رواية اثبات ملكية الفصل الثالث 3 بقلم ملك ابراهيم
رواية اثبات ملكية الفصل الثالث 3 هى رواية من كتابة ملك ابراهيم رواية اثبات ملكية الفصل الثالث 3 صدر لاول مرة على موقع التواصل الاجتماعى فيسبوك رواية اثبات ملكية الفصل الثالث 3 حقق تفاعل كبير على الفيسبوك لذلك سنعرض لكم رواية اثبات ملكية الفصل الثالث 3
رواية اثبات ملكية الفصل الثالث 3
وقفت ابص على امي وهي في الاوضه والاجهزه متوصله بجسمها، انا لازم اتصرف لازم اعمل اي حاجه عشان انقذ حياة امي، المشكله ان انا مليش حد استلف منه المبلغ دا، واعمامي يعتبر قطعو علاقتهم بينا من بعد وفاة بابا عشان خايفين نطلب منهم فلوس، وقفت وانا حاسه ان الدنيا بتلف بيا، لقيت البنات اللي بيشتغلوا معايا في الكوافير جم ومعاهم مدام سحر صاحبة الكوافير، سألوني عن حالة ماما وقولتلهم على العمليه والفلوس اللي لازم ادفعها، طبعا انا عارفه ان ظروفهم نفس ظروفي ومش هيقدروا يساعدوني، بس مدام سحر خدتني على جمب وقالتلي(بقولك ايه يا ساره، انا عندي طريقه سهله وبسيطه تقدري تجيبي منها المبلغ دا بسرعه)
بصتلها باستحقار وقولتلها(اكيد طريقه مش شريفه طبعا اللي هقدر اجيب بيها المبلغ دا وبسرعه كدا) حركت راسها بـ لا وقالتلي(بالعكس،، دي طريقه شريفه جدا وبشرع ربنا كمان) بصتلها وانا مش فاهمه حاجه، اتكلمت بصوت واطي اكتر (تعالي معايا برا وانا اقولك هي ايه) بصيت حواليا شويه افكر وبعدين قولت لنفسي، وماله اروح معاها واسمعها يمكن طريقه شريفه فعلا، خرجت معاها وقعدنا برا المستشفى واتكلمت باختصار وقالتلي (بصي يا سارة، في واحد خليجي من اللي بيحبو يدلعوا نفسهم، جه مصر ونفسه يجرب النوع المصري، واهم شرط عنده ان العروسه تكون عذراء ويكون هو اول راجل في حياتها وهيدفعلها 50 الف جنيه مهر بس الجوازه دي هتكون بعقد وللفترة اللي هيقضيها هنا وبس وبعد كدا العقد ينتهي) بصتلها بصدمه وقولتلها(هو الكلام دا حقيقي، يعني مش خيال وبنشوفه في التلفزيون وبس!! ) قالتلي(تلفزيون ايه بس، انا بقولك فيها 50 الف جنيه دا غير اللبس الحلو اللي هيشترهولك والدلع اللي هتعيشيه معاه) وبعدين كملت كلامها بتأكيد(والاهم بقى ان الخمسين الف جنيه دول انا ليا فيهم عشرين الف وانتي التلاتين بتوع عملية والدتك) بصتلها بقرف وقولتلها (انا مستحيل اعمل اللي انتي بتقولي عليه دا ولا بمال الدنيا كلها) حركت راسها بتفهم وقالتلي(كنت عارفه ان انتي وش فقر وفي الف واحده غيرك تتمنى الفرصه دي وخليكي انتي كدا قاعده مكانك تتفرجي على امك وهي بتموت) وقفت عشان تمشي وانا حسيت وقتها ان فرصة انقاذ حياة امي هتضيع مني، لحقتها وقولتلها(انا موافقه) ابتسمت وقالتلي (ايوا كدا يا حبيبتي خليكي عاقله، هستناكي النهاردة في الكوافير بعد الساعه 12 بالليل وهيكون هو موجود ونكتب العقد وتاخدي الفلوس) خوفت من كلامها، معقول انا ممكن اعمل كدا،، حركت راسي بالموافقه وهي مشت وسبتني واقفه مكاني، رجعت المستشفى تاني ولقيت الدكتور بيأكد عليا تاني بضرورة عمل العمليه في اسرع وقت، حسيت ساعتها ان دي اشارة عشان مفكرش كتير واخد القرار، حياة امي اهم من حياتي ولازم اعمل المستحيل عشان انقذ حياتها.
