فريد : بغض النظر مصطفى عايش او ميت انا بقول كفايه عليكي عذاب كده يا مها .. آن الأوان تعرفي الحقيقة بقي 

قام لبس هدومه ونزل يدور العربية ويروح عليهم .. من ناحية يدور معاهم على مصطفى ومن ناحية يقول لـ مها الحقيقة

🖤🖤🖤🖤🖤🖤🖤🖤🖤🖤🖤🖤🖤🖤🖤🖤

مها وبدر وزهره مازالوا بيدوروا .. 

مها وشها اصفر وبدأ يظهر عليها علامات التعب اكتر من زهره وبدر كمان وتعرق وتنهج بس مبتفقدش الأمل .. زهره ماشية سنداها وبتحاول تقويها لحد ما يكملوا ويلاقوه .. بدر عمال يسأل في الناس ويبص حواليه 

وفجأة زهره بتتلفت على مها لقيتها في الأرض مغم عليها 💥💥

بدر رجع جري عليهم .. فضلوا يفوقوا فيها مش بتفوق تماماً 

بدر شالها ورجع جري بيها ع المستشفي وزهره معاه 

الدكتور والممرضات بدأوا يفوقوها لحد ما فين وفين فاقت .. بدأ الدكتور يكشف عليها كشف شامل عشان يعرف ايه سبب الإغماء

وبعد دقايق ***

الدكتور : متقلقوش ياجماعة خير

الأمور دي طبيعية جداً وبتحصل في أول كام شهر في الحمل 

مها بتبرق بصدمة !!!!!

بدر وزهره : اااااااايه ؟؟؟؟؟؟

زهره : حامل ازاي يعني وهي شايلة الرحم 

بدر بيبرق مش عارف ازاي حامل وهي شايلة الرحم ، وازاي حملت ومصطفى ملمسهاش اصلا !!!

مها : اكيد حضرتك متلغبط يا دكتور انا عامله استئصال للرحم من اكتر من اربع شهور

الدكتور بيضحك : استئصال ازاي يامدام .. الرحم بتاع حضرتك سليم 100٪ وشايل جنين سليم بردو 

ازاي عامله استئصال مش قادر أفهم!! 

مها بتتعدل وبتقوم من. عالسرير : ازاي يعني ؟؟؟؟؟؟ 

مستحيل يابشر 

زهره ومها وبدر بيبصوا لبعض وبيضربوا كف علي كف مش قادرين يفهموا اللي حصل 

فريد داخل : الدكتور بيتكلم صح ياجماعة .. الرحم متشالش ولا حاجة .. ألف مبروك يا مها هتبقي أم 

مها : !!!!!!!!

*فريد اخدهم وخرج بيهم برا *

مها : ممكن تفهمني تقصد ايه باللي قولته ده

فريد : اقصد إن اللي حصل كان تخطيطي 

مفيش حد في الدنيا يتخيل انا زهره اختي بالنسبالي ايه واللي يأذيها ممكن أعمل في ايه حتي لو كانت أختي التانية ، وبعد مااكتشفت اللي عملتيه قعدت افكر ايه أكبر حاجة ممكن اعاقبك بيها واعرفك ان الله حق

وفي ثواني معدودة فكرت في كل حاجة ممكن تتعمل هل اقتلك هل احبسك هل ارفع عليكي قضية هل ارزعك علقة اكسرلك دماغك وفي الآخر اكتشفت ان كل دول هييجو بنتيجة عكسية وفي وقت مانا بفكر جت من عند ربنا وامي الله يرحمها دبت السكينة في بطنك وبعد ما روحنا المستشفي .. 

Flash back 📸🔙 يوم حادثة مها وضربة السك"ينة 

*مها في أوضة العمليات *

*كلهم واقفين في الطرقة قصاد الاوضة*

فريد : انا هدخل اوضة العمليات أشوف الدنيا فيها ايه 

بدر : معتقدش هيرضوا يدخلوك يابني 

فريد : الدكتور اللي جوا صاحبي من أيام ما كنت في اسكندرية وليا كلام معاه 

فتح الباب ودخل وقفل وراه طرقة اوض العمليات نفسها .. لبس الكمامة والروب وعقم نفسه .. وقبل ما يوصل للاوضة اللي فيها مها لقى الدكتور خارج

