الجزء الأخير 🦋 الواقعي 

_"باركوا لي يا جماعة أنا قررت اتجوز بعد محاولتين فاشلين ههههه وشكل هتبقي الثالثة تابتة"

معتز بص له بصدمة لأنه حس ان هند بدأت تحب أخوه وكان متوقع أن عمران يتقدملها

هند بصدمة حاولت إخفاءها " تتجوز ألف مبرووك ومين بقي العروسة"

_"ممثلة في الوسط أكيد هتعرفيها فيروز الزيات"

_"طول عمرك بتعرف تختار هههه"

هند في سرها بوجع " الحمد لله علي كل حال مفيش حاجة بطلبها بتتحقق شكلي كنت بتوهم لما حسيت أنه بيحبني أنا اتوجعت بما فيه الكفاية ومش هوجع نفسي تاني عشان أي حد الحمد لله"

عمران بفرحة وعبوس في نفس الوقت " هند هند انتي يابنتي سرحتي فين"

هند بإبتسامة " سمعاك يا عمران كنت بتقول انك عايز نحتفل برا وبعدين"

_"هههه دايما مركزة حتي وانتي سرحانة وبعدين يا ستي الفرح اخر الأسبوع وأنا جهزت كل حاجة عشان اتقدملها ونعمل الفرح بسرعة"

_"هتتقدم لها امتي"

_"كان نفسي اتقدملها النهاردة قبل بكرا بس الصراحة عايز احتفل الأول معاكم"

عمران بإستغراب " ايه يا معتز هتفضل واقف عندك كتير مش هتبارك لي ولا ايه"

معتز بارك له وسابه ومشي بسرعة

عمران بهمس " ماله ده زعلان ليه أنا عارف أنه مش هيقدر يعيش من غيري بردوه هههه"

........................

عدي يومين 

هند قررت تسيب الشغل بس بعد ما لقت شغل في عيادة لدكتورة قلب بس كل اللي مزعلاها أنها هتسيب ماسة بعد ما اتعلقت بيها بس هتعمل ايه مفيش حاجة في ايديها 

هند لسه هتدخل لمعتز مكتبه تبلغه أنها هتسيب الشغل دخل عمران وهو في حالها يرثي لها

هند بقلق " معتز انت كويس حصل ايه"

عمران بدموع " انا اترفضت يا هند رفضتني فيروز شايفاني ... واحد ملهوش قيمة أنا والله بحبها انا ليه حصلي كده كل ده عشان اتجوزت كذا مرة"

هند قلبها وجعها من حالته " اهدي بس واقعد وانا هجيب لك كوباية عصير تفوق من القرف اللي انت شاربه ده"

بعد شوية 

كان عمران فاق شوية من آثر الكحو**ليات اللي شربها 

_"هند تتجوزيني أنا عارف انك بتحبيني من زمان فوافقي تتجوزيني وانا هعيشك ملكة"

هند بجمود " تصدق أنا حقيقي عمري ما شوفت أحقر منك يعني كنت عارف انِ بحبك ومتكلمتش ودلوقتي عايزني استبن بدل فيروز اللي رفضتك"

_"احب أقولك أن طلبك مرفوض يا أستاذ عمران روح شوف واحدة غيري تقبل باللي أنا رفضته مش بعد كل اللي عيشته في حياتي هتيجي انت وتكمل عليا وأي ذرة حب كانت في قلبي ليك في يوم بح اتبخرت"

خلصت كلامها وسابته ومشيت لمت حاجاتها وجهزت شهيرة وعمر ورجعت شقتها القديمة   

وكل ده حصل ومعتز عارف ومتكلمش ولا أتدخل 

......................

عدي 3 سنين

هند اشتغلت في عيادة الدكتورة اللي أسلوبها من برا تحسها كويسة وهي عكس كده وكانت مطلعة عين هند طلبات طلبات وهند كل ده مستحملة عشان ولادها اللي مصاريفهم كترت ومحتاجين مصاريف كتب ودروس 

في كل المدة دي مافيش حد من أهل هند حاول يسأل عليها ويعرف أخبارها عشان مترجعش وتبقي حمل عليهم من تاني

عمران ندم علي اللي قاله لهند وحاول يعتذر لها كتير بس هي مقبلتش أي محاولة منه هو حس أنه حبها بس متردد يتقدم لها ولا لأ

ومعتز كان دايما بيكلمها وبيطمن عليها 

....................

