحى دلوقتي 

ريهام بااستفزاز وهيا بتبص لمليكة: ومين فينا الل مفروض يروح

مليكة بحزن ودموع متجمعه فى عيونها

=معاكى حق انا الل هروح

وبالفعل مشيت مليكة وقررت انها تروح على المكان الل سيلا قالتلها عليه

بص فهد بغض"ب لريهام ومشى

اخرجت ريهام هاتفها واجرت مكالمة 

ريهام: اسمعني هيا هتيجى على العنوان دلوقتي عايزاك تخلص عليهم هما الاتنين 

انهت ريهام المكالمة وابتسمت بمكر 

=اروح انا بقى اجهز لفرحى انا وفهد 

اما عند مليكة فكانت وصلت بالفعل وشافت سيلا 

مليكة باارتباك: س سيلا انتى عايزة ايه وازاى خرجتى من المصحة؟ 

سيلا بااستعجال: مليكة اسمعيني كويس عارفة الل هقوله خطي*ر بس انتى الوحيدة الل تقدرى تساعدينى

مليكة بعدم فهم واستغراب: اساعدك فى ايه انا مش فاهمه حاجه اصلا وايه الل تعرفيه عن فهد؟ 

سيلا: انا غلطت غلطة كبيرة اوى يامليكة بس مش لوحدى

مليكة: سيلا وضحى كلامك تقصدى ايه؟ 

سيلا بحزن: انا فكرت اروح لفهد واقوله كل الل اعرفه بس خوفت يحبسنى.. 

مليكة باستغراب: يحبسك!؟ 

سيلا بندم: انا اشتركت فى مؤامرة خطيرة والل ساعدن.... اااااااااه

مليكة برعب: سيلااااا

قبل مامليكة تستوعب كانت هيا كمان انصابت برصاصة 

والاتنين وقعوا على الارض وبدأت الناس تتجمع عليهم