الدكتور : اهلااااا .. فريد عاصم بنفسه 

عايز اسلم عليك والله بس زي مانت شايف الوضع مش مناسب خالص

فريد : ايوة منا فاهم .. طمني عليك

الدكتور : قبل مااتطمن عليك بس هو انت داخل فين كدا 😂 ليك حد جوا يعني ؟

فريد : مها اللي لسة خارج من اوضتها دي تبقي اختي ، طمني هي عامله ايه 

الدكتور : الحمدلله العملية نجحت .. هو بس الجرح كان غويط لجوا شوية بس عملنا غرز داخلية وخارجية والحمدلله عدت الخطر

والله لو كنت اخدت بالي قبل ماادخل العمليات إنك موجود كنت خليتك تتعقم وتدخل في اوضة العمليات نفسها تتابع العملية معانا .. انت ليك في رقابتي جمايل قد كدا يافريد من ايام اسكندرية وانا نفسي أرد اي حاجة فيهم .. عمري ما هنسي اللي عملته معايا عشان ابقي في المكان ده 

فريد : لا ياعم عمليات ايه اللي ادخل اقف فيها هي كوسه 😂 انا بس ليا عندك طلب ضروري جدااااا

انا عارف انه صعب شويتين بس لو عايز تساعدني بجد تعملهولي ومش كـ رد للي عملته معاك والكلام الفاضي ده احنا اخوات ، بس كـ مساعده فيها حياة او موت 

الدكتور: ايه يافريد قول انا رقابتي ليك 

بس تعالي نتكلم برا أفضل عشان المكان هنا مش مناسب للكلام خالص 

فريد : مش هينفع نقول الكلام ده برا خلينا هنا .. هما كلمتين بالظبط 

رجع فريد من الفلاش باك 🔙

 فريد : وطبعاً إقناع الدكتور مكانش سهل لأنه آه صاحبي وعايز يساعدني بس في نفس الوقت عنده أخلاق مهنة لازم يحافظ عليها .. لحد ما قدرت أقنعه بذكاء بعد ما ضمنتله اني مش هجيب سيرته في أي حاجة وانها مجرد كلمة هيقولها بس .. وبعدها انا عرفت مصطفى بس باللي عملته لأنه عايش معاكي في نفس البيت وهو اللي ممكن يكتشف حاجة زي دي ، وهو وافقني عشان كان خلاص اللي حصل حصل 

زهره بصدمه : ليه كده يافريد 

ليه تحرق قلبها بالمنظر ده وفي أغلى حاجة ممكن تملكها ك ست 

فريد : ما هي حرقت قلبك يازهره وكان لازم هي كمان قلبها يتحرق

زهره : كان كفايه اللي حصل فيها ومصطفى واللي عمله فيها وجوازه ليها بالغصب وماما الله يرحمها اللي حاولت تقتلها وضربتها بالسك"ينة كان ايه الداعي من اللقطة اللي عملتها بس

فريد : اللي مها عملته مش قليل وكان لازم كل واحد فينا يكون ليه يد في عقابها 

ماما تضربها بالسكي"نة ، بابا يتبرا منها 

انتي وبدر تنتقموا عن طريق مصطفى ، وانا كمان كان لازم افش غلي وده اللي حصل

واديني اول ما حسيت انها اتغيرت بجد جيت اقولكو واقولها الحقيقة ، ولو اللي بقوله مش كفاية انا عندي إستعداد اعتذر و...

وقبل ما يكمل كلامه مها اخدته بالحضن

كلهم بصوا لبعض باستغراب !!!!

مها وهي حضناه : اوعي تعتذر او تقول اي حاجة من دي

انا لازم اشكرك لأنك شاركت في اني افوق بجد واتغير واعرف ان فيه ربنا وفيه حق وباطل وسما وارض 

ومش زعلانه منك ولا منهم ولا من اي حد انا زعلانه بس من نفسي اني كنت بالسوء ده كله ، بس الحمدلله الفضل يرجع لربنا وليكو اني قدرت اتغير 

فريد بيبتسم وبيحضنها و بيطبطب عليها بفرحه لما حس انها اتغيرت بجد وكمان سامحتهم 

مها بتبعد وبتحط ايديها على بطنها وبتدمع دموع فرحة : مكنتش اعرف ان الطريقة اللي مصطفى عايز ينتقم بيها مني هتكون السبب إن ربنا يرزقني باجمل حاجة في الدنيا .. انا متأكدة إن الطفل ده علامه من ربنا ان مصطفى لسة عايش وهيرجعلي ونربي ابننا سوا .. يلا نكمل احنا لازم نلاقي مصطفى انا عاوزة افرحه 

بدر واقف هيتجنن ومخه هيشت

زهره بتبص لبدر باستغراب !!!!