_" ماما"

_"ماما"

_"ماما"

هند بعصبية " ايه عايزة ايه انتي واخوكي ماما ماما فيه انا قرفت والله قرفت وتعبت مش دي الحياة اللي كنت عايزاها"

كملت بدموع " ليه بيحصلي كده انا عايزة اعيشكم عيشة كويسة ومرتاحة وتبقوا حاجة بس أنا تعبت ومحدش حاسس بيا تعبت نفسي ابعد عن كل حاجة وكل الناس"

شهيرة وعمر بصوا لها بدموع وحضنوها وطبطبوا عليها 

شهيرة بزعل ودموع " متزعليش يا ماما احنا آسفين"

هند حضنتهم بقوة " انا اللي اسفه يا روح قلبي انتي واخوكي متزعلوش مني انا بس مضغوطة في الشغل"

شهيرة بتفكير " مش طنط رنين جارتنا بتحب أكلك يا مامي ايه رأيك تفتحي صفحة اكل وطنط تعرف صاحبها وقرايبها"

هند بتنهيدة " خليكي بس في مذاكرتك يا شوشو وسيبك من الكلام ده الطبخ موال وعايز حاجات كتير"

_"جربي مش هتخسري حاجة"

_"حاضر يا حبيبتي كبرتي امتي يا شهيرة وبقيتي تقولي الكلام ده هههه"

_"امدحيني اكتر يا مامي ههههه"

..................

عدي فترة 

وموضوع الصفحة شاغل بال هند لحد ماقررت تعمله وتسيب شغلها مع الدكتورة بدأت في المشروع وعرفت كل جيرانها وواحدة واحدة المشروع بدأ يكبر وصفحتها بقي عليها متابعيين كتير 

.................

بعد سنة 

هند فتحت مطعم خاص بيها في منطقة راقية في زايد سمته نجمة لأن ده كان حلم بعيد المنال زي النجمة واتحقق بفضل ربنا 

_"أنا آسف"

هند بصت وراها بدهشة " عمران انت بتعمل ايه هنا"

_"كنت جاي اتغدي مع معتز وماسة في المنطقة هنا وشدني اسم المطعم فدخلت"

هند شافت معتز هو بنته وبصتلهم بإبتسامة وهو كمان بصلها وابتسم

_"أنا آسف سامحيني"

هند بإبتسامة " آسف علي ايه"

_"آسف انِ جرحتك يومها بالطريقة دي أنا بحبك من ساعة ما سيبتي الفيلا وانا حياتي بقي ملهاش معني"

_" انت جاي بعد كل السنين دي وتقول كده تمام وأنا مسمحاك يا عمران"

_"تتجوزيني"

_"عمران انا عارفة انك متردد وعايز أي واحدة في حياتك وخلاص بس انا خلاص مش هتجوز تاني كفاية عليا شهيرة وعمر مليين كل حياتي ومش عايزة غيرهم وانت ان شاء الله ربنا يرزقك ببنت الحلال اللي تستاهلك ونصيحة لوجه الله ابعد عن صحاب السوء اللي مبوظيين حياتك "

خلصت كلامها وسألته ومشيت

معتز بص لها بإبتسامة لكلامها لأنه عارف انها مش هتقبل زي ما هو ما ادخلش من اكتر 3 سنين لما سابت الشغل وساعة كلام عمران هو دلوقتي ما ادخلش لأنه واثق أنها قوية وهتستحمل أي حاجة تواجهها

................

_"السلام عليكم يا أهل البيت"

شهيرة وعمر جريوا علي الباب حضنوها " وعليكم السلام ورحمه الله وبركاته وحشتينااااااااا"

عمر بزعل " اتاخرتي ليه يا أختي كل ده عشان تيجي"

_"صدق يا واد يا عمر انا هروح ارجع الحاجة اللي كنت جايباها الماركت تاني"

عمر بهزار "هههه استني بس يا هنود متخديش علي اعصابك يا اختي هاتي بس كيس الحاجة الحلوة بتاعي وممكن ترجعي بتاع شهيرة عادي هي عاملة رجيم"

شهيرة بإستنكار " ر ايه رجيم انا والرجيم مش بنتجمع في جملة واحدة انت ياض عايز الضرب"

شهيرة خدت الكيس بتاعها وبتاع عمر وجريت بسرعة " ابقي قابلني بقي يا اخويا لو عرفت تاخده هههه"

هند ضحكت بقلة حيلة لأن دي عادتهم كل يوم بيتخانقوا 

_"الحمد لله يا رب رغم كل اللي حصل في حياتي بس انت عوضتني بالأحسن عوضتني بشهيرة وعمر وبشغلي وان شاء الله هكمل بعد كل ده تعليمي"

_"بحبك يا الله فعلا عوضك جميل"

تمت