فضلت قاعده في المستشفى لحد الساعه 12 بالليل بفكر بحيره اروح ولا لا، وقفت قدام الاوضه اللي امي فيها وبصيت عليها وهي مغمضه عنيها والاجهزه متوصله بجسمها، خدت القرار ان لازم اوافق واروح اجيب لها فلوس العمليه،، اتحركت وانا خايفه من اللي انا رايحه عليه، خرجت من المستشفى وروحت على الكوافير وانا حاسه اني رايحه انتحر، مش متخيله اني ممكن اعمل كدا، ازاي اتجوز بالطريقه دي، دخلت الكوافير ولقيت مدام سحر بتنادي عليا وهي قاعده في اوضة مكتبها، دخلت عندها ولقيت راجل كبير قاعد لابس عبايه خليجي بيضه وبيبصلي بطريقه جمدت جسمي كله، معقول انا ممكن اتجوز دا، معقول انا ممكن ابقى معاه كدا، لا مش قادرة اتخيل حاسه اني هيغمى عليا، حطيت ايدي علي بؤي وجريت على الحمام، مش قادرة اتحمل فكرة اني ممكن اكون مع الراجل دا،، دخلت مدام سحر ورايا واتكلمت معايا بعصبيه(ايه القرف اللي انتي عملتيه قدام الراجل دا) غسلت وشي بالمايه وانا بحاول اهدي نفسي، حاسه بوجع جامد في معدتي، اتكلمت معاها بتعب(مش قادره اتخيل اني ممكن اتجوز الراجل دا واكون معاه زوجه، مش قادره وغصب عني والله) بصتلي بغضب واتكلمت بتحذير(بصي يا ساره انا مضربتكيش على ايدك، انا عرضت عليكي وانتي وافقتي، وعايزه رد سريع منك دلوقتي، هتمضي على العقد وتروحي مع الراجل وانتي مراته ولا اشوف واحده تانيه غيرك) كنت حاسه في الوقت دا بصداع شديد اوي وكأن في أصوات كتير حواليا بتتكلم وانا مش قادرة اركز ولا اخد قرار صح، خدتني من ايدي ورجعنا المكتب تاني، قعدتني قدامه واتكلمت هي معاه بابتسامه(معلش يا شيخ اصل مامتها في المستشفى وهي معاها من الصبح زي ما قولتلك وريحة التعقيم في المستشفى قلبت معدتها شويه) رد عليها وهو بيبصلي من فوق لتحت وكأنه بيعاين البضاعه اللي هيشتريها، طلعت مدام سحر العقود من درج مكتبها وطلع هو الفلوس وادهالها وقالها انهم خمسين الف جنيه زي ما اتفقوا، كتبت مدام سحر العقود وادتني العقد وقالتلي(خدي يا ساره امضي هنا) بصيت للعقد وانا حاسه اني مش شايفه، الصداع بيزيد اكتر ومدام سحر بتتكلم كتير وعماله تضغط عليا عشان امضي وبتفكرني بالعملية اللي لازم امي تعملها الصبح، خدت منها العقد ومضيت وكأني بمضي على شهادة وفاتي،، خد الراجل العقد ووقع عليه هو كمان وقالي بصوته الغليظ(مبروك يا عروسه) ضحكت معاه مدام سحر واتكلمت معايا وهي بتغمزلي(قومي يلا مع جوزك يا ساره والصبح هستناكي في المستشفى بالفلوس عشان تدفعي مصاريف العمليه لوالدتك) وقفت وانا مش مصدقه، ايه اللي انا عملته في نفسي دا، معقول انا كدا اتجوزت من الراجل دا، في اللحظه دي اتمنيت اني اموت بجد، بس كنت بهون على نفسي وبقول المهم انقذ حياة امي انا مليش غيرها في الدنيا.