زهره بتوتر : مها انا عايزاكي ثواني

خدت مها من ايديها ودخلوا مكان فاضي

مها بابتسامة فرحة : ايه يازهرة في حاجة ولا ايه 

زهره : اه فيه حاجة غريبة شوية 

مها: ايه الغريب ؟

زهره : انتي حملتي في الطفل ده امتى 

مها : مانتي عارفه يا زهره الوقعة اللي حصلت يوم ما مصطفى اتجوزني 

زهره : مها انتي تقريباً الفرحه مخلياكي مش مركزة ولا مجمعة

الوقعة اللي حصلت دي من حوالي ٤ شهور .. ازاي هتكوني حامل المدة دي كلها ومش واخدة بالك !!!! مستحيل

مها بتركز : ٤ شهور ؟؟

اه صح ٤ شهور *بتستغرب* 

بس عادي بتحصل يعني يمكن الحمل مجاليش بأعراض 

زهره : طب وبالنسبة للـ (****) محستيش إنها محصلتش لمدة ٤ شهور بردو

مها : لا محستش لأنها في الطبيعي بتلغبط كدا شوية فأنا محستش 

زهره بتبصلها ومش مقتنعة !!!

زهره : ماشي تعالي نرجع لـ بدر وفريد 

**رجعولهم**

مها : يلا ياجماعه ننزل نكمل اللي بنعمله 

فريد : انتي مش هينفع تنزلي تاني وانتي حالتك بالمنظر ده 

مها : لاااا يافريد انا قلبي هيقف من الخوف علي مصطفى ومش هرتاح ولا هحط جسمي علي كرسي قبل ماالاقيه واشوفه قدامي مرتاح

فريد : ماشي تعالي اسندك وننزل

بدر جاي يروح وراهم زهره مسكت ايده وقفته لحد ما هما مشيوا قدام .. لفت وقفت قدامه

زهره : بدر هو انت مش قولتلي ان مصطفى ملمسهاش !!

بدر : أيوة وانا متأكد مليون في المية ان مادام قالي ملمستهاش يبقي ده اللي حصل .. بس انا هتجنن مش فاهم ده حصل ازاي 

زهره : واللي هيجنني انا اكتر ان فيه فرق توقيت ٤ شهور بين اللي حصل والنهاردة .. ازاي الوقت ده كله عدى ومعرفناش حاجة يعني !

بدر : والله انا ما فاهم حاجة يازهره بس يا خبر بفلوس .. انا اللي فارق معايا دلوقتي اني ألاقي صاحبي 

مش هقدر افكر ولا أجمع في حاجة قبل مالاقيه قدامي 

زهره بتمسك ايده : هنلاقيه ياحبيبي .. انا عاوزاك أقوى من كدا .. متعودة عليك ثابت وعمود مفيش حاجة بتهزك

بدر : فراق الأخ والصاحب بيهز وبيقطم الضهر يازهره 

بيبص لفوق : بس قادر يرجعه ليا بالسلامة وميورنيش فيه غير الخير 

زهره : اللهم آمين .. يلا بينا ياحبيبي 

🔥🔥🔥🔥🔥🔥🔥🔥🔥🔥🔥🔥🔥🔥🔥🔥

**في بيت عاصم **

عاصم قاعد على سجادة الصلاة خلص صلاة وقرأ الورد اللي بيقرأه كل يوم لـ عبير .. رفع ايده لـ ربنا وبدأ يدعي

عاصم : يارب رد مصطفى لأهله ولصاحبه ولبنتي 🤲🏻

يارب انا عارف إنها غلطت كتييير وان انا نفسي مش قادر ابص في وشها لحد النهاردة بس اللي بيحصل ده كتير عليها اوي .. انا في الأول وفي الآخر أب وقلبي واجعني عليها بكل اللي بيحصلها ده 

يارب بحق حبيبك المصطفى ما توجع قلبها في جوزها كمان وترده ليها بأسرع ما يكون وتريح قلبها هي واختها واخوها يارب ... اللهم آمين 

🔥🔥🔥🔥🔥🔥🔥🔥🔥🔥🔥🔥🔥🔥🔥🔥

فريد جاله تليفون ضروري وسابهم ومشي عشان شغله .. كملوا هما تدوير في كل مكان لحد ما وصلوا لمكان جنب المكان اللي حصل فيه الحادثة 

*مكان واسع وفاضي والأرض مزروعة*

وكالعادة زهره مسندة مها وبيدوروا سوا على اي حاجة .. بدر سابقهم وماشي لوحده بيبص حواليه

وفجأة بيبص ع الأرض لقى "محفظة" شبه عليها وحس انه شايفها قبل كدا .. وطى جابها من الأرض وفتحها 

اول ما فتحها شاف صور ابو وام مصطفى 

اكتشف إنها "محفظة مصطفى" .. كمل فتحها بسرعة يمكن يلاقي اي حاجة

الغريب إنه لقى الفلوس زي ماهي حتى متسرقتش يعني الموضوع خارج عن الحرامية !!

