_سوزي خلينا ننسي الماضي ويلا نرجع لبعض

*حصل غلطة صغنونه في البارت الأول في نهايتة كتبت مريم بدل سوزي ف عذراً"

كنت مصدومه قفلت الخط بسرعه وبصيت لبابا وأنا دموعي بدأت تظهر 

اتنرفز بابا_بعد كل اللي عمله ده وعايز يرجع ده أنا هبهدله لو شوفته

أدهم كان قاعد مش فاهم حاجه حاول يهدي بابا_أهدي يا عمي في ايه حصل ايه

أتكلم بضيق_ده الزفت اللي كان هيخطب سوزي 

أتكلم أدهم بأستغراب_وماله ده

اتنهد بابا وكان لسه هيتكلم قاطعته بسرعه وأنا بكتم دموعي_بابا لو سمحت قفل الموضوع 

بصلي بابا بقله حيله واتنهد بحزن 

كان أدهم بيبصلي في المرايا بأستغراب بس مهتمتش

وصلنا البيت وطلعنا أنا وماما 

وبابا وقف مع أدهم يودعه وطلع هو كمان

أول ما طلعت انهارت وماما حاولت تهديني_اهدي يا حبيبتي صدقيني مايستاهلش ضفرك حتي 

بابا قرب مني وخدني في حضنه_أهدي يا قلب أبوكي حقك علي عيني صدقيني لو السماء انطربقت علي الأرض مش هترجعيله تاني

أتكلمت بعياط_هو ليه بيعمل فيا كدا!! يرجع وقت ما يحب ويمشي وقت ما يحب لعبة في ايده أنا!!!

بابا شدد علي حضني وفضل هو وماما جنبي لغاية ما هديت ونمت 

صحيت تاني يوم تعبانة ومصدعه جداً 

بصيت في الساعه كنت متأخره علي الكلية جهزت بسرعه ونزلت ولحظي الحلو ملقتش مواصلات 

أتكلمت بضيق_كملت اهي أوف 

مهو أكيد مش هروح الكلية علي رجلي هو يوم باين من أوله 

حسبي الله في الرجالة!

_طب  و الرجالة مالها دلوقتي 

بصيت لمصدر الصوت لقيته أدهم ركبت العربية بتاعته بسرعه_ابن حلال وصلني الكلية بسرعه اللهي تنستر 

ضحك_حاضر يا سوزي

بالفعل ساق وكنا في طريقنا للكلية 

كنا في حاله صمت قاطعه هو_أنتِ كويسه

اتنهدت_الحمدلله

بصلي وابتسم_مش حابه تفضفضي لأدهم 

بصيتله وسرحت في موقف طفولي

فلاش باك

كنت قاعدة مضايقه ودموعي علي خدي

_سوسي 

=نعم يا اتهم 

_مالِك

=مفيس 

_لاء فيه مالِك

=مفيس يا أتهم

_مس حابه تفطفطي لأدهم حبيبك 

باك

بصيتله وابتسمت_لسه فاكر

بص قدامه بثبات_عمري ما نسيت  ده أنتِ كان عليكي واحده اتهم بتدوبني

بصيتله وابتسمت وبعدين بصيت قدامي واتنهدت _بليل لو حابب ممكن نتقابل ونتكلم سوا

بصلي وابتسم_أحب ومحبش ليه

أتوترت_بص علي الطريق يا أدهم 

وصلني الكلية وهو راح علي شغله في الكافيه 

كان يوم متعب وما صدقت خلصته 

روحت البيت اتغديت ونمت شوية وبعدين صحيت جهزت ولبست لبس مريح ونزلت عشان أقابل أدهم 

نزلت لقيته واقف تحت البيت بعربيته

_يلا بينا

بصلي وابتسم_يلا بينا

روحنا عند البحر وقعدنا 

راح جاب آيس كريم ورجع 

اتنهد وبدأت احكيله_كنت بحب شخص واتقدملي بابا شافه كويس ومحترم فوافق عليه مرت الأيام واجا معاد الخطوبه فلقيته قبلها حرفياً بساعه بعتلي مسدچ وبيقولي 

"أنا آسف يا سوزي أنتِ تستاهلي حد أحسن مني"