خدني في عربيته وانا حطه ايدي علي دماغي من شدة الصداع، حاسه اني في كابوس، عقلي رافض يصدق اللي بيحصل معايا دلوقتي، وصلنا قدام عمارة وفتحلي باب العربية ونزلت معاه، كنت بحاول اهرب من الواقع دا وبقنع نفس اني في كابوس واكيد هيخلص،، طلعت معاه الشقه وانا مش قادره افتح عيني من كتر التعب، قرب مني عشان يضمني زقيته بعيد عني وعيطت وقولتله(معلش يا عم الحاج مينفعش يحصل بينا اللي انت عايزه دا، اعتبرني بنتك) وشه قلب ١٠٠ لون واتكلم معايا بعصبيه وقالي لو مش عايزه اكمل في الجوازه يبقى نفسخ العقد وياخد فلوسه تاني.. عيطت وقولتله اني محتاجه الفلوس دي لعملية امي وانها هتموت لو معملتش العمليه وانا مليش حد غيرها، قولت يمكن قلبه يحن عليا لما يعرف ظروفي الصعبه، لكن للاسف طلع معندوش قلب اساسا وقالي انه دفع الفلوس خلاص ولازم ياخد حقه دلوقتي وحاول يتهجم عليا،، حاولت اخلص نفسي منه وكنت بصرخ بكل صوتي عشان حد ينقذني منه.. سمعت صوت خبط قوي على باب الشقه، ضربته في بطنه برجلي وقومت وجريت افتح الباب عشان اهرب منه، فتحت الباب ولقيت الظابط اللي قابلته في القسم قدامي، مصدقتش نفسي اني شيفاه قدامي فعلا، رميت نفسي في حضنه من غير ما افكر، خبيت وشي في صدره وانا بعيط وخايفه ، الغريب انه رفع ايديه وضمني هو كمان.
وقفوا العساكر اللي معاه يتابعوا اللي بيحصل قدامهم بصدمه، الظابط بتاعهم بيحضن بنت غريبه المفروض انه كان جاي يقبض عليها في شقه مشبوهه.
وقف الراجل اللي المفروض انا متجوزاه وقرب مننا واتكلم مع الظابط بغضب وهو بيشدني من حضنه(شيل ايدك عن زوجتي) بصلي الظابط بصدمة، ايده سابت ايدي وهو واقف مصدوم، شدني الراجل وقربني منه، بصلي الظابط بصدمه وقالي (انتي متجوزه؟) حركت راسي بـ لا وحاولت اقرب منه وانا بفك قبضة ايد الراجل دا عني واتكلمت بسرعه وانا بعيط وقولتله (انا متجوزتش حد ومش عارفه ازاي انا وفقت اعمل كدا بس تعب ماما خلاني مش عارفه انا بعمل ايه،، ماما تعبت امبارح ودخلت المستشفى والدكتور قالي انها محتاجه عمليه ضروري والعمليه بـ30 الف جنيه وانا مش معايا المبلغ دا ومدام سحر صاحبة الكوافير اللي بشتغل فيه قالتي هجبلك الفلوس لما تتجوزي وخلتني مضيت على عقد بس انا مش عايزه اكمل انا عايزه امشي من هنا ومش عايزه الفلوس دي) وقف يبصلي بصدمه،، طبعا هو فهم انا مضيت على ايه بس انا للاسف مكنتش فاهمه انا عملت ايه في نفسي.