البطايق والفيز بتاعة مصطفى .. ووسط كل الحاجات دي لقى ورقة بيضا متطبقة ومحطوطة في خانة لوحدها 

جاله فضول يفتح الورقة يشوف فيها ايه يمكن يقدر يوصله .. فتح الورقة 

" الورقة دي على ما توصل في ايدك هكون انا مش في مصر يا بدر ..

انا غلطت غلطة كبيره اوي يابدر ومن ساعتها مش قادر أسامح نفسي عليها ولا عارف أعيش واحط عيني في عينك 

انا اتجوزت مها بناءً على رغبتي في إني انتقملك منها واعاقبها ع اللي عملته، واحميكو من شرها لحد ما تتصرفوا وتلاقوا حل .. بس القدر كان ليه رأي تاني

واللي حصل عكس كل اللي خططناله وتوقعناه .. 

انا حبيت مها يا بدر 

وحبي ليها بدأ من تعاطفي معاها لما فجأة كل حاجة اتطربقت فوق دماغها ولقت نفسها بطولها في الدنيا وخسرت كل حاجة ، وبدل مااكون بعذبها لقيت نفسي بطبطب عليها وبداوي جروحها لحد ما غصب عني اتشديتلها وحبيتها ، وده بسبب إنها كانت قدامي ٢٤ ساعة في فرحها وزعلها عياطها وضحكها وفوق كل ده إحساسي إنها في الاول والاخر مراتي وانا بشر يا بدر مش ملاك

بس كل ده انا مقولتلكش الغلطة الحقيقية كانت فين !

الغلطة إننا في يوم من الأيام اللي كنت بحاول اهون فيه عليها وافرحها وفي لحظة ضعف .. حصل بيننا علاقة وبقينا اتنين متجوزين رسمي 💥💥

ولما صحينا تاني يوم اكتشفت إنها مش فاكره ااااي حاجة عن اللي حصل وده لما حاولت افهم بطريقة غير مباشرة .. الاول استغربت ازاي وفكرتها لعبة جديدة ، وبعدها اكتشفت إنها في الوقت بتاع بالليل بتاخد مهدأ قوي جداً عشان تقدر تنسى وجعها علي امها وتعرف تنام ، وغالباً المهدأ ده بيخليها مش واعية للي بيحصل بنسبة ١٠٠٪ او فاكراه حلم لحد ما تصحي تاني يوم .. وبقيت التفاصيل اللي حصلت والآثار اللي هي صحيت لقيتها انا عملت حوار لكل حاجة عشان مخليهاش تحس ان حصل حاجة

 ومن يومها وانا مبنامش من إحساسي بالذنب ناحيتك وناحية زهره وانك لو عرفت ده مش هتسامحني عشان خلفت وعدي ليك لما قولتلك مش هلمسها وهتفكر إني استغليت الفرصة واتجوزتها بجد او هتفكر ان عيني كانت عليها من الاول بس والله ده ماحصل وربنا يشهد عليا لو كنت بكدب في كلمة

حقك عليا ياصحابي .. انا قولت اكتب الورقة من دلوقتي وهكمل قضية مدحت ويوم ما هخلصها هسيبلك الورقة دي وهطلق مها وهسافر بعيييد على قد مااقدر .. وربنا يسامحني لو كنت علقتها بيا من غير مااقصد"

بدر خلص الرسالة وطبق الورقة وحطها مكانها 

بدر : مسامحك ياصاحبي .. بس مش هسامحك لو كنت سيبتني ومشيت يا مصطفى 

سواء سافرت او حتي جرالك حاجة انا مش هساااامحك 

نزل في الأرض بحزن وكسره فظيعة ودموعه نازلة 

بدر بصوت عالي ممزوج بعياط : انت فين يا مصططططططططفى .. مش اتفقنا هنفضل سوا على طول خلفت بـ وعدك ليييييييه 