طبعاً حاولت أرن عليه كتير بس للأسف عملي بلوك من كل حته

يومها أنا قلبي أتكسر كسرة وحشه أوي أتكسر مرتين 

مرة لما عشمني ومشي ومرة لما شوفت القهرة في عيون أهلي 

ضحكت بسخرية_وبعد كل ده البيه كلمني انبارح وعايز نرجع تعبان ميعرفش إني لو هفضل طول عمري سنجل عادي بس مش هكون معاه 

كان سامعني بهدوء وفي الآخر اتنهد_مش عارف أقولك ايه بس حقيقي شخص زي ده ميستاهلش بس بصه منك ده شخص مش سوي أبدا واناني عايز يقرب ويبعد وقت ما يحب

بصلي في عيوني_أنتِ غالية أوي يا سوزي وأي حد يتمني رضاكي صدقيني 

أبتسمت علي كلامه_شكرا يا أدهم 

_ده أنا اللي شكرا يا سوزي أنك لسه بتحكيلي زي زمان 

أبتسمت وسكت وفجأة لقيته وقف قدامي_محتاجك بكرة معايا 

بصيتله بأستغراب_فين

_عندي فرح واحد زميلي ومش عايز أروح لوحدي 

=مش عارفه بس عندي مذاكرة أنا امتحاناتي قربت و...

قاطعني_مش هنتأخر متخافيش أنا كده كده مش بحب جو الأفراح 

=طيب بحيس كده اجي 

مر اليوم بسلام ما بين كلامنا وهزارنا واسترجاع بعض الحواديت من الطفوله 

"تاني يوم علي معاد الفرح

لبست دريس أزرق فاتح وعملت شعري كيرلي وحطيت ميكب سيمبل ولبست الهيلز 

لقيته باعتلي مسدچ"أنا تحت

نزلت لقيته واقف ساند علي العربية لابس قميص أسود وبنطلون أبيض وكان شكله تحفه 

أول ما شافني صفر_ايه الحلويات دي

ضحكت بكسوف_كمساميدااا(شكراً)

ضحك_ويلكم ويلكم

فتحلي الباب بحركة رومانسيه ضحكت وركبت

أول ما ركب لقيته بيديني بوكيه فراشات أزرق كان تحفه أوي 

لحظه كنت منزلاه قبل كده بوست وكاتبه عليه "اللهم من قرة عيني" هو عرف ازاااااي

بصيتله بصدمه وضحكت_شكرا

بصلي وابتسم وبدأ يسوق

وصلنا القاعه نزلنا ودخلنا

_بصي هروح أسلم علي صحابي واجيلك أقعدي هنا

=تمام

قعدت علي ترابيزة بعيد شوية عن الناس كنت بصاله ومركزة معاه

مكنتش شايفه حد غيره 

فجأة لقيت واحده مايعه لابسه لبس مفتوح أوي قربت منه وكانت بتحاول تلمسه 

أتضايقت! 

بس في أقل من الثانية هو بعد عنها منغير ما يحرجها وده خلاني أحترمه أكتر 

فجأة لقيته بصلي وأبتسم وأنا أبتسمت 

قرب مني_معلش سيبتك لوحدك 

أبتسمت_ولا يهمك

فجأة برضو نفس البنت قربت مننا وقعدت علي الكرسي اللي جنبه 

أتكلمت بدلع_أدهوم نورت الفرح

رد منغير ما يبصلها_شكرا 

_مالك يا حبيبي مش مبسوط ولا ايه

=حبيبك؟

بصتلي وردت بغرور_ايه ده معلش مشوفتكيش يا حبيبتي 

=ليه يعني دبانه قاعدة 

_نعم

أبتسمت بتصنع_ولا يهمك يا حبيبتي 

قوليلي أنتِ لازقه في الواد كده ليه متبعدي شوية يا حبيبتي محسساني أنه جوزك

بصتلي بضيق وبعدين قامت مشيت

بصتلها بقرف_مايعه

والتاني كان بيحاول يكتم ضحكته

أتكلمت بضيق_بتضحك علي ايه أنتَ كمان 

_احم متاخديش في بالك 

فضلنا حبه وطبعاً كل شوية بنت شكل تقرب مننا مش عارفه ايه القرف والتلزيق ده!

وفجأة قرب مننا حد مكنتش أتمني إني أشوفه!

يتبع...