مها جايه على صوته وبتبصله ب هدوء : في ايه يا بدر 

بدر باصص قدامه : جوزك شكله راح بجد يا مها 

مها بصاله من غير اي ريأكشن .. وفجأة نزلت عينيها

بتبص جنبها لقت في الأرض بقايا ازازة ازاز في الأرض .. مسكت ازازة فيهم وحطتها علي شرايينها 

بدر باصصلها ومعندوش طاقة يتكلم ولا حتي يمنعها

زهره جاية بتجري : مها انتي هتعملي اااايه 

مها : حلو لحد كده .. يا نعيش عيشة فل احنا التلاتة 

يا نموت احنا التلاتة 

حد جاي من وراهم : هيهون عليكي تسيبوني انتو الاتنين في الدنيا لوحدي وتمشوا يا مها 

مها وزهره وبدر بيتلفتوا عليه .. 

واقف قدامهم هدومه كلها دم ومتكحرت لدرجة إن مش قادر يقف على رجله 

بدر بيغمض عينه وبينزل يسجد في الأرض 

مها بعدم استيعاب : اللي انا شايفاه ده صح ؟؟؟؟ 

مصطفى : أيوة اللي شايفاه صح .. انا رجعتلك يا مها 

جريت عليه خدته بالحضن وكأن دموعها انفجررت بصوت عالي دموع الفرح انها لقته والزعل بسبب الإحساس اللي كانت حاساه والتوتر والخوف 

مها : انا كنت حاسه اني هلاقيك اقسم بالله كنت حاسه إنك عايش وانك مش هتسيبني 

*مصطفى بيضمها باستغراب ومش مصدق إنها بتعمل معاه كدا *

اتعدلت وقعدت تبوس في ايده ودماغه ووشه بلهفة وهي بتشكر ربنا إن لقيته قدامها وبتعيط 

مصطفى بيمسك وشها : اهدي يا مها .. انا عمري ما كنت هسيبك وامشي بالسهولة دي .. جوزك راجل بردو 

مها بتعيط : كنت متأكدة إنك عايش وبتتنفس وكنت هدور عليك لآخر يوم في عمري .. بس انت عرفت ازاي وامتي اني حامل ؟

مش مهم مش مهم أي أسئلة دلوقتي المهم إنك معايا ورجعتلي بس

مصطفى باصصلها وبيبتسم بتعب مش قادر يتكلم ومطلع صوته بالعافيه

سابها وراح وقف قدام بدر وهو مازال ساجد في الأرض .. وطي طبطب عليه .. بدر اتعدل ومسح وشه من التراب 

مسك دماغه حطها على دماغه وهو دموعه نازلة : عمري ما صدقت للحظة إن حصلك حاجة او سيبتني في الدنيا ومشيت .. خدنا عهد على نفسنا مع بعض في الحلوة والمرة 

مصطفى : وانا عمري مااخون عهدي معاك ياصاحبي 

بدر بياخده في حضنه وبيغمض عينه وبيرفع عينه للسما بيحمد ربنا 

زهره داخله على مصطفى وبتبتسم : الف حمدالله على سلامتك يا مصطفى .. احنا كنا هنتجنن عشان نلاقيك الحمدلله إنك بخير

بس الأهم من ده كله .. فهمنا اللي حصلك ده حصل ازاي انا مخي مش قادر يستوعب .. حرامية طلعوا عليك سرقوا العربية ولا ايه اللي حصل

مصطفى : لا مش حرامية .. الحكاية مش زي مانتو فاكرين خالص

 هحكيلكو كل حاجة بس الأول ودوني مستشفى يكتموا الجروح اللي عماله تنزف دي عشان متصفاش وانا واقف جنبكو 😂

بدر بيمسح دموعه : أيوة صح احنا كان لازم نعمل كده بدل حصة الدراما والغم دي كلها 😂 يلا بينا

🔥🔥🔥🔥🔥🔥🔥🔥🔥🔥🔥🔥🔥🔥🔥🔥

فريد واقف في المحل بتاعه بيصلح جهاز .. فجأة بنت دخلت في المحل 

( في غاية الجمال وملامح بريئة وملائكية)

فريد بيرفع عينه وبيبصلها بـ صدمة 

فريد : حبيبة !!!!!!

جريت اخدته بالحضن وهي بتغمض عينيها : وحشتني اوووي يافريد .. اوي

وبعد لحظات على نفس الوضع ... 

هند داخلة المحل بصفاء نية بتبتسم وبترفع عينيها : فرفورت..... 💥💥💥💥💥

...... يتبع